Yesu O Pisa Ocitumbulukila Cimue Ca Sina

Yesu wa sumbila calua Yoano Upapatisi. Pole, ovisimĩlo vipi omanu valua va kuete viatiamẽla ku Yoano Upapatisi? Yesu o popia hati: “Ocitumbulukila eci . . . ci sokisiwa lomãla va tumãla pocitanda va kalukila akamba vavo, vati: ‘Tuo sikili olombendo, puãi ka wa pilukili; tua lila, pole, ka wa liteteleli omo liesumuo.’”—Mateo 11:16, 17.

Olondaka Yesu a popia vi lomboloka nye? Eye o lombolola elomboloko liaco poku popia hati: “Yoano ka lile ndaño oku nyua, pole, omanu va popia vati, ‘Eye o kuete ondele.’ Mõlomunu wa lia, wa nyua, pole, omanu va popia vati, ‘Tala! U ocisapanu, ukuakunyua ovinyu, haeye ekamba lia vakuakutambula elisimu kuenda vakuakandu.’” (Mateo 11:18, 19) Yoano ambata omuenyo umue wa leluka ndu Nasiri okuti, ka nyui ovinyu. Pole, ocitumbulukila eci ci kasi oku popia okuti Yoano o kuete ondele. (Atendelo 6:2, 3; Luka 1:15) Yesu wa lianja ndomanu vakuavo. Eye o lia kuenda o nyua lonjila yimue ya sunguluka, pole, omanu vo lundila okuti ocisapanu. Omo liaco, eci ci lekisa okuti ka ca lelukile oku sanjuisa omanu.

Yesu o sokisa ocitumbulukila eci lomãla va tumãla pocitanda okuti, va likala oku piluka eci omãla vakuavo va sika olombendo, ale ka va sumua eci vakuavo va lila. Eye o popia hati: “Haimo lumue, olondunge vi limbukiwa okuti viesunga omo liovilinga vialuo.” (Mateo 11:16, 19) Omo liaco, ‘ovilinga’ evi okuti ovituwa via lekisa Yoano kuenda Yesu, vieca uvangi wokuti alundi va va lingila wuhembi.

Yesu noke yoku tukula ocitumbulukila eci okuti ca sina, o pisa alupale amue ndeci, luo Korasene, luo Betesaita kuenda luo Kafarinau muna a lingila ovopange a komõhisa. Yesu o popia okuti, nda wa lingile ovopange aco valupale o ko Foinike ndeci ko Turo lo ko Sidono, alupale aco nda a likekembela. Eye wa tukulavo o Kafarinau olupale luna a siata oku lingila ovopange vokuenda kuotembo yalua. Pole, omanu va sangiwa volupale luaco, ka va lekisile onjongole. Yesu o popia eci catiamẽla kolupale luaco hati: “Keteke Liekanga ci leluka vali oku lekisa ohenda kofeka yo Sodoma okuti ene ci sule.”—Mateo 11:24.

Omo liaco, Yesu eca esivayo ku Isiaye omo lioku sitika ukũlĩhĩso wocili Condaka yaye “ku vakualondunge lava va lilongisa,” pole, wa u situluila kambombe okuti va sokisiwa lomãla vatito. (Mateo 11:25) Eye o va laleka lesanju hati: “Enjui kokuange, ene vosi wa kavi haene vu kuete ovilemo kuenje ndu kavuluisi. Tambuli okanga yange kuenda lilongisili kokuange, momo ame ndomboka haime ndonjuka vutima kuenje vu sanga ekavuluko kovimuenyo viene. Okanga yange ya sunguluka kuenda ocitele cange ca lela.”—Mateo 11:28-30.

Yesu eca ndati ekavuluko? Asongui vetavo, va siata oku kapa ocilemo komanu loviholo via tĩla ndeci poku kisika ovina vialua viatiamẽla koku lava Esambata. Pole, Yesu o va kavuluisa poku va longisa ocili catiamẽla ku Suku okuti, ka catiamẽlele koviholo viesanda. Eye o longisavo omanu ndomo va pondola oku sanga ekavuluko omo lioku talisiwa ohali lasongui vopulitika kuenda vana va sumua omo liakandu va linga. Yesu o va longisavo ndomo akandu avo a pondola oku eceliwa kuenda ndomo va kuata ombembua la Suku.

Omanu vosi vana va tava kokanga ya lela ya Yesu, va pondola oku litumbika ku Suku loku vumba Isietu ukuacali, haeye ukuahenda. Poku ci linga, ka ci lekisa oku ambata ocitele ca lema, momo olonumbi via Suku ka vi lemi.—1 Yoano 5:3.