Kuatisa Vakuene Oku Pokola Kueci Embimbiliya Li Longisa

“Ombuto ya lokila posi yiwa ya lomboloka ava okuti, eci va yeva ondaka va yi seleka vovitima vie lipua haivio via sunguluka, kuenje va pandikisa loku ima apako.”​—⁠LUKA 8:⁠15.

1, 2. (a) Elivulu Embimbiliya li Longisa Nye, lia sandekiwila oku linga nye? (b) Yehova wa siata oku sumũlũisa ndati upange woku kunda u kasi oku lingiwa lomanu vaye koloneke vilo?

MANJI umue ukundi wotembo yosi poku lombolola catiamẽla kelivulu, Embimbiliya li Longisa Nyea, wa popia hati: ‘Elivulu eli li lombolola ovina viwa. Omanu ndi lilongisa lavo Embimbiliya, va lisole calua. Ame ndi lisolevo. Elivulu eli lia leluka calua oku fetika lalio elilongiso Liembimbiliya kolonjo viomanu.’ Manji umue ukulu wendamba poku lombolola catiamẽla kelivulu liaco, wa popiavo hati: ‘Nda siata oku kuata esumũlũho lioku longisa omanu valua oku kũlĩha Yehova. Tunde eci nda fetika oku kunda toke cilo, papita ale ci soka 50 kanyamo. Kuenda ndi kuete handi ombili kupange waco. Pole, elivulu eli li komõhisa calua. Upopi u sangiwa velivulu liaco, wa leluka. Alitalatu aco a vetiya ovitima viomanu.’ Anga hẽ, eci oco wa siatavo oku yeva vutima wove catiamẽla kelivulu liaco? Elivulu eli lia sandekiwila oku ku kuatisa oco o tẽlise ocikundi Yesu a ecele kolondonge viaye eci a popia hati: “Kuendi, ka tavisi olofeka viosi oco va linge olondonge. . . . Va longisi oku linga ovina viosi ndo kundiki.”​—⁠Mateo 28:​19, 20.

² Yehova wa sanjuka calua poku mola eci ci pitãhala olohuluwa epandu Kolombangi viaye vi kasi oku pokola kocikundi ca Yesu. (Olosapo 27:​11) Eye o kasi oku sumũlũisa upange waco. Vokuenda kunyamo wo 2005, olondaka viwa Viusoma via kundiwila kueci ci soka 235 kolofeka. Kuenda kua endisiwa eci ci pitãhala 6.061.500 kalilongiso Embimbiliya. Kuenje omanu valua va yeva ondaka ya Suku, kuenda va yi tava ‘ndomo yi kasi okuti, handaka yomanuko, puãi ondaka ya Suku.’ (1 Va  Tesalonike 2:​13) Vokuenda kuanyamo avali a sulako ndeti, ci pitãhala ovita vitãlo kolohulukãi viomanu va litumbika ku Yehova omo lioku pokola kolonumbi viaye.

3. Apulilo api tu konomuisa vocipama cilo atiamẽla kelivulu Embimbiliya li Longisa Nye?

³ Ove hẽ, wa kuatele ale esanju lioku lilongisa Embimbiliya lomunu umue? Voluali muli omanu valua ‘vakuavitima via lipua haivio via sunguluka’ okuti va yeva ondaka ya Suku kuenje “va pandikisa loku ima apako.” (Luka 8:​11-​15) Tu konomuisi ndomo o talavaya lelivulu Embimbiliya li Longisa Nye kupange woku longisa omanu ondaka ya Suku. Vocipama cilo tu konomuisa atosi atatu: Liatete: O fetika ndati elilongiso Liembimbiliya lomunu? Liavali: Olonjila vipi o kuama poku longisa omunu umue? Liatatu: Ndamupi o kuatisa omunu oco kaka kale lika ondonge, pole, o lingavo ulongisi Wondaka ya Suku?

