Amamako Loku Ninisa “Elavoko Lieyovo” Liove!

“Tu wali elavoko lieyovo ndongalau.”−1 VA TESALONIKE 5:8.

1. “Elavoko lieyovo,” li tu kuatisa he ndati oco tupandikise?

Elavoko lioku popeliwa citava okuti likuatisa omunu oku pandikisa ndaño okasi oku liyaka lovitangi vialua. Omunu endela vonaviyu yavomba, opondola oku kala vociteyuilo comuenyo otembo yalua nda wa kuliha okuti va kua ku popela vakasi vonjila oco veye vopopele. Cimuamue hacovo okuti, vokuenda kuolohulukãi vianyamo, elavoko ‘lieyovo lia Yehova,’ liasiata oku kuatisa alume lakãi vakuekolelo eci vasangiwa lovitangi lovitangi, kuenda elavoko liaco, lalimue eteke lika sulila vesumuo. (Etundilo 14:13; Osamo 3:8; Va Roma 5:5; 9:33) Upostolo Paulu wa sokisa “elavoko lieyovo ndongalau” yovimaleho viespiritu Viukristão. (1 Va Tesalonike 5:8; Va Efeso 6:17) Oco muele, etu tua kolela okuti, Suku o ka tu yongola, oka teyuila ovisimilo vietu, oka tu kuatisa oco ka tu ka konyohe eci tu sangiwa lovitangi, mdeci, oku kuamaiwa kuenda oku yuvula ayonjo.

2. Momo lie “elavoko lieyovo” olio ociseveto cavelapo kefendelo liocili?

² O The International Starndard Bible Encyclopedia, yi lombolola eci catiamela Kakristão vo kocita catete canyamo yapopia ndoco: “Elavoko liatiamela kotembo yo kovaso ka lia kapiwileko lavakualofeka voluali lulo.” (Va Efeso 2:12; 1 Va Tesalonike 4:13) Pole, “elavoko lieyovo,” olio ociseveto cefendelo liocili. Ndamupi? Catete ceci okuti, oku popeliwa kuomanu va Yehova kukuete elitokeko londuko yaye. Ukualosamo Asafe wa likutilila hati: “A Suku yeyovo lietu, tu ohelele ulamba wonduko yove. Tu popele.” (Osamo 79:9; Esekiele 20:9) Handi vali, oku kolela kolohuminyo via Yehova viatiamela kasumuluho, ci kuete esilivilo liocili oco tukuate elitokeko liwa laye. Paulu wa lombolola ondaka eyi ndoco: “Okusunguluka ku Suku ka ku teliwa te lekolelo. Momo wosi o yongola oku kolela ku Suku, co sesamela oku kolela okuti kuli Suku, kuenda okuti Suku eca onima kuava vo sanda.” (Va Heveru 11:6) Handi vali, Paulu wa lombololavo hati, oku yovuiwa kuomanu va li kekembela olio esunga liavelapo Yesu eyililile palo posi. Eye wa popia hati: “ Ondaka eyi yokuti Kristu Yesu weyilila kilu lieve oku popela vakuakandu, ondaka yocili, haiyo ya sungulukila oku taviwa kuoha.” (1 Timoteo 1:15) Kuenda upostolo Petulu poku popia eci catiamela keyovo, wa li tukula hati, ‘onima [ale ceci cimila] kekolelo.’ (1 Petulu 1:9) Eci calomboloka ciwa kueci catiamela kelavoko lioku yovuiwa. Puãi, eyovo lilomboloka nye? Kuenda nye cisukiliwa oco litambuiwe?

EYOVO HE LILOMBOLOKA NYE?

3. Eyovo lipi omanu va Yehova va kuata kotembo yosimbu?

³ Vovisonehua via va Heveru, ‘eyovo’ lilomboloka okupiwa koku talisiwa ohali. Ndeci, Daviti poku vilikiya Yehova wa popia hati: “[Yehova] eye onjovoli yange. Eye Suku yange haeye ewe liange. . . . Eye ocikolo cange haeye ociwundilo cange. Eye upopeli wange. O mopela kungangala. Mbilikiya Yehova, eye wa posokela esivayo. Kuenje mopelua kovanyali vange.” (2 Samuele 22:2–4) Daviti wa kulihile okuti Yehova oyevelela eci omanu Vaye vakuekolelo vovilikiya oco a va kuatise.−Osamo 31:22,23; 145:19.

