Ukanda Wosungu Yolombangi Via Yehova

A Vamanji wa Soliwi:

Isietu wokilu Yehova, eye ongangu ya velapo yocisola. Embimbiliya li popia hati: “Suku eye ocisola.” (1 Yoa. 4:8) Ndaño okuti, Yehova Ukuonene wosi, Ondaka yaye ka yi popi hati, “Suku eye unene.” Yehova o tiamisila uviali waye vocisola. Ocituwa caco ci tu vetiya oku amela kokuaye!

Yehova o yongola okuti tu u sola kuenda tu u vumba lutima wetu wosi. Poku ci linga, tu lekisa okuti tua sanjukila uviali waye momo tu tava okuti olonjila viaye via sunguluka haivio viocisola. Ocisola ci tu vetiya oku teyuila uviali waye.

Ocili okuti, uviali wa Yehova lalimue eteke u ka nyõliwa. Pole, Satana wa kapa vatatahãi unene wa Suku woku viala, kuenje eci ca kokela ohali yalua omanu. Yehova, omo liolondunge viaye, ka tambuluile Satana poku kisika omanu oku tava kuviali Waye, ndaño okuti wa ponduile oku ci linga. Sokolola kulandu wa pita la Baliame okuti, eci a yonguile oku siñala va Isareli.

“Tala, etaili nda ku kapela omuenyo luwa, kuenda oku fa lũvi.” (Esin. 30:15) Omanu va kuata elianjo lioku nõla oku kala komuenyo. Cimuamue haico Yehosua a linga poku sapuila va Isareli hati: “Nda wa soki hoti, Oku vumba Yehova cĩvi, oco nõli etaili u vu yongola oku vumba.” Kuenje, omanu va tambulula Yehosua vati: “Ocisimĩlo coku yanduluka Yehova ha tu vumbi olosuku vikuavo, ci kale ocipãla letu.” (Yeh. 24:15, 16) Koloneke vilo, tu kuetevo ovisimĩlo ndevi viavo. Omo okuti tu kuetele ocisola Yehova, ka tu kuete “ocisimĩlo” coku u yanduluka.

Omo tua tiamẽla vekongelo Liakristão vocili, tua kũlĩha eci ci lomboloka oku kuata elianjo. Ndaño okuti akulu vekongelo va kuete omoko yoku tu lungula loku tu pindisa, ovo ka va sandiliya oku tu viala pamue oku lavulula ekolelo lia vamanjavo. Upostolo Paulu wa soneha ndoco: ‘Ka ci lomboloka okuti etu tua linga vacime cekolelo liene. Pole, tu talavaya lene oku vokiya kesanju liene, okuti vekolelo liene muẽle, omo vu talama ngõ.’—2 Va Kor. 1:24.

Oku linga ocina cimue omo lionjongole tu kuete, okuti ka tu ci lingi omo lioku kisikiwa, ci nena esanju lialua! Yehova o tu vetiya oku linga ovina viwa omo tu u kuetele ocisola. Tu pondola oku limbuka esilivilo liaco volondaka via Paulu eci a popia hati: ‘Nda ngeca ovikuata viange viosi oco ndi tekule olosuke, nda ngeca etimba liange oco ndi lipande, pole si kuete ocisola, ka ci sumũlũisa.’—1 Va Kor. 13:3.

Yehova poku mola olohuluwa via vamanjetu alume lakãi va kasi oku u vumba lutima wosi omo liocisola vo kuetele, o sanjuka calua!

Ocili okuti, Yehova o vu soli calua ene afendeli vaye, ci kale omãla kumue lamalẽhe, va siata oku lekisa ocisola Kokuaye ndaño okuti, oluali lu vetiya omanu oku kuata ocipululu. Kolelivo okuti, etu tu vu seli calua.—Luka 12:42, 43.

Omo liaco, ocisola vu kuetele Yehova, ene a vamanji, kumue lamalẽhe ci limbukiwila kueci ci soka 1.748.697.447 kolowola via lingiwa poku kunda esapulo liwa unyamo wa pita. Omo lioku vetiyiwa locisola caco ci soka 7.782.346 kakundi va litumbika kupange woku kunda voluali luosi. Tua sanjukilavo eci ci soka 268.777 ya vamanji va papatisiwa ndondimbukiso yelitumbiko liavo ku Yehova okuti, pokati kavo pa sangiwa akulu lamalẽhe. Eci ci lekisa okuti osemana losemana, ku papatisiwa eci ci soka 5.168 komanu. Ovina viaco, vi vetiya calua utima wetu!

Koloneke vilo via sulako, afendeli va Suku va siata oku pita lovitangi vialua, ndeci, alambalalo, oku vela, kuenda vamue pokati kavo va kuka. Pole, tua likapelako okuti, lalimue eteke “tu konyõha.” Tu vu kueteli ocisola ca piãla.—Va Hev. 10:39; 2 Va Kor. 4:16.

Vamanjene,

Osungu Yolombangi Via Yehova