O Pondola Oku Limbuka Ndati Efendelo Liocili?

1. Anga hẽ kuli lika etavo limosi liocili?

Yesu wa longisa olondonge viaye etavo limosi lika liocili. Etavo liaco lia sokisiwa ndonjila yi tuala komuenyo ko pui. Catiamẽla konjila yaco, Yesu wa popia hati: “Vañamiñami va yi sanga.” (Mateo 7:14) Suku o tava lika efendelo li songuiwa Londaka yaye yocili. Afendeli vosi vocili, va kasi vomunga yekolelo limuamue.—Tanga Yoano 4:23, 24; 14:6; Va Efeso 4:4, 5.

Tala ovideo Suku o Tava hẽ Olonjila Viosi Vioku u Fendela?

2. Nye Yesu a popia catiamẽla Kakristão vesanda?

Yesu wa popele hati ovaprofeto vesanda va ka nyõla etavo Liakristão vocili. Ovo va ka limolehisa ndafendeli vocili loku popia hati, etavo liavo liocili. Pole, ove o pondola oku va limbukila kovilinga viavo. Ndamupi? Etavo liocili, olio lika li kuete Akristão vakuavilinga viwa.—Tanga Mateo 7:13-23.

3. O pondola oku limbuka ndati afendeli vocili?

Konomuisa olondimbukiso evi vitãlo:

• Afendeli vocili va sumbila Embimbiliya okuti Ondaka ya Suku. Ovo va likolisilako oku pokola kolonumbi vialio. Etavo liocili, lia litepa letavo li songuiwa lovisimĩlo viomanu. (Mateo 15:7-9) Afendeli vocili, ka va kundi ocina cimue kuenje va linga cikuavo.—Tanga Yoano 17:17; 2 Timoteo 3:16, 17.

• 

  Olondonge viocili via Yesu via sumbila onduko ya Suku okuti Yehova. Yesu wa sumbilile onduko ya Suku poku yi sapula komanu. Eye wa kuatisa omanu oco va kũlĩhe Suku kuenda wa va longisa oku likutilila okuti onduko ya Suku yi sumbiwe. (Mateo 6:9) Vocikanjo cene, etavo lipi lia siata oku kundila omanu onduko ya Suku?—Tanga Yoano 17:26; Va Roma 10:13, 14.

• Afendeli vocili va kunda Usoma wa Suku. Suku wa tuma Yesu oco a kunde olondaka viwa Viusoma. Usoma wa Suku owo lika u ka malako ovitangi viomanu. Yesu wamamako oku kunda Usoma waco toke eci a fa. (Luka 4:43; 8:1; 23:42, 43) Eye wa sapuila olondonge viaye oco vi kunde Usoma wa Suku. Nda omunu umue o sapela love catiamẽla Kusoma wa Suku, ketavo lipi a tiamẽla?—Tanga Mateo 24:14.

• Olondonge via Yesu ka vi pangi onepa koluali lulo lũvi. Tu pondola oku va limbuka momo ka va litengi vopulitika ale vovitangi vikuavo violuali. (Yoano 17:16; 18:36) Handi vali, va yuvula oku kuama ovilinga vĩvi kuenda ovituwa violuali.—Tanga Tiago 4:4.

• Akristão vocili va likuetele ocisola pokati. Ondaka ya Suku ya va longisa oku lekisa esumbilo komanu vakuapata osi. Ndaño okuti atavo esanda va siata oku kuatisa kovoyaki oluali, pole, afendeli vocili ka va ci lingi. (Mika 4:1-3) Ovo, va pesela otembo yavo, kuenda ukuasi wavo koku kuatisa vakuavo loku va kolisa.—Tanga Yoano 13:34, 35; 1 Yoano 4:20.

4. O pondola hẽ oku limbuka etavo liocili?

Etavo lipi okuti alongiso avo a tunda Vondaka ya Suku, va sumbila onduko Yaye, kuenda va kunda okuti Usoma wa Suku owo lika u ka malako ovitangi viomanu? Velie va siata oku lekisa ocisola komanu vosi haivo ka va kuatisa kovoyaki? Cipi ocisimĩlo cove?—Tanga 1 Yoano 3:10-12.