Esanju

ESANJU likuatisa oku eca ongusu kohundo. Ndaño okuti oku sapula ocipama lelomboloko ci kuete esilivilo, oku linga ohundo lesanju ci kuatisa oku vetiya ovitima violonjeveleli. Cikale okuti wa citiwila vekalo lioku lianja ale sio, esanju ocituwa cimue ove o kuete oku likolisilako oku lekisa.

Vangula Levetiyo Liovutima. Eci Yesu a vangula lukãi u Samaria, wo sapuila hati ava va fendela Yehova va kuete oku ci linga “lespiritu locili.” (Yoano 4:24) Oku fendela kuavo te ku vetiyiwa lutima wa sanjuka, kuenda te kua tiamẽla kocili ci sangiwa Vondaka ya Suku. Nda omunu o kuete esanju liaco vutima waye, cika limbukiwila koku vangula kuaye. Eye oka kuata onjongole yoku vangula la vakuavo eci catiamẽla kaliangiliyo a Yehova ocisola. Emolẽhiso liocipala caye, oku ilaika kuaye kuenda ondaka yaye, cosi cika lekisa ndomo a liyevite kueci catiamẽla kondaka a kasi loku vangula.

Oco hẽ, momo lie okuti ohundi yimue yi sole Yehova haiyo yi tava kueci yi kasi loku popia, lopo muẽle ka yi lekisa esanju poku vangula? Kokuaye, oku pongiya lika eci aka vangula ka ci tẽla. Eye o sukila oku likongela vonepa yaco lutima waye wosi, okuti ovisimĩlo viaye viosi oko a vi tiamisila. Ndeci, tu sima okuti eye oka linga ohundo yatiamẽla kocilumba cocisembi ca Yesu Kristu. Eci hundi a linga ohundo yaco, utima waye te ka weyukisilue lika latosi aka vangula, puãi te weyukisua lolopandu omo lieci ocilumba ca Yesu co lingila kuenda olonjeveleli viaye. Eye o sukila oku lekisa olopandu a yevite vutima waye kueci catiamẽla ku Yehova Suku kuenda ku Yesu omo lieliangiliyo liaco liocisola. Eye o sukila oku tiamisila ovisimĩlo viaye kelavoko liomuenyo ko pui li kasilili omanu vosi kuenda oku sokololavo esanju ka li pui lioku ka kala vofeka yelau luhayele wa suapo! Omo liaco, eye o sukila oku tiamisila utima waye kovina evi.

Catiamẽla kusonehi Esera haeye wa kala ulongisi ko Isareli, Embimbiliya lipopia hati “wa litumbik[ile] [c]ocili [k]oku lilongisa ondaka ya Suku loku yi pokola loku longisa va Isareli ovihandeleko viayo lovisila viayo.” (Esera 7:10) Nda oco tua lingavo, okuti ka tu pongiya lika ocipama tuka lekisa pole tu pongiyavo utima wetu, eci tuka vangula tuka ci vangula lutima wetu wosi. Olondaka viaco vi tunda kutima, vi kuatisa calua koku vetiya ava va yeva eci tu vangula oku sola calua ocili.

Sokolola Eci Catiamela Kolonjeveleli Viove. Onjila yimue ya velapo koku molehĩsa esanju, oku kuata ekolelo liokuti olonjeveleli viove vi sukila oku yeva eci o yongola oku va sapuila. Eci ci lomboloka okuti, poku pongiya eci oka lekisa kolonjeveleli viove, ku ka luluvalele lika koku kongela alomboluilo oka sukila, puãi likutililavo ku Yehova oco a ku kuatise oku lombolola ocipama caco lonjila yimue okuti ci kuatisa ava oka vangula lavo. (Osa. 32 :8; Mat. 7:7, 8) Kũlĩhĩsa esunga lieci olonjeveleli viove vi sukilila oku yeva ulandu waco, kuenda ndomo uka va kuatisa. Kũlĩhĩsavo ndomo o pondola oku yevalisa ulandu waco lonjila yimue okuti ovo va limbuka esilivilo liayo.

Talavaya vocipama cove toke eci o limbuka okuti ci ku sanjuisa. Ocipama caco ka ci sukila ño okuti ci kala cokaliye, pole onjila ndomo o ci lekisa te oyo ya lekisa ukaliye waco. Nda okuti o kasi loku pongiya ocipama cimue cika kuatisa olonjeveleli viove oku pamisa ukamba wavo la Yehova, loku sola aliangiliyo aye, kuenda oku litunda ciwa koku liyaka lasipato omuenyo woluali lulo, ale oku va vetiya oku kala vakuambili kupange woku kunda, o kuete esunga lialua lioku lekisa ohundo yaco lesanju.

