Olondavululi Ekũi la Vivali

Va Isareli va tunda Komunda Sinai va enda vekalasoko lio Parane kocitumãlo ci tukuiwa hati, Kadesi. Kocitumãlo caco, oko Yehova a sapuila Mose hati: ‘Tuma 12 kalume okuti, kepata lepata ku tunda ulume oco va kũlĩhĩse ofeka yo Kanana, ofeka yina ndi laika oku eca ku va Isareli.’ Mose wa nõla 12 kalume kuenje wa va sapuila hati: ‘Kuendi kofeka yo Kanana, kũlĩhĩsi nda ofeka yaco yiwa koku ima okulia. Kũlĩhĩsivo omanu va tungamo nda va pama ale nda ka va pamele, nda va tunga volombalaka ale valupale.’ Olondavululi 12 oku kongelamo Yehosua la Kalembe va enda ko Kanana.

Eci pa pita 40 koloneke, olondavululi via tiuka, kuenje via nena akuyu, alumau kuenda ayuva. Olondavululi via popia viti: ‘Ofeka yaco yiwa, pole, omanu va tungamo, va pama kuenda alupale aco a kuete ovimbaka vinene calua.’ Pole, Kalembe wa popia hati: ‘Tu tẽla oku va yula. Tu endiko!’ Ove wa kũlĩha esunga lieci Kalembe a popela olondaka evi? Momo eye la Yehosua va kolelele Yehova. Pole, olondavululi vikuavo ekũi via popia viti: ‘Sio! Omanu vosi tua muĩlamo va lepa calua soketi ovindululu! Kokuavo tua kala ndapange.’

Olondaka viaco via sumuisile va Isareli. Ovo va fetika oku lisiõsiõla loku livangula omunu lukuavo vati: ‘Tu nõli usongui ukuavo, tu tiukili Kegito. Momo lie tu endela vofeka eyi oco tu pondiwe?’ Yehosua la Kalembe va popia vati: ‘Ko ka sinili Yehova kuenda vali ko ka yokoki. Momo Yehova o tu teyuila.’ Pole, va Isareli ka va tavele. Ovo va yonguile oku ponda Yehosua la Kalembe!

Nye Yehova a linga? Eye wa sapuila Mose hati: ‘Ndaño okuti nda lingila ovina vialua va Isareli, lopo ka va pokuile kokuange. Ovo va laika oku kala vekalasoko vokuenda kueci ci soka 40 kanyamo kuenje haimo va ka fila. Pole, omãla va va Isareli la Yehosua kuenda Kalembe, ovo lika va ka iñila vofeka nda likuminya oku eca kokuavo.’