Ocipama 19
Amamako Oku Vangula Ondaka ya Suku Lutõi
1. (a) Olondaka vipi viwa olondonge via Yesu via kunda? Ndamupi vamue va Yudea va tambuluiya? (b)Apulilo api tu kuete oku linga?
PA PITA ale 2.000 kanyamo tunde eci Yesu Kristu a vialekiwa oku kala Osoma ya palo posi koloneke viokovaso. Yesu wa pondiwile lovanyali vaye vakuetavo, pole Yehova wo pindula pokati kava va fa. Vonduko ya Yesu kaliye ci tava oku kuata elavoko liomuenyo ko pui. Eci olondonge via Yesu via kunda olondaka viwa viatiamẽla kepinduko liaye, va fetika oku suvukiwa. Vamue pokati kavo va kapiwa vokayike, va tipuiwa kuenje va va handeleka oku liwekapo oku vangula catiamẽla ku Yesu. (Ovilinga 4:1-3, 17; 5:17, 18, 40) Nda hẽ va linga nye? Nda ca kale ove nda wa ci linga ndati? Nda wamamako oku kunda lutõi?
2. (a) Olondaka vipi viokaliye vi komohĩsa vi kuete oku kundiwa koloneke vietu? (b) Helie o kuete ocikele coku kunda olondaka viwa?
2 Kunyamo wo 1914 Soma Yusoma wa Suku, Yesu Kristu, wa vialekiwa kilu oco a viale ‘pokati kovanyali vaye.’ (Osamo 110:2) Noke, Satana lolondele viaye va imbiwa palo posi. Tunde opo kua fetika oloneke via sulako violuali lulo lũvi. (Esituluilo 12:1-5, 7-12) Eci otembo eyi yi pitila kesulilo, Suku oka nyõla oluali lulo lu kasi loku tumĩliwa la Satana. (Daniele 2:44; Mateo 24:21) Ava vaka puluka vaka kuata elavoko liomuenyo ko pui vofeka yimue yelau. Nda okuti ove wa tava kolondaka evi viwa, oka kuata ombili yoku sapuilako vakuene. (Mateo 24:14) Pole etambululo lipi o lavoka?
3. (a) Omanu va tambuluiya ndati kesapulo Liusoma? (b) Tu kuete oku liyaka locitangi cipi?
3 Eci ove o kunda olondaka viwa Viusoma, pamue vamue va ku tava, pole onepa yomanu valua ka vaka tava. (Mateo 24:37-39) Vamue pamue vaku yola epembe ale vaku suvuka. Yesu wa eca elungulo liokuti oka suvukiwa muẽle lavakuepata liove. (Luka 21:16-19) Oka suvukiwavo kupange wove ale kosikola. Kolofeka vimue, Olombangi via Yehova vi kasi handi vesipato liolombiali. Eci o liyaka lekalo liaco, handi wamamako oku kunda lutõi ondaka ya Suku loku ‘amamako vekolelo’?—1 Va Korindo 16:13.
Ka tu Kolela Kongusu Yetu Muẽle
4. (a) Ocina cipi cavilapo cisukiliwa oco tu linge afendeli va koleliwa va Suku? (b) Momo lie olohongele Viakristão vi kuetele esilivilo lialua?
4 Ekisika limue liavelapo lioku kala ufendeli wakolelua wa Yehova, oku kolela kovina eye a siata oku tu ĩha. Yimue pokati kovina viaco, olohongele viekongelo. Embimbiliya li tu lungula oco ka tu ka vi tombi. (Va Heveru 10:23-25) Ava va siata oku amamako oku kala Olombangi via Yehova via koleliwa, va siata oku endaenda kolohongele olonjanja viosi lavamanjavo vetavo. Volohongele viaco, ukũlĩhĩso wetu watiamẽla Kovisonehua u livokiya. Kuenda ombili yetu kocili lelomboloko ndomo tu kuete oku cikapako, yi livokiya. Ukamba wetu lavamanjetu Akristão vefendelo u pamisiwa vali. Ku vetiyiwa oku linga ocipango ca Suku. Espiritu lia Yehova lieca olonumbi vonduko yekongelo, kuenda Yesu o kala pokati ketu vonduko yespiritu eli.— Mateo 18:20; Esituluilo 3:6.
5. Eci Olombangi via Yehova vi kala vesipato, nye va siata oku linga catiamẽla kolohongele?
5 Wa siata hẽ oku endaenda kolohongele olonjanja viosi loku kapako eci wa siata oku yevako? Olonjanja vimue, eci Olombangi via Yehova vi kala vesipato, ci sukila okuti ovo va linga olohongele viavo vovimunga vitito, volonjo via vamanji. Ovitumãlo viaco, ale elivala liaco li pondola oku pongoloka, kuenda halonjanja viosiko ci tẽliwa, momo olohongele vimue pamue vi lingiwa kuteke walua. Ndaño ndoco, vamanji alume lakãi vakuekolelo va litumbika koku kala kala kolohongele viosi.
