Olonumbi Viatiamẽla Kohongele Ekalo Lietu Tuakristão Kuenda Oku Kunda

Ceci ci Kasimo

1. Ohongele Ekalo Lietu Kuenda Oku Kunda, yi kamamako oku lingiwa ndomo ca lekisiwa Vovipama Viohongele—Ekalo Lietu Tuakristão Kuenda Oku Kunda kuenda ndomo ci likuata lolonumbi vi kuãimo. Akundi vosi va sukila oku lalekiwa oco va liece olumue koku tambula olonepa violondonge. Omanu vakuavo okuti va siata oku endaenda kolohongele olonjanja viosi, va pondolavo oku panga onepa, nda va tava kalongiso Embimbiliya kuenda va kapako olonumbi vialio komuenyo wavo.—Osikola Yupange, kem. 282.

OLONDAKA VIOKU FETIKA

2. Ekukutu limosi. Olosemana viosi, noke yocisungo kuenda ohutililo yoku fetika, usongui wohongele Ekalo Lietu Kuenda Oku Kunda, o ka lombolola ovina vimue viatiamẽla kulandu wohongele. Eye o sukila oku tiamisila utima kolonepa vi ka kuatisa calua ekongelo.

OVOKUASI A SANGIWA VONDAKA YA SUKU

3. Ohundo: Akukutu ekũi. Osapi kuenda atosi avali ale atatu a velapo, a kapiwa Vovipama Viohongele Ekalo Lietu Tuakristão Kuenda Oku Kunda. Ohundo yaco, yi sukila oku lingiwa lukulu umue wekongelo ale loñuatisi yimue yekongelo ya loñoloha. Eci ku fetikiwa elivulu limue liokaliye vulandu woku tangiwa Kuembimbiliya vosemana, ku ka lekisiwa ovideo yimue yulandu welivulu liaco. Manji o linga ohundo, o pondola oku lombolola ndomo ovideo yi likuata losapi. Pole, eye o sukila oku kũlĩhĩsa atosi a sangiwa vovipama viohongele. Handi vali, nda otembo yecelela, o sukila oku lombolola oviluvialuvia vina via kapiwamo okuti vi panga onepa kulandu waco. Eye o pondola oku kongelamo ovina vikuavo a konomuisa, nda ovina viaco vi kuatisa oku tõlisa ulandu wohundo.

4. Ovina vi Sangiwa Vembimbiliya: Akukutu ekũi. Eyi onepa yimue yi lingiwa lapulilo kuenda atambululo okuti ka mu kongela olondaka vioku fetika ale vioku malusula. Oyo yi lingiwa lukulu umue wekongelo ale loñuatisi yimue yekongelo ya loñoloha. Hundi o sukila oku linga apulilo avali kolonjeveleli. Handi vali, eye o pondola oku nõla nda ku tangiwa ovinimbu viosi Viembimbiliya via tukuiwa. Vamanji vana va tambulula, va sukila oku ci linga vokuenda kueci ci soka 30 kolosengundu.

5. Oku Tangiwa Kuembimbiliya: Akukutu akuãla. Onepa eyi yondonge yi sukila oku lingiwa la manji umue ulume. Eye o sukila oku tanga onepa ya tukuiwa okuti ka tukula olondaka vioku fetika ale vioku malusula. Manji o songola ohongele, o ka lekisa onjongole yoku kuatisa olondonge oku tanga lonjila ya suapo, yi lomboloka, oku tumbika ciwa ondaka, etõliso liondaka ndomo mua sunguluka, epongoluilo liondaka, atulo a sunguluka kuenda oku vangula ndomo a tuwa. Omo okuti olonepa vimue vioku tanga vimbumbulu kuenda vikuavo via lepa, usongui wohongele Ekalo Lietu Kuenda Oku Kunda o sukila oku kapako oku loñoloha kuolondonge eci a eca olonepa viaco.

