Anga hẽ ohali yi ka pua?

CECI EMBIMBILIYA LI POPIA

“Suku . . . o puenya asuẽlẽla osi kovaso avo. Okufa ka ku kalako vali, ndaño oku lila loku liyula lupongo.”—Esituluilo 21:3, 4, Embimbiliya li Kola.

CECI CI PONDOLA OKU LOMBOLOKA KOKUOVE

Kolela okuti, Suku haeyeko wa siata oku tu kokela ovitangi.—Tiago 1:13.

Tu lembelekiwa poku kũlĩha okuti, Suku wa kapako ohali yetu.—Sakariya 2:8.

Tu kuete elavoko liokuti, ohali yosi yi ka pua.

​—Olosamo 37:9-11.

TU SUKILA MUẼLE OKU TAVA KUECI EMBIMBILIYA LI POPIA?

Oco, omo liasunga avali a kuãimo ndeci:

• Suku wa suvuka ungangala kuenda ekambo liesunga. Sokolola ndomo Yehova Suku a enda oku liyeva eci afendeli vaye kosimbu va enda oku talisiwa ohali. Embimbiliya li popia hati, eye wa sumuile calua omo lia “vana va enda oku va kangisa.”—Olonganji 2:18, Embimbiliya li Kola—Epongoluilo Lioluali Luokaliye.

  Suku wa siata oku tema nda umue o talisa ohali vakuavo. Embimbiliya li popia okuti, Yehova wa suvuka “ovaka a pesela osonde yomunu ka kuete eko.”—Olosapo 6:16, 17.

• Suku wa kapako omunu lomunu. Omunu lomunu haeyeko lika wa kũlĩha “efengi liaye muẽle kuenda ohali yaye muẽle,” pole, Yehova wa yi kũlĩhavo!—2 Asapulo 6:29, 30.

  Yehova pocakati Cusoma waye, ndopo o ka malako ovitangi omunu lomunu a siata oku liyaka lavio. (Mateo 6:9, 10) Osimbu otembo yaco ka yepitĩlilepo, eye wa siata oku lembeleka locisola omanu vana vo sanda lutima wosi.—Ovilinga 17:27; 2 Va Korindo 1:3, 4.