6. Lonjila yipi tu pondola oku lekisa ekolelo lietu ku Yehova? Kuenda eci ci pondola ndati oku tu kuatisa koku amamako oku vangula lutõi?
6 Ekolelo ku Yehova li pamisiwa, poku lupukila kokuaye olonjanja viosi vohutililo yi lingiwa lutima wosi, poku limbuka okuti tu sukila ekuatiso liaye. Oco hẽ wa siata oku linga? Vokuenda kupange waye palo posi Yesu wa likutilila olonjanja vialua. (Luka 3:21; 6:12, 13; 22:39-44) Kuenda vuteke osimbu handi ka valeliwile kuti wa vetiya olondonge viaye hati: “Lavululi, kuenda likutilili okuti eyonjo ka liu sangi.” (Marko 14:38) Nda okuti omanu ka va tavele kesapulo Liusoma pamue tu yonjiwa oku tepulula ombili kupange wetu woku kunda. Eci omanu va tu yola epembe ale va tu suvuka, pamue tu sanga eyonjo lioku liwekapo oku kunda oco tu yuvule ovitangi. Pole nda tua likutilila lutima wosi, poku pinga espiritu lia Suku oco li tu kuatise koku amamako oku vangula lutõi, tu teyuiliwa kayonjo ava.—Luka 11:13; Va Efeso 6:18-20.
Esapulo Lilekisa Utõi Kupange Woku Kunda
7. (a) Momo lie elivulu Liovilinga li kuetele esilivilo lilikasi kokuetu? (b) Tambulula apulilo a sangiwa kesulilo liocinimbu eci, loku lombolola ndomo olonumbi evi vi pondola oku tu kuatisa
7 Elivulu Liovilinga li kuete esilivilo lilikasi kokuetu. Li lombolola ndomo ovapostolo kuenda olondonge viatete va kala ndetu, va yula ovitangi loku lekisa oku kala Olombangi via Yehova vakuotõi. Tu kũlĩhĩsi onepa yimue yelivulu eli lekuatiso liapulilo kuenda liovinimbu via tukuiwa. Poku ci linga, konomuisa esilivilo ove o pondola okupa kueci o tanga.
Ovapostolo hẽ va kala omanu va kuavisoko vinene? Va kala hẽ vakuotõi, okuti nda vekalo lie nda lie? (Yoano 18:17, 25-27; 20:19; Ovilinga 4:13)
Nye ca loñoluisa Petulu oku vangula lutõi kombonge kuna va pisa Omõla a Suku? (Mateo 10:19, 20; Ovilinga 4:8)
Nye ovapostolo va linga vokuenda kuolosemana via kambeleko oco va ambatiwe kombonge? (Ovilinga 1:14; 2:1, 42)
Eci olombiali via handeleka ovapostolo oco va liwekepo oku kunda catiamẽla konduko ya Yesu, Petulu la Yoano va tambulula ndati? (Ovilinga 4:19, 20)
Noke yoku eciwa, kulie ovapostolo va lupukila vali lokupa ekuatiso? Va likutilila hẽ oco olombiali vi liwekepo oku va suvuka? Nye hẽ va likutililila? (Ovilinga 4:24-31)
Ndamupi Yehova a eca ekuatiso eci ovanyali va seteka oku tateka upange woku kunda? (Ovilinga 5:17-20)
Ndamupi ovapostolo va lekisa okuti va kuata muẽle elomboloko lieci vava ecela? (Ovilinga 5:21, 41, 42)
Ndaño muẽle ceci va enda loku va sandowala kolonepa vikuavo omo lioku suvukiwa, va amamako oku linga nye? (Ovilinga 8:3, 4; 11:19-21)
8. Ocina cipi ci sanjuisa ceyilila kupange wolondonge viatete, kuenda ndamupi tua kongeliwamo?
8 Upange woku kunda olondaka viwa ka wa kale wolivova. Ci soka 3.000 kolondonge via papatisiwa “kua vokiyiwa va lua va tava ku Ñala, owiñi walume lakãi.” (Ovilinga 2:41; 4:4; 5:14) Vokuenda kuotembo, toke muẽle umue wa temẽle vali koku suvuka omanu va Suku, Saulu u Tarso, wa lingavo Ukristão kuenda lutõi walua wa kunda ocili. Eye weya oku kũlĩhĩwa londuko yupostolo Paulu. (Va Galatia 1:22-24) Upange wa fetikiwa kocita catete ka wa liwekelepo. Wa siata oku kuata ongusu yalua koloneke vilo via sulako, kuenda wa li sanduila kolonepa viosi violuali. Tu kuete esumũlũho lioku pangako onepa. Poku ci linga ci tava okuti tu lilongisila kongangu yaeciwa lolombangi vakuekolelo kosimbu.