Ndomo o Fetika Elilongiso Liembimbiliya Lomunu

4. Momo lie omanu vamue va kuetele ohele yoku lilongisa Embimbiliya? Ndamupi o kuatisa omanu vaco?

⁴ Nda umue wa ku pinga oco o tẽhe olui lumue lunene, ku tava kondaka yaco. Pole, nda vokati kaco va kapamo ovawe oku liatela, o tava oku yoka olui luaco. Cimuamue haico catiamẽla komanu vana va kuete ohele yoku lilongisa Embimbiliya omo liotembo yavo yitito. Ovo pamue va sima hati, oco omunu a lilongise Embimbiliya, o sukila oku kuata otembo yalua, kuenda oku likolisilako calua. Ndamupi o kuatisa omanu vaco? O va kuatisa lika poku kuama alomboluilo a sangiwa velivulu Embimbiliya li Longisa Nye? Momo alomboluilo aco a tuala omunu koku lilongisa Ondaka ya Suku. Nda olonjanja viosi poku enda konjo yaye wa lipongiya ciwa, o kala ndeyau li u tuala koku kuata ukamba la Yehova.

5. Momo lie o sukilila oku tanga elivulu Embimbiliya li Longisa Nye?

⁵ Osimbu handi kua kuatisile omunu lelivulu Embimbiliya li Longisa Nye, o sukila oku kũlĩha ciwa elivulu liaco. Ove hẽ, wa tanga ale elivulu liaco okupisa kefetiko toke kesulilo? Manji umue lukãi waye eci va kala koloneke viepuyuko kupange, vambatele elivulu liaco koku ñuala ñuala kohulo yokanlunga. Osimbu va kala oku puyuka, va fetika oku litanga. Noke ukãi umue ukuakulandisa ovikulia komanu veya kokalunga, wa mola osapi yelivulu liaco. Kuenje, wa sapuila vamanji hati, osimbu handi sia lisangele lene, nda lingile ohutilio yatiamẽla kepulilo eli oco Suku a ndi tambulule. Noke vamanji vo wĩha elivulu liaco. Ove hẽ wa siata oku sanda otembo yoku tanga elivulu liaco osimbu o talamẽla ocendelo, poku sapela lavakuene kupange ale kosikola? (Va Efeso 5:​15, 16) Nda wa ci linga, o kũlĩha ciwa elivulu liaco. Kuenje o kuata epuluvi lioku vangula la vakuene catiamẽla kulandu u sangiwamo.

6, 7. Poku fetika elilongiso Liembimbiliya londonge, o kuama ndati elivulu Embimbiliya li Longisa Nye?

⁶ Poku eca elivulu liaco kupange woku kunda, lombolola ciwa ovindekaise vi sangiwamo, lovinimbu viaco Viembimbiliya. Kuamavo apulilo a kasi kemẽla 4, 5, kuenda 6. Poku fetika ombangulo lomunu umue, pula ndoco: ‘Omo liovitangi tua siata oku liyaka lavio koloneke vilo, pi tu sanga olonumbi viwa?’ Noke yoku yevelela etambululo liaye, tanga elivulu lia 2 Timoteo 3:​16, 17 loku u lomboluila okuti, Embimbiliya lieca olonumbi vi kuatisa oku tetulula ovitangi viomanu. Kuenje, tuvula kemẽla 4 kuenda 5, loku u pulisa ndoco: ‘Pokati kalitalatu o lete ndeti palo, ocitangi cipi ca siata oku ku sakalaisa calua?’ Nda eye wa tukula ocitangi cimue, u wĩha elivulu liaco loku u tangela ocinimbu cimue Cembimbiliya catiamẽla kocitangi caco. Noke tanga kemẽla 6, kuenda pula omunu waco ndoco: ‘Pokati kapulilo epandu a sangiwa ndeti palo, epulilo lipi o yongola oku sanga etambululo liaco?’ Nda eye wa tukula epulilo limue, u lekisa kocipama ku sangiwa etambululo liaco. Noke, u sila elivulu kuenda linga esokiyo lioku tiuka onjanja yikuavo oco u sapele eci catiamẽla kondaka yaco.

