Amamako Oku Taimisa “Ulienge wa Yehova”

1. Ndamupi Embimbiliya li tukula ocisola cocili?

OCISOLA ci kasi “ndovilienge viondalu vi taima kulienge wa Yehova. Ovava a tumõha ka a pondola oku ima ocisola ndaño olondui ka vi ci tẽla oku ci ambata.”b (Ocis. ca Sal. 8:6, 7) Eli elomboluilo limue liwa lia tiamẽla kocisola cocili! Olondaka evi vi vetiya calua olohueli okuti: Ove o pandola oku kuata ocisola ca pama omunu lukuene.

2. Nye ohueli yimue yi sukila oku linga oco ocisola cavo volohuela ka ci ka pole?

² Ci sukila alikolisilo oco ohueli yimue yamameko oku lisola omunu lukuavo osimbu va kasi komuenyo. Ndocindekaise, ondalu yi pondola oku amamako oku taima nda umue amamako oku kapa olohũi. Nda omunu waco ka ci lingile, ondalu yima. Cimuamue haico, ocisola culume lukãi camamako oku pama nda ovo va pamisa ukamba wavo. Pole, pamue ohueli yi limbuka okuti ocisola cavo ci kasi oku pola, ca piãla enene, nda va kasi oku liyaka locitangi colombongo, cuhayele ale coku tekula omãla vavo. Oco hẽ ove o kuele o pondola ndati oku amamako oku taimisa, “ulienge wa Yehova” volohuela viove? Vocipama cilo, tu ka konomuisa olonjila vitatu vioku pamisa olohuela viene kuenda oku kuata esanju volohuela.c

AMAMAKO OKU PAMISA UKAMBA WOVE LA YEHOVA

3. Oku kuata ukamba wa pama la Yehova ci kuatisa ndati ohueli yimue oku amamako locisola? (Ukundi 4:12) (Talavo ociluvialuvia.)

³ Oco ulienge wa Yehova wamameko oku taima, cikale ulume kuenda ukãi, va sukila oku likolisilako oku pamisa ukamba wavo la Yehova. Oku pamisa ukamba wavo la Yehova ci kuatisa ndati olohuela viavo? Eci ohueli yi kapako ukamba va kuetele Isiavo wokilu, ovo lonjanga yalua va kapako alungulo aye lina li ka va kuatisa oku yuvula loku yula ovitangi vina nda via polisa ocisola va likuetele omunu lukuavo. (Tanga Ukundi 4:12.) Vana va kuete ukamba wa pama la Yehova va sukila oku setukula ovituwa viaye ndeci, ohenda, epandi kuenda oku ecela. (Va Efe. 4:32–5:1) Eci ohueli yimue yi lekisa ovituwa viaco ci leluka ocisola va likuetele oku pama. Manji umue ukãi o tukuiwa Lena okuti tunde eci akuela papita ale 25 kanyamo wa popia hati: “Ci leluka oku sola loku sumbila omunu umue wa pama kespiritu.”

4. Momo lie Yehova a nõlela Yesefe la Maria oco vi kale olonjali via una wa laikele oku kala Mesiya?

⁴ Kũlĩhĩsa ulandu umue Wembimbiliya. Eci Yehova a nõla ohueli yimue oco vi kale olonjali via una wa laikele oku kala Mesiya, eye wa nõla Yosefe kuenda Maria okuti vamue pokati kocitumbulukila ca Daviti. Momo lie? Kavali kavo va kuatele ukamba wa pama la Yehova kuenda Yehova wa kũlĩhĩle okuti ovo va panduile oku pamisa olohuela viavo omo liocisola vo kuetele. Vana va kuele nye va pondola oku lilongisa ku Yosefe la Maria?

