Ono Yovipama Viohongele Ekalo Lietu Tuakristão Kuenda Oku Kunda
OSEMANA 4-10 YELOMBO
OVOKUASI A SANGIWA VONDAKA YA SUKU | VA ROMA 12–14
“Ceci ci Lomboloka Oku Lekisa Ocisola Cakristão”
(Va Roma 12:10) Lisoli lutima wosi ndomunu la manjaye. Koku sumbila, velisipo vakuene.
perspicaz-volume 1 kem. 59
Ocisola
Ocisola coku lisola Pokati (ko Hela., phi·la·del·phiʹa, literalmente: “oku sola manji umue”), ci sukila oku lekisiwa lavamanji vosi vekongelo. (Va Rom. 12:10; Va Hev. 13:1; tangavo 1 Pet. 3:8.) Ci lekisa okuti, ukamba u kasi lavamanji vekongelo u sukila oku kala wocili, hawo wa pama kuenda wesanju ndowu u kasi pokati kepata limue. Ndaño okuti vosi vekongelo va siata oku lekisa ale ocisola pokati, va vetiyiwa oku amamako oku ci linga.—1 Va Tes. 4:9, 10.
Kelimi lio Helasi ondaka phi·loʹstor·gos yi lomboloka “oku likuatela ocisola pokati,” yi tiamisiwila komunu umue o kuete ukamba wocili lomunu ukuavo. Ono yimue yondaka yaco okuti sterʹgo, olonjanja vialua ya siata oku tukuiwa oco ci situlule ocisola ci sangiwa pokati komanu vepata limue. Upostolo Paulu wa vetiya Akristão oku kuata ocituwa caco. (Va Rom. 12:10) Paulu wa popiavo okuti oloneke viasulako via laikele oku limbukiwa lomanu “ka va kuete ocisola la vangadiavo” (Gr., aʹstor·goi) kuenda okuti omanu vaco va sesamela oku fa.—2 Tim. 3:3; Va Rom. 1:31, 32.
(Va Roma 12:17-19) Ko ka fetuluinyi umue cĩvi leci cĩvi. Lingili eci ciwa omanu vosi. 18 Nda citava, kali vakuambembua lomanu vosi. 19 Akuetu wa soliwi, ko ka fetuluinyi, efetuluinyo li kale konyeño ya Suku; momo ca sonehiwa citi: “‘Efetuluinyo liange; ame fetuluinya,’ oco Yehova a popia.”
Utala wondavululi 15/10/2009 kem. 8 ocin. 3
“Kali Lombembua Lomanu Vosi”
3 Tanga Va Roma 12:17. Paulu wa lombolola okuti, nda tu kasi oku lambalaliwa, tu sukila oku yuvula oku fetuluinya. Oku pokola kelungulo liaye, ci kuete esilivilo, capiãla enene vapata ana okuti, vamue Halombangiko Via Yehova. Akristão va sukila oku yuvula oku fetuluinya lolondaka vĩvi. Ka ca sungulukile oku fetuluinya ‘cĩvi leci cĩvi.’ Ocituwa caco ci vokiya ovitangi.
utala wondavululi 1/7/2007 kem. 26 ocin. 12-13
“Ko Ka Fetuluinyi Umue Cĩvi Leci Cĩvi”
12 Paulu velungulo liaye, wa lekisa ndomo tu sukila oku kala la vakuetu kuenda vana ka va fendela Yehova. Eye wa popia hati: “Ko ka fetuluinyi umue cĩvi leci cĩvi.” Olondaka evi Paulu wa vi lombolola noke yolondaka a popele tete hati: “Nyehuli eci cĩvi.” Omunu o nyehula ndati eci cĩvi nda o fetuluinya vakuavo leci cĩvi? Omunu wosi o fetuluinya cĩvi leci cĩvi, ka lekisa ‘ocisola cocili.’ Paulu wa popia hati: “Sandi ovina viwa kovaso omanu vosi.” (Va Roma 12:9, 17) Tu pokola ndati kolondaka evi?
13 Paulu vukanda a sonehela va Korindo, wa lombolola ovitangi ovapostolo va liyaka lavio. Eye wa popia hati: “Tua linga etalula kovaso oluali kuenda kovaso ovangelo lo kovaso omanu. . . . Eci va tu siliñinya tu livondela. Toke etaili lilo omanu va tu lingisa ño ndovina viokeyala lioluali, pamue ndonasi yovina viosi.” (1 Va Korindo 4:9-13) Akristão koloneke vilo, va siatavo oku linga ocitalukilo comanu voluali lulo. Pole, eci omanu va limbuka ovituwa vietu viwa ndaño tu tatiwa lãvi, va yevelela ciwa esapulo tu va kundila.—1 Petulu 2:12.
(Va Roma 12:20, 21) Pole, “nda unyali wove o kasi lonjala, u wĩha coku lia, nda o kasi lenyona, u wĩha cimue coku nyua; momo poku ci linga o lundika akala ondalu ponumbutue yaye.” 21 Ku ka yuliwe leci cĩvi, puãi eci cĩvi ci yula leci ciwa.
utala wondavululi 15/11/2012 kem. 29 ocin. 13
Lieceli Pokati
14 Citava okuti o yongola oku kuatisa omunu umue wa ku tambuluile lãvi poku u kundila olondaka viwa. Upostolo Paulu wa soneha ndoco: “Nda unyãli wove o kasi lonjala, u lisa, nda o kasi lenyona, u nyuisa. Nda wa ci linga, o lundika akala ondalu ponumbutue yaye. Ku ka yuliwe leci cĩvi. Pole, eci cĩvi ci yula leci ciwa.” (Va Rom. 12:20, 21, NW) Nda wa lekisa esunguluko eci omanu va ku popia lãvi, va pondola oku siapo ovituwa viavo vĩvi, kuenje, va lekisa ovituwa viwa. Nda o likolisilako oku lekisa ohenda eci va ku popia ovina vimue ka via sungulukile, o va kuatisa oku lilongisa Ondaka ya Suku. Omo liaco, nda eci omanu va ku lingila cimue cĩvi wa yuvula oku tema, ci va vetiya oku limbuka esunga lieci o kuetele ovituwa viwa.—1 Pet. 2:12; 3:16.
