Lilo Olio Eteke Lieyovo!
“Oco limbuki okuti yilo oyo otembo yaco ya sunguluka, leteke lilo olio eteke liaco lieyovo.”—2 VA KORINDO 6:2.
1. Nye cisukiliwa oco tuamameko okukala vekalo litaviwa la Suku kuenda la Kristu?
Yehova wasokiya eteke limue liokutetulula omanu. (Ovilinga 17:31) Nda eli likakala eteke lieyovo kokuetu, tusukila okupandikisa oco tukale omanu vataviwa la Yehova kuendavo Longanji yanõliwa laye, Yesu Kristu. (Yoano 5:22) Okupandikisa kuaco kukisika ovilinga viatiamela Vondaka ya Suku kuenda ekolelo limue okuti lituvetiya okukuatisa vakuetu oco vakale olondonge viocili via Yesu.
2. Momo lie oluali luomanu lualitepela ku Suku?
2 Omo liekandu liapiñaliwa, oluali luomamu lualitepa ku Suku. (Va Roma 5:12; Va Efeso 4:17, 18) Pole, vana tuasiata okukundila citava okuti vakuata eyovo, nda vatiuka okulisunguluisa la Suku. Upostolo Paulu wacilombola ciwa eci asonehela Akristão va Korindo. Tukulihisi elivulu lia 2 Va Korindo 5:10–6:10 kuenda tutali eci Paulu apopia catiamẽla kokusombisiwa, kokulisunguluisa la Suku, kuenda keyovo.
Etu Tukuamelela Okupeya Omanu
3. Paulu wakuamela ndati okupeya omanu, kuenda momo lie etu tusukilila okucilingavo oloneke vilo?
3 Paulu watokekisa esombiso lokukunda, eci eye asoneha hati: “Vosi tu laika oku iya kekanga lia Kristu ha tu tambula eci ca sesamela ovilinga vietu, ci kale ciwa, ci kale civi, okuti omunu omunu o tambula ndovilinga viaye vina a linga osimbu a kala vetimba. Omo tua kuliha oku sumbila Ñala, oco tu [“kuamelela, NW ] [oku]peya omanu.” (2 Va Korindo 5:10, 11) Upostolo wakuamẽlela okupeya omanu lokukunda olondaka viwa. Nye he cipopiwa catiamela kokuetu? Omo okuti tukasi ocipepi lesulilo lioluali lulo, te tualikolisilako okupeya vakuetu oco valinge eci cisukiliwa okuti vasombisiwa lohenda la Yesu kuenda oco vataviwe la Yehova Suku, Ono yeyovo.
4, 5. (a) Momo lie katusukilila okulipanda omo liovina vimue tutela okulinga ciwa vupange wa Yehova? (b) Paulu walipandelele ndati “Suku”?
4 Ndaño okuti Suku okasi okusumuluisa upange wetu, kacisukila okuti tulipanda. Kofeka yoko Korindo, vamue vakala lokulipanda ovo muele ale okupandiya omanu vakuavo, omo liaco canena olonepele vekongelo. (1 Va Korindo 1:10–13; 3:3, 4) Omo liocitangi eci, Paulu wasoneha hati: “Ka tu kasi loku lisivaya vali kokuene, te oku wihi evelo lioku tu kuatela olopandu okuti vu tẽla oku kumbulula ava va lipandiyila evi vi moleha viomunu, viovutima waye havioko. Momo nda tua linga ayui, tua cilingila Suku, nda tua linga vakualondunge tuo ci lingili ene.” (2 Va Korindo 5:12, 13) Vamue vakuepela ka vakale lonjongole yokumõla elitokeko keunda ekalo liwa liespiritu vekongelo. Ovo onjongole yavo yakala ño yokulipanda lemõleho liavo lioketima, kavakapeleko okukuatisa vakuavo vakuetavo oco vamameko okukala lovitima viwa kovaso a Suku. Omo liaco, Paulu wapisa ekongelo liaco kuenje noke wapopia hati: “U o lipanda, a lipandele [“Yehova” NW].−2 Va Korindo 10:17.”
5 Paulu he kakale lokulimpandiya eye muẽle? Vamue pamue mbi vasimile okuti oco muẽle, omo lieci eye apopele catiamẽla kokukala upostolo. Pole eye walipandelele “Suku.” Eye walipandelele wuvangi waye wupostolo oco va Korindo kava katinduke ku Yehova. Paulu wacilingila oco avatiule ku Suku, momo apostolo vesanda vakala lokuvatuala konjila kayangulukile. (2 Va Korindo 11:16–21; 12:11, 12, 19–21; 13:10) Pole, Paulu kakale lokuseteka okukomõhisa vosi lovilinga viaye.−Olosapo 21:4.
Ocisola ca Kristu Anga he Cikuvetiya?
