Oku Loñoloha Koku Songola Elilongiso Liembimbiliya
1. Ocikele cipi akundi va kuete poku songola alilongiso Embimbiliya?
1 Lomue o pondola oku vumba Yehova Suku te Iika nda eye u “koka.” (Yoa. 6:44) Pole, akundi va songola alilongiso Embimbiliya va sukila oku linga onepa yavo poku kuatisa omanu oku kuata ukamba la Isiavo wokilu. (Tia. 4:8) Oku ci linga ci sukila oku lipongiya ciwa. Oku tanga lika ocinimbu locinimbu loku linga epulilo li sangiwa velivulu ka ci kuatisa omunu tu longisa Embimbiliya oku kuata elomboloko liesapulo liaco kuenda oku amamako oku kula kespiritu.
2. Onima yipi yi tunda koku songola elilongiso Liembimbiliya luloño?
2 Oco akundi va loñolohe koku songola alilongiso Embimbiliya, va sukila oku kuatisa omanu va longisa Embimbiliya kolonepa ndeci: (1) oku kuata elomboloko lieci Embimbiliya lilongisa, (2) oku tava kueci Embimbiliya lilongisa kuenda (3) oku kapako eci Embimbiliya lilongisa. (Yoa. 3:16; 17:3; Tia. 2:26) Ocili okuti ci ambata olosãi vialua oco omanu tu longisa Embimbiliya va kapeko olonumbi viaco. Pole, enanga lenanga va eca, li lekisa alikolisilo avo oku kuata ukamba la Yehova kuenda oku litumbika kokuaye.
3. Momo lie akundi va loñoloha va lingila apulilo a ecelela omunu va longisa Embimbiliya oku lombolola ovisimĩlo viaye?
3 Cipi Ocisimĩlo Comunu tu Longisa Embimbiliya?: Oco tu limbuke nda omunu tu longisa Embimbiliya o kasi oku kuata elomboloko kuenda o tava kueci a kasi oku lilongisa, tu yuvuli oku vangula calua, pole, tu u vetiya oku situlula ocisimĩlo caye. (Tia. 1:19) Anga hẽ eye o kasi oku kuata elomboloko lieci Embimbiliya li popia catiamẽla kulandu a kasi oku lilongisa? Eye o pondola hẽ oku lombolola ulandu waco volondaka viaye muẽle? Nye a yeva vutima catiamẽla kovina a kasi oku lilongisa? Eye o tava hẽ okuti ovina Embimbiliya lilongisa via sunguluka? (1 Va Tes. 2:13) Anga hẽ o kuete elomboloko liokuti ovina a kasi oku lilongisa vi pondola oku linga apongoloko komuenyo waye? (Va Kol. 3:10) Oco tu kũlĩhe atambululo apulilo aco, tu sukila oku kuata utate poku linga apulilo a kuatisa omunu tu longisa Embimbiliya oku lombolola ovisimĩlo viaye kuenda oku u yevelela.—Mat. 16:13-16.
4. Nye ci lingiwa nda omunu tu longisa Embimbiliya o kuete ocitangi coku kuata elomboloko, ale oku kapako eci a kasi oku lilongisa Vembimbiliya?
4 Ovituwa, kuenda ovisimĩlo vimue via lamelela vutima, olonjanja vialua vi tĩla calua oku vi siapo. (2 Va Kor. 10:5) Nye ci lingiwa nda omunu tu longisa Embimbiliya ka tava, ale ka kapiko eci a kasi oku longisiwa? Tu sukila oku lekisa epandi oco okuti vokuenda kuotembo Ondaka ya Suku kuenda espiritu sandu vi talavaya vutima waye. (1 Va Kor. 3:6, 7; Va Hev. 4:12) Nda omunu tu kasi oku longisa o kuete ocitangi coku kuata elomboloko ale oku kapako elongiso limue Liembimbiliya, tu yuvuli oku u kisika, kuenda tu nõli ulandu ukuavo. Omo liaco, osimbu tu amamako oku u longisa Embimbiliya lepandi kuenda ocisola, eye vokuenda kuotembo o ka vetiyiwa oku linga apongoloko a sukiliwa.