Ndomo vu Talavaya Lolombongo

Vosi yetu tu sukila olombongo vioku landa ovina vi sukiliwa vepata. (Olosapo 30:8) Ocili okuti, “olombongo ombindikiyo.” (Ukundi 7:12) Pamue pokati kene ka ca lelukile oku sapela catiamẽla kolombongo, pole ku ka eceleli okuti olombongo vi nena ovitangi volohuela viene. (Va Efeso 4:32) Olohueli vi sukila oku likolela pokati kuenda oku sokoluila pamosi ndomo va landa ovina vi sukiliwa.

1 LINGI ESOKIYO LIWA

CECI EMBIMBILIYA LI POPIA: “Helie pokati kene, nda o yongola oku tunga ombonge, ka tumala tete oku tenda epese liaco, nda he o kuete coku yi malusula?” (Luka 14:28) Oku sokiyila kumuamue ndomo u talavaya lolombongo viene ci kuete esilivilo. (Amosi 3:3) Sokololi eci vu sukila oku landa kuenda olombongo vi sukiliwa. (Olosapo 31:16) Omo okuti o kuete olombongo vioku landa cimue, ka ci lomboloka okuti o sukila oku landa cosi o lete. Yuvula oku kuata olofuka. Landa ovina via lisoka lolombongo o kuete.—Olosapo 21:5; 22:7.

CECI O SUKILA OKU LINGA:

• Kesulilo liosãi nda pa supa olombongo, ka vali kene sokololi eci vu sukila oku linga lavio

• Nda vu kuete o fuka, lingi esokiyo lioku tepulula ovina wa siati oku landa. Teleki ene muẽle okulia, okuti ka wendi vali kolonjo vioku landa okulia kuapia

2 SITULULA OVISIMĨLO VIOVE KUENDA KALA UKUACILI

CECI EMBIMBILIYA LI POPIA: “Linga eci ca sunguluka, hakovaso a Ñalako [Yehova] lika, puãi lo kovaso omanu le.” (2 Va Korindo 8:21) Kala ukuacili lahueli yove poku u sapuilako ofeto o tambula kupange kuenda olombongo wa siata oku pesela.

Poku landa ovina vimue vinene, pulisa ohueli yove catiamẽla kolombongo vi pesiwa. (Olosapo 13:10) Oku vangula catiamẽla kolombongo, ci ka ku kuatisa oku amamako lombembua volohuela viene. Eci va ku feta olombonge kupange, ku ka vi tende okuti viove pole, viepata.—1 Timoteo 5:8.

CECI O SUKILA OKU LINGA:

• Sapeli olombongo omunu a pondola oku pesela okuti ka sukila oku sapuilako ukuavo

• Ku ka sapeli ño catiamẽla kolombongo eci peya ovitangi