Yosefe wa Kapiwa Vokayike

ECI Yosefe a landisiwa Kegito wa kala leci ci soka 17 kanyamo. Eye wa landisiwile kulume umue o tukuiwa hati, Potifara. Potifara wa kala mitavaso yakuenje velombe va Soma Fareo Kegito.

Yosefe wa talavaya calua konjo ya Potifara cime caye. Eci Yosefe a kula cime caye wokundika onjo yaye yosi. Oco hẽ momo lie Yosefe a kasilili vokayike? Eye wa kapiwa vokayike omo liukãi wa cime caye.

Yosefe wa posokele calua kuenje ukãi wa cime caye Potifara wa yonguile oku lipekela laye. Yosefe ka tavele momo wa kũlĩhile okuti elinga liaco lĩvi. Omo liaco, ukãi wa potifara wa temele calua kuenje wa fetika oku kemba ulume waye. Eye wa sapuila ulume waye hati: ‘Yosefe wa seteka oku ndi kuata oco a li pekele lame.’ Potifara wa tava kuhembi waco kuenje wa kapa Yosefe vokayike.

Kalei kokayike wa limbuka okuti Yosefe wa kala omunu umue uwa. Kuenje wa kundika peka lia Yosefe olomandekua viosi viovo kayike. Eci pa pita oloneke vimue, Fareo wa temẽla akuenje vaye okuti kalei kovinyu kuenda kalei kolombolo. Kuenje wa va kapa vokayike. Eteke limue va kalei vaco va lota olonjoi vimue pole ka va kuatele elomboloko liaco. Noke eci kuaca omẽle Yosefe wa popia lavo hati: ‘Sapuiliko olonjoi viene.’ Eci vo sapuila olonjoi viaco Yosefe wa kuatisiwa la Suku kuenje wa va lomboluila elomboloko liaco.

Ku kalei kovinyu, Yosefe wa popia hati: ‘Pokati koloneke vitatu o tunda vo kayike kuenje Fareo oku tiuwiya vali kupange wove.’ Eye wamisako vali hati: ‘Eci o tiukila ku Fareo nukule kokuaye oco o ndi kuatise oku tunda vonjo yilo.’ Ku kalei kolombolo Yosefe wa popia hati: ‘Pokati koloneke vitatu Fareo oku teta utue wove.’

Eci papita oloneke vitatu ondaka ya Yosefe haico ya tẽlisiwa. Kalei kolombolo Fareo wo teta utuwe waye kuenje kalei kovinyu wa tunda vokayike. Wa tiukila vali kupange waye woku vumba soma. Pole ka lomboluile ku Fareo ovina viatiamẽla ku Yosefe. Omo liaco, Yosefe wamamako oku kala vokayike.