Usoma Umue u ka Kala Oloneke ka vi Pui

Vuteke umue Soma Nevukandesa wa lota onjoi yimue ka ya kũlĩhĩwile. Onjoi yaco yo sakalaisa calua okuti ka tẽlele oku pekela. Omo liaco, wa kovonga alume vaye vakualumbu kuenje wa va sapuila hati: ‘Ndi lomboluili onjoi yange.’ Ovo va popia vati: ‘Tu sapuile eci wa lota a Soma.’ Noke Nevukandesa wa popia lavo hati: ‘Eci nda lota ca ndimba! Pole, nda ka wa ndi sapuilili onjoi yaco ndu ku pondi.’ Ovo va sapuila vali soma vati: ‘Tu sapuile eci wa lota kuenje noke tu lombolola elomboloko liaco.’ Eye wa popia hati: ‘Ene vosi vu kasi oku seteka oku ndi limbika. Ndi sapuili eci nda lota!’ Ovo va sapuila soma vati: ‘Kilu lieve ka kuli omunu o tẽla oku lombolola ondaka yaco. Eci wa pinga ka ci tẽliwa.’

Nevukandesa wa temẽle calua kuenje wa handeleka okuti olonoño viosi vio vofeka vi pondiwa. Volonoño viaco, mua kongelele Daniele, Sadrake, Mesake kuenda Aved-Nego. Daniele wa pinga oco soma o wĩhe evelo lioku u lomboluila onjoi. Kuenje Daniele kumue lakamba vaye va likutilila ku Yehova loku pinga kokuaye oco a va kuatise. Nye Yehova a linga?

Vocinjonde cimue, Yehova wa lekisa ku Daniele onjoi ya Nevukandesa kuenda wo situluila elomboloko liaco. Keteke lia kuamamo Daniele wa enda kukuenje wa soma kuenje wo sapuila hati: ‘Ku ka ponde laumue pokati kolonoño. Ame ndi pondola oku lombolola onjoi ya soma.’ Ukuenje wa soma wa tuala Daniele ku Nevukandesa. Daniele wa sapuila soma hati: ‘Suku wa situlula kokuove eci ci ka pita kovaso yoloneke. Onjoi yove yeyi: Ove wa mola ociñumañuma cimue cinene ci kuete utue wulu, onete lovoko opalata, imo kuenda ovikalo viosipi, ovolu aco utale kuenda olomãhi viaco viutale okuti via tengiwa lotuma. Noke ewe limue lia tetiwa komunda kuenda lia veta kolomãi viociñumañuma. Kuenje ociñumañuma ca nyanyõha ndoneketela kuenda cambatiwa lofela. Pole, ewe lia linga omunda yimue yinene kuenje lia yukisa ongongo.’

Omo liaco, Daniele wa popia hati: ‘Onjoi yove yi lomboloka ndoco: Usoma wove owo utue wulu. Opalata usoma umue u keya noke yusoma wove. Noke ku keya usoma umue u ka kala ndosipi kuenje u ka viala oluali luosi. Usoma u ka kuamamo u ka pama ndutale. Oku sulako ku kala usoma umue u tepiwa, okuti olonepa vimue vi pama ndutale kuenda olonepa vimue vi leñela ndotuma. Ewe lia linga omunda, li lomboloka Usoma wa Suku. Owo u ka nyõla ovosoma aco osi kuenda u kala muẽle hũ oloneke ka vi pui.’

Nevukandesa wa kekamẽla Daniele loku petamisa ocipala caye. Nevukandesa wa popia hati: ‘Suku yove wa situlula onjoi eyi kokuove. Ka kuli Osuku ya lisoka laye.’ Nevukandesa ka pondele Daniele, pole, wo lingisa usongui wolonoño viosi kuenda wa viala olofeka viosi vio ko Bavulono. O pondola hẽ oku limbuka ndomo Yehova a tambulula ohutililo ya Daniele?