Part 9
Etavo Liocili li Pondola Oku ku Kuatisa Otembo Yenda ño hũ!
1. Nda tua “amẽla ku Suku,” nye tuka mõla?
YEHOVA o sole vana vo vumba. Nda ove wa fendela Yehova eye oka ku sumũlũisa cilo kuenda kotembo yiya kovaso. Embimbiliya li popia hati: “Amẽli ku Suku kuenje eye amẽla kokuene.” —Tiago 4:8.
2. Ndamupi tu pondola oku amẽla ku Suku, kuenda ndamupi eci cika litava lolohutililo vietu?
2 Oco wamẽle ku Suku, o kuete oku lilongisa Ondaka yaye Embimbiliya kuenda oku yi kapako. Nda o likutilila leci ci litava locipango caye, Yehova oka yevelela olohutililo viove kuenda oka vi tambulula. Upostolo Yoano wa soneha hati: “Ekolelo tu u kuetele lieli, nda tu pinga cimue ca sungulukila ocipango caye eye o tu yeva. Kuenje, nda tua kũlĩha okuti o tu yeva pokati kapingilo osi, oco tua kũlĩhavo okuti tu tambula eci tuo pinga.”—1 Yoano 5:14, 15.
3-7. Ndamupi tu pondola oku kuata olondunge via Suku, kuenda ndamupi cika tu kuatisa?
3 Handi vali, osimbu ove wa mamako oku amẽla ku Suku, eye oka ku ĩha olondunge ndomo o pondola oku liyaka lovitangi viomuenyo weteke leteke. Embimbiliya lipopia okuti: “Nda umue pokati kene wa kamba olondunge a pinge ku Suku.”—Tiago1:5.
4 Ndamupi olondunge vi tunda ku Suku vi pondola oku ku kuatisa? Konepa yimue, vi pondola oku ku kuatisa oku kũlĩha eci Yehova a suvuka. Ove o pondolavo oku lilongisa momo lie Yehova a suvukila ovina viaco kuenda eci o kuete oku linga oco o yuvule o vituwa viaco ka via sungulukile. Ukũlĩhĩso waco u pondola oku ku teyuila kovitangi vialua via siata oku lipita lomanu. Ndeci, oku pokola kelungulo lia Suku liatiamẽla koku liyelisa kekalo, ci teyuila omanu va Suku ndeci, oku mina kuna kua yonguile, uveyi una wiyilila ko ku linga ukahonga, esumuo ale oku litepa kuolohuela.
5 Nye vali olondunge via Suku vi pondola oku ku ĩha? Ovio vi pondola oku ku ecelela oku kuata asumũlũho komuenyo. Vi pondolavo oku ku kuatisa oku nõla lolondunge ovina visilivila, ndeci oku talavaya ciwa lolombongo viove. Ove ci tava okuti oka amamako oku kuata ovimãho vina okuti vi silivila kuenda oku likala ovimãho vina ka vi kuete esilivilo.
6 Olondunge via Suku vi pondolavo oku ku kuatisa kukamba wove la vakuene. Ove o pondola oku kuata omuenyo umue wepata lia sanjuka. Ci tava okuti o pamisa ukamba wove la vakuene ketavo, kuenda o pondola oku sumbiwa, ndaño muẽle la vana ka va fendela Suku.
7 Handi vali, ove poku kuata olondunge via Suku cika mioñolola ekalo liove liatiamẽla komuenyo. Eci cika ku kuatisa ndomo o pondola oku liyaka lovitangi viomuenyo kuenda esumuo. Kuendavo, oka kuata esunguluko liwa liatiamẽla kovina viokovaso. Oku kuata ocituwa ciwa, cika ku kuatisa oku amamako luhayele uwa kovisimĩlo kuenda kutima.—Olosapo 14:30; Isaya 48:17.
8. Nda ove wa fendela Suku, kuka kuata usumba wa nye?
8 Nda ove o fendela Suku yocili, oka yovuiwa kusumba u tatayasa omanu vana ka vo fendela. Omo lioku kũlĩha okuti ava vafa ka va kuete vali omuenyo. Omo liaco ove kuka kuatela vali usumba ava vafa. Omo lioku kuatela ekolelo kolohuminyo via Suku vioku pindula ava vafa, ku ka salukila vali okufa. Handi vali ove poku kũlĩha okuti Suku Ukuonenewosi, kuka kuata usumba lumbanda.—Yoano 8:32.