Oku Konomuisa LutateOvina vi Sangiwa Vembimbiliya
(Va Rom. 12:1) A vamanji, ndu pingi lohenda ya Suku, okuti weci atimba ene ndocilumba ci kasi lomuenyo, ci kola, haico ci taviwa la Suku, okuti upange u kola kuenda uloño wene woku sokolola.
kala vocisola kem. 64-65 ocin. 5-6
Ndomo tu Nõla Olomapalo Via Sunguluka
5 Ovina viosi o linga, vi kuete elitokeko lefendelo liove ku Yehova. Vukanda Paulu a sonehela va Roma, wa tukula olondaka vimue vi kuete esilivilo lialua. Eye wa popia hati: ‘Eci atimba ene ndocilumba ci kasi lomuenyo, haico ci kola, kuenje ci sanjuisa Suku. Oco efendelo liene li linge liocili.’ (Va Roma 12:1) Ondaka atimba vene, yi lomboloka ovisimĩlo, utima, kuenda olohõlo vietu. Ovina viaco, ovio vi tu kuatisa oku vumba Suku. (Marko 12:30) Paulu wa sokisa upange tu linga lutima wosi ndocilumba. Ondaka ‘ocilumba’ yi kuete esilivilo lialua. Ocihandeleko ca eciwile ku Mose, ci lekisa okuti Suku ka tavele ovilumba viovinyama ka via puile etondelo. (Ovisila 22:18-20) Cimuamue haico, nda Akristão va linga ovina ka via sungulukile Suku ka tambula ovilumba viavo. Ovilumba vie?
6 Paulu wa lungula Akristão vo ko Roma hati: “Ovimatamata viene ko ka vi eci kekandu.” Paulu wa va sapuila hati: “Ekandu ka li ka viale vatimba ene a fa fa ndokuti vu pokuisua lalio koloñeyi viao.” (Va Roma 6:12-14; 8:13) Tete, eye wa tukula, “ovilinga vietimba.” Catiamẽla komanu vakuakandu wa soneha hati: “Imela viavo vie yuka esiñalo.” “Olomãi viavo vi yayuila koku pesela osonde.” “Ka va kuete usumba la Suku.” (Va Roma 3:13-18) Ukristão o pondola oku li vĩhisa, poku linga ekandu “lovimatamata” vietimba liaye. Nda Ukristão o tala ovina ka via sungulukile, ndeci oviluvialuvia viomanu va kasi epolõla ale ungangala, eye o kasi oku ‘eca ovaso aye kekandu,’ kuenda o vĩhisa etimba liaye liosi. Kuenje efendelo liaye ka li taviwa vali la Suku. (Esinumuĩlo 15:21; 1 Petulu 1:14-16; 2 Petulu 3:11) Oku li tumbika kolomapalo ka via sungulukile ci nena ovitangi vialua!
(Va Roma 13:1) Omanu vosi va pokole kolombiali, momo ka kuli uviali okuti ka wa tundile ku Suku; olombiali vi kasiko via tambula unene waco ku Suku.
utala wondavululi 15/6/2008 kem. 31 ocin. 4
Atosi Avelapo Vukanda wa Va Roma
13:1—Olombiali violuali lulo ‘via tumbikiwa ndati la Suku’? ‘Via tumbikiwa la Suku’ omo okuti eye o kasi oku ecelela uviali wavo. Handi vali, uviali wavo Suku wa u lomboluile ale kosimbu. Uvangi waco wa lekisiwa kovina Embimbiliya lia popele catiamẽla ketendelo liolombiali violuali lulo.
