Amamako Oku Loñoloha Kupange Woku Kunda

1. Ovolandu api o kocita catete a lekisa okuti tu sukila oku amamako oku loñoloha kupange woku kunda?

¹ Akristão vocili va sukila oku amamako oku loñoloha kupange woku kunda. Eli olio esunga lieci Yesu a sapuilila olondonge viaye oco vi amameko oku pindisiwa kupange woku kunda. (Luka 9:1-5; 10:1-11) Akuila la Prisila va kuatisavo Apolosi eci a kala lavo kuenda vo “wimba onumbi ya velapo yonjila ya Suku.” (Ovil. 18:24-26) Upostolo Paulu wa vetiya umalẽhe Timoteo oco amameko loku kapako ovina a lilongisa oco “vosi va mole oku amamako oku kula kuaye.” (1 Tim. 4:13-15) Ndaño okuti tu kasi ale oku vumba Nãla, tu sukila oku amamako oku loñoloha upange wetu woku kunda.

2. Tu pondola ndati oku lilongisa lavakuetu?

² Lilongisa la Vakuene: Onjila yimue yoku loñoloha koku longisa kuetu, oku lilongisa la vakuetu. (Olosap. 27:17) Omo liaco, osimbu manji o kasi laye kupange woku kunda a kundila omunu umue, yevelela lutate. Pinga ku vamanji olonumbi va siata oku kuama kupange woku kunda kuenda yevelela lutate ovina va ku sapuila. (Olosap. 1:5) Anga hẽ wa kapako olonumbi viatiamẽla koku nyula omunu wa kundila, oku fetika oku longisa omanu Embimbiliya, ale ovina vikuavo viatiamẽla kupange woku kunda? Kuata utõi woku fetika ombangulo kuenda pinga ekuatiso kumitavaso yupange woku kunda ale kakundi vana va loñoloha oco va ku kuatise. Ivalukavo okuti espiritu sandu lia Yehova liu ku kuatisa oku loñoloha kuenda pinga ekuatiso kokuaye poku likutilila olonjanja viosi.—Luka 11:13.

3. Ocituwa cipi tu sukila oku lekisa eci tu tambula onumbi yimue capiãla enene nda ka tua pingile ekuatiso liaco?

³ Nda wa tambula olonumbi vimue oco vi ku kuatise kupange woku kunda, ku ka teme. (Uku. 7:9) Lekisa umbombe poku tava ekuatiso kuenda eca olopandu ndeci Apolosi a linga. Nda wa ci linga o lekisa olondunge.—Olosap. 12:15.

4. Momo lie Yesu a popela okuti tu sukila oku amamako oku loñoloha kupange woku kunda?

⁴ Oku Amamako Oku Loñoloha ci Sivaya Suku: Vocindekaise cimue Yesu a tukula, wa vetiya olondonge viaye oco vi amameko oku loñoloha kupange woku kunda. Yesu wa li sokisa eye muele nduti kuenda olondonge viaye wa vi sokisa ndovianja. Yesu wa popia okuti Isia “o sonjela o canja oco cime epako lia lua.” (Yoa. 15:2) Ndeci muele ukuacumbo cimue a yongola okuti ovianja vioviti viaye vi eca apako, cimuamue haco Yehova a yongola okuti tu amamako oku loñoloha oco “tu yimi epako liovimela vietu.” (Va Hev. 13:15) Onima yipi tu kuata nda tu amamako oku loñoloha kupange woku kunda? Yesu wa eca etambululo poku popia hati: “Kokuima kuene epako lia lua oko Tate a muisilua ulamba.” —Yoa. 15:8.