Ndomo ku Mioñoluiwa Uloño Woku Sapela

ANGA hẽ olonjanja vialua cu ku leluka oku sapela la vakuene? Komanu valua, ocisimĩlo coku likongela vombangulo, ci va kokela ohele, ca piãla enene lomunu umue ka va kũlĩhĩle. Omanu vaco pamue vakuasõi. Ovo pamue va lipula ndoco: ‘Nye ndi popia? Ndamupi ndi pitila petosi lioku fetika ombangulo yimue? Ndamupi ndi pondola oku amasako ombangulo?’ Omanu vana okuti va likolela haivo va lianja, va kuete ocituwa cokuti ovo lika va vangula. Ocina ca va tĩlila soketi oku ecelela okuti vakuavo va vangulakovo kuenda oku lilongisa oku yevelela eci vakuavo va kasi loku popia. Omo liaco, cikale vakuasõi cikale ava va lianja, vosi yetu tu sukila oku amamako loku lilongisa uloño woku vangula.

Fetikila Konjo

Oco o mioñolole uloño wove woku vangula, momo lie ku ci fetikilila konjo? Ombangulo yiwa yi kuatisa calua koku nena esanju vepata.

Osapi ya velapo yombangulo yaco, oku li kapako pokati. (Esin. 6:6, 7; Olosap. 4:1-4) Nda tua li kapako, tu li vanguisa, kuenda tu yevelela eci ukuetu a yongola oku popia cimue. Ocina cikuavo ca velapo, oku kuata cimue coku popia okuti ci kuete esilivilo. Nda tu kuete esokiyo lioku tanga Embimbiliya olonjanja viosi pokolika, tuka kuata calua coku vangula la vakuetu. Oku tanga lolondunge okalivulu ka tukuiwa hati, Konomuisa Ovisonehua Eteke Leteke ku pondola oku pepisa ombangulo. Vokuenda kueteke, pamue tua pita lulandu umue uwa kupange woku kunda. Ale pamue tua tanga cimue cesapulo ale cimue ci koka ovinjola. Te ci kala ocituwa cetu oku vangula ovina viaco la vakuetu vokuenda kuombangulo yiwa vepata. Eci cika tu kuatisavo oku vangula lomanu vana okuti ha vakuepatalietuko.

Oku Vangula Lomunu Kua Kũlĩhĩle

Omanu valua okuti va suma suma oku fetika ombangulo lomunu umue ka va kũlĩhĩle. Pole, omo lioku sola Suku loku solavo ava va lisungue lavo, Olombangi via Yehova via siata oku likolisilako cocili oku lilongisa ndomo va vangula oco va sapuileko vakuavo ocili ci sangiwa Vembimbiliya. Nye cika ku kuatisa oku mioñoloha konepa eyi?

Onumbi yi sangiwa ko Va Filipoi 2:4, yi kuete esilivilo liocili. Kelivulu liaco tu vetiyiwa okuti: “Lomue ka ka sokolole ovina viaye lika, puãi omunu omunu a sokolole ovina via vakuavo.” Ivaluka okuti: Nda lalimue eteke wa lisangele lomunu umue, eye oku tenda ndocingendelei. Nye o kuete oku linga oco eye a lianje? Ocinjola cimue cesanju kuenda ocilamo cukamba ci kuatisa konepa eyi. Pole kuli vali ovina vimue vi sukila oku vi kũlĩhĩsa.

Ove ci tava okuti o tutuiya ovisimĩlo viaye. Nda hẽ wa seteka oku u kongela vombangulo yi kasi vovisimĩlo viove, pole kua kapeleko eci ci kasi vovisimĩlo viaye, eye hẽ oka ku tambulula muẽle ciwa? Nye Yesu a linga eci a lisanga lukãi umue ocipepi lo ko Samária? Ocisimĩlo cukãi ca kala coku tapa ovava. Yesu wa fetika ombangulo yaye loku yi tiamisila kueci ukãi a kala loku sima, kuenje, lonjanga yalua wa yapuisila ocisimĩlo caco kombangulo yespiritu.​—Yoa. 4:7-26.