Oku Tangiwa Kuembimbiliya
(Va Roma 13:1-14) Omanu vosi va pokole kolombiali, momo ka kuli uviali okuti ka wa tundile ku Suku; olombiali vi kasiko via tambula unene waco ku Suku. 2 Kuenje wosi o tamalãla lolombiali o patãla esokiyo lia Suku; vosi va patãla esokiyo liaco, va linenela ovo muẽle episo. 3 Ava va linga eci ciwa ka va yokokela vana va viala, te vana va linga eci cĩvi. Ove hẽ o yongola okuti ku kuatela usumba olombiali? Amamako oku linga eci ciwa kuenje o sivayiwa; 4 momo ovo akuenje va Suku va kapiwila oku ku kuatisa. Pole, nda wa linga eci cĩvi, yokoka, momo va kuete omoko yoku ku pisa. Ovo akuenje va Suku oco va pise vana va linga eci cĩvi. 5 Ene vu sukila oku pokola kolombiali, hamekondako liepiso liaco, pole, mekonda liowanji wutima wene. 6 Eli olio esunga lieci vu fetelavo elisimu; momo ovo akuenje va Suku va talavayela owiñi kuenda owo upange wavo. 7 Eci ku vosi eci ca va sesamẽla, ku una o pinga elisimu, elisimu; ku una o pinga ulambu, ulambu; ku una o yongola epokolo liove, u pokola; ku una o yongola esumbilo, lekisa esumbilo kokuaye. 8 Ko ka kuateli ofuka omunu umue, te ofuka yoku lisola pokati; momo wosi o sole ukuavo, o pokola Kocihandeleko. 9 Momo ocihandeleko ci popia citi, “Ku ka linge ukahokolo, ku ka ponde, ku ka nyane” kuenda ovihandeleko vikuavo, vi likongela vondaka eyi yokuti: “Sola ukuẽle ndeci o lisole ove muẽle.” 10 Omunu o kuete ocisola ka lingi cĩvi ukuavo; ocisola ci tẽlisa ocihandeleko. 11 Cimuamue haico vu sukila oku linga, momo wa kũlĩhi otembo tu kasi okuti oyo owola yoku pasuka kotulo, momo eyovo lietu li kasi ocipepi okuti otembo tua tava ci sule. 12 Uteke u panda kesulilo; utanya u kasi ocipepi. Omo liaco, tu yuvuli ovilinga via tiama kowelema kuenda tu talavayi lovimalẽho viocinyi. 13 Tu endaendi lovituwa viwa ndu okuti vutanya, ha layeleko, loku kolua, lukahonga, lumbondo, lovama kuenda esuvu. 14 Pole, kuami ongangu ya Ñala Yesu Kristu kuenda ko ka sokiyi oku tẽlisa oloñeyi vietimba.
OSEMANA 11-17 YELOMBO
OVOKUASI A SANGIWA VONDAKA YA SUKU | VA ROMA 15–16
‘Sanda Yehova Oco aku Lembeleke Loku ku Pamisa’
(Va Roma 15:4) Momo ovina viosi via sonehiwa osimbu, via sonehiwila oku tu longisa, okuti omo liepandi lietu kuenda elembeleko li tunda Kovisonehua, tu kuata elavoko.
utala wondavululi 07/2017 kem. 14 ocin. 11
“Lili Lava va Lila”
11 Ulandu wa tiamẽla kesumuo lia Yesu eci Lasaru a fa, umue pokati kovisonehua vialua vielembeleko vi sangiwa Vondaka ya Suku. Eci ka ci tu komohisa, momo “ovina viosi via sonehiwa osimbu, via sonehiwila oku tu longisa, okuti omo liepandi lietu kuenda elembeleko li tunda Kovisonehua, tu kuata elavoko.” (Va Rom. 15:4) Nda ove wa sumua omo lioku fisa ngandiove, o pondolavo oku sanga elembeleko vovinimbu Viembimbiliya vi kuãimo:
▪ “Yehova yu ocipepi la vakuavitima via teka; Eye o popela ava va kasi lovitima via samba.”—Osamo 34:18, 19.
▪ “Eci atatahãi a nduila vutima, okulemba kuove a Yehova okuo ku ñolisa.”—Osamo 94:19.
▪ “Ñala yetu Yesu Kristu kuenda Suku Isietu, una wa tu sola, okuti wa eca elembeleko ka li pui lelavoko liwa omo liohenda ya piãla, a lembeleke ovitima viene loku vu pamisi.”—2 Va Tesalonike 2:16, 17.
(Va Roma 15:5) Suku una o tu lembeleka haeye o tu pamisa, a ecelele okuti omunu lomunu pokati kene a kuate ovisimĩlo vimuamue ndevi via Kristu Yesu,
utala wondavululi 04/2016 kem. 10 ocin. 5
“Eceleli Okuti Epandi li Telisa Ocimãho Calio”
5 Pinga ku Yehova oco a pamise ekolelo liove. Momo, Yehova eye “Suku una o tu lembeleka haeye o tu pamisa.” (Va Rom. 15:5) Yehova eye lika o pondola oku kuata elomboloko liekalo lietu, ovisimĩlo vietu, kuenda wa kũlĩha ekalo lietu. Omo liaco, eye wa kũlĩha ciwa ovina tu sukila oco tu pandikise. Embimbiliya li popia ndoco: “[Yehova] o muisa vosi vo sumbila evi va yongola. O yeva [oku litetela kuavo], o va popela.” (Osa. 145:19) Pole, Yehova Suku o tambulula ndati olohutililo vietu oco tu kuate ongusu yoku pandikisa poku liyaka lovitangi?
(Va Roma 15:13) Suku, una eca eca elavoko a ku yukisi lesanju lialua kuenda ombembua omo wa koleli kokuaye, okuti vu supoka lelavoko lunene wespiritu sandu.
utala wondavululi 15/6/2014 kem. 13 ocin. 11
“Sola Yehova Suku Yove”
11 Yehova ‘eca kokuetu elavoko li tu ĩha esanju lombembua.’ (Va Rom. 15:13) Elavoko liaco, li tu kuatisa oku pandikisa lekolelo poku liyaka lovitangi. Olombuavekua ‘vi pandikisa lekolelo toke kolofa, vi ka tambula ekolowa liomuenyo kilu.’ (Esit. 2:10) Omanu vakuavo va kuete elavoko lioku kala Voluali Luokaliye palo posi, nda va pandikisa, va ka tambula asumũlũho omuenyo ko pui. (Luka 23:43) Tu tenda ndati elavoko liaco? Ka tu kuete hẽ esanju, ombembua, kuenda ocisola omo Suku a tu ĩha ‘ovina viosi viwa lombanjaile ya lipua’?—Tia. 1:17.
