Suku o Fetika Oku Lulika Ovina

OVINA viosi viwa tu kuete, via tunda ku Suku. Eye wa lulika ekumbi oco li tu ĩhe ocinyi kutanya, kuenda osãi lolombungululu oco tu kale locinyi kuteke. Suku wa lulika ongongo oco tu tungemo.

Pole ekumbi, osãi, olombungululu, kuenda ongongo, havioko ovina viatete Suku a lulika. Ove hẽ, wa kũlĩha ocina catete Suku a lulika? Suku tete wa lulika omanu vamue va lisetahãla laye. Ndeci ka tu pondola oku mola Suku, haico ka tu pondolavo oku mola omanu vaco. Vembimbiliya omanu vaco, va tukuiwa hati ovangelo. Suku wa lulika ovangelo oco va kale kumue laye kilu.

Ungelo watete Suku a lulika, wa kala ungelo umue o likasi. Eye wa kala omõla watete wa Suku kuenda wa talavaya kumue la Isiaye. Ungelo waco wa kuatisa Suku koku lulika ovina vikuavo ndeci: Ekumbi, osãi, olombungululu, kuenda ongongo.

Ongongo hẽ ya kala ndati? Kefetikilo, vongongo ka mua kaile oviendalomuenyo. Oyo ya kala ño upolokoso okuti ya ñualiwile lovava alua. Pole Suku wa yonguile okuti vongongo mu kala omanu. Omo liaco, Eye wa fetika oku lulika ovina vialua. Nye Eye a linga?

Catete, vongongo mua sukilile ocinyi. Kuenje Suku wa lulika ocinyi cutanya oco ci tuile vongongo. Eye wa cilinga lonjila yimue okuti ku kala epuluvi liutanya kuenda liuteke. Noke Suku wa kongela pamosi ovava a kala vepuluvi lilu kuenje kueya ongongo yakukuta.

Voluali ka mua kaile lacimue. Oluali lua kala ndeci lu molẽha vociluvialuvia cilo. Ka mua kaile olonelẽho ndaño oviti ale ovinyama. Vokalunga ka mua kailevo oviendalomuenyo. Suku handi wa kuata upange walua woku finisa ongongo okuti mu tunga omanu kuenda ovinyama.