5. Nye alume va kuele va lilongisila kongangu ya Yosefe?

⁵ Yosefe wa enda oku kapako lonjanga olonumbi via Yehova kuenje co kuatisa oku kala ohueli yimue yiwa. Vapuluvi atatu, eye wa tambula olonumbi via Suku ndomo a ponduile oku tata epata liaye. Olonjanja viosi eye wa pokola lonjanga kolonumbi viaco ndaño pamue ka ca lelukile kokuaye. (Mat. 1:20, 24; 2:13-15, 19-21) Yosefe, poku kapako olonumbi via Suku wa teyuila Maria, wo kuatisa kuenda wo tata. Sokolola ndomo ovilinga via Yosefe via vetiya Maria oku u sola loku u sumbila vali calua! Ene alume vu kuele, vu pondola oku setukula ongangu ya Yosefe poku sanda alungulo vu tanga Vembimbiliya atiamẽla koku tata apata ene.d Eci o kapako alungulo aco, ndaño okuti pamue ka ca lelukile oku ci linga, o lekisa ocisola kukãi wove kuenda vu pamisa olohuela viene. Manji umue ukãi ko Vanuatu okuti tunde eci a kuela papita ale 20 kanyamo, wa popia hati: “Eci ulume wange a sanda oku kapako alungulo a Yehova, ame ndu sumbila vali calua. Ndi liyeva okuti nda kolapo kuenda ñolela kolonjila eye a nõla.”

6. Nye akãi va kuele va lilongisila ku Maria?

⁶ Maria wa pamisile ukamba waye la Yehova kuenda ekolelo liaye ka lia tambele kovina Yosefe a enda oku linga. Eye wa kũlĩhĩle ciwa Ovisonehua. (Tala Luka 1:46.) Eye wa endavo oku sokolola ovina a lilongisa. (Luka 2:19, 51) Ocili okuti, ukamba Maria a kuata la Yehova wo kuatisa oku kala ukãi umue uwa. Koloneke vilo, akãi valua va kuele va siata oku likolisilako oku setukula ongangu ya Maria. Ndeci, manji umue ukãi o tukuiwa Emiko hati: “Eci handi sia kuelele nda kuatele esokiyo liange muẽle lielilongiso.” Pole, noke lioku kuela nda limbuka okuti omo ulume wange eye wa enda oku likutilila loku songola efendelo liepata ekolelo liange lia fetika oku tamba kueci eye a enda oku linga. Kuenje nda limbuka okuti, ame muẽle nda sukililevo oku pamisa ukamba wange la Yehova. Noke nda sokiya otembo yoku kala lika wange oku likutilila ku Suku, oku tanga Ovisonehua kuenda oku sokolola kueci nda lilongisa. (Va Gal. 6:5) Ene akãi vu kuele, oku amamako kuene oku pamisa ukamba wene la Yehova, ci ka vetiya alume vene oku vu pandiyi kuenda oku vu soli.—Olosap. 31:30.

7. Nye olohueli vi lilongisila ku Yosefe la Maria catiamẽla koku fendelela kumosi?

⁷ Yosefe la Maria va li kuatisavo pokati oco vamameko lukamba wa pama la Yehova. Ovo va kũlĩhĩle esilivilo lioku fendela Yehova kumosi lepata. (Luka 2:22-24, 41; 4:16) Citava okuti ka ca lelukile oku ci linga ca piãla enene osimbu etendelo liomãla lia kala oku livokiya, pole, va tẽla oku ci linga. Kuenje ongangu yimue yiwa kolohueli vio koloneke vilo! Nda ove o kuete omãla ndeci ca pita la Yosefe kuenda Maria, citava okuti ka ca lelukile kokuove oku endaenda kolohongele loku linga efendelo liepata. Handi vali, pamue ci tĩlavo kokuove oku sanda otembo yoku lilongisa, ale oku likutilila kumosi lahueli yove. Pole, ivaluki okuti eci vu fendeleli kumosi Yehova, ukamba wove laye kuenda lohueli yove u livokiya. Omo liaco, petisi kovaso efendelo liene.