KAPAKO OLONUMBI EVI KUPANGE WOKU KUNDA

6. Ekũi latãlo kakukutu. Onepa eyi yohongele ya sokiyiwila oku pindisa vamanji kupange woku kunda kuenda oku mioñolola uloño wavo woku kunda kuenda woku longisa. Ndomo ci likuata lesukila, akulu vekongelo va pondola oku tambula ovipama violondonge. Ondonge londonge yi sukila oku lilongisa kuenda oku kapako ocipama combrochura Oku Longisa ale combrochura Sola Omanu yi molẽha vovingondombela ponele yocipama ci sangiwa Vovipama Viohongele Ekalo Lietu Tuakristão Kuenda Oku Kunda. Olonjanja vimue, ku ka lingiwa esokiyo lionepa yimue lonumbi yokuti, “Ohundo lapulilo amue kolonjeveleli.” Onepa yaco, yi sukila oku lingiwa lukulu umue wekongelo ale loñuatisi yekongelo ya loñoloha.—Tala ocinimbu 15 ci lombolola ndomo ku lingiwa olonepa lonumbi yokuti “Ohundo lapulilo amue kolonjeveleli.”

7. Oku Fetika Ombangulo: Onepa eyi yi lingiwa la manji ulume ale ukãi. Nda manji ulume eye o linga onepa yaco, oñuatisi yaye yi sukilavo oku kala ulume, nda ukãi o sukilavo oku kala ukãi, ale umue ukuepata yondonge yaco. Ondonge yaco kumue loñuatisi yaye, citava okuti va tumala ale va talama.—Oco kuate alomboluilo akuavo atiamẽla kulandu wonepa yaco kuenda ovindekaise tu pondola oku talavaya lavio, tala ovinimbu 12 kuenda 13.

8. Amamako Oku Vetiya Onjongole: Onepa eyi yi lingiwa la manji ulume ale ukãi. Nda manji ulume eye o linga onepa yaco, oñuatisi yaye yi sukilavo oku kala ulume, ale nda ukãi o sukilavo oku kala ukãi. (km 5/97 kem. 3) Ondonge yaco kumue loñuatisi yaye, citava okuti va tumala ale va talama. Ondonge yi sukila oku linga ocindekaise lonjila yimue okuti, yi vetiya onjongole omunu alekisa onjanja ya pita.—Oco kuate alomboluilo akuavo atiamẽla kulandu wonepa yaco kuenda ovindekaise tu pondola oku talavaya lavio, tala ovinimbu 12 kuenda 13.

9. Oku Linga Olondonge: Onepa eyi yi lingiwa la manji ulume ale ukãi. Nda manji ulume eye o linga onepa yaco, oñuatisi yaye yi sukilavo oku kala ulume, ale nda ukãi o sukilavo oku kala ukãi. (km 5/97 kem. 3) Ondonge yaco kumue loñuatisi yaye, citava okuti va tumala ale va talama. Onepa eyi, yi lekisa onepa yimue yelilongiso Liembimbiliya lia fetikiwa ale. Ku sukila oku tukula olondaka vioku fetika ale vioku malusula, te lika nda okuti ondonge yi kasi oku kũlĩhĩsiwa pokati katosi aco. Ka sukila oku tanga lolukandi ulandu wosi wonepa yaco, ndaño okuti citava oku ci linga.

10. ELombolola Ovina wa Siata Oku Lilongisa: Onepa eyi nda ohundo yi sukila oku lingiwa la manji umue ulume. Nda okuti ocindekaise yi lingiwa la manji umue ulume, ale ukãi, ale umue ukuepata yondonge yaco. Ondonge yi sukila oku tambulula ciwa kuenda lutate epulilo liosapi, poku kuama olonumbi viono yocipama. Vamanji va linga onepa, va pondola oku tumãla ale oku talama. Ondonge oyo yi nõla nda yi tukula ale sio elivulu muo piwa ocipama caye.

