Lava ‘Uloño Wove Woku Longisa’

“Kunda ondaka. . . . Tamalala lava va yi pengisa. Lemela. Lungula. Ku ka tepuluke kepandi ndaño [kuloño woku] longisa.”​—⁠2 TIM. 4:⁠2.

1. Ocikundi cipi Yesu a eca kolondonge viaye, kuenda ongangu yipi a sia?

NDAÑO Yesu wa linga ovina vi komohisa poku sakula omanu vokuenda kupange waye woku kunda palo posi, pole, ka kũlĩhĩwile nda umue ukuakusakula, ale ukuakulinga ovikomo. Eye, wa kũlĩhĩwile ndulongisi. (Mar. 12:19; 13:⁠1) Yesu wa pitisile kovaso upange woku kunda olondaka viwa Viusoma wa Suku, kuenda olondonge viaye koloneke vilo, vi sukilavo oku kuama ongangu yaye. Akristão va kuete ocikele coku amamako lupange woku kunda, poku longisa omanu oku pokola kovina viosi Yesu a tuma.​—⁠Mat. 28:​19, 20.

2. Nye tu sukila oku linga oco tu tẽlise ocikele cetu coku kunda?

² Oco tu tẽlise ocikele cetu coku longisa omanu, tu sukila oku mioñolola uloño wetu woku longisa. Upostolo Paulu wa lekisa esilivilo liuloño waco poku sonehela ekamba liaye Timoteo, loku popia hati: “Lilava ove muele. Lavavo oku longisa kuove. Pandikisa lovina evi, omo, nda o ci linga, o lipopela ove muele, o popelavo ava va ku yeva.” (1 Tim. 4:​16) Elongiso Paulu a tukula, ka li lomboloka lika oku pitiya ukũlĩhĩso. Akristão va loñoloha kupange woku kunda, va kuatisa omanu oku linga apongoloko komuenyo wavo. Ovo va sukila uloño woku ci linga. Tu pondola ndati oku kuata “[uloño woku] longisa” poku kundila vakuetu olondaka viwa Viusoma wa Suku?​—⁠2 Tim. 4:⁠2.

Kuata Uloño ‘Woku Longisa’

3, 4. (a) Tu pondola ndati oku kuata “[uloño] woku longisa”? (b) Osikola Yupange Wakristão yi tu kuatisa ndati oku linga alongisi va loñoloha?

³ Ondisionaliu yimue, yi lombolola okuti, “uloño,” “ocina cimue omunu a pondola oku kuata poku lilongisa, oku pitolola ovina a lilongisa, kuenda oku lavulula ndomo vakuavo va linga ovina vimue.” Tu sukila oku kapako ovina vitatu via tukuiwa ndeti, oco tu loñolohe koku longisa olondaka viwa. Tu pondola lika oku kuata elomboloko liovina evi poku vi lilongisa lekuatiso liohutililo. (Tanga Osamo 119:​27, 34) Oku lavulula ndomo akundi va loñoloha va longisa, ku tu kuatisa oku kapako onjila yavo yoku longisa kuenda oku kuama ongangu yavo. Oku kapako ovina tua lilongisa, ci tu kuatisa oku mioñolola uloño wetu woku longisa.​—⁠Luka 6:40; 1 Tim. 4:​13-15.

⁴ Yehova eye Ulongisi wetu Wavelapo. Lekuatiso liocisoko caye palo posi, wa siata oku eca olonumbi komanu vaye, oco va tẽlise ocikele cavo coku kunda. (Isa. 30:​20, 21) Omo liaco, akongelo a siata oku linga ohongele Yosikola Yupange Wakristão olosemana viosi. Ohongele yaco, yi kuatisa vamanji oku loñoloha koku kunda Usoma wa Suku. Kohongele yaco yosikola, va siata oku kuama Embimbiliya. Ondaka ya Yehova yi tu sapuila ovina tu sukila oku longisa, kuenda yi lekisa olonjila via sunguluka vioku longisa. Osikola Yupange Wakristão, ya siata oku tu ivaluisa okuti, oco tu loñolohe kupange wetu, tu sukila oku longisa ovina vi kasi Vondaka ya Suku. Tu pondola oku ci tẽlisa poku linga apulilo a leluka, oku leluisa ovina tu longisa, kuenda oku kapako omanu. Omo liaco, tu konomuisi atosi a tukuiwa ndeti. Noke, tu kũlĩhĩsi ndomo tu kuatisa omanu tu longisa.

