Ocipama 16
“Kolisiko Oku Lisola Pokati”
1. Olonjanja vialua nye ca siata oku komõhisa ava va enda onjanja ya tete kolohongele Violombangi via Yehova?
ECI omanu va enda onjanja yatete kolohongele Violombangi via Yehova, olonjanja vialua va siata oku komõha omo liocisola ci lekisiwilamo. Ovo va limbuka okuti va va yolela lesanju lialua. Vana va siata oku enda kolohongele vietu viofeka va limbukavo ocisola eci. Catiamẽla kohongele yimue yofeka, ulume umue wa soneha hati: ‘Lomue wa kala lava va sipa epangue ale vava va nyua ovinyua vi koluisa. Ka pa kale oku yuela ndaño oku kaloka. Ka pakale oku lisinda, oku limba olohokolua, oku lisiñala, oku livanguisa olondaka vĩvi, kuenda oku nyana. Lomue wa imba oviwala powangu. Cakala ocina cimue okuti ka ca siatele oku muiwa.’ Cosi eci ocindekaise cocisola cina okuti “ka ci lingi akutisasõi; ka ci lisandela ovina viaco muẽle.”—1 Va Korindo 13:4-8.
2. (a) Nye ci kuete oku lekisiwa vokuenda kuotembo catiamẽla kocisola cetu? (b) Loku setukula Kristu, tu sukila oku kuata ocisola cipi?
2 Ocisola oco ondimbukiso Yakristão vocili. (Yoano 13:35) Osimbu tu amamako oku loñoloha kespiritu, tu lilongisa vali oku lekisa ocisola. Upostolo Paulu wa likutilila oco ocisola ca vamanjaye Akristão “ci lue.” (Va Filipoi 1:9) Upostolo Yoano wa lombolola okuti, ocisola cetu te ci lieca oco muẽle. Eye wa soneha hati: “Omo [Omõla a Suku] a tu ecela omuenyo waye, oco tua kũlĩha ocisola ndomo ci kasi. Ca tu sesamela oku ecela vakuetu ovimuenyo vietu.” (1 Yoano 3:16; Yoano 15:12, 13) Tu ecela muẽle omuenyo wetu vamanjetu? Ndaño okuti halonjanja viosiko ekalo li ci kisika, toke petosi lipi tu pondola oku likolisilako oku kuatisa vamanjetu, ndaño vapuluvi a tĩla?
3. (a) Vonepa yipi tu pondola oku lekisa ciwa ocisola cetu? (b) Momo lie ci kuetele esilivilo oku lisola pokati cilo?
3 Kumue lovilinga vi lekisa ocisola coku lieca, tu sukila oku lekisa esanju liocili ku vamanjetu. Ondaka ya Suku yi tu vetiya hati: “Lisoli pokati ndomunu la manjaye.” (Va Roma 12:10) Vosi yetu tu kuete ocisola caco lomanu vamue. Pole ci tava hẽ okuti tu ci lekisavo komanu vakuavo? Omo okuti tu kasi koloneke vilo via sulako, ci kuete esilivilo oku tokekisa vali ukamba la vamanjetu Akristão. Embimbiliya lia popia hati: “Esulilo liovina viosi li kasi ocipepi. . . . Cinene ceci, Kolisiko oku lisola pokati, momo ocisola ci tuvika akandu a lua.”—1 Petulu 4:7, 8.
Ceci Kuiya Ovitangi
4. (a) Momo lie ci tavela okuti pokati ka vamanji vekongelo peya ovitangi? (b) Ndaño okuti halonjanja viosiko tu pondola oku cilinga, ovina vipi viyilila koku kapako alungulo Embimbiliya?
4 Ocili okuti osimbu handi ka tua lipuile, olonjanja vimue tuka lueyela vakuetu. Vamanjetu vaka tu lueyelavo olonjanja vialua kuenda volonepa viñi viñi. (1 Yoano 1:8) Nda weya oku sanga ekalo liaco nye o kuete oku linga? Ovisonehua vieca olonumbi vi sukiliwa. Pole olonjanja vimue eci Ovisonehua vi popia ci tava okuti ka ci liendi lekalo lietu omo okuti ka tua lipuile. (Va Roma 7:21-23) Omo liaco, oku likolisilako kuetu koku kapako elungulo li sangiwa Vembimbiliya, cika eca uvangi wokuti tu kuete muẽle onjongole yoku sanjuisa Yehova. Handi vali oku cinga cika pamisavo ocisola tu kuetele vakuetu.