6. Ocisola ca Kristu te cituvetiya okulinga nye?
6 Omo okuti Paulu wakala upostolo wocili, walongisa vakuavo eci catiamela kocilumba cocisembi ca Yesu. Eci cakala lesilivilo liocili vomuenyo wa Paulu, momo eye wasoneha hati: “Ocisola ca Kristu oco ci tu vetiya, omo tua kolela okuti umuamue wa fila vosi; oco vosi va fa. Kuenje eye wa fila vosi okuti, ava va kasi lomuenyo ka va kasilili lawo ovo muẽle, te oku vumba u wa va fila haeye wa va pinduiwila.” Hacisolakuoco Yesu alekisa pokueca omuenyo waye kokuetu! Omo liaco, ocisola caco te cikala ongusu yivetiya ovimuenyo vietu. Olopandu viomo Yesu aeca omuenyo waye kokuetu te vituvetiya okulinga lombili upange wokukunda olondaka viwa vieyovo vieaciwa la Yehova pokati Komõlaye wasoliwa. (Yoano 3:16; cisokisa Losamo 96:2) “Ocisola ca Kristu” cikasi he okukuvetiya okukuata onepa, lombili yocili kupange wokukunda Usoma kuend wokulilongisa omanu oco valinga olondonge?−Mateo 28:19, 20.
7. Nye cilomboloka okulimbuka omunu ketimba?
7 Omo liokuambata ovimuenyo viavo lelinga limue lilekisa olopandu kueci Kristu avalingila, olombuavekua kavikasi vali lokulinga ocipango cavo muele, puãi vikasi okulinga ocipango ca Kristu. Omo liaco, Paulu wapopia hati “Kaliye, ka tu limbuka vali omunu ukuetimba ndeci a limbukiwa ño voluali lulo. Ndaño tua limbukile Kristu ndomunu ukuetimba voluali lulo, haimo, tunde opo ka tu u sikoluila vali ndoco.” (2 Va Korindo 5:16) Akristão kacitava okuti vatala omanu ketimba, ndakuti pamue vavelisapo va Yudea okuti Vakualofeka cisule, ale vavelisapo ohuasi okuti osuke cisule. Olombuavekua ka vi “limbuka vali omunu ukuetimba,” omo liaco, kokuavo, ekalo liespiritu lavakuavo vakuetavo olio liavelapo. Omanu valimbukile Kristu ndomunu ukuetimba havanako lika vamõla Yesu eci akala kulo kilu lieve. Ndaño okuti vamue vakala lokulavoka Mesiya, weya okulimbukiwila okuti Kristu, vosokisile ño ndomunu ukuetimba, pole ovo kavamaleko lokusima ndoco. Eye waeca etimba liaye ndocisembi noke wapinduiwa, kuenje cilo walinga espiritu limuisa omuenyo. Vakuavo vapinduiwila omuenyo wakilu waeca atimba vavo vositu ndaño okuti kavamuile Yesu Kristu letimba liositu.−1 Va Korindo 15:45, 50; 2 Va Korindo 5:1–5.
8. Ndamupi omunu lomunu pokati ketu akala velitokeko la Kristu?
8 Lokuamamako okutiamisila olondaka viaye kolombuavekua, Paulu wapopia hati: “Nda umue o kasi [“velitokeko la,” NW] Kristu, wa linga ociluvo cokaliye. Cosi cale ca pita, kuenje cosi ca linga cokaliye.” (2 Va Korindo 5:17) Okukala “[“velitokeko la, NW”] Kristu” cilomboka okukala kumuamue laye. (Yoano 17:21) Ekalo eli lifetika okukala pokati komunu eci Yehova okokela Komõlaye kuenje ucita lespiritu sandu. Omo okuti omunu waco walinga omõla wa Suku wacitiwa lespiritu, kaliye walinga “ociluvo cokaliye” lelavoko liokukala kumuamue la Kristu Kosuma wokilu. (Yoano 3:3–8; 6:44 Va Galatia 4:6, 7) Akristão vaco ava olombuavekua, vatambula ocikele cinene cupange.
Okulisunguluisa la Suku
9. Suku walinga nye oco okulisunguluisa laye kutave?
9 Hesumuluhokuolio Yehova asiata okueca kocilulikilo cokaliye! Paulu wapopia hati: Cosi eci ci tunda ku Suku u wa tusunguluisa kokuaye la mitakati Kristu, kuenje wa tu kundika upange wokusunguluisa. Calomboloka okuti, vu Kristu, Suku wakala lokusunguluisa oluali kokuaye, okuti katendele vali akandu omanu oku va pisa lao, kuenje wa tu kundika upange wokusunguluisa. (2 Va Korindo 5:18, 19) Omanu valitepa ku Suku eci Adama alinga ekandu. Pole, Yehova locisola calua wayulula onjila yokulisunguluisa lomanu pokati kocilumba ca Yesu.-Va Roma 5:6–12.