11. Ohundo: Onepa eyi, yi lingiwa la manji umue ulume kuenda yi sukila oku lingiwa ndohundo yimue vekongelo. Nda ohundo yaco ya kunamela ketosi lionepa lialomboluilo A yombrochura Sola Omanu, ondonge yi sukila oku lombolola ndomo ovinimbu Viembimbiliya via tukuiwa vi pondola oku kuamiwa kupange woku kunda. Ndeci, eye o pondola oku lombolola epuluvi tu pondola oku talavaya locinimbu cimue Cembimbiliya, elomboloko liocinimbu caco kuenda ndomo ci pondola oku kuatisa omunu umue. Eci ohundo yaco yi kunamela kocipama cimue combrochura Sola Omanu, ondonge yi sukila oku lombolola ndomo tu kapako ocipama caco kupange woku kunda. Eye o pondola oku lombolola ulandu u sangiwa ketosi 1 liocipama ale ocinimbu cimue Cembimbiliya ca tukuiwa vocipama caco, nda ci sukiliwa.

12. Ulandu: Olonumbi vi sangiwa vocinimbu eci leci ci kuaĩmo, vi tiamisiwila konepa “Oku Fetika ombangulo” kuenda “Amamako Oku Vetiya Onjongole.” Nda ka kuli onumbi yikuavo, ocimãho condonge oku lombolola ocili Cembimbiliya lonjila yimue ya leluka haiyo yi kuete esilivilo komunu a kasi oku sapela laye, loku sia etosi limue lioku sapela onjanja yikuavo. Ondonge yi sukila oku nõla etosi limue liatiamẽla kocitangi omanu va kasi oku liyaka laco okuti lieca onima yiwa. Eye o pondola oku nõla nda o lekisa elivulu limue ale ovideo yi sangiwa vocimalẽho cetu coku longisa ale sio. Olondonge ka vi sukila oku patekela ovindekaise, pole, vi sukila oku pindisa uloño wavo woku sapela loku lekisa ovituwa ndeci, onjongole ku vakuakuavo kuenda oku vangula ndomo va tuwa.

13. Ovindekaise: Ondonge yi sukila oku talavaya lovindekaise vio wĩhiwa loku talavaya lavio ndomo ci likuata lekalo lio pocitumãlo. Ndeci:

(1) Konjo Lanjo: Vocindekaise eci mua kongela, oku kundila konjo lanjo, lotelefone ale lukanda. Mua kongelavo oku vetiya onjongole ya lekisiwa kolonjila viaco vitatu okuti, kupange woku kundila konjo lanjo.
(2) Uvangi ka wa Sokiyiwile: Ocindekaise eci ci lekisa ndomo tu sanda apuluvi oku pongolola ombangulo yimue oco tu ece uvangi. Mu kongela oku tukuila ocinimbu cimue Cembimbiliya komanu kupange, kosikola, posongo, vokalela, ale kocitumãlo cikuavo osimbu ku lingiwa ovopange eteke leteke.
(3) Oku Kundila Volokololo: Vocindekaise eci mua kongela oku kunda lotuakãlu loku sapela lomanu pocitanda, volokololo, povitumãlo vioku puyukila, povitumãlo pa talama oviendelo kuenda kolonepa vikuavo ku sangiwa omanu.

14. Oku Talavaya Lolovideo Kuenda Alivulu: Ndomo ci likuata lekalo, ondonge oyo yi nõla nda yi tukula ovideo ale elivulu limue. Nda vocindekaise condonge mua kongela ovideo, ale nda oyo yi nõla oku tukula ovideo yimue, o pondola oku tukula ovideo yaco loku yi lombolola, pole ka yi lekisa vokuenda kuonepa yaco.