⁷ Poku sapela lomunu ka ci sukila oku kala otembo yalua. Citava oku pesela lika akukutu atãlo. Vokuenda kuakukutu aco, kũlĩha ovitangi viaye, loku tanga ocinimbu Cembimbiliya kuenda oku u lekisa ndomo ci kapiwako. Noke, linga esokiyo lioku tiuka onjanja yikuavo. Ombangulo yove yonimbu, yika vetiya omunu waco kuenda yu lembeleka kovitangi a siata oku liyaka lavio vokuenda kuanyamo alua. Noke ndaño okuti omunu waco ka kuete otembo, oka sanda akukutu amue oku sapela love. Kuenje, oko kuatisa oku fetika oku endela ‘vonjila yi tuala komuenyo.’ (Mateo 7:​14) Vokuenda kuotembo, nda omunu waco wamamako lonjongole yaye, citava oku vokiya akukutu amue kotembo yelilongiso. Ci lingiwa poku tumãla laye kuenda oku nõla elivala lioku lilongisa.

Olonjila Vimue vi Kuatisa Koku Longisa

8, 9. (a) Ndamupi o kuatisa omunu o lilongisa laye Embimbiliya oco a pandikise kovitangi a liyaka lavio? (b) Pi ku sangiwa ovimalẽho vi pamisa ekolelo?

⁸ Eci omunu a fetika oku pokola kovina Embimbiliya li longisa, o liyaka lovitangi vi tateka oku amamako kespiritu. Upostolo Paulu wa popia hati: “Vosi va panga oku kala lomuenyo wesunga lia Suku vu Kristu Yesu va kangisiwa.” (2 Timoteo 3:​12) Ovitangi viaco, Paulu wa vi sokisa ndondalu okuti yi nyola onjo ya tungiwa lovikuata via leñela. Pole, ka yi tẽla oku nyola ovikuata via pama ndeci: Ulu, opalata kuenda ovawe akuavo atĩla. (1 Va  Korindo 3:​10-13; 1 Petulu 1:​6, 7) Oco omunu o lilongisa laye Embimbiliya a pandikise kovitangi, o sukila oku u kuatisa lovimaleho ka vipi londalu.

⁹ Ukualosamo ‘olonumbi via Yehova’ wa vi sokisa “ndopalata ya yenguluiwa vofolono yi kasi posi, haiyo ya yenguluiwa olonjanja epanduvali.” (Osamo 12:⁠6) Vembimbiliya mu sangiwa ovikuata viosi tu sukila koku pamisa lavio ekolelo. (Osamo 19:​7-11; Olosapo 2:​1-6) Kuenje, elivulu Embimbiliya li Longisa Nye, li ku kuatisa ndomo o loñoloha koku longisa Ondaka ya Suku komanu.

10. Ndamupi o tiamisila utima wondonge kolonumbi Viembimbiliya?

¹⁰ Vokuenda kuelilongiso, tiamisila utima wondonge kovinimbu viosi Viembimbiliya vi sangiwa vocipama. Linga apulilo a kuatisa ondonge oku kuata elomboloko liovinimbu Viembimbiliya kuenda oku vi kapako komuenyo waye. Ku ko sapuile ovina viosi. Kuama ongangu ya Yesu. Eci ulume umue wa kũlĩhĩle Ovihandeleko a lingile epulilo kokuaye, eye wo kumbulula hati: “Vovihandeleko hẽ, mua sonehiwa nye? O tangamo ndati?” Ulume wa kumbulula loku tukula ovisonehua. Pole, Yesu wo kuatisa oku kũlĩha ndomo a kapako ovinimbu viaco. Noke poku linga ocindekaise cimue, wo kuatisavo oku limbuka ndomo a kapako elongiso liaco. (Luka 10:​25-​37) Velivulu Embimbiliya li Longisa Nye, mu sangisa ovindekaise vialua vi kuatisa ondonge oku kapako olonumbi Viembimbiliya komuenyo waye.

11. Anga hẽ o sukila oku longisa ovina vialua kondonge vonjanja yimosi?

¹¹ Ondaka ya Suku velivulu Embimbiliya li Longisa Nye, ya lomboluiwa vupopi umue wa leluka ndeci Yesu a linga poku lombolola ovina via longa. (Mateo 7:​28, 29) Omo liaco, kuama ongangu ya Yesu. Longisa lupopi umue wa leluka haiwo u teta onimbu. Kuka yoloke ño locipama. Pole, kũlĩhĩsa ovitangi viaye loku loñoloha kuaye kuenda oku sokiya etendelo liovinimbu o lilongisa laye. Yesu omo lioku kũlĩha ciwa olondonge viaye, ka va ĩhile alomboluilo a pitahãla ovina va sukila.​—⁠Yoano 16:⁠12.