9. (a) Vapuluvi a pi Paulu a eca uvangi? (b)Volonjila vipi ove o kunda olondaka Viusoma ku vakuene?
9 Eci Paulu a lilongisa ocili catiamẽla ku Yesu, nye a linga? Eye “haico muẽle a kundila Yesu volosunangonga okuti eye Mõla a Suku.” (Ovilinga 9:20) Wa limbukile ocali Suku a tu kuatela kuenda wa limbukilevo okuti vosi va sukila oku kũlĩha olondaka viwa eye a tambuile. Paulu wa kala u Yudea, kuenje ndocituwa koloneke, viaco eye wa endaenda volosunangonga oku eca uvangi. Wa kundalavo vonjo lanjo kuenda wa endaenda oku vangula lomanu povila. Kuenda wa kuata onjongole yoku endaenda kovikanjo ka va la kundila oco aka kunde olondaka viwa.—Ovilinga 17:17; 20:20; Va Roma 15:23, 24.
10. (a) Ndamupi upostolo Paulu a lekisa okuti ndaño wa kala ukuotõi, wa enda loku eca uvangi lundunguluke? (b) Ndamupi tu pondola oku lekisa ovituwa via Paulu eci tu eca uvangi ku vangandietu, kuava tu talavayela lavo ale ava tu tangela lavo kosikola?
10 Paulu wa kala ukuotõi pole wa kuatavo undunguluke, kuenje haico tu kuetevo oku kala. Wa lomboluila va Yudea eci catiamẽla kolohumĩnyo Suku a lingila olosekulu viavo. Ku va Helasi, wa vangola eci catiamẽla kovina va kũlĩha. Pamue wa lomboluale ovina a lipita lavio osimbu a kala loku lilongisa ocili, ndonjila yoku eca uvangi. Eye wa popia hati: “Cosi ndi ci lingila ondaka yiwa, okuti lamevo ndi yi sumũlũhila.”—1 Va Korindo 9:20-23; Ovilinga 22:3-21.
11. (a) Paulu wa lingaile nye, oco a yuvule ovitangi lovanyali vaye? (b) Vepuluvi lipi ca sunguluka oku lekisa ongangu ya Paulu kuenda ndamupi? (c) Kupi ku tunda ongusu yetu yoku amamako oku vangula lutõi?
11 Eci okuti oku suvukiwa kua kisika Paulu oku kundila kovitumãlo vikuavo, eye wa ci lingaile pole ka lingaile ovama lovanyali vaye. (Ovilinga 14:5-7; 18:5-7; Va Roma 12:18) Ka la kuatela osõi olondaka viwa. (Va Roma 1:16) Ndaño okuti Paulu ka solaile ekangiso liungangala a tambula peka liovanyali vaye, eye wa “kuata utõi vu Suku yetu” oco amameko oku kunda. Eye wa popia hati: “Ñala, eye wa ñaila onyima, haeye wa nyiha ongusu yoku kunda ondaka.” (1 Va Tesalonike 2:2; 2 Timoteo 4:17) Yesu, Utue wekongelo Liakristão, o kasi loku amamako oku tu ĩha ongusu tu sukila, oco tu linge upange a popele okuti uka lingiwa koloneke vietu vilo.—Marko 13:10.
12. Utõi Wakristão u lekisa nye, kuenda yipi ono yaco?
12 Tu kuete esunga lialua lioku vangula ondaka ya Suku lutõi, ndeci ca linga Yesu kuenda afendeli vakuavo va Suku kocita catete. Eci ka ci lomboloka okuti ka tu kapiko ava tu kundila ale tu seteka oku silĩha ava ka va yongola oku yevelela esapulo liaco. Pole ka tu liwekapo omo ño omanu ka va tava. Ka tu liwekapovo omo lioku suvukiwa. Ndeci Yesu a linga, tu sapula Usoma wa Suku nduviali woluali luosi. Tu vangula lekolelo, momo tua tumĩwa la Yehova, Tõlo Yoluali Luosi, kuenda momo okuti ondaka tu kasi loku kunda hayetuko pole yaye. Ocisola tu kuetele Yehova te oco ci kala ocimãho ca velapo coku u sivaya.— Va Filipoi 1:27, 28; 1 Va Tesalonike 2:13.
Apulilo Voku Pitulula
• Momo lie ci kuetele esilivilo oku kundila vosi tu pondola, ondaka Yusoma? Pole oku tambuluiya kupi tu kuete oku lavoka?
• Ndamupi tu pondola oku lekisa okuti ka tua kolelele kongusu yetu muẽle oco tu vumbe Yehova?
• Ocina cipi ci kuete esilivilo lia velapo tu lilongisila kelivulu Liovilinga?
[Elitalatu kemẽla 173]
Ndomo va lingaile kosimbu, koloneke vilo afendeli va Yehova va vangula ondaka ya Suku lutõi