Nda hẽ wa tambula onepa yoku tangela owiñi? Oco o ci linge lesanju, o sukila oku linga vali calua okuti haku tokekako lika ciwa olondaka loku vi tukula ciwa. Lilongisa ciwa ocipama caco. Nda wa lunga loku tanga onepa yimue Yembimbiliya, konomuisa vimue viatiamẽlako. Tala nda ca ku lomboloka ciwa. Kũlĩhĩsa ndomo cika ku kuatisa ove muẽle kuenda ndomo cika kuatisavo olonjeveleli viove. Ci tanga lonjongole yoku ci pitiya komanu va kasi loku ku yevelela.

Anga hẽ o kasi oku lipongiyila oku enda kupange woku kunda? Konomuisa ondaka oka vangula kuenda ovisonehua wa sokiya oku ka tanga. Kũlĩhĩsavo, eci ci kasi vovisimĩlo viomanu. Asapulo api o kaliye va yevite? Ovitangi vipi ovo va kasi loku liyaka lavio? Eci o lipongiyila oku lekisa komanu okuti Ondaka ya Suku yi kuete eci ci sukiliwa koku tetulula ovitangi va kasi oku liyaka lavio, ove oka yeva onjongole yoku va ci sapuila, kuenje esanju likeya olio muẽle.

Lekisa Esanju Poku Linga Onepa Yove. Esanju li muĩwila vali enene koku linga kuove ohundo lombili. Eci te ca limbukiwila kemolẽhiso liocipala cove. Ove te wa li molehĩsa okuti wa kolela kueci o kasi loku vangula, pole kuka ci linge luhãlo.

Ci sukila oku pita ño pokati. Vamue va kuete ocituwa coku lekisa esanju lia piãla kovina viosi. Ovo va sukila oku kuatisiwa oco va limbuke okuti, eci omunu a pitahãisapo vali enene koku lekisa esanju, olonjeveleli vika tiamisila vali enene ovisimĩlo viavo kokuaye okuti kohundo yaye hakoko. Handi vali, vana okuti vakuasõi va sukila oku kuatisiwa oco va lekise vali esanju koku vangula kuavo.

Esanju li sambuka. Nda wa vanja vanja kolonjeveleli viove kuenda ohundo yove wa sanjuka layo, olonjeveleli viove vika sanjukavo. Apolosi wa lekasaile esanju koku vangula kuaye, kuenda wa kũlĩhĩwile okuti ohundi yimue yaloñoloha. Nda weyukisua lespiritu sandu lia Suku, ohundo yove yesanju yika vetiyila olonjeveleli koku linga eci va yeva.​—Ovil. 18:24, 25; Va Rom. 12:11.

Esanju Lisesamẽla Kocipama Cika Lekisiwa. Kuata utate wokuti ku pitahãisapo enene oku lekisa esanju, kuenda ku lekisavo esanju vokuenda kuohundo yove yosi, sanga olonjeveleli viove vika kava. Kuenje evetiyo liosi oka eca lioku linga eci ci kasi loku lomboluiwa, ka lika kapiwako. Eci ci lekisa esilivilo lioku pongiya ocipama cove lonjila yimue okuti, yiku ecelela oku pongoyolola oku lingiwa kuohundo yove. Kuata utate oco kuka kupukile voku linga ohundo yove locituwa cimue hacukambako. Nda wa nõla ciwa eci oka lombolola, oka kuatavo onjongole laco. Ocili okuti atosi amue a sukila vali oku a lekisa lesanju okuti akuavo ci sule. Voku lingiwa kuohundo yove eci te ca lekisiwa.

Atosi a velapo a sesamẽla oku lekisiwa lesanju. Ohundo yove te yi kuata atosi a velapo okuti kilu liaco oko o vokiya alomboluilo akuavo. Omo okuti atosi aco o-o a velapo vohundo yove, atosi aco a kuete oku nõliwila oku vetiya olonjeveleli. Pana okuti wa vetiyila ale olonjeveleli koku tava eci ca vanguiwa, o sukila oku va lekisa asumũlũho eyilila koku kapako eci ca lomboluiwa. Esanju liove lika ku kuatisa oku veta kovitima violonjeveleli viove. Oku linga ohundo lesanju lalimue eteke ku kisikiwa. Te ku kala esunga lieci omunu a lekisila esanju. Ocipama oka tambula oco cika ku ĩha esunga liaco.