8. Olohueli vina vi kuete ovitangi vepata nye vi sukila oku linga oco vi kuatisiwe lefendelo liavo liepata?

⁸ Nye ci popiwa nda vukueti ovitangi vimue voluhuela? Ocisimĩlo coku kala kumosi kefendelo liepata pamue ci molẽha ndu okuti ka ci vetiya. Nda oco, fetiki loku konomuisa olonepa vimue vitito haivio vi sanjuisa, vina ene wa litavi oku sapela pokati. Oku ci linga, ci vu vetiyi oku pamisa olohuela viene kuenda oku kuata onjongole yoku fendelela kumosi Yehova.

SANDI OTEMBO YOKU KALA KUMOSI

9. Momo lie ulume lukãi va kuele va sukilila oku pita otembo kumosi?

⁹ Ene a lohueli vu pondola oku amamako locisola cene poku pita otembo kumosi. Nda vu ci lingi, ci ka ku kuatisi oku kapako ovisimĩlo viohueli yove kuenda ndomo a liyevite. (Efet. 2:24) Kũlĩha eci Lilia la Ruslan va limbuka noke lioku kuela okuti papita ale ci pitahãla 15 kanyamo. Ukãi hati: “Tua limbuka okuti ka tua ponduile oku kuata otembo yalua yoku pita kumosi. Otembo yetu ya enda oku puila lika kupange oku sanda eteku, koku tata onjo kuenda noke omãla vetu. Kuenje tua limbuka okuti nda etu muẽle ka tua sandele otembo yoku kala kumosi tu ka nyõla olohuela vietu.”

10. Ndamupi ohueli yimue yi pondola oku kapako onumbi yi sangiwa ku Va Efeso 5:15, 16?

¹⁰ Nye olohueli vi sukila oku linga oco vi kolele okuti via siata oku pita otembo kumosi? Ene vu sukila oku sokiya otembo yoku kala kumosi. (Tanga Va Efeso 5:15, 16.) Manji umue ulume ko Nigeria o tukuiwa Uzondu wa popia hati: “Eci ndi linga esokiyo liovopange ange, ndi kongelamo otembo yoku kala kumue lukãi wange loku tenda epuluvi liaco ndocina ca velapo.” (Va Fil. 1:10) Kũlĩhĩsa ndomo manji umue o tukuiwa Anastasia okuti ukãi wa manji umue ukuakunyula akongelo ko Moldavia, a talavaya ciwa lotembo yaye. Eye hati: “Ame ndi likolisilako oku linga upange wange osimbu ulume wange a tẽlisa ovikele vikuavo. Kuenje eci noke ci ngecelela oku pita otembo kumosi.” Pole, nye o sukila oku linga nda a sokiyo ove ka a ku ecelela oku pita otembo kumosi?

11. Ovopange api Akuila la Priska va lingila kumosi?

¹¹ Vana va kuele va pondola oku lilongisila kongangu ya Akuila la Priska, okuti ohueli yimue ya soliwile calua Lakristão vokocita catete. (Va Rom. 16:3, 4) Embimbiliya ka li tukula ovina vialua viatiamẽla kolohuela viavo, pole, olio li situlula okuti ovo va talavaya kuenda kumosi va kuatisa vakuavo. (Ovil. 18:2, 3, 24-26) Kuenje olonjanja viosi eci Embimbiliya li tukula Akuila la Priska, li va tukuila kumosi.