Olondingesunga Vika Piñala Ofeka
9-11. Helie oka kala Vofeka Yelau, kuenda helie kaka kalamo?
9 Nda wamẽla ku Suku, kuka kuatela usumba weci ci keya kovaso. Tua kũlĩha okuti Embimbiliya lia popele ale kueci catiamẽla kovitangi tu lete voluali etaili lilo. Yehova Suku o tu sapuila okuti ovina evi ka vika amamako otembo yalua, momo Usoma wa Suku ndopo muẽle uka pongolola oluali lulo oco lu kale ofeka yelau.—Luka 21:10, 11, 31; 23:43.
10 Ava vamẽla ku Yehova loku u fendela, ovo lika vaka kala vofeka yelau. Embimbiliya li popia okuti: “Okasimbu kaño handi kuenje ondingaĩvi ka yi kalapo. Ambombe puãi va piñala ofeka, kuenje va sanjukila okusalala kualua.”—Osamo 37:10, 11.
11 Vana va sina haivo va likala oku pokola kovihandeleko via Suku vaka pesela omuenyo wavo otembo ka yi pui. (2 Va Tesalonike 1:8, 9) Ovo ka vaka kalako vali. Vaka kongeliwa kumosi la Satana kuenda olondele viaye kenyõleho ka li pui. (Esituluilo 20:10, 14) Pole, vana va lilongisa eci catiamẽla ku Yehova haivo vo fendela vaka sanga ombembua Vofeka Yelau.
Otembo Yimue Yiwa yo Kovaso!
12 Yehova wa selekele ovina viwa kuava vo sole! Tu lete ale eci Ondaka yaye yi popia catiamẽla komuenyo Vofeka Yelau palo Posi:
12. Nye Embimbiliya li popia catiamẽla komuenyo wo kovaso?
● Okulia kualua: “Vofeka mu kale olomema via lua. Vi hunge hunge kilu liolomunda. Ovaima ayo a soke lavo voko Levanone. Kovaimbo ku telehe omanu ndowangu wovisenge.”—Osamo 72:16.
● Olonjo Viwa: “Va tunga olonjo kuenje va kalamo.”—Isaya 65:21.
● Upange u sanjuisa: “Ava va nõliwa lame vaka lialia ño-o kupange wovaka avo ka valingi upange olivova.”—Isaya 65:22, 23, NW.
● Ka kuka kala vali oku vela: “Layimue onungi yi popia yiti, Ndi vela.”—Isaya 33:24
● Ka kuka kala vali ulema: “Oco ovaso olomeke a patuluka kuenda ovatuĩ ovisitatuĩ a situluka. Oco ocilema ci somboka ndosonge. Momo vekalasoko mu tunda ovava kuenda vekango olondui.”—Isaya 35:5, 6.
● Ka kuka kala vali olongembia, evalo, lokufa: “ Suku [oka] puenya asuelela osi kovaso avo. Okufa ka ku ka kalako vali, ndaño oku lila loku liyula lupongo laviovo ka vi ka kalako vali. Momo ovina viatete via pita.” —Esituluilo 21:4.
● Uyaki ka uka kalako vali: “Suku [oka] imola ovita toke kesukiyo liongongo.”—Osa. 46:9.
● Omuenyo ko pui: “ Olondingesunga vi[ka] piñala ofeka, vi tungamo oloneke ka vi pui.”—Osamo 37:29.
13. Helie okuti eye lika o pondola oku pongolola ongongo yilo oco yi kale ofeka yelau, kuenda momo lie?
13 Omanu lalimue eteke vaka pondola oku nena ovina viwa, pole Yehova o kuete unene woku tẽlisa cosi eye a popia. Lacimue ci pondola oku u tateka oku tẽlisa eci a yongola oku linga. Embimbiliya li popia hati: ‘Ka kuli eci ka ci tẽliwa la Suku.’—Luka 1:37.
14. Ndamupi o pondola oku endela vonjila yi tuala komuenyo ko pui?
14 Yehova pokati Kolombangi viaye, o kasi loku eca epuluvi komanu vo kolonepa viosi viokilu lieve oku “Iñilila vombundi ya sukatela” oco va endele vonjila yi tuala komuenyo ko pui. Ci tava okuti ove o sangiwa pokati komanu vana va tava kelaleko liaco. Ci tava okuti ove o kuama etavo liocili kuenda oku sanjukila asumũlũho a Yehova otembo yosi!—Mateo 7:13, 14.
[Full-page picture on page 31]