Sanda Apuluvi Oku Sandeka Esapulo Liusoma
1. Nye tu lilongisa kongangu ya Daviti?
1 Soma Daviti wa kuatele ocisimĩlo coku tunga onjo ya Yehova. Eci a limbuka okuti ka pondola oku tunga onjo yaco wa pongolola ovimãho viaye kuenda wa sokiya ovina via kuatisa Salomone oku tunga onembele. (1 Olos. 8:17-19; 1 Asa. 29:3-9) Daviti wa tiamisilile utima kovina a tẽlele oku linga, puãi ka lingile ovina ka ponduile oku linga. Tu kuama ndati ongangu ya Daviti eci tu sanda epuluvi lioku sandeka esapulo Liusoma?
2. Nye tu sukila oku konomuisa?
2 Linga Eci o Tẽla: Vamanji valua va siata oku leluisa omuenyo wavo oco va litumbike kupange wakundi va sokamo ale akundi votembo yosi. (Mat. 6:22) O pondola oku ci lingavo? Osimbu o konomuisa ekalo liove, o limbuka okuti kua ku ‘yulukila epito linene lioku linga upange walua.’ Nda ca pita love, ku ka pumbe epuluvi liaco!—1 Va Kor. 16:8, 9.
3. Apuluvi api tu kuete nda ekalo lietu ka litu ecelela oku kala akundi votembo yosi?
3 Nye o linga nda ekalo liove li ku tateka oku kala ukundi wotembo yosi? Ku ka liwekepo oku linga ovina o tẽla okuti vi kasi vepondolo liove. Nda upange wove woku sanda eteku li ku ecelela oku sapela lomanu ka va lilongisa Embimbiliya, momo lie ku sandiliya epuluvi lioku va kundila? Ale nda o kuete ovitangi vioku vela, o pondola hẽ oku sanda epuluvi lioku kundila vana va ku tata? Ivaluka okuti kuli esokiyo limue lia vana va vela okuti ka va tẽla oku talavaya calua omo lioku kuka, va pondola oku talavaya ci soka 15 kakukutu vosãi loku kapa akukutu aco vulandu wavo wupange woku kunda. Poku soneha ulandu wove wupange woku kunda wosãi, kongelamo otembo wa pesila koku eca uvangi ka wa sokiyiwile, alivulu, olotratadu, kuenda otuikanda tuo ku laleka omanu oku enda kocipito Conjivaluko. O komõha calua poku limbuka ndomo otembo yove ya livokiya lovina evi vi moleha ndu okuti vitito!
4. Nye wa nõlapo oku linga?
4 Ndaño tu kuete ekalo lia litepa, pole, tu sandi apuluvi oku sandeka olondaka viwa. Tu kuata esanju lioku kũlĩha okuti tu kasi oku linga eci tu tẽla oco tu kuatise Usoma.—Mar. 14:8; Luka 21:2-4.