Ocipama 13

Atutu Lowanga Ovina Vimue Kaviasungulukile

Satana oyongola okuti ove olinga atutu. Valua vaeca ovilumba kuvakukululu yavo vafa ale osimbu ale kaspiritu oco vavateyuile kovitangi. Valinga eci ndeti omo okuti ovo vakuete usumba walua lunene waspiritu oluali. Ovo vakapa olonela viatutu kimuine ale pamue ovinunga kovoko. Vanyua ale valisieketa “ovihemba” vetimba lokusima okuti eci civaha unene umue. Omanu vamue vaseleka ale vafẽla posi, vokati kolonjo viavo lokulembika ovinjangatela vioviteka vakolela okuti vivateyuila kovitangi viatiamẽla kumbanda. Handi vali vakuavo vakuete ovihilahila “vihemba” lelavoko liokuti eci cikavanenela ekuatiso lialua ndeci kolomilu, ko ku pita ciwa voloseteko vio kosikola, ale koku sanga akãi vafina.

Ekuatiso liavelapo liokutila Satana oku kuata ukamba la Yehova. Yehova Suku kuenda angelo vaye vavelapo vali enene okuti Satana lolondele viaye cisule. (Tiago 2:19; Esituluilo 12:⁠9) Yehova okuete onjongole yalua yokulekisa unene waye voku popela akamba vaye​—⁠vosi vana okuti vapokola muẽle ocili kokuaye.​—⁠2 Asapulo 16:⁠9.

Ondaka ya Suku yilombolola okuti: ‘Koka sumbili owima.’ Yehova opisa atutu kuenda owanga omo okuti omunu wosi ocilingaenga opondola oku kala vemehi liunene wa Satana Eliapu.​—⁠Ovisila 19:26.