Oku Konomuisa Lutate Ovina vi Sangiwa Vembimbiliya
(Va Roma 15:27) Ocili, ovo va sanjukila oku ci linga kuenda va va kuatelele ofuka; momo nda vakualofeka va eca ovina viavo via tunda ku Suku, ovo va sesamẽlavo oku kuatisa lovina viavo vietimba.
utala wondavululi 1/12/1989 kem. 24 ocin. 3
“Oseteko Yocisola Cocili”
Vamanjavo vakualofeka va vetiyiwa oku va kuatisa. Handi vali, va kuatelele “ofuka” akritão vo Yerusalãi. Ka ca kaile hẽ vo Yerusalãi kuna olondaka viwa via lisanduila kuvakualofeka? Paulu wa popia hati: ‘Va Yudea va tepa asumũluho avo konepa yespiritu lavakualofeka kuenje vakualofeka va sukila oku vumba va Yudea lovina va kuete.’—Va Roma 15:27.
(Va Roma 16:25) Cilo Suku una o tẽla oku u kolisi, lolondaka viwa ñasi oku sapula loku kunda catiamẽla ku Yesu Kristu, ndesituluilo lielumbu li kola, lia sitikiwile tunde osimbu.
perspicaz-volume 3 kem. 319 ocin. 3
Mesiya ale Kristu, wa laikele oku kala Ombuto ya likuminyiwile okuti omanu vosi vakuesunga va tunda kolofeka viosi va sumumũlũisiwa. (Va Gal. 3:8, 14) Ondaka “ombuto” ya tukuiwa tete noke yesino ya lingiwa vocumbo cendene osimbu Havele ka citiwile handi. (Efet. 3:15) Pa pitile eci ci soka 4.000 kanyamo osimbu handi “elumbu li kola” ka lia situluiwile lekuatiso lietukuluko ‘liombuto’ ya Mesiya. Omo liaco, ‘esituluilo lielumbu li kola, lia sitikiwile tunde osimbu.’—Va Rom. 16:25-27; Va Efe. 1:8-10; 3:4-11
Oku Tangiwa Kuembimbiliya
(Va Roma 15:1-16) Etu tua pama tu sukila oku pandikisa loku hongua kuava ka va pamele kuenda ka tu li kokela etu muẽle esanju. 2 Omunu lomunu pokati ketu, a sanjuise ukuavo kueci ciwa coku u kolisa. 3 Momo ndaño Kristu ka sandele oku tẽlisa onjongole yaye muẽle, pole, ca sonehiwa citi: “Ovina omanu va popia levi va linga oco va ku sepule, vieya kokuange.” 4 Momo ovina viosi via sonehiwa osimbu, via sonehiwila oku tu longisa, okuti omo liepandi lietu kuenda elembeleko li tunda Kovisonehua, tu kuata elavoko. 5 Suku una o tu lembeleka haeye o tu pamisa, a ecelele okuti omunu lomunu pokati kene a kuate ovisimĩlo vimuamue ndevi via Kristu Yesu, 6 okuti londaka yimuamue vu sivaya Suku haeye Isia ya Ñala Yesu Kristu. 7 Litambuli pokati ndeci Kristu o tambuli, oco Suku a muisue ulamba. 8 Momo Kristu wa linga ukuenje wa vana va seviwa evamba oco va limbuke okuti Suku ukuacili kuenda va kũlĩhĩsa olohuminyo Eye a lingila ku vakukululu yavo, 9 okuti olofeka vi sivaya Suku omo liohenda yaye. Ndeci ca sonehiwa citi: “Hu sivayaila pokati ka vakualofeka, loku imbila onduko yove ovisungo.” 10 Eye wa popia vali hati: “Yoleli ene a vakualofeka, kumue lomanu vaye.” 11 Kuenda vali hati: “Sivayi Yehova ene a lofeka viosi kuenda omanu vosi vo sivaye.” 12 Isaya wa popiavo hati: “Ocikoti ca Jese ciya, ku katuka umue o viala olofeka; vokuaye omo olofeka vi kuatela elavoko.” 13 Suku, una eca eca elavoko a ku yukisi lesanju lialua kuenda ombembua omo wa koleli kokuaye, okuti vu supoka lelavoko lunene wespiritu sandu. 14 A vamanji, ame muẽle nda kolela okuti weyuki ohenda, haene weyuki ukũlĩhĩso wosi kuenje vu tẽla oku lilungula pokati. 15 Kuenje, ñasi oku vu soneheli atosi amue lutõi walua oku wivaluisi omo liohenda ya piãla ya nyĩhiwa la Suku, 16 okuti ndinga ukuenje wa Kristu Yesu kolofeka. Nda litumbika kupange u kola wolondaka viwa via Suku, okuti ombanjaile yolofeka evi yi taviwa kuenda yi kolisua lespiritu sandu.
OSEMANA 18-24 YELOMBO
OVOKUASI A SANGIWAVONDAKA YA SUKU | 1 VA KORINDO 1–3
“Anga hẽ Umunu Umue Ukuetimba Ale Umunu Umue Ukuespiritu?”
(1 Va Korindo 2:14) Una o songuiwa lolonjongole viaye muẽle ka tava kovina viespiritu lia Suku, momo ovio uveke kokuaye; pole, ka vi kũlĩha, momo omunu o sukila oku kuata espiritu lia Suku oco a vi limbuke.
utala wondavululi 02/2018. kem. 19 ocin. 4-5
Nye ci Lomboloka Oku Kala Omunu Ukuespiritu?
