Ocipama 4 Longisa Omõlove Oku Kala Ukualondunge

NYE CI LOMBOLOKA OKU KALA UKUALONDUNGE?

Omunu wosi ukualondunge wa koleliwa. Eye o likolisilako oku tẽlisa ciwa ocikele cimue kuenda votembo ya sokiyiwa.

Ndaño muẽle omãla vatito va pondola oku lilongisa oku kala vakualondunge. Elivulu limue li lombolola catiamẽla koku pindisa omãla li lekisa okuti, “omõla o fetika oku kuata uloño woku kuatisa eci a tẽlisa unyamo umosi ale olosãi vitatu kuenda eci a tẽlisa unyamo lomenyu, eye o fetika oku kuata onjongole yoku kuatisa kovopange vomanu a kasi lavo.” Elivulu liaco lia amisako ndoco: “Vapata alua, omãla vakuanyamo 5 toke 7, va longisiwa oku kuatisa kovapange okonjo kuenje, ndaño okuti vatito, ovo va tẽla oku kuatisa ciwa kovopange a liyekaila.”

NYE CI LOMBOLOKA OKU KALA UKUALONDUNGE?

Amalẽhe valua va tunda konjo, pole noke va tiukila konjo Yolonjali omo liovitangi viomuenyo. Eci ca siata oku pita lavo omo okuti, amalẽhe vaco lalimue eteke va lilongisile oku talavaya ciwa lolombongo, oku tata onjo ale oku tẽlisa ovikele viavo.

Omo liaco, hĩse oku pindisa omõlove cilo oco a lipongiyile ovikele vinene eci a linga ukulu. Elivulu losapi, Como Criar um Adulto, liti: “Ove ku yongola okuti umalẽhe amamako oku kevelela ekuatiso liove vovokulu, eci u ko wecelela oku tunda konjo.”

NDOMO O LONGISA OMÕLOVE OCO A LINGE UKUALONDUNGE

Eca ovopange okonjo komõlove.

ONUMBI YEMBIMBILIYA: “Kuli onima yiwa kovopange osi.”—Olosapo 14:23.

Omãla vatito va sole calua oku lingila kumosi ovina lolonjali. Ove o pondola oku kuama onjongole yaco kuenda oku eca ovopange komõlove.

Olonjali vimue ka vieci ovopange komãla omo vi sima okuti, va kuete ale upange walua wokosikola va sukila oku linga.

Pole, omõla o kuatisa kovopange okonjo, o kuete vali epuluvi liwa lioku litunda ciwa kosikola. Eci ci kuete esilivilo momo, ovopange okonjo a longisa omãla oku kuata ovikele kuenda oku vi tẽlisa. Handi vali, tala eci elivulu lia tukuiwa kefetikilo liocipama eci liamisako: “Eci ka tu kapiko onjongole yomõla yoku kuatisa, tu kasi oku u longisa ocisimĩlo cokuti, oku kuatisa vakuetu ka ku kuete esilivilo . . . eye o fetikavo oku sima okuti vakuavo ovo va kuete ekisika lioku u lingilako ovina.”

Eci ci lekisa okuti, nda omãla va linga ovopange okonjo, ovo va lilongisa oku kuatisa vakuavo kuenda ka va kala vakuakulivelisapo. Ovo va kuatavo elomboloko liokuti, oku tẽlisa ovikele viavo ci kuete esilivilo vepata.

Kuatisa omõlove oku tava ovina vĩvi vi yilila kueci a linga.

ONUMBI YEMBIMBILIYA: “Yevelela kelungulo kuenda tava kepindiso, oco o kuate olondunge kovaso yoloneke.”—Olosapo 19:20.

Nda omõlove wa linga cimue ka ca sungulukile, ndeci, nda wa tetula ocikuata ca umue, ko ka seteke oku u tundila olunda. Omãla va kuete epondolo lioku tava kovina vieyilila kueci va linga, omo liaco, citava okuti va pinga ongecelo kuenda oku kuatisa omunu kueci vo nyõlela.

Omãla vove oku tava kovina vieyilila kovilinga viavo ci va kuatisa:

• oku vangula ocili

• oku yuvula oku vetela evelo vakuavo

• oku yuvula oku li sandela esunga

• oku pinga ongecelo olonjanja viosi nda ci sukiliwa