4. Elavoko lipi liatiamela komuenyo wokovaso liakuatele omanu va Yehova okuti Akristão vo kocita catete canyamo?

⁴ Omanu va Yehova okuti Akristão vo kocita catete canyamo, vakuatelevo elavoko liomuenyo wo kovaso. (Yovi 14:13–15; Isaya 25:8; Daniele 12:13) Ocili okuti vialua olohuminyo viatiamela koku yovuiwa visangiwa Vovisonehua vio Heveru via lombolola eci catiamela keyovoko liavelapo, okuti lituala komuenyo ko pui. (Isaya 49:6, 8; Ovilinga 13:47; 2 Va Korindo 6:2) Kotembo ya Yesu, valua va Yudea okuti vakuatele elavoko liomuenyo kopui, pole, ka vatavele Yesu okuti eye osapi yoku telisiwa kuelavoko liavo. Yesu wa popisa asongui vakuetavo vokolotembo yaye hati: “Vu konomuisa ovisonehua, momo wa soki hoti, Omo tu muila omuenyo ko pui, kuenje evi ovio vi njimbila uvangi.”−Yoano 5:39.

5. Oku yovuiwa ku ka lomboloka nye kokusulako?

⁵ Vonduko ya Yesu, Suku wa situlula ovina viosi viatiamela koku popeliwa. Muaco omu, muakongela oku yovuiwa kekandu, oku yovuiwa kupika wetavo liesanda, oku yovuiwa koluali lukasi ndeti peka lia Satana, oku yovuiwa koku kuata usumba lomanu, kuenda oku yovuiwa kusumba woku fa. (Yoano 17:16; Va Roma 8:2; Va Kolosai 1:13; Esituluilo 18:2–4) Okusulako, omanu va Suku vakuekolelo, oku yovuiwa kuavo la Suku ka kulomboloka lika okupiwa voku fukilisua ale vohali, pole, vasangavo epuluvi lioku kuata omuenyo ko pui. (Yoano 6:40; 17:3) Yesu walongisa hati, oku popeliwa kuava vatiamela ‘kokacunda katito’ ku lomboloka oku pinduiwa okuti va endela kilu oco va ka viale Vusoma kumosi la Kristu. (Luka 12:32) Omanu vakuavo, oku popeliwa kuavo kulomboloka oku tumbulula omuenyo wavo walipua kuenda oku kala velitokeko liwa la Suku, ndeci Adama la Heva va kala vocumbo Cedene, eci handi ka va lingile ekandu. (Ovilinga 3:21; Va Efeso 1:10) Omuenyo ko pui vofeka yelau, oco ca kala ocipango catete Suku ayonguilile omanu. (Efetikilo 1:28; Marko 10:30) Ekalo liaco, citava he okuti li tumbuluiwa?

OCISEMBI OCO OCISEVETO COKU YOVUIWA

6, 7. Ocikele cipi Yesu akuete catiamela koku popeliwa kuetu?

⁶ Oku yovuiwa otembo yenda hu ku sangiwa lika vonduko yocilumba cocisembi ca Kristu. Momo lie? Embimbiliya lilombolola okuti, eci Adama a linga ekandu wa likapa eye muele ‘kupika’ wekandu. Kuenda wakapavo ‘kupika’ wekandu ovitumbulukila viaye viosi vieya oku citiwa noke, oku kongelamo vosi yetu, kuenje casukila okuti kuiya ocisembi oco omanu va kuata elavoko liocili. (Va Roma 5:14, 15; 7:14) Ocisembi cangiliyiwa la Suku oco ciyovole omanu vosi, calekisiwilile vovilumba viovinyama viakisakaiwale Vocihandeleko ca Mose. (Va Heveru 10:1–10; 1 Yoano 2:2) Ocilumba ca Yesu oco catelisa ovitumasuku viaco. Eci handi Yesu ka citiwile, ungelo wa Yehova waeca esapulo liokuti: “[Yesu] o[ka] popela omanu vaye kakandu avo.”−Mateo 1:21; Va Heveru 2:10.

