Esapulo 55

Kakuenje Umue wa Vumba Suku

KAKUENJE wa posoka ndeti onduko yaye Samuele. Ulume wo kuata ndeti kutue, onduko yaye, Eli. Eli wa kala ocitunda cinene ko Isareli. Samuele, isiaye Elikana, kuenda inaye, Hana. Ovo va kasi loku u nena ku Eli.

Otembo yaco citava okuti Samuele wa kuata lika anyamo akuãla ale atãlo. Pole vo nena oco a kale votavernakulu ya Yehova la Eli kuenda ovitunda vikuavo. Ocili okuti, Samuele wa kala omõla. Momo lie Elikana la Hana vo wecelela oku vumba Yehova vo tavernakulu? Tu konomuisi esunga liaco.

Otembo yaco ka pa pitile anyamo alua tunde eci Hana a sumuile calua. Hana wa sumuile calua omo okuti ka kuatele omõla. Eteke limue eci Hana a endele oku ka nyula otavernakulu ya Yehova, wa likutilila hati: ‘A Yehova, ku ka njivale! Nda wa nyiha omõla, ndi likuminya oku weca kokuove. Eye oka ku vumba oloneke viosi viomuenyo waye.’

Yehova wa yeva ohutililo ya Hana. Kuenje eci papita olosãi vimue, Hana wa cita omõla ulume wo luka Samuele. Hana wa solele calua omõlaye. Osimbu handi omõlaco a kala utito, Hana wa fetika oku u longisa ovina vialua viatiamẽla ku Yehova. Hana wa sapuila ulume waye hati: ‘Eci Samuele a sumuha, ndu u tuala kotavernakulu oco a vumbe Yehova.’

Eci oco Hana la Elikana va kasi loku linga ndomo ci molẽha vociluvialuvia cilo. Samuele wa longisiwa ciwa lolonjali viaye. Omo liaco, eye wa kala lolondunge vioku vumba Yehova votavernakulu Yaye. Unyamo lunyamo, Hana la Elikana va enda oku ka fendela Yehova votavernakulu yaco. Kuenje va kuata epuluvi lioku nyula omõlavo. Handi vali, unyamo lunyamo, Hana wa enda loku tuala ku Samuele uwalo wokaliye una a tongaile.

Samuele wamamako oku vumba votavernakulu ya Yehova vokuenda kuanyamo alua. Kuenje Samuele weya oku soliwa calua la Yehova kuenda oku soliwa lomanu. Pole omãla va Eli ocitunda cinene, ka va lingaile eci ca sunguluka ku Yehova. Omãla vaco, Hafeni kuenda Finehase. Ovo va enda oku linga eci cĩvi kuenda oku vetiya omanu oku lueyela Yehova. Eli wa sukilile oku upa kokuavo ovikele vioku vumba ndovitunda, pole ka ci lingile.

Samuele ka ecelele okuti ovina vĩvi via lingawaile votavernakulu, vi u tateka oku vumba Yehova. Kotembo yaco ka kua kaile omanu valua va solele Yehova. Momo tunde eci Yehova a vanguile lomanu vamue palo posi, pa pitile ale otembo yalua. Eci Samuele a kula, kueya oku pita ulandu umue:

Samuele wa kala loku pekela votavernakulu kuenje wa yeva ondaka yimue yo pasula. Eye wa kumbulula hati: ‘Ame ulo.’ Eci a pasuka, wa lupukila ku Eli loku popia hati: ‘Ove wa mbilikiya kuenje ndeya.’

Pole Eli wa kumbulula hati: ‘Ame sia ku vilikiyile. Kuende ka pekele.’ Kuenje Samuele wa enda wa pekela.

Noke Samuele wa yeva ondaka onjanja yavali ya popia hati: ‘A Samuele!’ Samuele wa pasuka vali kuenje wa enda ku Eli loku popia hati: ‘Ove wa mbilikiya kuenje ndeya.’ Eli wa kumbulula hati: ‘Sia ku vilikiyile amõlange. Pekela.’ Kuenje Samuele wa enda, wa kapela.

Samuele wa yeva vali ondaka onjanja yatatu yo vilikiya hati: ‘A Samuele.’ Samuele wa lupukila ku Eli loku popia hati: ‘Ame ulo ndeya, momo ove wa mbilikiya.’ Noke Eli weya oku limbuka okuti Yehova eye wa kala loku vilikiya Samuele. Omo liaco, wa sapuila Samuele hati: ‘Kuende ka pekele. Nda eye wa ku vilikiya vali kumbulula hati: “A Yehova, popia ño. Ukuenje wove oku yevite.”

Eci oco Samuele a kumbulula Yehova eci o vilikiya onjanja yikuavo. Yehova wa sapuila Samuele okuti, ndi yambula Eli lomãla vaye. Noke Hafeni kuenda Finehase veya oku fila kuyaki la va Filisiti. Eci Eli a yeva ulandu waco, wa kupuka ocinyimaime, osingo yaye ya teka, kuenje wa fa. Omo liaco, Yehova wa tẽlisa ondaka yaye.

Samuele wamamako oku kula kuenje wa linga onganji ya sulako ko Isareli. Eci a kala oku kuka, omanu va popia laye hati: ‘Tu nõlele osoma yimue oco yi tu viale.’ Samuele ka tavele kondaka yaco. Eye wa kũlĩhile okuti, Yehova eye osoma yavo. Pole Yehova wa sapuila Samuele oco a yevelele kondaka yomanu.

1 Samuele 1:​1-28; 2:​11-36; 4:​16-18; 8:​4-9.