EKALO LIAKRISTÃO

15. Noke liocisungo, akukutu 15 a sokiyiwila onepa yimue ale vivali vi ka kuatisa olonjeveleli oku kapako Ondaka ya Suku. Nda ka kuli onumbi yikuavo, olonepa viaco vi eciwe kakulu vekongelo ale koloñuatisi viekongelo via loñoloha, pole onepa yokuti, vievi vi sukiliwa vekongelo, vi lingiwe lika lakulu vekongelo. Nda onepa yaco yi kuete onumbi yokuti, ohundo lapulilo amue kolonjeveleli, manji o linga onepa yaco o pondola oku linga apulilo akuavo vokuenda kuonepa yaco okuti, ka lingi lika apulilo ana a sokiyiwa. Eye o sukila oku fetika lolondaka via teta onimbu oco a kuate otembo yoku tukula atosi a velapo kuenda oco olonjeveleli vi ecevo atambululo. Nda okuti mua kongela oku pulisa manji umue, atambululo aye o ka a ecela kembumbua, okuti ka ci lingila apa a tumãla, nda citava.

16. Elilongiso Liembimbiliya Vekongelo: Akukutu akũi atatu. Onepa yaco yi lingiwe lukulu umue wekongelo wa loñoloha. Vakongelo ana okuti ka muli akulu valua vekongelo, citava okuti oloñuatisi viekongelo via loñoloha ovio vi linga onepa yaco nda citava.) Ocimunga cakulu vekongelo oco ci nõla omunu wa loñoloha oku songola Elilongiso Liembimbiliya Vekongelo. Vana va nõliwa va sukila oku linga onepa yaco lonjila yimue yi vetiya, poku talavaya ciwa lotembo, oku lombolola ovisonehua via velapo kuenda oku kuatisa olonjeveleli viosi oku limbuka esilivilo lioku kapako atosi a konomuisiwa. Vamanji va nõliwa va ka kuatisiwa lolonumbi via sandekiwa vi lekisa ndomo ku songuiwa olonepa vi lingiwa lapulilo kuenda atambululo. (w23.04 kem. 24, lokakasia) Nda ulandu wosi wa sokiyiwila oku lilongisa osemana yaco wa pua, ka kuli esukila lioku amisako lelilongiso. Nda citava, osemana losemana ku kale vamanji va litepa va songola kuenda vana va tanga. Nda usongui Wohongele Ekalo Lietu Tuakristão Kuenda Oku Kunda eca onumbi yokuti otembo yelilongiso yi tepuluiwe, manji o songola eye o nõla ndomo a ci linga. Citava okuti eye o nõlapo okuti ovinimbu vimue ka vi tangiwa.

OLONDAKA VIOKU MALUSULA

17. Akukutu atatu. Usongui Wohongele Ekalo Lietu Tuakristão Kuenda Oku Kunda o pitulula atosi a velapo ohongele. O sukilavo oku tukula atosi ohongele yosemana yi kuãimo. Nda kua supa otembo, eye o sukilavo oku tukula olonduko violondonge vi ka linga olonepa osemana yaco. Nda ku eciwa esapulo limue ale ku tangiwa ukanda umue, manji o songola o sukila oku ci linga vakukutu aco a sulako, te lika nda kuli onumbi yikuavo. Olonumbi vikuavo viatiamẽla koku puenya ale olohongele viupange woku kunda vi lingiwa olonjanja viosi, ka citava oku vi tukuila kembumbua pole, vi kapiwa vokuadru yasapulo. Pamue akukutu atatu olondaka via sulako, ka a tẽla oco ku eciwe asapulo a sukiliwa ale oku tanga ovikanda via tambuiwa. Nda oco ca li pita, usongui wohongele o sukila oku pinga ku vamanji va ka linga olonepa losapi, Ekalo Lietu Tuakristão oco va tepulule otembo yolonepa viavo. (Tala ovinimbu 16 kuenda 19.) Ohongele yi malusuiwa locisungo kuenda ohutililo.