⁷ Yesu wacitiwa locikomo lufeko Maria, kuenje omo okuti eye omõla wa Suku, kapiñalele olofa viakandu ku Adama. Omo okuti eye kapiñalele ekandu kuenda wa pandikisa kayonjo, eci caecelela okuti omuenyo waye ufeta ondando yasukiliwile oco omanu vayovuiwe kekandu kuenda kolofa. (Yoano 8:36; 1 Va Korindo 15:22) Yesu wa litepa lomanu vakuavo, momo kapisiwile kolofa omo liekandu. Eye, weyile palo posi oco ‘aece omuenyo waye ndocilumba coku yovola valua.’ (Mateo 20:28) Omo lioku linga eci, kuenda omo a pinduiwa, cilo wa vialekiwa Kusoma, kuenje Yesu kaliye opondola oku yovola omanu vosi vana va lava ovihandeleko via Suku.−Esituluilo 12:10.

NYE CISUKILIWA OCO OMUNU APOPELIWE?

8, 9. (a) Etambululo lipi Yesu aeca kumalehe ombiali wa pula eci catiamela koku popeliwa? (b) Velivala liaco, onjila yipi Yesu akuama oco alongise olondonge viaye?

⁸ Onjanja yimue, ukuenje umue ohuasi woko Isareli okuti wa kala ombiali, wa pula Yesu hati: “Ndiga nye okuti ñuata omuenyo ko pui?” (Marko 10:17) Epulilo liaye liatiamelele kovisimilo via va Yudea vokoloneke viaye, vasimaile hati, Suku okisika ovilinga vimue viwa kuenje, nda ovina viaco omunu wa vilinga okuti wa vi suisapo viosi, citava oku yovuiwa la Suku. Pole, ocituwa caco eci cokulitumbika kupange citundilila kocipululu. Ovilinga viaco ka vi koleliwa kueci catiamela kelavoko lioku yovuiwa, momo omanu kavalipuile ka vapondola oku telisa ovihandeleko viosi via Suku.

⁹ Poku tambuluiwa epulilo lialingiwa lukuenje, Yesu wowivaluisa okuti eye te wa pokola kovihandeleko via Suku. Umalehe ombiali lonjanga yalua wa tambulula Yesu hati, ndikasi oku telisa ale ovihandeleko via Suku, tunde vutila. Etambululo liaye liavetiya Yesu oku u kuatela ocisola. Yesu wosapuila hati: “Wa kamba cimue, kuende, ka landise cosi okuete, ci avela olosuke, kuenje okala lipako kilu; oco wiye o ñuame.” Noke ukuenje wa tiukila lesumuo lialua, “momo wa kala lovipako vialua.” Noke, Yesu wa popisa olondonge viaye hati, oku kakatela calua kovokuasi a mulo voluali citateka oku sanga eyovo. Handi eye wavokiyako hati, lomue oyula eyovo lelikolisilo liaye muele. Pole, Yesu wa kolisa hati: “Komanu ka ci teliwa puãi ku Suku citeliwa, momo ovina viosi viteliwa la Suku.” (Marko 10:18–27; Luka 18:18–23) Oku popeliwa kuteliwa he ndati?

10. Nye tusukila oku linga oco tupopeliwe?

¹⁰ Oku popeliwa ombanjaile yimue yitunda ku Suku, pole oyo ka yiya okuti omunu ka likolisilako vali. (Va Roma 6:23) Kuli eci cisukiliwa okuti omunu lomunu okuete oku ci telisa oco atambule ombonjaile yaco. Yesu wa popia hati: “Omo Suku wa sola ndoco oluali, oco a ecela omõlaye wongunga okuti wosi u kolela ka fi, puai o mola omuenyo ko pui.” Kuenda upostolo Yoano wavokiwako hati: “U o kolela Mõla o kuete omuenyo ko pui, puãi u ka kolela Mõla, eye ka moli omuenyo, puãi onyeño ya Suku yi kala ño–o laye.” (Yoano 3:16, 36) Cimõleha ciwa okuti, omunu wosi olavoka oku sanga epopelo lienda hu, osukila oku kuata ekolelo ku Suku, kuenda oku pokola kokuaye. Omunu lomunu okuete oku nõlapo eci a linga oco a tave ocisembi kuenda oku kuama volomãhi via Yesu.

11. Omunu kalipuile citava he ndati okuti o taviwa la Yehova?

¹¹ Omo okuti ka tualipuile, ka tuatiamelele koku pokola, omo liaco ka tu tela oku pokola muele ndomo mualipua. Eli olio esunga lieci Yehova angiliyila ocisembi oco cituvike akandu vetu. Pole, etu tusukila okuamamako loku likolisilako calua oco tu kale ndomo Suku ayongola. Ndomo Yesu a sapuila ukuenje ombiali, etu tusukila oku lava ovihandeleko via Suku. Nda tua kuama onjila eyi, tu ka tatiwa la Suku kuenda tu ka kuatavo esanju liapiãla, momo “ovihandeleko viaye ka vi lemi,” puãi ‘vikavuluisa.’ (1 Yoano 5:3; Olosapo 3:1, 8) Pole, kacalelukile okuamamako loku kuata elavoko lioku popeliwa.

