Tunde Koku Lulikiwa Kuoluali Toke Ketande

Ilu kuenda ongongo via tunda pi? Ekumbi, osãi, olombungululu, kuenda ovina vikuavo vi kasi vongongo vieya ndati? Embimbiliya, lieca atambululo ocili. Olio li popia okuti ovina viaco via lulikiwa la Suku. Elivulu lilo, kefetikilo li lombolola asapulo Embimbiliya atiamẽla kovina via lulikiwa.

Suku tete wa lulika omanu vakuetimba liespiritu ndeli liaye. Omanu vaco va tukuiwa hati, ovangelo. Pole, ongongo ya lulikiwa oco mu tunge omanu va kasi letimba ndeli lietu. Suku wa lulika ulume lukãi. Olonduko viavo Adama la Eva kuenje wa va kapa vocumbo cimue ceposo. Omo okuti ovo ka va pokuile Kokuaye, va pumba esumũlũho liavo lioku kala lomuenyo.

Tunde koku lulikiwa kua Adama toke koku iya kuetande, pa pita eci ci soka 1.656 kanyamo. Vokuenda kuanyamo aco, kilu lieve kua kala omanu valua olondingaĩvi. Kilu kua kalavo oviluvo viespiritu vina ka viletiwe okuti Satana kuenda ovangelo vaye vãvi. Kilu lieve kua kala omunu umue o tukuiwa hati Kaini kuenda omanu vakuavo vãvi oku kongelamo ovindululu. Pole, kilu lieve kua kalavo omanu vamue olondingesunga ndeci, Havele, Enoke kuenda Noha. Vonepa YATETE, tuka lilongisa eci catiamẽla komanu vaco kuenda ovolandu akuavo.