Longisa Omãla Vove
Samuele wa Lingainga Eci ca Sunguluka
WA SIATA hẽ oku mola ndomo omanu va linga ovina vĩvi?—a Eci oco ca pita la Samuele. Eye wa kala pokati komanu ka va sesamẽlele oku linga ovina vĩvi. Wa talavaya vo tavernakulu ya Suku ale vocitumãlo cefendelo, kimbo lio Silo. Tu konomuisi eci ca pita vo tavernakulu, muna Samuele a kala okuti tunde kotembo yaco pa pita ale ci soka 3.000 kanyamo.
Osimbu handi Samuele ka citiwile, Hana wa yonguile oku kuata omõla. Kuenje eci va endele oku ka fendela vo tavernakulu, Hana wa pinga ku Suku vohutililo oco o kuatise. Vohutililo yaco wa vanguila vutima okuti omẽla owo ño wa menõha. Eci ca vetiya Eli, ocitunda cinene, oku sima okuti ukãi waco wa kolua. Pole, eci a limbuka okuti ukãi wa nyumãla, Eli wo sumũlũisa loku popia hati: “Suku ya Isareli a ku muise eci wo lomba.”—1 Samuele 1:17.
Noke eci Samuele a citiwa, Hana wa sanjukile calua yu wa sapuila veyaye Elikana hati: ‘Tuli Samuele a sumuha, ndu tuala ko tavernakulu okuti o vumba Suku otembo yosi.’ Kuenje eci Samuele a tẽlisa ci soka anyamo akuãla ale atãlo, oco eye a linga!
Eli wa kukile ale, kuenda omãla vaye, Hafeni la Finehase, ka va fendelele Yehova lonjila ya sunguluka. Ovo, va enda oku pekela lakãi vo tavernakulu! Nye ove o sima okuti oco isiavo a sukilile oku linga?— Eye wa sukilile oku va lemẽla oco va siepo oku linga ovina vĩvi.
Osimbu umalẽhe Samuele a kala oku kula, wa enda oku mola ovina vĩvi omãla va Eli va lingaile. Anga hẽ Samuele wa kuama ovituwa viavo vĩvi?— Sio, eye wa amamako oku linga ovina viwa vina vio longisile olonjali viaye. Ocili okuti, Yehova wa temẽle calua la Eli. Omo liaco, wa tuma uprofeto waye oku sapuila eyambulo lia laikele oku pita lepata lia Eli, ca piãla enene omãla vaye vãvi.—1 Samuele 2:22-36.
Samuele wa amamako oku vumba kumue la Eli vo tavernakulu. Eteke limue luteke, eci Samuele a kala oku pekela, wa yeva ondaka yo vilikiya. Kuenje Samuele wa enda ku Eli, pole Eli wo sapuila hati, sia ku vilikiyile. Ondaka yaco yo vilikiya onjanja yavali. Noke konjanja yatatu eci ondaka yaco yo vilikiya, Eli wa sapuila Samuele oku kumbulula hati: “A Yehova, popia ño. Ukuenje wove o yevite.” Eci Samuele a tambulula, Yehova wa popia laye. Wa kũlĩha eci Yehova a sapuila Samuele?—
Suku wa sapuila Samuele eyambulo a laikele oku nenẽla epata lia Eli. Kuenje omẽle yikuavo Samuele wa kuata usumba woku sapuilako Eli ovina Yehova a popia. Pole Eli wa livondela Samuele hati: “Ku ka ci ndimbike.” Yu Samuele wa sapuilako Eli ovina viosi Yehova a laikele oku linga, ndeci uprofeto Waye a sapuilile Eli tunde kefetikilo. Eli wa kumbulula hati: “Eye muẽle Yehova. A linge eci co sungulukila.” Noke Hafeni la Finehase, va pondiwa kuenda Eli layevo wa fa.—1 Samuele 3:1-18.
Vokuenda kuotembo, “Samuele wa kula, kuenje Yehova wa kala laye.” Samuele layevo wa kala umalẽhe, okuti oyo otembo yi kuete esilivilo lialua kamalẽhe. Ove hẽ o sima okuti Samuele co lelukile oku amamako oku linga eci ca sunguluka pokati ka vana va lingaile eci cĩvi?—Ndaño okuti ka ca lelukile, oku linga eci ca sunguluka, Samuele wa amamako oku vumba Yehova lekolelo vomuenyo waye wosi.—1 Samuele 3:19-21.
Nye ove o sima? Osimbu o kasi oku kula oka kuama hẽ ongangu ya Samuele? Oka amamako hẽ oku linga eci ca sunguluka? Oka kakatela hẽ kolonumbi Viembimbiliya kuenda kovina olonjali viove via siata oku ku longisa? Nda wa ci linga oka sanjuisa Yehova kuenda olonjali viove.
[Etosi pombuelo yemẽla]
a Poku tangela ulandu owu komõla, apa posi o sanga etayo (—), talamapo kamue kuenda u wecelela oku tambulula apulilo volondaka viaye muẽle.
Apulilo:
○ Samuele weya oku vumba ndati vo tavernakulu ya Yehova?
○ Ovitangi vipi Samuele a pita lavio?
○ Ongangu yipi Samuele a sila amalẽhe?