4 Tu limbuka ndati omunu ukuetimba? Omunu ukuetimba o setukula ovituwa violuali, loku tiamisila utima kolonjongole viaye muẽle. Paulu wa tukula ovituwa viaco ‘okuti via siata komãla vakuesino.’ (Va Efeso 2:2) Ovituwa viaco vi vetiya omanu valua oku setukula vakuavo. Ovo va linga ovina va sima okuti via sunguluka kokuavo kuenje ka va kapiko ovihandeleko via Yehova. Omunu ukuetimba o sokolola lika ovina vietimba kuenda o sima okuti ekalo liaye lolombongo, via velapo okuti ovina vikuavo vi sule.
5 Omunu ukuetimba o linga ovina Embimbiliya li tukula hati, “ovilinga vietimba.” (Va Galatia 5:19-21) Vukanda watete Paulu a sonehela va Korindo, wa tukula ovina vikuavo omanu vakuetimba va linga. Ovo va koka ovaima, lolonepele, loku vetiya vakuavo oku kala vakuesino, va tuala omunu lukuavo kombonge, ka va sumbile asongui vavo kuenda va velisapo oku lia loku nyua. Omunu ukuetimba ka tamalãla eci a setekiwa oku linga eci cĩvi. (Olosapo 7:21, 22) Yuda wa popia hati omanu vaco va pumba espiritu lia Yehova.—Yuda 18, 19.
(1 Va Korindo 2:15, 16) Omunu ukuespiritu o kũlĩhĩsa ovina viosi, pole, eye muẽle ka kũlĩhĩsiwa lomunu umue. 16 “Helie wa kũlĩha ovisimĩlo via Yehova, okuti o tẽla oku u longisa?” Etu puãi tu kuete ovisimĩlo via Kristu.
utala wondavululi 02/2018. kem. 19 ocin. 6;
Nye ci Lomboloka Oku Kala Omunu Ukuespiritu?
6 Omunu ukuespiritu wa kapako ukamba waye la Suku. Eye ecelela okuti espiritu sandu lia Yehova liu songuila kuenda o likolisilako oku u setukula. (Va Efe. 5:1) O likolisilakovo oku kũlĩha ovisimĩlo via Yehova loku tenda ovina ndomo Yehova a vi tenda. Eye wa velisapo calua Suku. Omunu waco, wa sumbila olonumbi via Yehova komuenyo waye. (Osa. 119:33; 143:10) Eye ka kuama “ovilinga vietimba” pole, o likolisilako oku lekisa “epako liespiritu” komuenyo waye. (Va Gal. 5:22, 23) Oco tu kuate elomboloko lia suapo lieci ci lomboloka oku kala omunu ukuespiritu, tu sokololi ocindekaise eci: Omunu wa loñoloha kolomĩlu, o tukuiwa okuti ukualomĩlo kuenda omunu wa pitisa kovaso efendelo liaye ku Suku o tukuiwa okuti ukuespiritu.
utala wondavululi 02/2018. kem. 22 ocin. 15
Nye ci Lomboloka Oku Kala Omunu Ukuespiritu?
15 Tu setukula ndati Kristu? Kelivulu liatete lia va Korindo 2:16, ku lekisa okuti tu sukila oku kuata “ovisimĩlo via Kristu.” Kelivulu lia Va Roma 15:5 ku tu ivaluisa oco tu kuate “ovisimĩlo vimuamue ndevi via Kristu Yesu.” Oco tu kale nda Kristu, tu sukila oku lilongisa ovisimĩlo viaye kuenda ovilinga viaye. Yesu wa velisilepo ukamba waye la Yehova okuti ovina vikuavo ci sule. Omo liaco, nda tua kala nda Yesu, ukamba wetu la Yehova u livokiya. Eli olio esunga lieci tu sukilila oku lilongisa ndomo tu kuata ovisimĩlo ndevi via Yesu.
Oku Konomuisa Lutate Ovina vi Sangiwa Vembimbiliya
(1 Va Korindo 1:20) Ukualondunge o kasi pi? Ukuavisonehua o kasi pi? Ukualonamalala violuali lulo o kasi pi? Suku ka tendele hẽ olondunge violuali lulo okuti uveke?
perspicaz-volume 3 kem. 479 ocin. 1
Olondunge
Oluali omo liolondunge wawo, lua tenda nduveke eliangiliyo lia Suku lekuatiso lia Kristu; vana va kala oku viala, ndaño okuti va kala oku songuila ciwa, pole via ‘ponda Ñala yinenei.’ (1 Va Kor. 1:18; 2:7, 8) Pole, Suku wa lekisa okuti olondunge via vakualondunge voluali lulo uveke, kuenda wa kutisa osõi vakualondunge poku talavaya lovina ovo va tendele okuti ‘ovina via Suku vi kuete olondunge’ levi omanu va simile okuti ‘viuveke, levi viaño, havio via tombiwa’ oco a telise ocipango caye. (1 Va Kor. 1:19-28)Paulu wa ivaluisa Akristão vo ko Korindo okuti “olondunge pokati kava va loñoloha [kuenda] violombiali violuali lulo” via laikele oku imuha; kuenje olondunge viaco ka via pangele onepa kesapulo liuprofeto. (1 Va Kor. 2:6, 13) Eye a lungula Akritão vo ko Kolosãi oco ka va ka yapuisiwe ‘lolondunge violuali [phi·lo·so·phiʹas, okuti , oku sola olondunge] kuenda ovisila viomanu, levi viatiamẽla koviholo violuali. —Va Kol. 2:8; sokisa lo vss 20-23.