EPANDIYO KUENDA ALUNGULO

18. Ondonge noke yoku linga onepa yaye, usongui Wohongele Ekalo Lietu Tuakristão Kuenda Oku Kunda, o kuete ekukutu limosi oco a ece epandiyo kuenda alungulo a kunãmela kocipama condonge yaco. Osimbu handi ondonge ka ya lingile onepa yaye, usongui ka citava okuti o tukula etosi a kasi oku kũlĩhĩsiwa. Pole noke liondonge oku malusula oku linga onepa yaye kuenda usongui wohongele oku eca epandiyo, nda usongui o yongola, citava okuti o tukula ocipama ca nõliwila ondonge loku lombolola esunga lieci ondonge yaco ya kuatela onima yiwa poku lombolola onepa yaco lumbombe kuenje ci ko kuatisa oku kũlĩhĩsa vali ocipama caco kuenda ndomo a ci linga. Usongui o pondolavo oku tukula atosi akuavo ocipama caco, nda wa limbuka okuti ci ka kuatisa ondonge kuenda olonjeveleli. Nda usongui o yongola, noke liohongele ale vepuluvi likuavo, citava okuti eca pokolika alungulo a kuete esilivilo a kunamela vombrochura Sola Omanu, ombrochura Oku Longisa ale velivulu Kuatisiwa Losikola, catiamẽla kocipama co nõliwila ale ocipama cikuavo. Oco o kuate olonumbi vikuavo viatiamẽla kocikele Cusongui Ekalo Lietu Tuakristão kuenda coñuatisi yoku eca alungulo, tala ocinimbi 19, 24 kuenda 25.

OTEMBO

19. Olonepa viosi vi sukila oku lingiwa votembo ya sokiyiwa, oku kongelamo alungulo a eciwa lusongui Wohongele Ekalo Lietu kuenda Oku Kunda. Ndaño okuti ocicapa colohongele Ekalo Lietu kuenda Oku Kunda ci lekisa otembo ocipama locipama ci lingiwa, ka kuli esunga lioku vokiyako olonumbi vikuavo oco otembo ya tukuiwa yi pueko. Nda manji umue wa pitahãla votembo yo sokiyiwila, usongui Wohongele Ekalo Lietu kuenda Oku Kunda ale oñuatisi yoku eca alungulo, va sukila oku eca elungulo pokolika. (Tala ocinimbu 24 kuenda 25.) Ohongele yosi, oku kongelamo ovisungo lolohutililo, yi sukila oku tumãla eci ci soka owola 1 lakukutu 45.

EPASU LIA MANJI O NYULA AKONGELO

20. Eci ekongelo li nyuliwa la manji o nyula akongelo, ulandu wendisiwe ndomo ci lekisiwa Kovipama Viohongele Ekalo Lietu Tuakristão Kuenda Oku Kunda, pole, eci ci sukila oku pongoloka ceci: Elilongiso Liembimbiliya Vekongelo okuti, li sangiwa vonepa Ekalo Liakristão li ka piñainyiwa lohundo yimue yupange yakukutu 30 okuti, yi lingiwa la manji o nyula akongelo. Osimbu ohundo yaco ka ya lingiwile, usongui wohongele Ekalo Lietu Kuenda Oku Kunda, o ka teta onimbu poku lombolola ovipama via lekisiwa kohongele loku tukula atosi a ka konomuisiwa vosemana yi kuamamo, o ka lingavo asapulo a sukiliwa, oku tanga ovikanda kuenje o ka vilikiya manji o nyula akongelo. Noke yohundo yupange, manji o nyula akongelo o ka malusula ohongele locisungo cimue ca nõliwa laye. Eye o pondola oku laleka manji ukuavo oco a linge ohutililo ya sulako. Vokuenda kuosemana yepasu, ka ku ka lingiwa onepa la yimue yondonge vohondo yikuavo velimi liekongelo. Ovimunga vi pondola oku linga olohongele vialio ndaño muẽle ceci manji o nyula akongelo a nyula ekongelo ocimunga ci tiamẽla. Pole, ocimunga ci sukila oku yevelela ohundo yupange ya manji o nyula akongelo kumosi lekongelo ocimunga ci tiamẽla.

OSEMANA YOHONGELE YIMBO ALE YOHONGELE YOFEKA

21. DVokuenda kuosemana yohongele yimbo ale yohongele yofeka, ka ku ka lingiwa olohongele viekongelo. Vosi vekongelo va sukila oku ivaluisiwa okuti, ovipama via sokiyiwila olohongele vosemana yaco, vi ka konomuisiwa velilongiso lio pokolika ale vefendelo liepata.