“YAKELA EKOLELO”

12. Elavoko lioku yovuiwa citava ndati okuti likuatisa Ukristão oco atamalãle kayonjo atiamela kukahonga?

¹² Ondonge Yuda wa yonguile oku sonehela Kakristão vatete eci catiamela ‘kondaka yeyovo’ liavo. Pole, ovituwa vivi via kalako viovetiya oku lungula vamanjaye oco ‘vayakele ekolelo.’ Ocili okuti, oco omunu apopeliwe oku kuata lika ekolelo kacitela, pole omunu osukila oku likolisilako oco akuate ekolelo liocili, kuenda oku pokola osimbu ovina vienda ciwa. Poku litumbika kuetu ku Yehova tu sukila oku kuata ongusu yocili oco tu tamalãle kayonjo kuenda kukahonga. Ocili okuti, ukahonga, undingaivi, elaviso kasongui, kuenda olonepele, kocita catete, viakala loku nyõla ekalo liwa vekongelo. Oco akuatise vakuavo va kalavo Akristão oco vaimbepo ovituwa viaco vivi, Yuda wa va vetiya oco ka va ka ivaleko ocimãho cavo, eci a va sapuila hati: “A vakuacisola, lipamisi lekolelo liene li kola. Likutilili ve Espiritu Sandu. Kali vocisola ca Suku. Feleveli ohenda ya Nãla yetu Yesu Kristu yu neneli omuenyo ko pui.” (Yuda 3, 4, 8,19–21) Elavoko lioku yula epopelo lia pondola oku va kuatisa kuyaki wavo oco vamameko lekalo limue liasunguluka.

13. Tu pondola ndati oku lekisa okuti ka tu kasi oku tambula ocali ca Suku leselula?

¹³ Yehova Suku okevelela okuti omanu vosi eye a ka popela te valekisa ovituwa viwa. (1 Korindo 6:9, 10) Pole, oku lava ovihandeleko via Suku, ka cilomboloka okuti tu sombisa vakuetu omo lieci vakasi oku linga. Etu ka tu kuete omoko yoku tepisa eci vakuetu va sesamela ale ka va sesamela kotembo yo kovaso. Suku eye oku cilinga, ndomo Paulu a sapuila va Helasi ko Atenas hati: “[Suku] wa tukula eteke lioku tetuluila oluali lesunga, kuenje wa nola ale ulume [Yesu Kristu okuti eye] o linga onganji yaco.” (Ovilinga 17:31; Yoano 5:22) Nda tukuetele ekolelo kocisembi ca Yesu Kristu, ka tu kuata vali usumba weteke liesombiso lia laika okuiya. (Va Heveru 10:38, 39) Cavelapo ceci okuti, lalimue eteke ka tu ka eceleli okuti ‘tu tambula ocali ca Suku [oku linalisa kuetu laye vonduko yocisembi] leselula,’ okuti tu yuliwa layonjo oco tu kuame ovituwa vivi. (2 Va Korindo 6:1) Handi vali, poku kuatisa vakuetu oco va popeliwe, tu lekisa okuti ka tu kasi oku tambula ocali ca Suku leselula. Tu kuatisa he ndati vakuetu?

OKU KUATA ONEPA KOKU SAPULA ELAVOKO LIEYOVO

14, 15. Helie Yesu aiha upange woku kunda olondaka viwa viepopelo?

¹⁴ Poku lombolola eci catiamela kuprofeto Yoeli, Paulu wasoneha ndoco: “Omunu wosi wa tukula onduko ya Yehova oka popeliwa, [NW].” Noke wa vokiyako vali okuti: “Puãi va vilikiya ndati u ka vo kolelele? Va kolela ndati u ka va la yeva? Va yeva ndati nda u o kunda sio?” Kuenje kovinimbu vikuãiko, Paulu wa lekisa okuti ekolelo ka citava okuti liya ño olio muele, pole, olio “li tunda kueci ci yeviwa,” okuti, li “tunda koku kunda Kristu.”−Va Roma 10:13, 14, 17; Yoeli 2:32.

