Momo Lie Ovitundo Vio Pulitika vi Kokela Oku Litepa?—Nye Embimbiliya li Popia?

Voluali luosi, olofeka vialua vi kuete ovitundo via litepa. Ndomo ci lekisiwa vekonomuiso lia lingiwa lo Pew Research Center ko 2022, ci soka “65 kolopulusendu yakulu va pulisiwa kueci ci soka 19 kolofeka, va popia okuti vofeka yavo ka kuli oku litava tava pokati, omo okuti omanu va tiamẽla kovitundo via li tepa.”

Pocitumãlo o kasi omanu valua va litepa omo lioku tiamẽla kovitundo via litepa? Momo lie? Oyo hẽ onjila ya sunguluka yoku potolola ovitangi? Kũlĩhĩsa eci Embimbiliya li popia.

Ovituwa vi koka oku litepa

Embimbiliya lia popele okuti koloneke vietu, oku ci tiamisila “koloneke via sulako,” omanu valua va laikele oku lekisa ovituwa ka vi koki oku likuata omunga.

• “koloneke via sulako, ekalo li ka tĩla calua halio li koka ohele. Momo omanu va ka linga vakuakulisola ovo muẽle, . . . ka va ka tẽla oku likandangiya.”—2 Timoteo 3:1-3.

Ndaño omanu valua va likolisilako oku kuatisa olombiali oco vi viale ciwa, pole ka ci tẽliwa. Omo okuti omanu va kuete ovisimĩlo via litepa, ka va tẽla oku talavayela kumosi oco va potolole ovitangi. Ovitangi viaco vi situlula eci Embimbiliya lia popele ale osimbu.

• “Omunu wa siata oku viala ukuavo oco o linge eci cĩvi.”—Ukundi 8:9.

Pole, Embimbiliya li tukula ono yoku malako ovitangi okuti, uviali umue u ka malako ovina vi kokela omanu oku tala ohali koloneke vilo.

Ombiali yimue ya loñoloha yi tata omanu

Embimbiliya li tukula ombiali yi kuete ovoloño a sukiliwa oco yi malako ovitangi viaco: Ombiali yaco Yesu Kristu. Yesu o kuete unene, omoko kuenda onjongole yoku nena omunga lombembua pokati komanu vosi.

• “Koloneke viaye ukuesunga o ka telẽha, kuenda ombembua yi ka kala kuosi.”—Olosamo 72:7.

• “Kuenda olofeka viosi vi ko vumba.”—Olosamo 72:11.

Yesu usongui uwa momo eye o lisakalaisa kuenda o yongola oku kuatisa omanu, ca piãla enene vana va tatiwa lekambo liesunga.

• “Momo eye o ka yovola ohukũi yina yi kaluka oku pinga ekuatiso, kuenda o ka yovolavo osuke lomunu wosi ka kuete umue u kuatisa. Eye o ka kuatela ohenda osuke lohukũi, kuenda o ka popela omuenyo wohukũi. Eye o ka va yovola kohali kuenda kungangala.”—Olosamo 72:12-14.

Lilongisa eci catiamẽla Kusoma wa Suku, uviali wokilu okuti Yesu eye usongui waco. Limbuka ndomo o pondola oku kuatisiwa kuenda oku kuatisa uviali waco.

• Tala ovideo losapi, Usoma wa Suku u Lomboloka Nye?

• Tanga ocipama losapi, “Usoma wa Suku—Uviali Umue ka u Kuete Ovitukiko.”