OSEMANA YONJIVALUKO

22. Nda Onjivaluko yi ka lingiwa vokati kosemana, ohongele Ekalo Lietu Kuenda Oku Kunda ka yi ka lingiwa.

MITAVASO YOHONGELE EKALO LIETU KUENDA OKU KUNDA

23. Ocimunga cakulu vekongelo, ci sukila oku nõla ukulu umue wekongelo oco a kale mitavaso yohongele Ekalo Lietu Kuenda Oku Kunda. Eye o kuete ocikele coku sokiya okuti, ohongele yongotiyiwa ciwa kuenda yi lingiwa ndomo ci likuata lolonumbi via tukuiwa. Eye o sukilavo oku sapela ciwa la manji oñuatisi yoku eca alungulo. Eci ku iya Ovipama Viohongele Ekalo Lietu Tuakristão Kuenda Oku Kunda, mitavaso yohongele Ekalo Lietu Kuenda Oku Kunda, o sukila oku linga esokiyo liovipama violondonge vi soka olosãi vivali. Mua kongela ovipama vina okuti haviolondongeko, ovipama viamanji o songola ohongele yovokati kosemana, (vamanji va taviwa locimunga cakulu vekongelo) kuenda ovipama violondonge. (Tala ovinimbu 3-16 kuenda 24.) Poku sokiya ovipama violondonge, o sukila oku kapako utunga loku kũlĩhĩsa uloño wondonge kuenda nda eye o pondola oku lombolola lonjila ya suapo onepa ya eciwa kokuaye. Eye o sukila oku kuama onjila yimuamue poku eca olonepa vikuavo viohongele. Onepa lonepa yi sukila oku eciwa selo okuti, ceci ku kamba olosemana vitatu. Emẽla liovipama Viohongele Ekalo Lietu Tuakristão Kuenda Oku Kunda (S-89) ci sukila oku talavaya lalio poku eca olonepa kolondonge. Usongui wohonglele Ekalo Lietu Tuakristão Kuenda Oku Kunda, o sukila oku kũlĩhĩsa okuti o kopiya yimue yulandu wovipama lolonepa viosi viohongele yi kapiwa vokuadru yasapulo. Ocimunga cakulu ci nõla ukulu ukuavo wekongelo ale oñuatisi yekongelo oco a kuatise kupange waco. Pole, akulu vekongelo ovo lika va kuete ocikele coku eca olonepa vina okuti ka vi lingiwa lolondonge.