(1 Va Korindo. 2:3-5) Kuenje eci ndeya kokuene nda honguele kuenda nda kala lusumba loku luluma kualua; 4 upopi wange leci nda kunda, ka via kaile olondaka violondunge vioku wu kisiki oku tava, pole, te lespiritu kuenda unene wa Suku, 5 okuti olondunge viene ka vi tiamisiwila komanu, te kunene wa Suku.
utala wondavululi 15/7/2008 kem. 27 ocin. 6
Atosi Avelapo Vovikanda Via Va Korindo
2:3-5. Omo okuti, omanu va kala volupale luo Korindo va kuata ukũlĩhĩso wovilongua via va Helasi, eci Paulu a va kundila, wa kala oku sokolola ndomo a pondola oku vetiya ovitima viavo. Pole, ka ecelele okuti usumba u tateka oku tẽlisa ocikele a tambuile ku Suku coku kunda olondaka viwa. Omo liaco, ka tuka eceleli okuti ovitangi viomuenyo vi tu tatekavo oku kunda olondaka viwa Viusoma wa Suku. Tu sukila oku kolela kekuatiso lia Yehova ndeci Paulu a linga.
Oku Tangiwa Kuembimbiliya
(1 Va Korindo 1:1-17) Paulu, una wa kovongiwa oku linga upostolo wa Kristu Yesu omo liocipango ca Suku kuenda Sositene manjetu, 2 tu kasi oku vu soneheli ene vu kasi vekongelo lio Korindo, ene wa nõliwi la Suku omo lia Kristu Yesu, haene wa kovongiwi oku kala olosandu kumue la vosi va kasi kolonepa viosi va tukula onduko ya Ñala yetu Yesu Kristu, Ñala yavo haeye Ñala yetu: 3 Ohenda ya piãla lombembua yi tunda ku Suku Isietu kuenda ku Ñala Yesu Kristu, yi kale lene. 4 Olonjanja viosi ndu panduili ku Suku yange omo liohenda ya piãla Suku o wĩhi vonduko ya Kristu Yesu; 5 momo wa lingisui olohuasi vokuaye kovina viosi, okuti kuloño woku popia kuenda kukũlĩhĩso, 6 ndeci uvangi wa imbiwila Kristu wa pamisiwa pokati kene, 7 okuti lacimue ocali co kambeli, osimbu vu lavoka esituluilo lia Ñala yetu Yesu Kristu. 8 Eye o vu pamisi toke kesulilo, okuti lomue u pisi keteke lia Ñala yetu Yesu Kristu. 9 Suku una wo kovongeli oku kuata ukamba Lomõlaye Yesu Kristu Ñala yetu, ukuacili. 10 A vamanji, ndu pingi vonduko ya Ñala yetu Yesu Kristu okuti vu popia popia cimuamue kuenda pokati kene ka pa ka kale olonepele, pole, likuati omunga lutima umuamue lovisimĩlo vimuamue. 11 A vamanji, vamue vakuanjo ya Koloe va ndi sapuila okuti pokati kene pali oku liyenja. 12 Eci ñasi oku lombolola ceci okuti, pokati kene umue o popia hati: “Ame nda tiamẽla ku Paulu,” “Ame nda tiamẽla ku Apolosi,” “Ame nda tiamẽla ku Kefa,” “Ame nda tiamẽla ku Kristu.” 13 Ekongelo lia Kristu lia li tepa tepa? Paulu hẽ wo pondiwili kuti? Ale wa papatisiwili vonduko ya Paulu? 14 Mandula Suku omo sia papatisile umue pokati kene, te lika Krispo la Gaio, 15 sanga umue o popia okuti wa papatisiwa vonduko yange. 16 Ocili okuti, nda papatisavo vakuanjo ya Stefana. Pole, nda nda papatisa vali vakuavo, si ci ivaluka. 17 Momo Kristu ka numile oku papatisa, te oku kunda olondaka viwa, haluloñoko wolondaka, sanga uti wekangiso wa Kristu u sepuiwa.
OSEMANA 25–31 YELOMBO
OVOKUASI A SANGIWA VONDAKA YA SUKU | 1 VA KORINDO 4–6
“Etumbisa Litito li Tumbisa Osema Yosi ya Tamiwa”
(1 Va Korindo 5:1, 2) Ocili, ca yevala okuti pokati kene pali evĩho liukahonga, pole, evĩho liaco ka lia la muiwa pokati ka vakualofeka, okuti ulume umue o lala lukãi wa isiaye. 2 Oco hẽ ene vu ci lipandela? Siti nda wa nyumaleli loku tundisa pokati kene omunu wa linga ovina viaco?
(1 Va Korindo 5:5-8) omunu waco vu sukila oku weca ku Satana okuti etimba liaye li nyõleha, oco espiritu li popeliwe vokuenda kueteke lia Ñala. 6 Oku lipandiya kuene ka kuwako. Ka wa kũlĩhĩli okuti etumbisa litito li tumbisa osema yosi ya tamiwa? 7 Tundisi pokati kene etumbisa liosi liosimbu, oco vu lingi osema ya tamiwa yokaliye, ene muẽle wa pui ale etumbisa. Ocili, Kristu Kameme ketu ko Paskoa, wa lumbiwa ale. 8 Omo liaco, ka tu ka lingi ocipito caco letumbisa liosimbu, ndaño letumbisa lievĩho ale liekandu, te lombolo ka yi kuete etumbisa okuti yesunguluko kuenda yocili.