Nda okuti ove ukuakukũlĩhĩsa, ci tava okuti oka tẽlavo oku limbuka eci omanu pamue va kasi loku sima. Anga hẽ omunu o molẽha soketi wa sanjuka, ale wa sumua? Omunu waco hẽ wa kuka, kuenda o molẽha soketi ombeyi? Wa limbuka cimue ci lekisa okuti konjo yaco soketi kuli omãla? Anga ci molẽha okuti omunu waco o kuete ovipako vialua? Ale o molẽha soketi o kasi loku yaka oco a sange ovina vi sukiliwa komuenyo? Ovina omunu waco a posuisa lavio onjo yaye ale pamue vievi a li posuisa lavio eye muẽle ketimba, vi lekisa hẽ okuti ukuetavo limue? Nda okuti poku lama kuove ovina evi wa vi kapako, omunu waco oka ku tenda ndomunu umue o kuete onjongole lovina eye a sole.

Nda okuti kua tẽlele oku li mõla lomunu waco oco o sapele laye mẽla la mẽla, pole u yevitile ño konyima yepito lia yikiwa, nye o sima? Omunu waco pamue o kasi lusumba. Ci tava hẽ okuti oku oko o tiamisila ombangulo yove, loku vanguila muẽle pepito liaco lia yikiwa?

Kolonepa vimue, ci tava okuti o kokisa omunu ombili yoku iñila vombangulo yove loku vangula laye eci catiamẽla kokuove muẽle. Ale ceci catiamẽla kesunga lieci weyilila pepito liaye, lesunga lieci wa kolelela Suku, leci o lilongisila Embimbiliya kuenda ndomo olio lia siata oku ku kuatisa. (Ovil. 26:4-23) Ocili okuti, eci ci kuete oku lingiwa lundunguluke kuenda locimãho cimue ca nõliwa ciwa vovisimĩlo. Eci, ci pondolavo oku vetiya omunu waco oku vangula ovina vimue viatiamẽla kokuaye muẽle kuenda ndomo ombangulo yaco a yi tenda.

Kolofeka vimue, va kuete ocituwa coku tambula ciwa omanu vana ovo ka va kũlĩhĩle. Pamue haico muẽle va ku laleka oku iñila vonjo yavo oco o tumãle. Pana okuti wa tumãla, nda wa linga apulilo a sunguluka atiamẽla kekalo liwa liepata liavo kuenda wa yevelela lutate katambululo, omanu wa sanga vaka ku yevelelavo lutate eci ove o kuete coku va sapuila. Omanu vamue va lekisa esakalalo lialuapo vali kakombe, omo liaco, oku lilama kuatete pamue ku tumãla otembo yalua. Poku lilama kuaco, ovo pamue va limbuka okuti ovituwa vimue viavo vimuamue levi viove. Eci ci pondola oku tuala kombangulo yimue yiwa yespiritu.

Nda kocitumãlo o kasi kuli omanu valua va vangula alimi akuavo okuti ku a tẽla oku a vangula, o ci linga hẽ ndati? Ndamupi o pondola oku vangula lomanu vaco? Nda wa lilongisa, ndaño muẽle oku lama ño kumue kua leluka pokati kalimi aco, omanu vaka limbuka okuti o va yonguila uwa. Eci pamue ci yulula onjila yolombangulo vikuavo.

Ndomo Kuamisiwako Ombangulo

Oco ombangulo yamameko, lekisa onjongole kovisimĩlo viukuene. U vetiya oco eye a vangule nda o kuete onjongole yaco. Epulilo limue lia nõliwa ciwa li kuatisa konepa eyi. Apulilo atiamẽla koku pula eci eye a sima, a sunguluka vali momo a sukila oku amisako vali poku tambulula, okuti hakutambululako lika hati oco ale hacoko. Ndeci, noke yoku tukula ocitangi cimue ci kasi loku sakalaisa omanu pocitumãlo, ove ci tava okuti o pula ndoco: “Nye o sima okuti oco ca koka ekalo liaco eli?” ale “Nye o sima okuti oco ci pondola oku mãlako ocitangi caco?”

Eci o linga epulilo limue, yevelela lutate etambululo. Lekisa onjongole yove loku popia ondaka yimue, ale oku kumõha kutue. Ku ka tete kondaka omunu o kasi loku vangula laye. Loku yevelela ciwa, kũlĩhĩsa eci ci kasi loku vanguiwa. ‘Kala ukuanjanga koku yeva, pole koku popia livala.’ (Tia. 1:19) Poku tambulula, lekisa okuti wa kala muẽle oku yevelela lutate eci ca kala loku vanguiwa.