5. Nda okuti umue wa tu lueyela momo lie ka tu kuetele oku ci kapako?
5 Pamue omunu nda vo lueyela o linga cosi ci tava oco a fetuluinye u wo lueyela. Pole eci ci pondola lika oku nena ovitangi. Nda okuti ci sukiliwa efetuluinyo, tu kuete oku ci sia peka lia Suku. (Olosapo 24:29; Va Roma 12:17-21) Vamue va siata oku liwekapo oku vangula lomunu wa va lueyela. Pole eci hacoko tu kuete oku linga la vamanjetu. Oku taviwa kuefendelo lietu kua tiamisiwila kocisola tu kuetele vamanjetu. (1 Yoano 4:20) Omo liaco, Paulu wa soneha hati: “Kuati utima woku kuamelela loku lisola pokati. Kuenda, nda vu likuetele olondaka, lieceli pokati. Ndeci [Yehova] o weceli ene, haico ene eceli.” (Va Kolosai 3:13) Ndamupi o pondola oku ci linga?
6. (a) Ndamupi tu pondola oku ecela vamanjetu olonjanja vialua? (b) Elomboloko lipi liatiamẽla kokuetu muẽle lika tu kuatisa oku linala lakandu va tu lingila?
6 Nye hẽ ci lingiwa nda umue o tu lueyela olonjanja vialua pole ekandu liaco halinako li koka oku tundisiwa vekongelo? Catiamẽla kakandu vaco vatito, upostolo Petulu wa simĩle hati omunu o kuete lika oku ecela “olonjanja epandu vali.” Pole Yesu wa popia hati: “Si popi love siti, olonjanja epanduvali, puãi mopia siti, akui epanduvali kolonjanja kolonjanja epanduvali.” Yesu wa tukula ofuka tu kuetele Suku loku ci sokisa lomunu umue wa tu levala. (Mateo 18:21-35) Tua siata oku lueyela Suku volonepa viñi viñi, ndeci poku lisola etu muẽle, poku popia cimue ale leci tu sima kuenda kovilinga vietu, pole ka tu limbuka okuti tu kasi loku linga ekandu. (Va Roma 3:23) Pole, Suku o kasi oku amamako oku lekisa ohenda yaye kokuetu. (Osamo 103:10-14; 130:3, 4) Eye o tu yonguilavo okuti tu li kuatela ohenda. (Mateo 6:14, 15; Va Efeso 4:1-3) Kuenje tu ka lekisa ocisola cina “ka ci patekela onyeño.”—1 Va Korindo 13:4, 5; 1 Petulu 3:8, 9.
7. Nda okuti manji umue o tu kuetele onyeño nye tu kuete oku linga?
7 Olonjanja vimue pamue, ndaño okuti etu ka tu kuete onyeño la manjetu, eye pamue o tu kuetele onyeño. Tu sukila oku ‘ci tuvika locisola,’ ndomo ca sonehiwa kelivulu lia 1 Petulu 4:8. Ale tu kuete oku kuata efetikilo lioku vangula laye loku likolisilako oku kuata vali ukamba wombembua.—Mateo 5:23, 24.
8. Nda manji umue wa tu lingila cimue ci tu sumuisa, olonjanja vimue hĩse oku linga nye?
8 Pamue manji umue o kasi loku linga ocina cimue okuti ci pondola oku ku sumuisa loku sumuisavo vakuene. Ka ciwa ko hẽ oku vangula laye oco a lunguiwe? Pamue ciwa. Nda wo lomboluila ocitangi caco locisola, pamue ku keyilila onima yiwa. Pole, tete hĩse o lipule ove muẽle: ‘Eci eye a linga anga Embimbiliya li ci pisa muẽle? Ale ocitangi caco ceya omo okuti ekalo liange lekalo liaye lia litepa?’ Konepa eyi lunguka oco kuka tumbike ovihandeleko viove muẽle loku u pisa omo liovihandeleko viaco. (Tiago 4:11, 12) Yehova omo okuti ka kuete ocame, o tava omanu vakuavisoko viñi viñi kuenda ova kuetele epandi osimbu va amamako oku loñoloha kespiritu.
9. (a) Nda okuti kua lingiwa ekandu limue linene vekongelo, kulie tu kuete oku lekisa esakalalo? (b) Vepuluvi lipi u va lueyela a kuete oku lingako cimue, kuenda lesilivilo lie?
9 Nda umue vekongelo wa linga ekandu linene, ndeci ukahonga, tu kuete oku lekisa esakalalo lonjanga yalua. Kulie? Kakulu vekongelo. (Tiago 5:14, 15) Nda umue vo lingila ekandu limue, okuti pamue ekandu liaco liatiamẽla komilũ ale ka tatele ciwa elimi liaye kuenje wa valula umue londaka ya tĩla, una va lueyela o kuete oku likolisilako tete oku kuatisa u wa lueya, pole o kuete oku ci lingila pokolika. (Mateo 18:15) Nda okuti ocitangi caco ka ca potoluiwile, alianga akuete oku kuamiwa a lomboluiwa kelivulu lia Mateo 18:16, 17. Ocisola tu kuetele manjetu wa tu lueyela kuenda onjongole yoku u ‘popela,’ cika tu kuatisa oku likolisilako oku vetiya utima waye.—Olosapo 16:23.
