OCIPAMA 24
Ovo ka va Tẽlisile Ohuminyo Yavo
Yehova wa sapuila Mose hati: ‘Lamanẽla Komunda Sinai. Enju kokuange. Ndi soneha ovihandeleko viange kovitale viovawe kuenje ndi vieca kokuove.’ Mose wa lamanẽla Komunda Sinai kuenje wa kalako eci ci soka 40 kovotanya lovoteke. Osimbu Mose a kala komunda yaco, Yehova wa soneha ekũi Liovihandeleko kovitale vivali viovawe kuenje wa vi eca ku Mose.
Noke yoloneke vimue, va Isareli va fetika oku sima okuti Mose wa va yanduluka. Ovo va sapuila Arone vati: ‘Tu yongola omunu umue o tu songuila. Tu tungile osuku yimue!’ Arone wa popia hati: ‘Neni kokuange ulu wene.’ Eye wa yengulula ulu waco kuenje wa tunga ociñumañuma congombe. Omanu va popia vati: ‘Ociñumañuma eci oco Osuku yetu yina ya tupa vofeka Yegito!’ Va Isareli va fetika oku fendela ociñumañuma culu kuenda va linga ocipito cimue. Anga hẽ ca sungulukile oku ci linga? Sio, momo omanu va likuminyile oku fendela lika Yehova. Pole, cilo va kasi oku nyõla ohuminyo yaco.
Yehova wa mola ovina via kala oku pita kuenje wa sapuila Mose hati: ‘Lokila komanu. Ovo ka va kasi oku pokola kokuange kuenda va kasi oku fendela osuku yimue yesanda.’ Mose wa loka komunda kuenda wambata ovitale vivali viovawe.
Eci Mose a pitĩla ocipepi locilombo, wa yeva omanu va kala oku imba. Noke wa mola okuti omanu va kasi oku piluka kuenda oku kekamẽla ociñumañuma. Ovina viaco via temisa calua Mose. Eye wa kupuila posi ovitale vivali viovawe kuenje via tetoka. Vepuluvi liaco, wa nyõla ociñumañuma caco. Kuenje Mose wa pula Arone hati: ‘Momo lie omanu va ku vetiyila oku linga ocina eci ka ca sungulukile?’ Arone wa popia hati: ‘Ku ka teme. Ove wa kũlĩha ndomo omanu ava va tuwa. Ovo va yonguile osuku yimue. Noke nda imba vondalu ulu wavo, kuenje mua tunda ongombe eyi!’ Arone ka kuatele esunga lioku linga ocina caco. Omo liaco, Mose wa tiukila vali Komunda Sinai kuenda wa livondela ku Yehova oco a ecele omanu vaco.
Yehova wa ecela omanu vana va kuatele onjongole yoku u pokola. O tẽla hẽ oku limbuka esunga lieci va Isareli va sukililile oku pokola kocikele ca Mose coku songola?
“Olonjanja viosi eci o linga ohuminyo yimue ku Suku, ku ka cilue oku yi tẽlisa, momo eye ka sanjukila aveke. Eci wa likuminya, ci tẽlisa.”—Ukundi 5:4