Ungelo wa Yehova wa Teyuila Hesekiya

Uviali wa va Asuria wa tambuile usoma wapata ekũi a va Isareli. Kaliye Senakeriva Soma yo Asuria, o yongolavo oku tambula usoma wapata avali a Yuda. Eye wa fetika oku tambula lumosi lumosi alupale o ko Yuda. Pole, olupale a yonguile vali o Yerusalãi. Senakeriva ka kũlĩhĩle okuti Yehova wa kala oku teyuila o Yerusalãi.

Hesekiya Soma yo ko Yuda wa feta Senakeriva olombongo vialua, oco ka ka tambule o Yerusalãi. Ndaño okuti Senakeriva wa tambula olombongo, pole, lopo wa tuma olohoka viaye via pama oco vi tambule o Yerusalãi. Omanu volupale va kala lusumba walua momo va Asuria va kala oku pitĩla ocipepi lavo. Kuenje Hesekiya wa sapuila omanu hati: ‘Ko ka kuati usumba. Va Asuria va pama, pole, Yehova o tu pamisa vali okuti ovo ci sule.’

Senakeriva wa tuma ko Yerusalãi omunga yaye, Ravesiake oco a pembule omanu. Ravesiake wa talama kosamua yolupale kuenje wa kaluka lolukandi hati: ‘Yehova ka tẽla oku vu popeli. Ko ka eceleli okuti Hesekiya o vu kembi. Ka kuli osuku yi pondola oku vu popela peka lietu.’

Hesekiya wa pula ku Yehova eci a sukila oku linga. Noke Yehova wa tambulula hati: ‘Ku ka kuate usumba lolondaka via Ravesiake. Senakeriva ka ka tambula o Yerusalãi.’ Noke Hesekiya wa tambula ovikanda vimue via tunda ku Senakeriva. Vovikanda viaco mua sonehiwa hati: ‘Liwekapo. Yehova ka pondola oku ku popela.’ Hesekiya wa likutilila hati: ‘A Yehova tu popele, oco omanu vosi va kũlĩhe okuti, ove lika u Suku yocili.’ Yehova wa sapuila Hesekiya hati: ‘Soma yo Asuria ka iñila vo Yerusalãi. Ame ndi teyuila olupale luange.’

Senakeriva wa kolelele okuti ndopo o tambula o Yerusalãi. Pole, vuteke umue Yehova wa tuma ungelo pocitumãlo asualali va kala, kosamua yolupale. Ungelo waco wa ponda eci ci soka 185,000 kasualali! Asualali vosi va pama va Soma Senakeriva va fa. Eye wa yuliwa kuenje wa tiukila konjo. Yehova wa teyuila Hesekiya kuenda o Yerusalãi ndomo a likuminyile. Nda ove wa kaile ko Yerusalãi, nda wa kolela hẽ ku Yehova?