Tiamisila Oku Longisa Kuove Vondaka ya Suku

5. Pi tu sukila oku tiamisila elongiso lietu, kuenda momo lie?

⁵ Yesu, ulongisi wavelapo wa kala voluali, wa tiamisilile Vovisonehua ovina a longisa. (Mat. 21:13; Yoa. 6:45; 8:​17) Eye wa popia hati, ka longisile ovisimĩlo viaye, pole wa longisa ovina viaco vonduko ya Isiaye wo tuma. (Yoa. 7:​16-​18) Omo liaco, tu sukila oku kuama ongangu yaye. Ovina viosi tu longisa konjo lanjo, ale poku longisa Embimbiliya kolondonge, tu sukila oku kuama Ondaka ya Suku. (2 Tim. 3:​16, 17) Uloño wetu, ka u sokisiwa lunene Wovisonehua. Embimbiliya olio ono yovina tu longisa. Nda tu yongola oku situlula etosi limue kondonge, tu sukila oku tanga laye Ovisonehua oco a kuate elomboloko lietosi liaco.​—⁠Tanga Va Heveru 4:⁠12.

6. Ulongisi o limbuka ndati okuti ondonge yi kasi oku kuata elomboloko liovina a kasi oku lilongisa?

⁶ Ka tuka simi okuti, ukundi ka sukila oku pongiya ocipama aka longisa kondonge. Pole, o sukila oku sokiya ovinimbu viovisonehua aka longisa, kuenda evi ondonge yika tanga vokuenda kuelilongiso Liembimbiliya. Olonjanja vimue, tu sukila oku tanga ovisonehua vi lekisa ono yelavoko lietu. Omo liaco, tu sukila oku kuatisa ondonge oku kuata elomboloko liocinimbu a tanga.​—⁠1 Va Kor. 14:​8, 9.

Linga Apulilo a Sunguluka

7. Momo lie oku linga apulilo ku kuetele esilivilo poku longisa?

⁷ Oku linga apulilo luloño, ci kuatisa ondonge oku situlula ovisimĩlo viaye, kuenda ci kuatisavo ulongisi oku nõla atosi a veta kutima wondonge. Eci o tanga ocinimbu cimue Cembimbiliya, kuka ci lombolole kondonge, pole pinga kokuaye oco a ci lombolole. Olonjanja vimue, o sukila oku linga apulilo a pondola oku kuatisa ondonge yove oco yi kuate elomboloko lia suapo. Eci o linga apulilo poku longisa ondonge, ku yi kuatisa lika oku sanga elomboloko lieci o kasi oku longisiwa, pole o yi kuatisavo oku tava kovina a kasi oku lilongisa.​—⁠Mat. 17:​24-26; Luka 10:​36, 37.

8. Tu pondola ndati oku limbuka ovisimĩlo viondonge?

⁸ Apulilo latambululo, oyo onjila ya sunguluka yelongiso li sangiwa valivulu etu. Omo liaco, omanu o longisa Embimbiliya, vaka eca etambululo poku kuama ulandu u sangiwa povinimbu vi tangiwa. Pole, ulongisi una o yongola oku kuatisa ondonge, ka sanjukila lika atambululo a eciwa. Citava okuti, ondonge yi lombolola ciwa eci Embimbiliya li popia catiamẽla kukahonga. (1 Va Kor. 6:​18) Pole, oku linga apulilo amue luloño, ci kuatisa ulongisa oku limbuka eci ondonge yi sima catiamẽla kueci a kasi oku lilongisa. Noke, ulongisi o pula ondonge ndoco: “Momo lie Embimbiliya li pisila ukahokolo? Nye osima catiamẽla kueci Suku a ecela ocihandeleko caco? Ove hẽ o tava okuti oku pokola kolonumbi via Suku ci nena ekalo liwa?” Atambululo kapulilo ava, a kuatisa oku limbuka eci ci kasi vutima wondonge.​—⁠Tanga Mateo 16:​13-17.

Kuama Onjila ya Leluka Poku Longisa

9. Nye tu sukila oku ivaluka poku longisa ovina vi sangiwa Vovisonehua?

⁹ Omanu valua va siata oku sima okuti ca leluka oku kolela kueci ci sangiwa Vondaka ya Suku. Citava okuti vana tu longisa Embimbiliya va kuete atatahãi lalongiso etavo liesanda. Omo liaco, tu sukila oku kuama onjila ya leluka poku longisa, oco omanu va kuate elomboloko Liembimbiliya. Akundi va loñoloha, va siata oku leluisa ovina va longisa oco olondonge vi kuate elomboloko. Nda tua kuama onjila eyi, ci va kuatisa oku sanga elomboloko va sukila. Yuvula oku lombolola ovina ka vi sukiliwa. Ka tu sukila oku lombolola atosi osi a tangiwa vovisonehua. Pole, tu lombolola lika ovina vi sukiliwa oco ondonge yi kuate elomboloko lietosi tu kasi oku longisa. Nda tua ci linga, ondonge yi kuata elomboloko liovina via longa Viovisonehua, osimbu amamako oku kula kespiritu.​—⁠Va Hev. 5:​13, 14.