¹⁵ Helie oka yevalisa komanu ‘olondaka viatiamela koku kunda Kristu’? Yesu waeca upange owu kolondonge viaye, vina okuti via lilongisa ale “ondaka” yaco. (Mateo 24:14; 28:19, 20; Yoano 17:20) Eci tukuata onepa kupange woku kunda Usoma kuenda woku longisa omanu oco valinge olondonge, tukasi loku telisa eci upostolo Paulu asoneha catiamela koloneke vilo, okuti capopiwa la Isaya hati: “Olomãi viava va sapula ondaka yiwa haiyo yombembua, via posoka nye!” Ndaño okuti omanu valua ka va tava kolondaka viwa viusoma, tukasi loku va kundila, olomãi vietu “via posoka” kovaso a Yehova.−Va Roma 10:15; Isaya 52:7.

16, 17. Olonepa vipi vivali vieci tu lingila upange wetu woku kunda?

¹⁶ Kueci catiamela koku telisa ocikundi eci muakongela olonepa vivali viavelapo. Yatete, yeyi okuti tukuete oku kunda olondaka viwa viusoma oco onduko ya Suku yisivayiwe, kuenda oco okuti omanu vosi vayongola epopelo va kuliha onjila vakuete oku kuama. Paulu ondaka yaco eyi yatiamela kocikundi cupange woku kunda, yalombolokele ciwa. Eye wa popia hati: “Momo oco ocikundi tua tambula ku Nãla, cokuti Nda ku lingisa ocinyi ca vakuolofeka, okuti o tuala epopelo toke kesulilo ongongo.” Omo okuti etu tulondonge via Kristu, omunu lomunu pokati ketu osukila oku kuata onepa kupange woku yevalisa komanu ondaka yepopelo.−Ovilinga 13:47; Isaya 49:6.

¹⁷ Cavali ceci okuti, oku kundiwa kuolondaka viwa oko kuavelapo vali ku Suku wa sunguluka koku sombisa. Kueci catiamela koku sombisa, Yesu wa popia hati: “Eci Mõlomunu eya lulamba waye kumue lovangelo vosi, oco o[ka] tumala kocalo culamba waye. Kuenje olofeka viosi vi[ka] kongelua kokuaye. Oco omanu vaco o[ka] va tepa pokati okuti va[ka] likaila, ndeci ungombo a tepa olomeme lolohombo.” Ndaño okuti esombiso kuenda oku tepiwa kuomanu ku ka lingiwa “eci Mõlomanu eya lulamba waye,” upange woku kunda ukasi loku lekisa komanu epuluvi lioku litokeka la vamanji ya Kristu kespiritu, oco va kuatise oku sanga epopelo liavo lienda hu.−Mateo 25:31–46.

AMAMAKO ‘LOKU SUISAPO ELAVOKO’

18. Tu pondola ndati okuamamako loku ninisa “elavoko lieyovo” lietu?

¹⁸ Ombili yetu yoku kuata onepa kupange woku kunda, onepa yimue vo yi tu kuatisa oco elavoko lietu linine. Paulu wa soneha ndoco: “Tu yongola okuti ene vosi, omunu omunu, vu lekisa ombili yaco oku suisapo elavoko liaco toke kesulo.” (Va Heveru 6:11) Omunu omunu pokati ketu, osukila oku kuata “elavoko lieyovo ndongalau”, loku ivaluka okuti, “Suku ka tu tukuilile onyeño, te oku kuatela eyovo la Mitakati Nãla yetu Yesu Kristu.” (1 Va Tesalonike 5:8,9) Omo liaco, tukuamivo elungulo lia Petulu, wa popia hati: “Pamisi ovitima viene. Lisuluviki. Elavoko liene li loñe lika kocali ciya kokuene.” (1 Petulu 1:13) Vosi va kuama onjila eyi, va ka mõla oku telisiwa ‘kuelavoko lieyovo’ liavo.!

19. Nye tu ka lilongisa kocipama cikuãimo?

¹⁹ Toke eci tupitila kotembo yaco, tu kuete oku tenda ndati otembo yakambako voluali lulo? Nye tu kuete oku linga lotembo yaco eyi oco tusange epopelo lietu muele kuenda lia vakuetu? Apulilo alo tu ka tambulula kocipama cikuãimo.

[Elomboluilo]

Oku popeliwa kukuete vali elomboloko liavelapo okuti haku yovuiwako lika kenyõleho