Tu Amamiko Oku Kuata Uloño Kupange Woku Kunda Oco tu Fetike Ombangulo Poku Eca Uvangi ka wa Sokiyiwile

Esunga Lieci Ci Kuetele Esilivilo: Eci tu kundila konjo lanjo, olonjanja vimue ka tu sangi omanu vosi kolonjo viavo. Pole, tu pondola oku sapela lavo povitumãlo ndeci: Poku endela vocendelo cimue, poku kevelela ndotolo vo seketa yaye, kelivala liepuyuko kupange, kosikola, kuenda kovitumãlo vikuavo. Yehova ecavo epuluvi lioku yevelela esapulo Liusoma komanu vana okuti ka va sangiwa kolonjo viavo. (1 Tim. 2:3, 4) Olonjanja vimue oco tu ece uvangi, tu sukila oku sanda epuluvi lioku fetika ombangulo lavo.

Ndomo ci Lingiwa:

Kulĩhĩsa ciwa. Anga hẽ omunu waco o kuete onjongole yoku linga ukamba kuenda oku sapela? Anga hẽ, epuluvi liaco lia sunguluka okuti tu sapela laye? Akundi vamue tete va siata oku luluvalela komunu va sanga loku memenapo kamue. Nda omunu waco wa memenapovo kamue citava oku fetika ombangulo laye.
Nda okuti ku kuete utõi woku vangula, linga ohutililo yovutima.—Neh. 2:4; Ovil. 4:29.
Lama, kuenda fetika ombangulo londaka yimue ya leluka. Yesu poku sapela lukãi u Samaria, vonjanja yaco ka fetikile ombangulo yatiamẽla Kusoma. (Yoa. 4:7) Olonjanja vimue citava oku fetika ombangulo poku popia hati: “Omãla vove va kuete ovituwa viwa!” Linga epulilo limue okuti li ecelela oku fetika ombangulo. Pula ndoco: “Ove hẽ wa tala ulandu wo kaliye wa lekisiwa vuteke wa pita”?
Osimbu o fetika ombangulo, sanda epuluvi lioku tiamisila ombangulo yaco poku lombolola olondaka viwa, pole, ku ka ci linge lonjanga. Ci linga lonjila yimue yaleluka. O pondola oku vangula olondaka vi vetiya onjongole yomunu waco okuti o linga epulilo limue kokuove. Nda okuti u kasi oku sapela ovina viatiamẽla komuenyo wepata, o pondola oku popia ndoco: “Nda sanga olonumbi vimue vi kuatisa koku pindisa omãla.” Nda okuti u kasi oku sapela catiamẽla kulandu umue wokaliye, o pondola oku popia ndoco: “Nda tanga esapulo limue liwa okuti nda li sola calua kuenda lia ndi kuatisa oku linga epongoloko.” Nda okuti kua kuatele epuluvi lioku kundila omunu waco ku ka sumue.
Kapa vekolombele liove okokanda kamue ale elivulu likuavo oco ece uvangi komunu umue wa lekisa onjongole.

Seteka Ndoco Vokuenda Kuosãi:

Olosemana viosi li kolisilako oku fetika ombangulo yimue locimãho coku eca uvangi ka wa sokiyiwile.