ONEPA 3
Ndomo ku Potoluiwa Ovitangi
“Kolisiko oku lisola pokati, momo ocisola ci tuvika akandu a lua.”—1 Petulu 4:8
Eci ove kumue lahueli yove u fetikila kumosi omuenyo, ku iya ovitangi vialua. Ovitangi viaco vi tunda kovituwa viene via litepa ndeci, kovisimĩlo, kolonjongole kuenda ndomo omunu lomunu pokati kene ambata omuenyo. Ale vi pondola oku tunda kovina vikuavo kuenda kovitangi viya ocipikipiki.
Oku liyaka lovitangi ka ca lelukile, pole, Embimbiliya li tu sapuila ndomo tu liyaka lovitangi vietu. (Mateo 5:23, 24) Oku kapako olonumbi Viembimbiliya ci ku kuatisa oku potolola ovitangi viove.
1 SAPELI ECI CATIAMẼLA KOVITANGI VIACO
CECI EMBIMBILIYA LI POPIA: ‘Kuli . . . otembo yoku popia.’ (Ukundi 3:1, 7) Sanda otembo yoku vangula catiamẽla kovitangi viene. Ecelela okuti ohueli yove yi kũlĩha ndomo o liyevite kuenda eci o kasi oku sima catiamẽla kocitangi caco. Olonjanja viosi “vangula ocili” lahueli yove. (Va Efeso 4:25) Ndaño o kasi lonyeño omo liocitangi caco, yuvula oku liyaka. Etambululo liumbombe li koka ombembua loku yuvula uyaki.—Olosapo 15:4; 26:20.
Ndaño ku tava kondaka yaco, lekisa umbombe, kuenda ku ka ivaleko oku lekisa ocisola lesumbilo kohueli yove. (Va Kolosai 4:6) Sanda oku potolola ocitangi caco lonjanga kuenda ku ka liwekepo oku vangula lahueli yove.—Va Efeso 4:26.
CECI O SUKILA OKU LINGA:
Sanda otembo ya sunguluka yoku sapela catiamẽla kocitangi caco
Kepuluvi liove lioku yevelela, ku ka tete ukuẽle kondaka. Momo noke o kuatavo epuluvi lioku vangula
2 YEVELELA LOKU KUATA ELOMBOLOKO
CECI EMBIMBILIYA LI POPIA: “Lisoli pokati ndomunu la manjaye. Koku sumbila, velisipo vakuẽle.” (Va Roma 12:10) Ocituwa cove coku yevelela, ci kuete esilivilo. Seteka oku kuata elomboloko liocisimĩlo cohueli yove “lohenda . . . kuenda eliketiso.’ (1 Petulu 3:8; Tiago 1:19) Ku ko yevelele ño lesanda. Nda citava, siapo upange o kasi oku linga oco u yevele ale u pula nda citava oku sapela kepuluvi likuavo ondaka yaco. Nda o tenda ohueli yove ndekamba okuti ku u tendi ndunyãli wove, ‘ku ka tema lonjanga.’—Ukundi 7:9.
CECI O SUKILA OKU LINGA:
Amamako oku yevelela lutate ndaño ku kasi oku sola ondaka yaco
Yevelela kosi yelimi. Kũlĩhisa eci ohueli yove yi kasi oku popia kuenda ondaka yaye
3 KUAMI ONJILA WA NÕLIPO
CECI EMBIMBILIYA LI POPIA: “Upange wosi u kuete onima. Upopi waño u tuala kusuke.” (Olosapo 14:23) Ku sukila oku tava ño kocisimĩlo cimue ciwa. U sukila oku kuama onjila wa nõlipo. Oku ci linga ka ca lelukile momo ci sukila oku likolisilako pole, ci nena onima yiwa. (Olosapo 10:4) Nda wa likuatisi pokati, u ka “mola onima” yupange wene.—Ukundi 4:9.
CECI O SUKILA OKU LINGA:
Omunu lomunu a sokolole onjila yoku potolola ovitangi viene
Otembo lotembo, kũlĩhĩsi ndomo omuenyo wene u kasi volohuela