Osikola Yupange Wakristão wo 2015 yi ka tu Kuatisa Oku Mioñolola Oku Longisa Kuetu

¹ Daviti ukualosamo wa soneha hati: “Olondaka viomela wange lovisimilo viutima wange vi sunguluke kokuove, a Yehova, Wucikolo cange, haive Wunjovoli yange.” (Osa. 19:14) Etu tu yongola okuti olondaka vietu vi sanjuisa Yehova, poku kapako esumũlũho lietu lioku vangula ocili vekongelo kuenda kupange woku kunda. Osikola Yupange Wakristão yimue pokati kolonjila Yehova a siata oku tu pindisa layo kupange woku kunda. Epindiso liaco lia siata oku lingiwa olosemana viosi kueci ci pitahãla 111.000 kakongelo a sangiwa voluali luosi. Ya siata oku kuatisa vamanji va sangiwa voluali luosi haivo va kuete akalo a litepa oco va loñolohe ndakundi volondaka viwa, koku longisa luloño, lutate, kuenda lutõi.—Ovil. 19:8; Va Kol. 4:6.

² Vulandu wosikola wo 2015 mu ka kongela ovolandu a sangiwa vombrochura losapi hati: “Okalivulu ka Lombolola Ondaka ya Suku” kuenda “ovolandu opiwa velivulu Estudo Perspicaz das Escrituras, Volume 1. Kuenda Volume 2. Handi vali, kua lingiwa apongoloko kotembo yoku tangiwa Kuembimbiliya kuenda konepa N. 1. Apongoloko aco kuenda olonumbi vi lekisa ndomo olonepa viosikola vi ka lingiwa, vi konomuisiwa vovinimbu vi kuaĩmo.

³ Oku Tangiwa Kuembimbiliya: Vamanji va ka linga onepa yaco va ka lombolola etosi limue lia velapo liopiwa koku tangiwa Kuembimbiliya vosemana vokuenda kuakukutu avali. Kuenje oku lipongiya ciwa ci ka kuatisa oku lombolola etosi lia velapo vekongelo votembo ya tukuiwa. Pole, ndomo ca siata oku lingiwa, ekongelo li ka kuata akukutu epandu okuti omunu lomunu o kuata 30 kolosengundu oku eca etambululo liaye ketosi lia velapo oku tangiwa Kuembimbiliya vosemana. Omo liaco ci sukila oku lipongiya loku lipindisa ciwa oco ku eciwe etambululo liwa vokuenda kolosengundu 30. Oku ci linga ci ka ecelela okuti vamanji valua va ecavo atambululo avo kueci va lilongisa kekonomuiso va linga.

⁴ Onepa No. 1: Otembo yoku tangiwa Kuembimbiliya oku upisa cilo ka yi ka pitahãle akukutu atatu kuenda manji o ka tanga lika ovinimbu vimue. Vamanji va ka linga onepa yoku tanga va sukila oku pongiya olonjanja vialua poku tanga lolukandi loku tukula ciwa olondaka kuenda oku vangula lelomboloko oco va pitiye ciwa ulandu waco. Afendeli vosi va Yehova va sukila oku likolisilako oku tanga ciwa, momo oku tanga ku kuete esilivilo lia velapo kefendelo lietu. Tua sanjuka calua omo lioku mola okuti valua pokati komãla vetu va tanga ciwa! Omo liaco tu eca olopandu kolonjali omo lialikolisilo avo oku kuatisa omãla vavo oku tanga ciwa.

⁵ Onepa No. 2: Yi ka lingiwa vakukutu atãlo, ocipama caco ci lingiwa la manji umue ukãi. Eye o sukila oku kuama osapi ya tukuiwa. Nda ulandu waco wopiwa Vokalivulu ka Lombolola Ondaka ya Suku, a lekise ndomo u kapiwako kupange woku kunda kuenda ndomo ci likuata lekalo liocikanjo. Nda onepa yaco yi lombolola omunu umue wa tukuiwa Vembimbiliya okuti yopiwa velivulu Estudo Perspicaz das Escrituras, Volume 1, manji o yi linga, o sukila oku konomuisa lutate vonepa ya linga hati, olonduko viomanu va tukuiwa Vembimbiliya, a nõle ovisonehua vi tangiwa, loku lekisa eci tu lilongisa kulandu womunu waco wa tukuiwa Vembimbiliya. Citava oku kongelamo ovisonehua vi likuata losapi yaco. Mitavaso yosikola eye o nõla manji o kala oñuatisi ya manji o linga onepa yaco.

