Ohutililo Ndomo yi Pondola Oku ku Kuatisa

Osimbu kua nolele onjila yimue, citava okuti o lipula ndoco, ‘Onjila yaco yi ka ndi kuatisa ndati?’ Oku yi kongela vohutililo ci lekisa hẽ epela?’ Sio. Momo tu yongola oku kũlĩha nda eci tu yongola oku linga, ca sunguluka oku ci kongela vohutililo. Yovi ulume umue ukuesunguluko wa pula hati: “Nda ndo vilikiya kuenje wa ñumbulula, lopo nda sia tẽlele oku kolela okuti wa yeva ondaka yange?”—Yovi 9:16.

Vocipama capita, tua kũlĩhisa okuti ohutililo ka yi pangi lika onepa ketavo ale oku sokisiwa lovihemba vi tepulula evalo. Suku yocili o yevelela olohutililo. Nda tua likutilila lonjila ya sunguluka, eye o tu yevelela. Eye o tu vetiya oku amẽla kokuaye. (Tiago 4:8) Nye tu lavoka nda ohutililo ya panga onepa komuenyo wetu? Tu kũlĩhisi asumũlũho amue tu pondola oku oku kuata.

Ombembua yovutima.

Eci oliyaka lovitangi kuenda oloseteko, wa siata hẽ oku sakalala? Embimbiliya li tu vetiya ‘oku likutilila’ vapuluvi aco loku ecelelela okuti ‘apingilo etu a sapuiwa ku Suku.’ (1 Va Tesalonike 5:17; Va Filipoi 4:6) Embimbiliya li tu kolisa okuti nda tua likutilila, “ombembua ya Suku, yina ya piãla olondunge viosi, yi lava ovitima [vietu] lovisimilo [vietu].” (Va Filipoi 4:7) Tu pondola oku kuata ombembua yaco poku eca asakalalo etu ku Isietu wokilu. Eli olio esunga lieci, eye a tu vetiya oku kapako olondaka vi sangiwa kelivulu Liosamo 55:22 viokuti: “Tuika Yehova ocitele cove kuenje eye o ku kuatisa.”

Omanu valua voluali va siata oku seteka oku kuata ombembua yaco. Hee Ran kofeka yo Korea do Sul, wa popia hati: “Ndaño ñuete ovitangi vialua, pole eci ndi likutilila catiamẽla kovitangi viaco, ndi yeva ekavuluko kuenda ñuata ongunsu yoku pandikisa.” Ukãi umue o tukuiwa hati, Cecilia, wo kofeka yo Filipina, wa popia hati: “Omo okuti ndi njali, ndi sakalala calua lomãla vange vafeko kuenda ina yange, okuti cilo ka ndimbuka vali. Pole omo liohutililo, nẽla oku liyaka lovitangi viange kuenda si sakalala. Nda kũlĩha okuti Yehova o ka ñuatisa oku va tata.”

Elembeleko kuenda ongusu eci tu liyaka lovitangi.

O kasi hẽ oku liyaka lesakalalo, omo liovitangi vialua komuenyo? Oku likutilila ku “Suku ukuakulembeleka” ci ku kuatisa oku yula esakalalo liaco. Embimbiliya li tu sapuila okuti eye, “o tu lembeleka kohali yetu yosi.” (2 Va Korindo 1:3, 4) Vepuluvi limue eci Yesu a sumuile, “wa kekama kolongolo kuenda wa likutilila.” Lonima yipi? ‘Ungelo wokilu wo tukulukila kuenda wo kolisa.’ (Luka 22:41, 43) Nehemiya ulume ukuavo ukuekolelo, wa lambalaliwile lomanu va seteka oku imula upange waye a tambuile ku Suku. Eye wa likutilila hati, “a Suku, kolisa ovaka ange.” Ovina vieya oku pita noke, via lekisa okuti Suku wo kuatisa oku yuvula usumba kuenda oku malusula upange waye. (Nehemiya 6:9-16) Reginald, wo kofeka yo Gana, poku lombolola ndomo a siata oku liyeva eci a likutilila wa popia ndoco: “Eci ndi likutilila, poku li yaka lovitangi, ñala ndu okuti ñasi oku sapuila ovitangi viaco komunu umue o pondola oku ñuatisa kuenje si sakalala vali.” Ocili okuti, Suku o pondola oku tu lembeleka eci tu likutilila kokuaye.

Olondunge vi tunda ku Suku.

Onjila tu nõla komuenyo yi pondola oku tu kuatisa ale oku tu kokela ovitangi vokuenda kuotembo yalua, loku nyola ocisola tu kuetele vakuetu. Tu nõla ndati onjila ya sunguluka? Embimbiliya li tu sapuila hati: “Nda umue pokati kene wa kamba olondunge a pinge ku Suku, u ecaeca komanu vosi ocali, halocikundoko, kuenje vi eciwa kokuaye.” (Tiago 1:5) Nda tua likutilila loku pinga olondunge, Suku o pondola oku tu ĩha espiritu sandu oco li tu songuile poku nõla onjila tu kuama. Tu pondola oku pinga espiritu sandu momo Yesu wa popia okuti, “Isiene ukuailu hẽ, ka velipo oku avela espiritu sandu kuava vo pinga?”—Luka 11:13.

Yesu wa limbukavo esilivilo lioku pinga ekuatiso ku Isiaye poku nõla olonjila via velapo. Embimbiliya li tu sapuila okuti eci eye a yonguile oku nõla 12 kalume oco va linge ovapostolo vaye, “wa likutilila ku Suku uteke wosi.”—Luka 6:12.

Omanu valua koloneke vilo, va siata oku limbuka ndomo Suku a tambulula olohutililo viavo ndeci ca pita la Yesu. Regina kofeka yo Filipina, wa lombolola ovitangi vialua a liyaka lavio, ndeci: Oku litekula eye muẽle kumue lepata noke liolofa viulume waye, eci a pumba upangi kuenda ocitangi co ku tekula omãla vaye vavali. Nye co kuatisa oku nõla onjila ya sunguluka? Eye wa popia ndoco: “Nda siata oku sanjukila ekuatiso lia Yehova omo lioku likutilila.” Kwabena kofeka yo Gana wa lombolola esunga lieci a pingila ekuatiso ku Suku poku popia hati: “Nda pumba upange wange woku tunga okuti va enda oku ndi feta ciwa.” Poku kũlĩhisa onjila a nõla, wa popia hati: “Olonjanja viosi ndi li kutilila ku Yehova oco a ñuatise oku nola onjila ya sunguluka.” Eye wamisako hati: “Cilo ndi li yevite okuti nda kolapo omo Yehova wa ñuatisa oku nola upange u ngecelela oku tẽlisa ovimãho viange kespiritu kuenda ketimba.” Ove o pondolavo oku limbuka okuti okasi oku songuiwa la Suku poku li kutilila catiamẽla kovitangi ale kovina vi pondola oku nyola ukamba wove laye.

Tua konomuisa lika ovina vimue, ohutililo yi pondola oku ku lingila. (Oco o kuate vali alomboluilo akuavo konomuisa okakasia losapi hati: “Asumũlũho Olohutililo.”) Oco o kuate asumũlũho aco, osukila oku kũlĩha Suku locipango caye. Nda eci oco o yongola tu ku vetiya oku vangula Lolombangi Via Yehova oco va ku longise Embimbiliya.a Eci ocina o sukila oku linga tete oco okuate ukamba ‘Lukuakuyeva ohutililo.’—Osamo 65:2.