10. Eci kuiya ovitangi, nye cika tu kuatisa oku tenda ovitangi viaco ndomo mu taviwa?
10 Eci kuiya ovitangi ci kale vinene ci kale vitito, tu pondola oku kuatisiwa oku likolisilako oku sanga elomboloko ndomo Yehova a tenda ocitangi caco. Eye ka tava ekandu, kuenje votembo yaye ya sokiyiwa u wa linga ekandu linene okuti ka tava oku likekembela, o tundisiwa vohongele yaye. Omo liaco ka tu ka ivaliko okuti vosi yetu tu lueya lovina vitito, kuenda tu sukila ongecelo yaye locisola caye. Yehova wa tumbika ongangu yimue oco tu yi kuame eci tu linala lakandu a vakuetu. Poku kala lohenda, tu lekisa ocisola caye.—Va Efeso. 5:1, 2.
Sanda Onjila Yoku ‘Lianja’
11. Momo lie upostolo Paulu a vetiyila va Korindo oco va ‘lianje’?
11 Upostolo Paulu wa pamisa ekongelo lio Korindo lia kala ko Helasi vokuenda kuolosãi vialua. Eye wa likolisilako calua oku kuatisa vamanji, kuenda wa va solele. Pole, vamue pokati kavo ka vo kuatelele ocisola. Ovo vaenda loku u pisa calua. Eye wa va vetiya oku ‘lianja’ koku lekisa ocisola. (2 Va Korindo 6:11-13; 12:15) Vosi yetu tu linga ciwa poku kũlĩhĩsa ndomo tu pondola oku lekisa ocisola ku vakuetu loku sanda olonjila vioku lianja.— 1 Yoano 3:14.
12. Ndamupi tu pondola oku pamisa ocisola cetu ku vosi vekongelo?
12 Vekongelo muli hẽ vamue okuti ca tu tĩlĩla oku livala lavo ukamba? Nda okuti tua siapo oku luluvalela ka ku lueya etu atito, ndeci tu yongola okuti oco vakuetu va tu lingila, ci pondola oku tu kuatisa oco pokati ketu pa kale ukamba uwa. Ekalo lietu lavo lika mioñolohavo nda tu sanda kokuavo ovituwa viwa loku luluvalela kokuavio. Ka kuli atatãhãi eci cika pamisa ocisola tu va kuetele.—Luka 6:32, 33, 36.
13. Ndamupi tu pondola oku lianja poku lekisa ocisola kuava va kasi vekongelo lietu?
13 Ocili okuti, havinaviosiko tu pondola oku lingila vakuetu. Pamue ka tu pondola oku lama vosi yavo kohongele lohongele. Pamue ka tu pondola oku laleka akamba vosi ko ndalelo yimue. Pole, ci tava hẽ okuti tu lianja poku pesela ño akukutu amue atito oco tu kũlĩhe ciwa umue o kasi vekongelo lietu? Ci tava hẽ okuti olonjanja vimue tu laleka umue ka tua kũlĩhĩle ciwa oco tu talavaye laye kupange woku kunda?
14. Eci tu kala pokati Kakristão vana okuti ka tua la lisanga lavo, ndamupi tu kuete oku li lekisila ocisola?
14 Olohongele Viakristão vieca epuluvi liwa lioku lianja kocisola cetu. Pamue ku kala olohulukãi viomanu. Ka tu pondola oku sapela la vosi yavo, pole tu pondola oku lekisa ovituwa vi lekisa okuti tua kapako uwa wavo kovaso loku linala kuetu lavo. Kapuluvi ana oku puyukapo tu pondola oku lekisa okuti vakuetu tua vakapako poku kuata efetikilo lioku kũlĩha vamue pokati kavo. Ku keya eteke limue okuti omanu vosi alume lakãi vaka kala vamanji, vaka li kuata omunga oku fendela lika Suku yocili, haeye Isia ya vosi. Hesanjukuolio cika kala, oku li kũlĩha omunu lukuavo! Ocisola cika tu vetiya oku ci linga. Momo lie ku ci fetikila muẽle cilo?
Apulilo Voku Pitulula
• Eci pokati Kakristão peya ovitangi, ndamupi vi kuete oku potoluiwa, kuenda momo lie?
• Osimbu tu amamako oku loñoloha kespiritu ndamupi ocisola cetu ci kuete oku kulavo?
• Ci tava ndati oku lekisa ocisola lomanu valua okuti kakamba vetu lika hakoko?
[Elitalatu kemẽla 148]
Ocisola Cakristão ci lekisiwila volonjila vialua, ndeci kolohongele viekongelo