Oku Sandiliya Yehova Lutima Umue wa Pongiyiwa

ESERA ocitunda ci Isareli wakalele omunu umue waloñoloha okuti ukuakukulihisa, ukuakulilongisa, ukuakusoneha, kuenda ukuakulongisa Ocihandeleko. Eye ecavo ongangu yimue yiwa Kakristão etaili kupange ulingiwa longusu yosi. Oco hẽ ndati? Momo eye wakuamẽlela lokulekisa ekolelo ku Suku ndaño eci akala ko Bavulono, olupale limue luayukile lolosuku viesanda lefendelo liolondele.

Pole ekolelo lia Esera ku Suku kalieyile ño, eye walikolisilako oco alikuate. Eye otusapuilako hati, “wa pongiya utima wahe loku lilongisa ondaka ya Yehova kuenda loku yi pokola.”−Esera 7:10, NW.

Ndeci Esera, omanu va Yehova etaili vayongola oku linga cosi Yehova okevelela kokuavo ndaño okuti vakasi voluali lumue lunyale efendelo liocili. Omo liaco tukulihisi olonjila vipondolavo oku tukuatisa oku pongiya ovitima vietu, omunu wovokati ketu−ocikongela ovisimilo, ovituwa, olonjongole, kuenda ombili yetu−yoku “lilongisa ondaka ya Yehova kuenda loku yi pokola”

Oku Pongiya Ovitima Vietu

“Oku pongiya” cilomboloka “oku liangiliyila kocina cimue eci handi kacalingiwile: oku cikapa vekalo limue liyonguiwa, likuamiwa, ale likeveleliwa. Ocili, nda ove wakuata ukulihiso umue wasuapo Wondaka ya Suku kuenda watumbika omuenyo wove ku Yehova, kuenje utima wove weca uvangi ulekisa okuti ukasi vekalo limue liapongiyiwa, oco yapa, usokisiwa “[l]ongongo yiwa” yapopiwa la Yesu kolusapo lukuli wombuto.−Mateo 13:18–23.

Pole, utima wetu olonjanja viosi usukila utate walua kuenda elikolisilo koku upokuisa. Momo lie? Momo liovina vivali. Tete, omo liovituwa vikoka ohele yalua, ndeci onjunde yikala vocumbo, citava okuti lonjanga yalua yikuata alumbombo, capiãla enene vokuenda “k[u]oloneke” vilo “viasulako” okuti oluali lua Satana, luayuka “ovituwa” lonjuela olonjanja viosi, kuenda ohẽle yovisimilo vivi vietimba. (2 Timoteo 3:1–5; Va Efeso 2:2) Esunga lia vali liatiamẽla kongongo yaco muẽle. Oyo nda kayitatiwa lonjanga yifetika oku kukuta, oku kola, kuenda ka yi kuata esilivilo. Ale eci omanu valua kavakuata utate poku ñuala ñuala vocumbo kuenje va keleñela osi oyo yikala yongo, ongongo yutima wetu ka yimi apako nda kayitatiwa ciwa ale yikeleñeliwa lomanu kavayongola uwa wetu kespiritu.

Hesilivilokuolio cikuete, kuvosi yetu oku kapako elungulo Liembimbiliya liti: “Lava utima wove lepandi, omo kokuawo oko ku tunda olono viomuenyo.”−Olosapo 4:23.

Ovina Vieca Esilivilo ‘Kongongo’ Yutima Wetu

Tukulihisi ovina vimue, ale ovituwa vimue, okuti viaevela esilivilo ‘kongongo’ yetu okuti vikuatisa oku kula kuhayele. Ocili okuti kuli, ovina vialua vikuatisa ovitima vietu kokuamameko, pole palo tulombolola epandu lika kovina viaco: Oku limbuka usuke wetu kovina viespiritu, umbombe, esunguluko, oku sumbila Suku, ekolelo, kuenda ocisola.

Yesu hati: “Vasumuluha ava valimbuka usuke wavo kovina viespiritu.” (Mateo 5:3, NW) Ndeci onjala tu kuata ketimba yituivaluisa okuti tusukila oku lia, oku limbuka usuke wetu kovina viespiritu cituavela onjala kokulia kuespiritu. Ndomo cilekisa, omanu va kuete oñeyi kokulia kuaco momo okuo kuavela elomboloko kuenda esilivilo komuenyo. Ayonjo oluali lua Satana ale owesi waño eci ovina viaco viya osimbu tukasi oku lilongisa pamue vitepulula ongusu yutima wetu koku limbuka usuke waco. Omo liaco Yesu wapopia hati: “Omunu ka muila omuenyo kombolo lika, te kondaka yosi yi tunda vomẽla wa Suku.”−Mateo 4:4.