(1 Va Korido 5:13) osimbu Suku a sombisa vana ka va kasi vekongelo? “Tundisi omunu waco ondingaĩvi pokati kene.”
perspicaz-volume 2 kem. 116, 544-546
Etumbisa
Upostolo Paulu wa tukula ocindekaise cimue eci a tuma akristão ko Korindo oco va tundise vekongelo ulume wa kala oku liga evĩho liukahonga, poku popia hati: Ka wa kũlĩhĩli okuti etumbisa litito li tumbisa osema yosi ya tamiwa? Tundisi pokati kene etumbisa liosi liosimbu, oco vu lingi osema ya tamiwa yokaliye, ene muẽle wa pui ale etumbisa, Ocili, Kristu o Paskoa yetu wa lumbiwa ale.” Eye wa lekisa eci a yonguile oku popia poku tukula “etumbisa.” “Omo liaco, ka tu ka lingi ocipito caco letumbisa liosimbu, ndaño letumbisa lievĩho ale liekandu, te lombolo ka yi kuete etumbisa okuti yesunguluko kuenda yocili.” (1 Va Kor. 5:6-8) Paulu wa tukula elomboloko Liocipito cikuavo Colombolo ka vi Kuete Etumbisa va Yudea va enda oku linga yina ya enda oku lingiwa noke lio Paskoa. Ndeci etumbisa litito li tumbisa osema yosi ya tamiwa, ale ya lingiwa ombolo, cimuamue aco okuti ekongelo ndetimba limuamue ya laikele oku vĩhĩsua kovaso a Yehova nda okuti ka va tundisile vekongelo ulume vaco ukuevĩho liukahonga. Ovo va sukilile oku upa “etumbisa” pokati kavo ndeci va Isareli va sukilile oku yuvula oku kuata etumbisa vonjo vokuenda kuocipito.
perspicaz-volume 2 kem. 116, 544-546
Satana
Nye ci lomboloka oku eca omunu umue ku Satana okuti etimba liaye li nyõleha”?
Poku longisa vamanji ko Korindo catiamẽla konjila ndomo va tata omunu umue vekongelo okuti wa linga evĩho liukahonga lukãi wa isiaye, upostolo Paulo wa soneha ndoco: “Omunu waco vu sukila oku weca ku Satana okuti etimba liaye li nyõleha.” (1 Va Kor. 5:5) Eyi ya kala ocihandeleko coku tundisa ulume waco vekongelo kuenda oku tepa ukamba laye. (1 Va Kor. 5:13) Poku u eca ku Satana, eye wa laikele oku tundisiwa vekongelo loku kala voluali luna okuti Satana eye o suku kuenda ombiali yaluo. Ulume waco o sokisiwa ‘letumbisa litito’ yi ‘tumbisa osema yosi,’ wa kala omunu umue “ukuetimba” vekongelo, kuenda poku tundisa ulume waco ukuevĩho liukahonga, vamanji vakuespiritu va ponduile oku kundula omunu ‘ukuetimba’ pokati kavo. (1 Va Kor. 5:6, 7) Cimuamue haico okuti, Paulu wa eca Humeneo la Alexandro ku Satana momo ovo va liwekapo oku lekisa ekolelo kuenda ovituwa viwa kuenje va liwekapo oku vumba Yehova.—1 Tim. 1:20.
(1 Va Korindo 5:9-11) Vukanda ndo soneheli nda popia siti, liwekipo oku kuata ukamba la vakuevĩho liukahonga, 10 ka ci lomboloka okuti vakuevĩho liukahonga, ale vakuacipululu, olondiandia, pamue vakuakufendela oviteka vo voluali lulo. Momo nda hacoko, nda wa tundi voluali. 11 Puãi cilo ñasi oku u soneheli oco vu liwekipo oku kuata ukamba lomunu wosi o tukuiwa manji okuti ukuevĩho liukahonga, ukuacipululu, ukuakufendela oviteka, ukuakuimbula, ale oholua, pamue ondiandia, ndaño oku lia laye, ko ka li laye.
kala vocisola kem. 207, kalomboluilo a vokiyiwako losapi hati, “Ndomo tu Tenda Omunu Wa Tundisiwa Vekongelo”
Oku tundisiwa vekongelo
Tu tenda ndati omunu wa tundisiwa vekongelo? Embimbiliya li popia hati: “Nda kuli umue ukuẽle ketavo wa pia kevĩho liukahonga, pamue kocipululu, pamue koku fendela oviteka pamue koku imbula, pamue koku kolua, pamue kundiandia, ndaño oku lia laye koka li laye.” (1 Va Korindo 5:11) Catiamẽla ku vana va liwekapo oku “kala vovilongua via Kristu,” tu lunguiwa hati: “ko ko tambuli vonjo ndaño oku u lama. Momo omunu ulama wa tava kovilinga viaye vĩvi.” (2 Yoano 9-11) Tu sukila oku yuvula oku kuata ukamba ale oku vangula ovina viespiritu lomanu vana va tundisiwa vekongelo. Utala Wondavululi 15 ya Cembanima wo 1981, kemẽla 21, wa lekisa okuti: “Enanga liatete lituala omunu oku fetika ombangulo la vana va tundisiwa vekongelo oku va pulisa hati, ‘Ciwa?’ Anga hẽ tu yongola oku eca enanga liaco liatete lava va tundisiwa?”