Pole, ivaluka okuti havosiko vaka tambulula apulilo ove. Omanu vamue etambululo vaka eca, pamue lika kala lika lioku tumũla ovisokopia ale ocimemeno. Vakuavo pamue va tambulula lika hati oco ale hacoko. Ka cika ku sumuise. Kala ukuepandi. Ku ka seteke oku kisika omunu oco a vangule. Nda okuti omunu o kuete onjongole yoku yevelela, upa esilivilo kepuluvi liaco loku u sapuila olonumbi vi kolisa vi sangiwa Vembimbiliya. Vokuenda kuotembo omunu waco, oka ku tenda ndekamba liaye. Kuenje, pamue eye oka liyeva vali ciwa oco a lombolole ovisimĩlo viaye lelisanjo.

Osimbu o vangula lomunu, angiliya epasu oka linga koloneke vi keya kovaso. Nda omunu wa linga apulilo alua, tambululako ño amue. Siako epulilo limue ale avali oka tambulula konjanja yikuavo eci oka sapela laye vali. U sapuila okuti oka konomuisa alivulu akuavo, noke u sapuilako eci wa sangamo. Nda okuti ka lingile epulilo lalimue, ove ci tava okuti o malusula ombangulo yene lepulilo limue wa kolela okuti lika vetiya onjongole yaye. U sapuila okuti oka li tambulula konjanja yikuavo eci oko pasuisa. Ovisimĩlo vimue viwa ci tava okuti vi sangiwa velivulu Raciocínios a Base das Escrituras, vombrochura Suku Oyongola nye Kokuetu? kuenda vatendelo okaliye Utala Wondavululi lo vo Despertai!

Poku Vangula la Vamanji

Eci o lisanga la yimue Ombangi ya Yehova onjanja yatete, o kuata hẽ efetikilo lioku kũlĩha omunu waco? Ale unjukila ño apa o kasi? Ocisola tu kuetele vamanjetu te ci tu vetiya oku kuata onjongole yoku va kũlĩha. (Yoa. 13:35) Ndamupi o pondola oku ci fetika? Ci tava okuti o tukula onduko yove kuenda o pulavo onduko yaye. Oku u pula ndomo eye a kũlĩha ocili, ci pondola oku tuala kombangulo yimue yiwa, yika ku kuatisi oku likũlĩha pokati. Ndaño okuti eci wa vangula ci kasi soketi ka ca potolokele enene, elikolisilo liove lika lekisa kokuaye okuti ove wo kapako, kuenda eci oco ci kuete esilivilo lia velapo.

Nye ci pondola oku vetiya okuti o kuata ombangulo yimue yiwa la umue ukuekongelo liene? Lekisa okuti omunu waco wo kapako kuenda epata liaye wa li kapakovo. Anga hẽ ohongele ya pua ale? Vangula eci catiamẽla katosi alomboluiwa wa limbuka okuti a kuete esilivilo lia velapo. Eci, cika ku kuatisi kavali kene. Ci tava okuti o tukula etosi limue wa sanga vocipama cimue Cutala Wondavululi ale vo Despertai!. Ku ka ci lingile oku li lekisa ale oku seteka ukũlĩhĩso. Ci lingila oku sapuilako ukuene cimue wa sanga okuti ci sanjuisa. Ci tava okuti o sapela eci catiamẽla kocipama cimue o kuete Kosikola Yupange Wakristão kuenda oku sapela pokati ndomo ci lingiwa. Ci tava okuti u sapelivo ulandu umue wa pita kupange woku kunda.

Ocili okuti, olonjanja vialua oku lekisa kuetu onjongole komanu, ci tuala kombangulo yatiamẽla komanu, kovina ovo va vangula levi va linga. Esanju li pondolavo oku kala onepa yolombangulo vietu. Nye tuka popia okuti ci vetiya? Nda okuti tua kapako elungulo Liondaka ya Suku kumue loku vetiyiwa locisola ndeci ca Suku, ka kuli atatahãi, ombangulo yetu yika kala ombangulo yimue yi kolisa.​—Olosap. 16:27, 28; Va Efe. 4:25, 29; 5:3, 4; Tia. 1:26.

Osimbu handi ka tua endele kupange woku kunda, tua siata oku liangiliya. Momo lie ku angiliyila okakulia kamue kapepa oco o kalie lakamba vove osimbu u vangolapo? Nda o kasi oku tanga ale oku yevelela cimue ciwa, patekelamo atosi amue o yongola oku sapula ku vakuene. Vokuenda kuotembo, oka kuata atosi alua okuti opo oka nõla eci o popia. Oku ci linga cika ku kuatisa oku amisako vali okuti hakuvangulako lika ekalo liomuenyo weteke leteke.

Ca velapo vali handi, ecelela okuti upopi wove weca uvangi wokuti o sole calua Ondaka ya Suku.​—Osa. 139:17.