12. Nye ulume lukãi waye va sukila oku linga oco va pite otembo yalua kumosi? (Talavo ociluvialuvia.)

¹² Vana va kuele nye va lilongisila ku Akuila la Priska? Sokolola kovina vialua ove la hueli yove vu pondola oku linga. Citava hẽ okuti vu lingila kumosi ovopange okuti ka vu a lingi omunu lomunu? Ndeci, Akuila la Priska va enda oku kundila kumosi. Ove hẽ wa siata oku sokiya oku linga cimuamue? Akuila la Priska va endavo oku talavayela kumosi. Ove kumue la hueli yove pamue ka vu kuete upange umuamue woku sanda eteku, oco hẽ vu pondola oku lingila kumue ovopange ovonjo? (Uku. 4:9) Eci vu li kuatisi kovopange aco vu kala ndo cimunga cimue kuenda vukuata epuluvi lioku sapela. Manji Robert la Linda tunde eci va kuela papita ale 50 kanyamo. Manji Robert hati: “Oku popia ocili, etu ka tua siatele oku pita otembo kumosi kolomapalo vimue. Pole, eci ndi sukula alonga kuenje ukãi wange o a puenya, ale ceci ndi tata olonelẽho noke ukãi wage iya oco a ñuatiseko njeva esanju lialua. Oku lingila kumosi ovina ci tu kuatisa oku likuata omunga. Ocisola cetu camamako oku kula.”

13. Oco pokati kulume lukãi waye pa kale omunga nye va sukila oku linga?

¹³ Ivaluka okuti halonjanja viosiko oku kala kumosi ci lomboloka oku likuata omunga. Ukãi umue wo ko Brasil hati: “Koloneke vilo omo liovitalukilo vialua nda limbuka okuti tu pondola oku kupukila veyonjo lioku sima okuti tua siata oku pita otembo kumosi omo tu kasi vonjo yimosi. Nda limbukavo okuti voku kala kumosi mua kongela ovina vikuavo. Vovina viaco vikuavo mua kongela oku kũlĩhĩsa asukila ohueli yange.” Kũlĩhĩsa ndomo manji Bruno lukãi waye Tays va siata oku likolisilako oku likapako pokati. Ulume hati: “Eci tu kala kumosi tu seleka olotelefone vietu kuenje tu upa esilivilo lioku kala pamosi.” 

14. Nda ohueli yimue ka yi sanjukila oku pita otembo kumosi nye ovo va sukila oku linga?

¹⁴ Nye vu sukila oku linga nda ove lohueli yove ka vu sanjukila oku pita otembo kumosi? Citava okuti vu kuete ovisimĩlo via litepa, ale pamue wa siati oku lihoyisa. Nye vu sukila oku linga? Kũlĩhĩsa ocindekaise condalu ca tukuiwa kefetikilo. Ondalu ka yi fetika oku taima vocipikipiki. Ove o sukila oku yi saminyila loku kapa olohũi. Momo lie ka vu fetikila oku pita otembo yimue oloneke viosi? Sokiyi oku linga cimue okuti kavali kene vu ci soli, hacinako ci vu kokeli oku lihoyisa. (Tia. 3:18) Poku fetika lovina viaco vitito ci pondola oku vokiya ocisola cene.

LITATI LESUMBILO OMUNU LUKUAVO

15. Momo lie esumbilo li kuetele esilivilo oco ocisola volohuela camameko?

¹⁵ Esumbilo li kuete esilivilo lialua volohuela. Olio li kasi ndofela yecelela ondalu oku taima calua. Nda ka kuli ofela ondalu yima lonjanga. Cimuamue haico okuti, nda pokati kolohueli ka pali esumbilo, ocisola ci pola lonjanga. Konepa yikuavo nda ulume lukãi va likolisilako oku lisumbila pokati ocisola cavo camamako. Omo liaco, ku ka sime lika okuti ove o lekisa esumbilo, ohueli yove yi sukila muẽle oku liyeva okuti ove wo sumbila. Manji Penny la Aret va kuete ale 25 kanyamo tunde eci va kuela. Ukãi hati: “Omo lioku lisumbila pokati, onjo yetu ya linga ocitumãlo cimue cocisola calua. Tu lianja poku situlula ovisimĩlo vietu momo tua kũlĩha okuti tua kapako ovisimĩlo viomunu lukuavo.” Oco hẽ nye o sukila oku linga oco ohueli yove yi liyeve okuti wo sumbila? Kũlĩhĩsa ulandu wa Avirahama la Sara.

