ESAPULO 115

Oluali Luokaliye Palo Posi

TALA oviti evi via lepa ndeti lolonelẽho via fina kuenda olomunda via lepa. Eci hẽ ka ca posokele? Tala ndomo o songe yi kasi loku lila peka lia kamõla u. Talavo olohosi kuenda otuvalu. Ku sanjukila oku kala pocitumãlo cimue ndeci o letele palo?

Suku o yongola okuti ove o kala otembo ka yi pui voluali luokaliye. Eye ka yongola okuti o yeva evalo lohali ndeyi omanu va kasi oku tala koloneke vilo. Embimbiliya lieca ohuminyo eyi kuava va ka kala voluali luokaliye yokuti: ‘Suku oka kala lavo. Okufa kaku ka kala ko vali ndaño oku lila lupongo. Momo ovina viatete via pita.’

Yesu oka linga apongoloko aco a komõhisa. Wa kũlĩha otembo eci cika tẽlisiwa? Ceci eye aka malako ungangala kuenda omanu vãvi palo posi. Ivaluka okuti eci Yesu a kala palo posi wa sakula ovovei osi omanu kuenda wa pindula ava va fa. Yesu wa linga ovina viaco, oco a lekise eci aka linga palo posi eci aka viala Ndosoma yuviali wa Suku.

Sokolola ño ndomo cika fina oku kala voluali luokaliye! Yesu kumue lava a nõla, vaka vialela kilu. Ovo vaka tata ciwa omanu palo posi oco va kale lesanju. Tu kũlĩhĩsi eci tu sukila oku linga oco tuka kuate omuenyo ko pui voluali luokaliye.

Esituluilo 21:​3, 4; 5:​9, 10; 14:​1-3.