10. Velie Yehova akundika upange wokulisunguluisa, kuenda nye ovo vasiata okulinga oco vatẽlise upange wavo?
10 Tunde opo, Yehova wakundika upange wokulisunguluisa kolombuavekua, omo liaco, Paulu watẽla okupopia hati: Oco tua linga olomunga via Kristu, okuti elaleko lia Suku li pitiyiwa letu. Vonduko ya Kristu tu vu peyi tuti, lisunguluisi la Suku. (2 Va Korindo 5:20) Kosimbu, olomunga vianda lokutumiwa calua kotembo yohali oco vatael nda omo luiyaki okakonyoha. (Luka 14:31, 32) Tunde eci oluali luomanu vakuakandu lualitepa ku Suku, eye wasiata okutuma olomunga viaye olombuavekua kovaso oco visapule komanu otembo yaye yokulisunguluisa. Omo okuti olombuavekua olomunga via Kristu, ovio vikuamẽlela okupeya omanu hati: Lisunguluisila Suku. Okulivondela kuaco okukuata ombembua la Suku kuejda okutava eyovo eye aeca pokati ka Kristu.
11. Omo liokulekisa ekolelo kocilumba cocisembi, velie tete citava okuti vakuata ekalo limue liesunga kovaso a Suku?
11 Omunu wosi olekisa ekolelo kocilumba cocisembi, catava okuti olisunguluisa la Suku. (Yoano 3:36) Paulu wapopia hati: “[Yesu] una ka kulihile ekandu [Yehova] Suku wo linga ekandu mekonda lietu, okuti vokuaye tu lingiwa esunga lia Suku.” (2 Va Korindo 5:21) Ulume walipua Yesu walinga ocilumba cokusitika ekandu liocitumbulukila cosi ca Adama cayovuiwa vekandu. Ovo valingiwa “esunga lia Suku” pokati ka Yesu. Esunga liaco eli, ale akalo liesunga kovaso a Suku, liafetika tete 144.000 Kakristão vakapiñala komosi la Kristu. Vokuenda Kuviali Wohulukãi Yanyamo, vakuesunga vakakala omanu valipua kuenje vakalinga omãla va palo posi va Isia Kapui, Yesu Kristu. Eye okavatuala vakolo limue lialipua liesunga pana okuti ovo vapita ale voseteko yokulekisa ekolelo liavo ku Suku kuenje vakatambual ombanjaile yomuenyo kopui.−Isaya 9:6; Esituluilo 14;1; 20:4–6, 11–15.
“Yilo Oyo Otembo Yaco Ya Sunguluka”
12. Upange upi wavalapo wukasi okulingiwa lolomunga via Yehova olombuavekua kuenda olomiwa viaye?
12 Oco tuyovuiwe, tusukila okulinga eci calienda lolondaka via Paulu, viapopia hati: “Oco, poku talavayela kumuamue laye, [Yehova] tu vu peya okuti ka vu tambula ocali ca Suku leselula. Momo eye wa popia hati, nda ku yeva kotembo ya sunguluka, keteke lieyovo nda ku ohela. Oco limbuki okuti yilo oyo otembo yaco ya sunguluka, leteke lilo olio eteke liaco lieyovo.” (2 Va Korindo 6:1, 2) Olomunga via Yehova olombuavekua kuenda olonumiwa viaye, “olomeme vikuavo,” vakatambula ocali ca Isiavo wo kilu leselula. (Yoano 10:16) Omo liokusuñamisa ovilinga viavo kuenda omo liokulinga upange wavo wokukunda lombili kotembo yilo yasunguluka, ovo vasanga ohenda ya Suku kuenje vasapula komanu vosi vatunga kilo lieve okuti lilo “olio eteke liaco lieyovo.”
13. Nye casonehiwa kelivulu lia Isaya 49:8, kuenda okutẽlisiwa kuatete kuocisonehua eci kuapita otembo yipi?
13 Paulu watukula elivulu lia Isaya 49:8, eci atanga hati: “Ca popia Yehova ceci, hati, Nda ku kumbulula kotembo yiwa, keteke lieyovo nda ku ohela. Nda ku lava. Nda ku lingisa ocisila ceyovo komanu, okuti o tumbulula ofeka, kuenje o tepisila omanu ovipiñalo via linga alunda.” Ocitumasuku eci catẽlisiwa tete eci va Isareli va yovuiwa kumandekua ko Bavulono kuenje noke vatiukila kofeka yavo yalinga alunda.−Isaya 49:3, 9.