10. Nye ci kuatisa ulongisi oku limbuka etendelo liovinimbu a sukila oku longisa kondonge?

¹⁰ Ovinimbu viñami tu sukila oku longisa vonjanja yimosi? Tu sukila oku kũlĩhĩsa ekalo liolondonge. Oku loñoloha kuondonge kuenda kulongisi kua litepa. Pole, tu sukila oku ivaluka okuti, ocimaho cetu, oku kuatisa ondonge oku pama kekolelo. Omo liaco, tu eceleli okuti, ondonge yi kuata otembo yoku tanga ovinimbu viaco, loku kuata elomboloko liovina a tanga, kuenda o tava kocili ci sangiwa Vondaka ya Suku. Tu yuvuli oku longisa ovinimbu vialua okuti ondonge ka yi kuata elomboloko liaco. Pole, tu sukila oku amamako lelilongiso liaco. Eci tu limbuka okuti ondonge yi kuete elomboloko lieci tuo longisa, citava okuti tu konomuisa etosi likuavo.​—⁠Va Kol. 2:​6, 7.

11. Ongangu yipi yupostolo Paulu tu sukila oku kuama poku longisa?

¹¹ Upostolo Paulu, poku kunda olondaka viwa wa kuama onjila ya leluka eci a vangula la vamue onjanja yatete. Ndaño okuti wa lilongisa calua kosikola, pole, wa yuvula upopi wa tatama. (Tanga 1 Va Korindo 2:​1, 2.) Oku leluisa olonumbi vi sangiwa Vovisonehua, ci vetiya omanu vakuavitima via sunguluka. Lomue o sukila oku pita kosikola yavelapo oco a kuate elomboloko liaco.​—⁠Mat. 11:25; Ovil. 4:13; 1 Va Kor. 1:​26, 27.

Kuatisa Olondonge Oku Kapako Ovina va Lilongisa

12, 13. Nye ci vetiya ondonge oku pokola kueci a kasi oku lilongisa? Lombolola ulandu waco.

¹² Oco tu tambule onima yiwa, tu sukila oku kuatisa ondonge lovina tu longisa. Eye o sukila oku limbuka ndomo a kapako ovina a kasi oku lilongisa, ndomo viu kuatisa, kuenda ndomo a pondola oku kuata ekalo liwa, nda wa pokola Kovisonehua.​—⁠Isa. 48:​17, 18.

¹³ Tu sukila oku konomuisa elivulu lia Va Heveru 10:​24, 25, li vetiya Akristão oku endaenda kolohongele kuna tu konomuisa Ovisonehua, kuenda oku li vetiya pokati la vamanji. Nda ondonge ka ya fetikile oku endaenda kolohongele, tu sukila oku u lomboluila eci tuka lilongisa kohongele. Tu sukilavo oku u lomboluila okuti, olohongele vi panga onepa kefendelo lietu, kuenda vi tu kuatisa. Noke tu laleka ondonge oku enda kohongele. Eye o sukila oku limbuka okuti, nda wa tava kueci Ovisonehua vi popia, o kasi oku lekisa onjongole yaye yoku pokola ku Yehova. Pole, ka ci lingila oku sanjuisa ulongisi waye.​—⁠Va Gal. 6:​4, 5.

14, 15. (a) Nye ondonge yi pondola oku lilongisa catiamẽla ku Yehova? (b) Oku kũlĩha ekalo lia Suku ci kuatisa ndati ondonge?

¹⁴ Nda ondonge ya kapako ovina a lilongisa Vembimbiliya, yi kuatisiwa calua, kuenda yi lekisa ocisola ku Yehova. (Isa. 42:⁠8) Ndaño Yehova Isia ukuacisola, haeye Ululiki wovina viosi voluali, pole, wa siata oku situlula ekalo liaye luloño waye ku vana vo sole kuenda vo vumba. (Tanga Etundilo 34:​6, 7.) Eci Mose a songuila va Isareli poku tunda kupika Kegito, Yehova wa li situlula loku popia hati: “Ame muẽle Ame.” (Etu. 3:​13-​15) Eci ci lomboloka okuti, oco Yehova a tẽlise ocipango caye, wa sukilile oku li situluila komanu vaye a nõla. Va Isareli veya oku limbuka okuti, Yehova Eye wa va popela, Ukualohoka, Ukuakueca, Ukuakutẽlisa olohuminyo viaye, kuenda wa va kuatisa kovina vikuavo.​—⁠Etu. 15:​2, 3; 16:​2-5; Yeho. 23:⁠14.