Komuenyo, oku lialia olonjanja viosi, oku litekula ovikulia viñi viñi kuenda vipepa cinena uhayele ketimba, kuenda ovio vikokisavo etimba oku kuata oñeyi kovikulia vikalingiwa noke. Cimue haico cilingiwa kovina viespiritu. Ove pamue kulikokisa okuti umunu umue ukuakulilongisa, pole nda walinga okuti oku tanga Ondaka ya Suku olonjanja viosi kuenda oku lilongisa alivulu atiamẽla Kembimbiliya olonjanja viosi okuti cikala ocituwa cove, okalimbuka okuti oñyi yove ya yilivokiya. Ocili muẽle, oka kuata onjongole olonjanja viosi kelilongiso liove Liembimbiliya. Omo liaco koka konyohe; likolisilako calua oco otẽle oñeyi yimue yiwa kespiritu.

Umbombe Utulumuisa Utima

Umbombe ocituwa cimue cikuete esilivilo lialua kokukuata utima umue wapongiyiwa utuloñoluisa oco tulongisiwe kuenda utukuatisa oku tava lonjanga yalua oku lemeliwa kuenda oku lunguiwa locisola. Kulihisa ongangu yiwa ya Soma Yosiya. Vokuenda kuviali waye ocisonehua cimue okuti muakongelile Ocihandeleko ca Suku caeciwa pokati ka Mose casangiwa. Eci Yosiya wayevelela olondaka Viocihandeleko kuenda walimbuka ndomo vakukululu vaye vaendele kupãla, watola uwavo waye kuenda wafetika oku lila kovaso a Yehova. Momo lie Ondaka ya Suku yapitila longusu kutima waye “ka wa sivile,” omo liaco cokuatisa oku omboka noke yoku yeva Ondaka ya Yehova. Yehova wamola umbombe wa Yosiya, lutima umue wasunguluka kuenje wosumuluisa ciwa.−2 Olosoma 22:11, 18–20.

Umbombe wakuatisa olondonge via Yesu “omanu vaño, haivo ka va longisiwile” oku likakatela kuenda oku kuama ocili cespiritu cina kacatẽliwile “lolonoño kuenda ku vakualondunge” vatẽla lika ndomo “oluali lutenda olondunge.” (Ovilinga 4:13; Luka 10:21; 1 Va Korindo 1:26) Ava vasulako kavalipongiyile oco vatave Ondaka ya Yehova momo ovitima viavo viakalele viongo lepẽla. Anga hẽ cikomõhisa omo okuti Yehova onyale epẽla?−Olosapo 8:13; Daniele 5:20.

Esunguluko kuenda Oku Sumbila Suku

Uprofeto Yeremiya wasoneha okuti, “utima wa piãla kelimbi haiwo wa hongua enene. Helie o tẽla oku u kulihisa? (Yeremiya 17:9) Elimbi liaco limoleha volonepa vialua, ndeci eci etu muẽle tuliavela esunga liokulinga ocina cimue calueya. Eci cimolehavo eci ovitima vietu vikuata onjongole yoku sanjuisa akambo etu. Pole, esunga, litu loñoluisa oku yila elimbi liosi liutima wetu loku tukuatisa oku tiamẽla kocili tupondola oku amamako. Ukualosamo walekisa esunga liaco eci alikutilila hati: “Ñulihise, a Yehova, seteke. Kulihisa utima wange lovisimilo viange.” Oco muẽle, ukualosamo wapongiya utima waye oco atave oku yelisiwa kuenda oku setekiwa la Yehova, ndaño okuti eci cilomboloka oku limbuka okuti kumoleha ovina vitateka kavikuete esilivilo.−Osamo 17:3; 26:2.

Oku sumbila Suku, kukongela “oku suvuka eviho,” eli ekuatiso limue liocili kondaka eyi yoku yelisiwa. (Olosapo 8:13) Ndaño okuti omunu osanjukila ohenda ya Suku kuenda esunga liaye, una okuti ocili muẽle osumbila Yehova te wakuliha okuti Yehova okuete epondolo lio kuavela ekangiso, ale olofa, kuvana kavapokola kokuaye. Yehova eci apopia ku va Isareli walekisa okuti vana vosumbila citava okuti va pokolavo kokuaye poku popia hati: “Nda va kuata utima woku sumbila loku lava ovihandeleko viange viosi oloneke viosi, nda ciwa, nda ovo lomãla vavo va kala ciwa olotembo viosi!”−Esinumuilo 5:29.

Cilomboloka okuti, oku kuata esumbilo ku Suku, hoku kuatako epokolo limue likisikiwa lusumba, puãi cituvetiya oku pokola ku Isietu ukuacisola haiye tuakuliha okuti okuete letu olonjongole viavelapo kutima. Ocili, esumbilo liaco ku Suku linene muẽle ndesanju, lina Yesu Kristu alekisa.−Isaya 11:3; Luka 12:5.