USONGUI WOHONGELE EKALO LIETU KUENDA OKU KUNDA

24. Osemana losemana, ukulu umue wekongelo o ka kala usongui wohongele Ekalo Lietu Kuenda Oku Kunda. (Vakongelo ana okuti ka muli akulu valua vekongelo, citava okuti oloñuatisi vimue viekongelo okuti via loñoloha, vi pondola oku linga onepa yaco nda ci sukiliwa.) Eye o kuete ocikele coku pongiya olondaka vioku fetika kuenda olondaka vioku malusula. Handi vali, eye o kuetevo ocikele coku vilikiya vamanji vosi va ka linga olonepa kuenje nda okuti ka kuli akulu valua vekongelo, eye o kuetevo ocikele coku linga olonepa vikuavo kohongele, ca piãla enene olonepa vina okuti mua kongela oku lekisa ovideo. Eye ka sukila oku vangula calua poku pandiya loku vilikiya manji o kuamamo. Ocimunga cakulu vekongelo va ka nõla akulu vekongelo va loñoloha oco va tẽlise ocikele coku songola. Akulu vekongelo okuti va loñoloha, va nõliwa olonjanja vimue oco va kale asongui vohongele. Ndomo ci likuata lekalo liekongelo, mitavaso yohongele Ekalo Lietu Kuenda Oku Kunda, o pondola oku kala usongui wohongele olonjanja vialua okuti akulu vakuavo vekongelo ci sule. Nda okuti ukulu umue wekongelo wa loñoloha koku songola Elilongiso Liembimbiliya Vekongelo, eci ci lekisa okuti eye wa loñolohavo koku songola ohongele yaco. Pole, ivaluki okuti, ukulu wekongelo o songola ohongele, o sukila oku eca epandiyo kuenda alungulo locisola ku vamanji va ka linga olonepa viavo. Usongui o kuetevo ocikele coku kũlĩhĩsa okuti ohongele yi malusuiwa velivala lia sokiyiwa. (Tala ovinimbu 17 kuenda 19.) Nda kembumbua kua lianja kuenda oyo onjongole yusongui, eye o pondola oku kala kenguena likuavo oco a vilikiye vamanji va ka linga olonepa osimbu manji wa nõliwa a kala kovaso yenguena konele yikuavo yembumbua. Usongui wohongele citava okuti o tumãla komangu yimue yi kasi komesa kembumbua, vokuenda kuonepa yoku tangiwa Kuembimbiliya kuenda onepa Kapako Olonumbi Evi Kupange Woku Kunda. Oku kuama onjila yaco, ci kuatisa koku tẽlisa olonepa votembo ya sokiyiwa.

OÑUATISI YOKU ECA ALUNGULO

25. Olonjanja vialua, ciwa oku nõla ukulu umue wekongelo wa loñoloha koku linga olohundo oco a tẽlise ocikele caco. Manji oñuatisi yoku eca alungulo o kuete ocikele coku eca alungulo pokolika kakulu vekongelo kuenda koloñuatisi viekongelo nda ci sukiliwa, atiamẽla kolonepa viosi va linga, oku kongelamo olonepa viohongele Ekalo Lietu Kuenda Oku Kunda, olohundo viowiñi kuenda oku songola ale oku tanga Utala Wondavululi ale Elilongiso Liembimbiliya Vekongelo. (Tala ocinimbu 19.) Nda vekongelo muli akulu valua vekongelo va loñoloha koku linga olohundo kuenda koku longisa, unyamo lunyamo ku nõliwa ukulu ukuavo oco a tẽlise ocikele coku kala oñuatisi yoku eca alungulo. Manji oñuatisi yoku eca alungulo ka sukila oku eca alungulo olonjanja viosi eci ku lingiwa onepa yimue.

OLOHONDO VIKUAVO VIOKU LINGILA OVIPAMA

26. Akongelo a pondola oku sokiya olohondo vikuavo oco vamanji va lingilemo olonepa, pole, ca tamba lika ketendelo liolondonge. Vohondo lohondo, mu sukila oku kala manji umue eca alungulo okuti wa loñoloha kuenda ca sunguluka oku nõla ukulu umue wekongelo. Nda ci sukiliwa, oñuatisi yimue yekongelo ya loñoloha yi pondola oku tẽlisa ocikele caco. Ocimunga cakulu vekongelo ci sukila oku nõla manji o pondola oku tẽlisa ocikele caco kuenda oku kũlĩhĩsa nda otembo lotembo ku ka nõliwa manji ukuavo. Manji ukuakueca alungulo, o sukila oku kuama onumbi yi sangiwa kocinimbu 18. Nda vekongelo muli olohondo vikuavo, vamanji va tambula olonepa violondonge, va sukila oku enda vohondo yaco noke yonepa Ovina vi Sangiwa Vembimbiliya ponepa Ovokuasi a Sangiwa Vondaka ya Suku. Noke lionepa Kapako Olonumbi Evi Kupange Woku Kunda, va sukila oku tiukila polomangu viavo.

OLOVIDEO

27. Vohongele yilo ku ka lekisiwa olovideo vimue via nõliwa. Olovideo viohongele yo vokati kosemana, vi ka kapiwa vo aplikativu JW Library^® okuti citava oku talavaya lavio vivimãleho via litepa.

S-38-UB 11/23