Kesongo Kolohoka Kuenda Kafeko Umue

Kafeko umue u Isareli wa kala kofeka yo ko Suria okuti, ocipãla lonjo yaye. Eye wopiwa pokati kepata liaye wambatiwa lolohoka vio ko Suria kuenje cilo wa linga upika wukãi wa kesongo kolohoka o tukuiwa hati, Namana. Kafeko kaco wa enda oku fendela Yehova, ndaño okuti omanu va kala laye ka va endaile oku ci linga.

Namana wa kuata uvei umue ũvi wovilundu okuti wa enda oku u kokela evalo otembo yosi. Kafeko u Isareli wa yonguile oku u kuatisa. Eye wa sapuila ukãi wa Namana hati: ‘Ame nda kũlĩha omunu umue o pondola oku kayisa ulume wove. Ko Isareli kuli uprofeto umue wa Yehova o tukuiwa hati, Elisia. Eye o pondola oku sakula ulume wove.’

Ukãi wa Namana wa sapuila Namana ovina kafeko a popia. Namana wa kala lonjongole yoku seteka ovina viosi viu kayisa kuenje wa enda konjo ya Elisia ko Isareli. Namana wa lavoka okuti Elisia u tambula ciwa konjo yaye ndomunu umue o likasi. Pole, Elisia hayeko wa sapela la Namana, eye wa tuma ukuenje waye oku lama Namana kuenda oku wĩha esapulo liokuti: ‘Kuende ka lisukule olonjanja epanduvali Volui Yordão. Nda wa ci linga o kaya.’

Namana wa sumuile calua. Eye wa popia hati: ‘Nda sima siti uprofeto o ndi sakula poku vilikiya onduko ya Suku yaye, loku ndi pepelela leka liaye. Pole, wa ndi sapuila oco ngende kolui olu ko Isareli. Etu tu kuete olondui via velapo ko Suria. Momo lie ka ndi tumilileko?’ Namana wa tema kuenje wa tunda konjo ya Elisia.

Akuenje va Namana vo kuatisa oco a sokolole ciwa. Ovo vo sapuila vati: ‘Nda kua lingile hẽ cosi citava oco o kaye? Eci uprofeto a ku sapuila oku linga, ocina cimue ca leluka. Nye ku ci lingila?’ Namana wa yevelela kolondaka viavo. Eye wa enda Kolui Yordão kuenje wa liyaveka vovava olonjanja epanduvali. Noke yolonjanja epanduvali, Namana wa tunda vovava okuti wa kaya. Eye wa eca olopandu kuenda wa tiukila ku Elisia oco o pandule. Namana wa popia hati: ‘Kaliye nda kũlĩha okuti Yehova eye Suku yocili.’ Nye o sima okuti oco kafeko u Isareli a yeva vutima eci Namana a tiuka okuti wa kaya?