Oku Konomuisa Lutate Ovina vi Sangiwa Vembimbiliya
(1 Va Korindo 4:9) Momo ci kasi ndu okuti etu tuvapostolo, Suku wa tu kapa kesulilo ndava va pisiwila oku fa, omo tua linga ndocitalukilo koluali, ci kale kovangelo, ci kale komanu.
utala wondavululi 15/5/2009 kem. 24 ocin. 16
Ovangelo “Aspiritu Vakuakuvumba”
16 Akristão vana va liyaka lovitangi, va “linga etalula kovaso . . . ovangelo.” (1 Va Kor. 4:9) Ovangelo va sanjuka calua poku mola ovilinga vietu viekolelo kuenda va sanjukila oku likekembela kuomunu umue ukuakandu. (Luka 15:10) Ovituwa viwa viakãi Akristão vi letiwevo lovangelo. Embimbiliya li lekisa okuti, “ukãi co sesamela oku futa ndokuti ovangelo va limbukilako omoko ya veyaye.” (1 Va Kor. 11:3, 10) Ovangelo va sanjuka calua poku limbuka okuti, afendeli vosi va Suku oku kongelamo akãi, va pokola ku vana va kuete ocikele coku songuila ekongelo, kuenda epata. Epokolo liaco, li vetiya ovangelo oku lekisa esumbilo ku Suku.
(1 Va Korindo 6:3) Ka wa kũlĩhĩli okuti tu ka sombisa ovangelo? Siti tu tẽlavo oku tetulula ovina viomuenyo ulo?
perspicaz-volume 2 kem. 674
Ocihandeleko
Ocihandeleko ca Eciwa Kovangelo. Ovangelo va velapo omanu; va kasi vemehi violonumbi kuenda viovihandeleko via Suku. (Va Hev. 1:7, 14; Osa. 104:4) Yehova wa eca ocihandeleko kunyali waye Satana loku u tateka. (Yovi 1:12; 2:6) Mingeli ungelo unene wa limbuka kuenda wa sumbila omoko ya Yehova ndonganji ya velapo, volondaka a popia poku lihoya Leliapu hati: “Yehova a ku pise.” (Yuda 9; sokisa lelivulu lia Sak. 3:2.) Yehova Suku wa eca ku Yesu Kristu unene Kovangelo vosi. (Va Hev. 1:6; 1 Pet. 3:22; Mat. 13:41; 25:31; Va Fil. 2:9-11) Omo liaco, lunene wa Yesu kua tumiwa omunga yimue yungelo ku Yoano. (Esit. 1:1) Pole vukanda 1 Va Korindo 6:3 upostolo Paulo o vangula kueci catiamẽla ku vamanji a Kristu ndomanu va ka sombisa ovangelo momo, ovo va ka panga onepa poku sombisa ovangelo vavĩ.
Oku Tangiwa Kuembimbiliya
(1 Va Korindo 6:1-14) Nda umue pokati kene o kuete ondaka lukuavo, o lukuta hẽ oku tuala ondaka yaco oco yi sombisiwe lava havakuesungako, okuti oku sombisiwa lolosandu hacoko? 2 Ale ka wa kũlĩhĩli okuti olosandu vi ka sombisa oluali? Kuenje, nda oluali lu sombisiwa lene ko tẽla hẽ oku tetulula ovina vitito? 3 Ka wa kũlĩhĩli okuti tu ka sombisa ovangelo? Siti tu tẽlavo oku tetulula ovina viomuenyo ulo? 4 Nda vu kuete ovina viomuenyo ulo oco vi tetuluiwe, vu nõla alume vana va sepuiwa vekongelo okuti ovo va linga olonganji? 5 Ndi ci popela oku vu kutisi osõi. Pokati kene ka pali hẽ umue ukualondunge okuti o tẽla oku tetuluila vamanjaye? 6 Pole, manji ambata manji ukuavo kekanga, kovaso a vana okuti havakuetavoko! 7 Eci vu lituali kekanga omunu lukuavo, wa yuliwi. Momo lie ka vu ecelelela okuti vu lingiwa lãvi? Momo lie ka vu ecelelela okuti vu kembiwa? 8 Pole, ene vu linga lãvi vamanjene loku va kemba! 9 Ka wa kũlĩhĩli okuti vana havakuesungako ka va piñala Usoma wa Suku? Ko ka kembiwi. Ndaño vakuevĩho liukahonga, ndaño vakuakufendela oviteka, ndaño vakahokolo, ndaño alume va litumbika kovilinga vioku lala lala la vakuavimatamata vimuamue viuyali, ndaño alume vakuakulala lalume, 10 ndaño ovimunu, ndaño vakuacipululu, ndaño oloholua, ndaño vakuakuimbula, ndaño olondiandia, ka va piñala Usoma wa Suku. 11 Vamue pokati kene va kuatele ovituwa viaco. Pole, cilo wa sukuiwi; wa kolisiwi; kuenda wa tendiwi nda vakuesunga vonduko ya ñala Yesu Kristu, lespiritu lia Suku yetu. 12 Ocihandeleko ci ngecelela oku linga ovina viosi, pole, haviosiko vi kuatisa. Ocihandeleko ci ngecelela oku linga ovina viosi, pole, si ecelela okuti ndi yuliwa locina cimue. 13 Okulia kua sovuilua imo kuenda imo lia sovuilua okulia, Suku o vi nyõla kavali kavio. Haimo lumue etimba ka lia sovuiluilue evĩho liukahonga, puãi lia sovuilua Ñala kuenda Ñala wa sovuilua etimba. 14 Puãi, Suku wa pindula Ñala kuenje o tu pindulavo kolofa lunene waye.