ONEPA 8
Ceci Kuiya Ovitangi
“Vu ci sanjukila, ndaño cilo vu nyikiwa lohali yiñi yiñi okasimbu kamue.”—1 Petulu 1:6
Ndaño u likolisilako oku kuata esanju volohuela kuenda vepata, ovitangi viya ocipikipiki vi pondola oku tepulula esanju liene. (Ukundi 9:11) Suku locisola o tu ĩha ekuatiso eci tuliyaka lovitangi. Nda wa kuama olonumbi Viembimbiliya, ove kumue lepata liove u ka likuata omunga ndaño ceci kuiya ovitangi.
1 KOLELA YEHOVA
CECI EMBIMBILIYA LI POPIA: “Ohele yene yosi yi yeki kokuaye momo eye o vu lava.” (1 Petulu 5:7) Olonjanja viosi ivaluka okuti, Suku hayeko wa siata oku koka ovitangi u liyaka lavio. (Tiago 1:13) Osimbu wa amamiko oku linga ukamba laye, eye o ka ku kuatisi kovina viosi. (Isaya 41:10) “Peseleli ovitima viene kokuaye.”—Osamo 62:8.
O ka sangavo elembeleko poku tanga Embimbiliya, kuenda oku kapako ovina o lilongisa oloneke viosi. Nda wa ci lingi u ka limbuka ndomo Yehova a siata oku “tu lembeleka kohali yetu yosi.” (2 Va Korindo 1:3, 4; Va Roma 15:4) Eye wa likuminya oku ku ĩhi “ombembua . . . yina ya piãla olondunge viosi.”—Va Filipoi 4:6, 7, 13.
CECI U SUKILA OKU LINGA:
Likutilili loku pinga ekuatiso ku Yehova oco u tulumũhe kuenda oku sokolola lutate
Kũlĩhĩsi o ovisimĩlo viosi kuenda nõlipo eci ci pondola oku ku kuatisi
2 LI TATA OVE MUẼLE KUENDA EPATA LIOVE
CECI EMBIMBILIYA LI POPIA: “Utima wa lunguka u kuata kuata olondunge; etũi liukualondunge li sanda sanda uloño.” (Olosapo 18:15) Kũlĩha ovina viosi via kongelamo. Kũlĩha ovina omunu lomunu vepata liove a sukila. Sapela lavo. Va yevelela.—Olosapo 20:5.
Nye tu linga eci ku fa omunu umue tu sole? Ku ka kuate ohele yoku situlula esumuo liove. Ivaluka okuti eteke limue, Yesu “wa lila.” (Yoano 11:35; Ukundi 3:4) Oku puyuka kuenda oku pekela ciwa ci kuete esilivilo. (Ukundi 4:6) Oku ci linga ci kuatisa oku potolola ovitangi vi pondola oku iya vepata.
CECI O SUKILA OKU LINGA:
Osimbu ka kua molehẽle ovitangi, kuata ocituwa coku sapela lepata liove. Eci kuiya ovitangi, ovo va kuata elianjo lioku sapela love
Sapela la vakuene va lipita locitangi cimuamue
3 SANDI EKUATISO VU SUKILA
CECI EMBIMBILIYA LI POPIA: “Ekamba li sola olonjanja viosi, kuenje li linga manjove koloneke viohali.” (Olosapo 17:17) Citava okuti akamba vove va yongola oku ku kuatisa, pole ka va kũlĩhĩle eci va pondola oku linga. Ku ka kuate ohele yoku pinga kokuavo ekuatiso o sukila. (Olosapo 12:25) Handi vali, sanda ekuatiso konepa yespiritu ku vamanji va kuete elomboloko lia suapo Liembimbiliya. Olonumbi va ka ku ĩha vi tunda Vembimbiliya, vi pondola oku ku kuatisa.—Tiago 5:14.
Nda wa linga ukamba lomanu vana va kolela ku Suku, kuenda kolohuminyo viaye, o ka tambula ekuatiso o sukila. O pondolavo oku kuata elembeleko, nda wa kuatisa vana va sukila elembeleko. Sapela lavo catiamẽla kekolelo o kuetele Yehova, kuenda kolohuminyo viaye. Lieca koku kuatisa omanu va sukila ekuatiso, kuenda ku ka yuvule vana va ku sole, okuti va yongola oku ku kuatisa.—Olosapo 18:1; 1 Va Korindo 15:58.
CECI O SUKILA OKU LINGA:
Sapela lekamba wa kolela kuenda ecelela okuti oku kuatisa
Vangula ocili kueci o Sukila