⁶ Onepa No. 3: Onepa yaco yi lingiwa vakukutu atãlo citava okuti yi lingiwa la manji ulume ale ukãi. Nda ya eciwa ku manji ukãi, eye o sukila oku yi linga ndeci ci lingiwa onepa No. 2. Nda onepa yaco ya eciwa ku manji ulume, kuenje yopiwa velivulu Estudo Perspicaz, oyo yi lingiwe ndohundo loku kapako olonjeveleli. Manji o yi linga, o sukila oku konomuisa lutate osapi, loku nõla ovisonehua vi tangiwa, loku lekisa eci tu lilongisa kulandu womunu wa tukuiwa Vembimbiliya.

⁷ Esokiyo Liokaliye Konepa No. 3 ya Vamanji Alume: Nda onepa yaco ya kunamẽla vulandu wopiwa Vokalivulu ka Lombolola Ondaka ya Suku, yi lingiwe ndocindekaise cefendelo liepata ale cupange woku kunda. Mitavaso yosikola o ka nõla manji o kala oñuatisi ya manji o linga onepa yaco. Manji yaco wa nõliwa o sukila oku kala ukuepata ya manji o ka linga onepa yaco, ale manji umue vekongelo. Citava oku kongelamo ovisonehua Viembimbiliya vi likuata losapi yaco. Olonjanja vimue citava okuti ukulu umue wekongelo o linga onepa yaco. Akulu vekongelo va pondola oku nõla oñuatisi yavo, kuenda ocindekaise. Ocili okuti oku ci linga ci ka vetiya vamanji oku mola akulu vekongelo oku lekisa uloño wavo woku longisa la umue vepata liavo ale manji umue ukuavo vekongelo.

⁸ Alungulo: Noke yonepa yimue vakukutu avali mitavaso yosikola o ka eca epandiyo lelungulo yi sangiwa velivulu Kuatisiwa Losikola Yupange Wakristão. Eci mitavaso yosikola a ka vilikiya manji umue oco a linge onepa yaye, ka sukila oku tukula etosi lielungulo manji a kasi oku kuama. PoIe, eci manji a mala oku linga onepa yaye, mitavaso yosikola o sukila oku eca olopandu viocili, kuenda citava oku tukula atosi amue awa manji a tẽlisa vonepa yaye, kuenje a lombolole ndomo manji a tẽlisa ciwa onepa yaye, ale esilivilo lieci manji a kapelako etosi liaco.

⁹ Kemẽla 79 toke 81 yelivulu Osikola Yupange ku sangiwa olonumbi ndomo ku eca alungulo kumanji olinga onepa. Noke ya manji oku linga onepa yaye, mitavaso yosikola o soneha velivulu lia manji atosi awa, kuenda o pulisa pokolika nda manji wa linga oseteko li sangiwa vetosi a tẽlisa. Noke liohongele ale kepuluvi likuavo, citava oku eca elungulo limue pokolika ale epandiyo ku manji wa linga onepa nda ci sukiliwa. Ekuatiso omunu lomunu a tambula kosikola, li tendiwe ndepuluvi lioku u kuatisa oku amamako kespiritu.—1 Tim. 4:15.

¹⁰ Nda manji o kasi oku pitahãla otembo a sokiyiwila, mitavaso yosikola ale manji ukuakueca alungulo citava okuti o linga ondimbukiso ale onjuela yimue yi lekisa okuti manji o kasi oku pitahãla otembo ya sokiyiwa, pole, ci lingiwe lutate. Manji o linga onepa o sukila oku kũlĩha ondimbukiso poku malusula onepa yaye ale oku tunda kembumbua.—Tanga velivulu Osikola Yupange, kem. 282 ocin.4

¹¹ Vosi va likolisilako oku tẽlisa olonumbi vi sukiliwa va vetiyiwa oku li sonehisa Kosikola Yupange Wakristão. (Tanga velivulu Osikola Yupange, kem. 282 ocin. 6.) Epindiso li eciwa losikola yaco li kuatisa afendeli va Suku oku kunda loku longisa olondaka viwa Viusoma lekolelo, lesumbilo, kuenda ocisola. Ocili okuti Yehova o sanjukila calua oku sivayiwa lomanu vosi va kasi oku kuatisiwa lepindiso liaye!—Osa. 148:12, 13; Isa. 50:4.