¹⁵ Olondonge vietu ka vi pondola oku tambula ekuatiso li tunda ku Yehova locikomo ndeci ca pita la Mose. Pole, osimbu vamamako oku kula kespiritu, loku sola ovina va lilongisa, kuenda oku vi kapako, vaka limbuka okuti, va sukila oku kolela ku Yehova oco a va ĩhe utõi, luloño kuenda oku va songuila. Nda va ci linga, va limbuka okuti Yehova ukuoloño, Ondunguli yimue ya koleliwa, Ukuakuteyuila, kuenda wa siata oku Eca kokuavo ovina viosi va sukila.​—⁠Osa. 55:22; 63:7; Olosap. 3:​5, 6.

Lekisa Ocisola Kondonge

16. Nye ci lekisa okuti, ekambo lioku loñoloha koku longisa halioko ocina ca velapo kupange woku kunda?

¹⁶ Nda wa limbuka okuti kua loñolohele koku longisa, kuka sumue. Yehova la Yesu, ovo va kasi oku songuila upange woku longisa u kasi oku lingiwa voluali luosi koloneke vilo. (Ovil. 1:​7, 8; Esit. 14:⁠6) Ovo va pondola oku sumũlũisa elikolisilo lietu, kuenje, ovina tu longisa, vi kuatisa vakuavitima via sunguluka. (Yoa. 6:​44) Ocisola ulongisi a kuetele ondonge yaye, cu kuatisa oku yuvula ovisimĩlo viokuti, ka loñolohele koku longisa. Upostolo Paulu wa lekisa esilivilo lioku sola vana a kala oku longisa.​—⁠Tanga 1 Va Tesalonike 2:​7, 8.

17. Tu pondola ndati oku lekisa onjongole kolondonge vietu?

¹⁷ Tu pondola oku lekisa onjongole kondonge yetu, poku sokiya otembo yoku u kũlĩha ciwa. Osimbu tu amamako oku u longisa olonumbi Viovisonehua, ci tu kuatisa oku kũlĩha ekalo liaye. Noke, tu limbuka okuti o kasi oku pokola kovina vimue a lilongisa Vembimbiliya. Pole, o sukila oku linga apongoloko kovina vikuavo. Nda tua limbuka okuti o kasi oku kapako ovina a lilongisa Vembimbiliya, tu sukila oku u kuatisa oco a linge ondonge ya Kristu.

18. Momo lie ci kuetele esilivilo oku likutilila kumosi londonge, kuenda oku kongelamo etosi limue liu kuatisa?

¹⁸ Tu sukila oku likutilila kumosi londonge, kuenda oku kongelamo etosi limue liu kuatisa. Eye o sukila oku kuata elomboloko liokuti, tu yongola oku u kuatisa oco a kũlĩhe ciwa Ululiki waye, oku kuata ukamba Laye, kuenda oku ecelela oku songuiwa Laye. (Tanga Osamo 25:​4, 5.) Poku likutilila oco Yehova a kuatise elikolisilo liondonge lioku kapako eci a kasi oku lilongisa, ci pondola oku u kuatisa oku limbuka esilivilo lioku pokola ‘kondaka.’ (Tia. 1:​22) Osimbu ondonge yi yevelela olohutililo tu linga lutima wosi, o pondola oku lilongisa ndomo a likutilila. Oku kuatisa ondonge oku kuata ukamba la Yehova, ci nena esanju lialua!

19. Nye tuka lilongisa vocipama ci kuãimo?

¹⁹ Tu vetiyiwa oku kũlĩha eci ci pitahãla olohuluwa epandu Violombangi Via Yehova voluali luosi, va kasi oku lekisa “[uloño] woku longisa,” oco va kuatise vakuavitima via sunguluka oku pokola kovina viosi Yesu a tuma. Onima yipi yi kasi oku iyilila kupange wetu woku kunda? Epulilo eli, lika tambuluiwa vocipama ci kuãimo.

Ivaluka Eci Tua Lilongisa?

• Momo lie Akristão va sukilila oku mioñolola uloño wavo ‘woku longisa’?

• Tu pondola ndati oku mioñolola uloño wetu woku longisa?

• Nye ci tu kuatisa oku yuvula ovisimĩlo viokuti, ka tua loñolohele koku longisa?

[Elitalatu kemẽla 9]

Wa siata hẽ oku kuata onepa Kosikola Yupange Wakristão?

[Elitalatu kemẽla 10]

Momo lie poku longisa ondonge ci kuetele esilivilo oku u vetiya oku tanga ovinimbu Viembimbiliya?

[Elitalatu kemẽla 12]

Likutilila kumosi londonge, kuenda kongelamo etosi limue liu kuatisa