16. Ulume umue o kuele o setukula ndati Avirahama? (1 Petulu 3:7) (Talavo ociluvialuvia.)

¹⁶ Avirahama wa tata Sara lesumbilo. Eye wa kapeleko Sara loku sumbila ovisimĩlo viaye. Onjanja yimue Sara wa temele calua, kuenje wa situlula ovisimĩlo viaye ku Avirahama, loku u vetela evelo. Anga hẽ Avirahama wa temele poku u sapuila cimue ka ca sungulukile? Sio. Eye wa kũlĩhĩle okuti Sara wo sumbilile kuenda wa kapeleko olonjila a enda oku nõla. Avirahama wo yevelela lutate kuenda wa tetulula ocitangi caco. (Efet. 16:5, 6) Nye tu lilongisilako? Ene alume, vu kuete omoko yoku nõla onjila yi sukiliwa vepata. (1 Va Kor. 11:3) Kuenje ocina ciwa o pondola oku linga oku konomuisa ukãi wove osimbu kua nõlele onjila yimue, ca piãla enene nda onjila yi nõliwa eye wa kongeliwamo. (1 Va Kor. 13:4, 5) Olonjanja vimue, pamue ukãi wove o tema calua kuenje pamue o sukila oku situlula ndomo a li yevite. Ove hẽ wa kapako ovisimĩlo viaye poku u yevelela lutate? (Tanga 1 Petulu 3:7.) Angela la Dmitry tunde eci va kuela papita ale 30 kanyamo. Angela wa lombolola ndomo ulume waye o kokela oku liyeva okuti wo sumbila. Eye hati: “Veyange Dmitry wa likapelako oku njevelela olonjanja viosi ñasi lonyeño ale ceci njongola lika oku vangula. Eye o ndekisa epandi ndaño ceci ñasi lonyeño.”

17. Nye akãi va kuele va lilongisila kongangu ya Sara? (1 Petulu 3:5, 6)

¹⁷ Sara wa sumbilile Avirahama poku kapako olonjila a enda oku nõla. (Efet. 12:5) Eteke limue Avirahama wa nõlapo oku yekisa akombe veyileño ocipikipiki. Eye wa pinga ku Sara oco a liwekepo upange a kala loku linga okuti o pongiya etendelo lialua liolombolo. (Efet. 18:6) Sara lonjanga yalua wa kuatisa konjila ya nõliwa la Avirahama. Ene wakãi vu kuele vu pondola oku setukula Sara poku kuama olonjila vi nõliwa lalume vene. Nda vu ci linga vu pamisa olohuela viene. (Tanga 1 Petulu 3:5, 6.) Dmitry, okuti wa tukuiwa ale kocinimbu ca pita, wa lombolola ndomo ukãi waye a lekisa okuti wo sumbila. Eye hati: “Ndi sole calua alikolisilo ukãi wange Angela, oku kuatisa kolonjila ndi nõla ndaño ceci ovisimĩlo vietu ka vi li kuata. Nda onjila nda nõla ka ya tundile ciwa eye ka ndi pisa.” Ocili okuti nda umue wa ku sumbila ci leluka calua oku u sola!

18. Olohueli vi kuatisiwa ndati poku amamako oku pamisa ocisola cavo?

¹⁸ Koloneke vilo, Satana o yongola oku nyõla ocisola ci kasi pokati kolohueli Akristão. Eye wa kũlĩha okuti nda ohueli yimue Ukristão ka yi li kuetele vali ocisola omunu lukuavo, va ka fetika oku yanduluka Yehova. Kuenje, ka citava okuti ocisola cocili cimuha. Omo liaco, ocisola cove volohuela cikaile ndeci ca sonehiwa Kocisungo ca Salomone. Nõlapo oku pitisa kovaso Yehova volohuela viove, piti otembo kumosi loku sumbila ovisimĩlo viomunu lomunu kuenda oku kapako asukila aye. Nda wa ci lingi olohuela viene vi ka eca esivayo kono yocisola Yehova kuenda ndondalu yimue yamamako oku taima, ocisola cene ci kamamako oku pama vokuenda kuomuenyo wene wosi.