Utima Umue Wapongiyiwa Ukuete Ekolelo Lialua

Utima umue wapama lekolelo wakuliha okuti ovina viosi Yehova otutuma oku linga ale otuimbila onumbi pokati Kondaka yaye viosi yavio viasunguluka kuenda vukuete esilivilo liavelapo kokuetu. (Isaya 48:17, 18) Omunu okuete utima waco okuata esanju lialua kuenda ekavuluko koku kapako elungulo liasonehiwa Kolosapo 3:5, 6, liti: “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove.” Utima umue wakamba ekolelo, upondola oku kuata ekambovo liekolelo ku Yehova, capiãla enene nda eci cilingiwa cisukila alikolisilo, ndeci oku tepulula ovina vimue komuenyo omo lioku kapa kovaso ovina Viusoma. (Mateo 6:33) Lesunga liwa Yehova walimbuka okuti, ekambo liekolelo kutima cilomboloka “undingaivi.”−Va Heveru 3:12.

Ekolelo lietu ku Yehova lilekisiwa kovina vialua, oku kongelako ovina tulinga eci tukasi vulika konjo yetu. Limbuka ongangu eyi, konumbi yasonehiwa ku Va Galatia 6:7 okuti: “Ko ka kembiwi, Suku ka tombiwa, momo, eci omunu a kula haico a lombola.” Ekolelo lietu konumbi eyi lilekisiwa kovina viaco, ndeci olosinema tuasiata oku tala, alivulu tuasiata oku tanga, ko kulua kuolonjanja tuasiata oku lilongisa Embimbiliya, kuenda ndomo tulinga olo hutililo vietu. Ocili, ekolelo limue liapama litukokisa oku “kulila espiritu” olio osapi yoku kuata utima utupongiya oku tava Ondaka ya Yehova lokuipokola.−Va Galatia 6:8.

Ocisola−Ocituwa Cimue Cavelapo

Ocili muẽle ocisola, oco cavelapo vali ovituwa viosi, cilinga ongongo yutima wetu oku kala locikele cokutava Ondaka ya Yehova. Omo liaco, eci acisokisa lekolelo kuenda lelavoko, upostolo Paulu walombolola hati ocisola “pokati kavio” oco ocituwa “capiãla.” (1 Va Korindo 13:13) Utima umue weyuka ocisola ku Suku wavela esanju lialua kuenda ekavuluko lioku kolela kokuaye; owo kaukuata onyeño kovina vikisikiwa la Suku. Upostolo Yoano wapopia hati: “Oku sola Suku kua lomboloka oku pokola kovihandeleko viaye. Ovihandeleko viaye ka vi lemi.” (1 Yoano 5:3) Cimuamue haico, Yesu apopia hati: “Umue, nda o sole ame, o pokola kondaka yange, Tate u solavo.” (Yoano 14:23) Tala okuti ocisola caco cikuatiwa pokati. Oco, Yehova osole calua vana vatiamẽla kokuaye locisolavo.

Yehova wakuliha okuti etu katualipuile kuenda olonjanja vialua tu ulingila akandu. Ndaño okuti eye kakasi papãla letu, eci Yehova olavulula kolonalavayi viaye, ‘utima wetu wosi,’ utuvetiya okuvumba kokuaye lonjongole yetu muẽle kuenda “loku pua evelo.” (1 Asapulo 28:9) Oco muẽle, Yehova wakuliha okuti cisukila otembo kuenda elikolisilo oco tukuate ovituwa viwa kutima wetu kuenje oco tulekise apako espiritu. (Va Galatia 5:22, 23) Omo liaco, o pandikisa letu, “momo wa kuliha ovatimba etu, ivaluka okuti tuneketela.” (Osamo 103:14) Yesu, walekisa ocituwa cimuamue, lalimue eteke watondala olondonge viaye omo liokulueya kuavo puãi le pandikiso wavakuatisa kuenda wavavetiya. Ocisola caco, ohenda, kuenda epandikiso lia Yehova leli lia Yesu ovina viaco kavikuvetiya hẽ oku vasola vali calua?−Luka 7:47; 2 Petulu 3:9.

Nda ove olonjanja vimue omola okuti cisukila uyaki walua oku nala olumbombo wakola okuti wongõ posi, okuti ovituwa vimue soketi onjunde ale ndoku tola olonjipela yovina viatila, yovituwa vimue soketi otuma yimue yongõ, oco yapa ko kaliwekepo ale ko kakonyohe. Puãi likolisilako lokuamamako osimbu u ‘tuwa oku likutilila,’ oku kongelako okulombela calua ku Yehova oco akuavele espiritu liaye.’(Va Roma 12:12) Lonjongole yaye yoku tukuatisa, ove oka litunda ciwa ndeci Esera koku kuata utima umue walipongiya ciwa “loku lilongisa Ondaka ya Yehova kuenda loku yi pokola.”

[Elitalatu kemẽla]

Esera wakuamẽlela loku fendela Suku ndaño eci akala ko Bavulono