Kuama Onumbi Yetu yo Internet Poku Longisa Omãla Vove
1. Vonumbi yetu yo Internet onepa losapi hati: “Omãla,” yi kuete ocimaho cipi?
1 Onumbi yetu yo Internet jw.org, yi kuete ocimaho coku kuatisa omanu vakuotunga wosi. Eci o sanga osapi hati: “Omãla,” (sandiliya onepa yi tukuiwa hati: Alongiso Embimbiliya > Omãla.) Onepa yaco, yi kuatisa omãla lolonjali oku pamisa ukamba wavo la Yehova. (Esin. 6:6, 7) O kuama ndati onepa yaco oco o longise omãla vove?
2. O nõla ndati ulandu wa sunguluka oco o longise omãla vove?
2 Linga Apongoloko a Sukiliwa: Omõla lomõla o kuete ekalo lia litepa. (1 Va Kor. 13:11) O nõla ndati ulandu wa sunguluka oco o longise omãla vove? Lipula ndoco: ‘Ulandu upi u pondola oku vetiya onjongole yomãla vange? Va ka kuata hẽ elomboloko liaco? Akukutu añami ndi kala lavo poku va longisa?’ Omãla va kuete anyamo atatu ale vana ka va tẽlisile handi anyamo aco, citava okuti o va longisa ovolandu a sangiwa vonepa losapi hati: “Ovipama Viange Viembimbiliya.” Apata akuavo a sanjukila oku konomuisa ovolandu Embimbiliya vonepa losapi hati: “Longisa Omãla Vove.” Kũlĩhĩsavo olonepa vikuãimo.
3. Olonjali vi pondola ndati oku kuama lutate ovolandu kuenda ovina vikuavo vi sangiwa vonepa losapi hati: “Asokiyo Efendelo Liepata”?
3 Asokiyo Efendelo Liepata: Asokiyo aco a kuatisa a songui vepata oku longisa omãla vavo. Tioka polumbutão lu tukuiwa hati: Tapa. Noke, tanga onepa yi popia hati: “Onumbi Kolonjali” okuti, muli alomboluilo a pondola oku ku kuatisa oku sanga olonepa o yongola oku kuama. Poku longisa omãla vatito, nõla ovipama vi kuete alitalatu. Kuatisa omãla vove oku soneha ovina via kamba vocipama u kasi oku lilongisa. Ocipama locipama celilongiso, ci lombolola ulandu umuamue Wembimbiliya okuti, omãla vakuotunga wosi va pondola oku panga onepa kesokiyo liefendelo liepata.
4. Nye tu pondola oku sanga vonepa losapi hati: “Kala Ekamba lia Yehova”?
4 Kala Ekamba Lia Yehova: Olovideo, ovisungo, kuenda ovina vikuavo vi sangiwa vonumbi yetu yo Internet vi kuatisa olonjali oku longisa Ondaka ya Suku komãla vavo vatito. (Esin. 31:12) Ndaño okuti olovideo viaco ka viambata otembo yalua poku vi tala, pole, vi longisa ovina vi kuete esilivilo. Ovina vimue ndeci, oku sandiliya olomapalo vi kuamiwa, vi lekisa esilivilo liovipama viaco. Omo okuti omãla va sole oku imba ovisungo, vi pondola oku va kuatisa oku ivaluka ovina va lilongisa. Ovisungo Viusoma kuenda vina via sokiyiwila omãla, via siata oku sandekiwa otembo yosi.
5. Momo lie olonjali vi sukilila oku pinga ku Yehova oco a va kuatise oku longisa ocili komãla vavo?
5 Ene alonjali, Yehova o yongola okuti, u tẽlisa ciwa ocikele cene coku longisa omãla. Omo liaco, pingi kokuaye oco o kuatisi oku longisa ocili komãla vene. (Olong. 13:8) Lekuatiso lia Yehova, u pondola oku pindisa omãla vene oco va ‘popeliwe vonduko ya Kristu Yesu.’—2 Tim. 3:15; Olosap. 4:1-4.