12. Otukasia tualomboluilo avokiyiwako, tu kuamiwa ndati?

¹² Elivulu Embimbiliya li Longisa Nye, li kuete eci ci soka 14 kalomboluilo avokiyiwako. Ove ulongisi, kũlĩhĩsa ciwa ekalo liondonge oco o limbuke atosi o sukila oku u lomboluila. Noke yelilongiso citava okuti, pamue ondonge ka yi kuata elomboloko liovina wa lilongisi. Ale pamue yi kuete epulilo liatiamẽla kondaka yimue. Momo ovina a kasi oku lilongisa via litepa levi a longisiwa ketavo liaye. Omo liaco, eca onumbi yiwa kokuaye oco a kũlĩhĩse ocipama cimue ci sangiwa votukasia tuaco. Ecelela okuti, eye muẽle o sanga etambululo. Handi vali, ekalo liondonge olio li ku kuatisa oku sokiya etendelo liovinimbu o sukila oku lilongisa laye vonjanja yimosi. Votukasia tualomboluilo avokiyiwako, mu sangiwa olosapi vimue vi kuete esilivilo ndeci: ‘Ocilelembia, Espiritu, kuenda Obavulono Yinene, vi Lomboloka Nye?’ Olonjanja vimue o sukila oku kũlĩhĩsa ovina evi lomunu o lilongisa laye Embimbiliya. Votukasia tuaco ka muli apulilo. Omo liaco, lilongisa ciwa alomboluilo aco okuti o kuata uloño woku sokiya apulilo.

13. Ohutililo yi kuete esilivilo lie koku pamisa ekolelo lietu?

¹³ Osamo 127:1 yi popia hati: “Nda Yehova ka tungisa onjo olomesele vi likavisa ño.” Omo liaco, poku lipongiya oku songola elilongiso Liembimbiliya, pinga ekuatiso ku Yehova. Eci o linga ohutililo yoku fetika elilongiso leyi yoku malusula, lekisa ukamba o kuete la Yehova. Vetiya ondonge oku pinga olondunge ku Yehova okuti, yi kuata elomboloko Liondaka yaye kuenda utõi woku yi kapako. (Tiago 1:⁠5) Nda wa cilinga, ondonge yove yika kuata utõi woku pandikisa kovitangi kuenda oku pamisa ekolelo liaye.

Kuatisa Olondonge Oku Kala Alongisi

14. Nye ondonge yi sukila oku linga oco yamameko kespiritu?

¹⁴ Nda tu yongola okuti omanu tu lilongisa lavo Embimbiliya va pokola ‘kovina viosi’ Yesu a handeleka kolondonge viaye, ovo va sukilavo oku linga alongisi Vondaka ya Suku. (Mateo 28:​19, 20; Ovilinga 1:​6-8) Oco hẽ, nye o sukila oku linga oco o kuatise ondonge oku amamako kespiritu toke a lingavo ulongisi?

15. Momo lie o sukilila oku vetiya ondonge yove oco yendaende kolohongele?

¹⁵ Okupisa kelilongiso liatete, vetiya ondonge oku endaenda love kolohongele. U lomboluila okuti, kolohongele oko tu tambuila epindiso lioku kala alongisi Vondaka ya Suku. Olonjanja viosi eci o lilongisa laye, sokiya otembo yoku u lomboluila epindiso wa siata oku tambula kolohongele vekongelo kuenda kolohongele vimbo. Lombolola lesanju esilivilo liolohongele viaco. (Va Heveru 10:​24, 25) Osimbu ondonge yamamako oku endaenda kolohongele, yi lingavo ulongisi Wondaka ya Suku.

16, 17. Ovimãho vipi ondonge yi sukila oku kuata?

¹⁶ Kuatisa omunu o lilongisa laye Embimbiliya oco a kuete ovimãho viespiritu kuenda oku vi tẽlisa. U sapuila oco a kuate ocituwa coku sapela lakamba vaye kuenda epata catiamẽla kovina a kasi oku lilongisa. U sapuilavo oco a kuate ocimãho coku tanga Embimbiliya liosi. Nda wo vetiya oku kuata ocimãho caco loku ci tẽlisa, u vetiyavo oku amamako. Momo noke yoku papatisiwa, ocituwa caco ci ko kuatisa calua. Vetiyavo ondonge oku kuata ocimãho coku ivaluka ocinimbu cimue Cembimbiliya ci tambulula epulilo limue liavelapo vocipama locipama celivulu Embimbiliya li Longisa Nye? Nda wa cilinga, ondonge yove yika kala ‘ondingupange ka yi kuete eci ci yi kutisa osõi, haiyo yi kunda lesunga ondaka yocili.’​—⁠2 Timoteo 2:⁠15.

