Lilongisila Kondaka Ya Suku

O Pondola Ndati Oku Limbuka Efendelo Liocili?

Ocipama cilo ci tukula apulilo amue okuti pamue wa va lingile ale, kuenda ci lekisa oku o pondola oku tanga atambululo aco Vembimbiliya liove. Olombangi Via Yehova vi sanjukila oku sapela love catiamẽla katambululo aco.

1. Anga hẽ kuli lika etavo limosi liocili?

Yesu wa longisa olondonge viaye etavo limosi lika liocili. Etavo liaco li kasi ndonjila yi tuala komuenyo. Catiamẽla konjila yaco, Yesu wa popia hati: “Vañamiñami va yi sanga.” (Mateo 7:14) Suku o tava lika efendelo li songuiwa Londaka yaye yocili. Afendeli vosi vocili, va kasi vomunga yekolelo limuamue.​—Tanga Yoano 4:23, 24; 14:6; Va Efeso 4:4, 5.

2. Momo lie ku kasilili atavo alua a litukula hati Akristão?

Ovaprofeto vesanda va siata oku nyõla etavo Liakristão kuenda oku talavaya lalio oco va tẽlise olonjongole viavo. Ndomo Yesu a ci popele, ovo va limõlehisa ‘ndolomeme’ viaye, pole vokati kavo va linga ndovimbungu via tema. (Mateo 7:13-15, 21, 23) Akristão vesanda va fetika oku molẽha noke yoku fa kuovapostolo va Yesu.​—Tanga Ovilinga 20:29, 30.

3. Ovina vipi via kongela vefendelo liocili?

Afendeli vocili va sumbila Embimbiliya okuti Ondaka ya Suku. Ovo va likolisilako oku pokola kolonumbi vialio. Etavo liocili, lia litepa letavo li songuiwa lovisimĩlo viomanu. (Mateo 15:7-9) Afendeli vocili, ka va kundi ocina cimue kuenje va linga cikuavo.​—Tanga Yoano 17:17; 2 Timoteo 3:16, 17.

Etavo liocili lia sumbila onduko ya Suku okuti Yehova. Yesu wa kundile onduko ya Suku. Eye wa kuatisa omanu oku kũlĩha Suku kuenda wa va longisa oco va likutilile okuti onduko ya Suku yi sumbiwe. (Mateo 6:9) Vocikanjo cene, etavo lipi lia siata oku vetiya omanu oku tukula onduko ya Suku?​—Tanga Yoano 17:26; Va Roma 10:13, 14.

4. O pondola ndati oku limbuka afendeli vocili?

Afendeli vocili, va kunda Usoma wa Suku. Suku wa tuma Yesu oco a kunde Usoma. Usoma wa Suku owo lika weca elavoko liocili komanu. Yesu wamamako oku kunda Usoma waco toke eci a fa. (Luka 4:43; 8:1; 23:42, 43) Eye wa sapuila olondonge viaye oco vi kunde Usoma wa Suku. Nda omunu umue o sapela love catiamẽla Kusoma wa Suku, ketavo lipi a tiamẽla?​—Tanga Mateo 10:7; 24:14.

Olondonge via Yesu havakualualiko. Ovo ka va litengi vopulitika ale vovitangi vikuavo violuali. (Yoano 17:16) Handi vali, va yuvula oku setukula ovilinga vĩvi kuenda ovituwa violuali.​—Tanga Tiago 1:27; 4:4.

5. Yipi ondimbukiso Yakristão vocili?

Akristão vocili va likuetele ocisola pokati. Ondaka ya Suku ya va longisa oku lekisa esumbilo komanu vakuapata osi. Ndaño okuti atavo esanda va siata oku kuatisa kovoyaki oluali, pole, afendeli vocili ka va ci lingi. (Mika 4:1-4) Ovo, va pesela otembo yavo, ukuasi wavo koku kuatisa vakuavo kuenda oku va kolisa.—Tanga Yoano 13:34, 35; 1 Yoano 4:20, 21.

Etavo lipi okuti alongiso avo a tunda Vondaka ya Suku, va sumbila onduko Yaye, kuenda va kunda okuti Usoma wa Suku owo lika u ka malako ovitangi viomanu? Velie va siata oku lekisa ocisola komanu vosi haivo ka va kuatisa kovoyaki? Ovolandu a lekisa okuti, Olombangi via Yehova ovio lika via siata oku ci linga.​—1 Yoano 3:10-12.

[Elitalatu kemẽla 17]

Oco o kuate elomboloko lia suapo liatiamẽla kondaka eyi, tala kocipama 15, celivulu eli lia sandekiwa Lolombangi Via Yehova.

[Elitalatu kemẽla 17]

EMBIMBILIYA LI Longisa NYE?

[Elitalatu kemẽla 16]

“Va popia vati, Tua kũlĩha Suku, puãi vo likala lovilinga viavo.”​—Tito 1:16