¹⁷ Kuka vetiye ondonge yove oku pitulula lika ovinimbu Viembimbiliya ale oku lombolola ño ovisimĩlo viaco. Pole, u vetiya okuti, poku eca etambululo komunu umue wo pulisa elavoko liaye, a lombolole ovinimbu Viembimbiliya vieca uvangi waco. Linga laye ovindekaise viupange woku kunda oco u kuatise. Poku linga ovindekaise viaco, ove o kala nda umue ukuepata liaye, ale ndekamba liaye liupange. Noke, u pula oco a lombolole ovina viatiamẽla ketavo liaye. U vetiya oku eca etambululo “lumbombe kuenda lesumbilo.”​—⁠1 Petulu 3:⁠15.

18. Eci ondonge Yembimbiliya yi linga ukundi, ekuatiso lipi a sukila oku tambula?

¹⁸ Vokuenda kuotembo ondonge yi fetika oku loñoloha oco yi litumbike kupange woku kunda. U lomboluila okuti, oku linga upange waco, esumũlũho limue linene. (2 Va  Korindo 4:​1, 7) Nda akulu vekongelo va tumãla laye kuenje va tava okuti o linga ukundi, u kuatisa oku lipongiya ciwa. Noke kuende laye kupange woku kunda. Amamako oku talavaya laye volonepa viosi viupange woku kunda. U longisa ndomo a tẽla oku lipongiya ciwa kuenda oku linga apasu komanu vana a kundila. Ongangu yove yiwa yika kuatisa calua ondonge.​—⁠Luka 6:⁠40.

‘Lipopela Ove Muẽle Kuenda Ava va ku Yeva’

19, 20. Ocimãho cipi tu sukila oku kuata, kuenda momo lie?

¹⁹ Ocili okuti, ka ca lelukile oku kuatisa omunu oco a ‘kuate ukũlĩhĩso wocili’ watiamẽla Kondaka ya Suku. (1 Timoteo 2:⁠4) Pole, oku kuatisa omunu oco a pokole kovina Embimbiliya li longisa, oco ci nena esanju lia velapo komuenyo. (1 Va  Tesalonike 2:​19, 20) Handi vali, tu kuete esumũlũho lioku kala ‘olondingupange via Suku’ kupange woku longisa omanu. Upange waco, u kasi oku lingiwa voluali luosi.​—⁠1 Va  Korindo 3:⁠9.

²⁰ Yehova lekuatiso lia Yesu Kristu kuenda ovangelo vaye, ndopo oka nena eyambulo komanu vana “ka va kũlĩhĩle Suku, lava ka va tava kondaka yiwa ya Ñala yetu Yesu Kristu.” (2 Va  Tesalonike 1:​6-8) Omuenyo womanu u kasi kohele. Omo liaco, kuata ocimãho coku songola elilongiso Liembimbiliya lomunu umue velivulu Embimbiliya li Longisa Nye? Osimbu wamamako lupange waco, o kuata epuluvi lioku ‘lipopela ove muẽle kuenda oku popela ava va ku yeva.’ (1 Timoteo 4:​16) Yilo oyo otembo yoku kuatisa omanu oku pokola kueci Embimbiliya li longisa.

[Atosi pombuelo yamẽla]

Nye wa Lilongisa?

• Momo lie kua sandekiwila elivulu Embimbiliya li Longisa Nye?

• Ndamupi o fetika elilongiso Liembimbiliya velivulu liaco?

• Olonjila vipi via sunguluka koku longisa?

• Ndamupi o kuatisa ondonge yove oku linga ulongisi Wondaka ya Suku?

[Elitalatu kemẽla 11]

Ove hẽ, o kasi oku talavaya ciwa lelivulu eli?

[Elitalatu kemẽla 11]

Embimbiliya li Longisa Nye?