14. Ocitumasuku cshonehiwa kelivulu kia Isaya 49:8, catẽlisiwa ndati konepa ya Yesu?
14 Kokutẽlisawa kuavelapo kuocitumasuku ca Isaya, Yehova waeca “ukuenje” waye Yesu oco alinge “ocinyi cavakualofeka oco eyovo [lia Suku] li kale toke kasulilo ongongo.” (Isaya 49:6, 8 cisokisa la Isaya 42:1–4, 6, 7; Mateo 12: 18–21.) Eci Yesu akala palo posi wakapeleko calua otembo yiwa, ale “otembo . . . ya sunguluka.” Eye walikutilila kuenje Suku wo “kumbulula.” Eli liakala “eteke . . . lieyovo” ku Yesu momo eye walekisa epandikiso liasuapo kuenje “wa linga ono yeyovo ka li pui lia vosi vo pokola.”−Va Heveru 5:7, 9; Yoano 12:27, 28.
15. Otembo yipi va Isareli yespiritu valimbukiwa okuti vasesamela ocali ca Suku, kuenda lonjongole ya nye?
15 Paulu watiamisila elivulu lia Isaya 49:8 Kakristão olombuavekua, lokuvalivondela oco okuti ka va “tambula ocali ca Suku leselula.” Pole, omo liokukuamẽlela okulinga ocipango caye votembo ya sanguluka eye ovaeha “eteke . . . lieyovo.” Paulu wamisako hati: “Oco limbuki okuti yilo oyo otembo yaco ya sunguluka, leteke lilo olio eteke liaco lieyovo.” (2 Va Korindo 6:2) Tunde ko Pendekoste 33 K.K., va Isareli yespiritu valilekisa okuti vasesamẽla ocali ca Suku, omo liaco, “otembo . . . ya sunguluka ” yalinga “eteke . . . lieyovo ” kokuavo.
Okulilekisa Okuti Tulonumiwa via Suku
16. Vemehi liovina vipi viatila Paulu alilekisila okuti onumiwa ya Suku?
16 Omanu vamue valikogalale lekongelo lia va Korindo, kafasesamelele ocali ca Suku. Ovo vapopale lãvi Paulu oco vanyõle unene waye wupostolo, pole ndaño ndoco, Paulu wayuvula oku “kapa ovilondokua vonjila.” Eye walilekisa okuti onumiwa ya Suku ndaño lokutala ohali longongo, ndaño ovina vivi vio sanga sanga, ndaño wa tipuiwa loku kapiwa vokayike, ndaño loku kala pokati konjuela lovopange lakaha kuenda onjala. (2 Va Korindo 6:3–5) Noke, Paulu lesunga walombolola okuti nda anyali vaye olonumiwa via Kristu, eye wapiãlapo vali momo watalisiwa ohali yalua volokayike, latipulo ka atendiwa, lokukala ocipepi lolofa olonjanja vialua, kuenda lekambo.−2 Va Korindo 11:23–27.
17. (a) Ovilinga vipi tusukila okulekisa vitulimbikisa okuti tulonumiwa via Suku? (b) “Ovimaleho viesunga” nye?
17 Ndeci calinga Paulu lakamba vaye, etu citavavo okuti tulilekisa okuti tulonumiwa via Suku. Ndamupi tucilinga “Loku pua atondelo,” ale lonjelo, kuenda lovilinga vialienda lukulihiso wasuapo Wembimbiliya. Etu tupondola okulekisa uvangi wetu “lepandi,” lokukolela uvi ale asumuluho, “loku unjuka” kuenda lokulinga ovina vimue viokukuatisa vakuetu. Handi vali, etu tulilekisa okuti tulonumiwa via Suku eci tutava okusonguiwa lespiritu liaye, lokulekisa ocisola cocili lokupipia ocili, lokukolela okuti, eye otuiha ongusu yokulinga upange wokukunda. Okukuliha okuti Paulu walekisavo uvangi waye “[l]ovimaleho viesunga kondio lokepili” cituvetiya calua. Kovoyaki vosimbu, eka liondio olio vanda lokunyuña lalio osipata osimbu epili likuata ocimãleho cokuliteyuila. Pokuyaka uyaki wespiritu lalongisi vesanda, Paulu kayakele lovimaleho vietimba liakandu−viponya, okuti kavikoleliwa, kuenda viesanda. (2 Va Korindo 6:6, 7; 11:12–14; Olosapo 3:32) Eye wayaka “[l]ovimaleho” viesunga, ale viumbombe, omo liokukapa kovaso efendelo liocili. Etu tusukila okulingavo ndoco.
18. Nda okuti tulonumiwa via Suku, tukalekisa ovilinga vipi?
18 Nda okuti tulonumiwa via Suku, ekalo lietu likakalavo ndeli lia Paulu lava atalavaya lavo kumosi. Etu tukalekisa ovilinga Viakristão cikale eci tusumbiwa ale ceci tutombiwa. Ovina vivi vatulundila kavikatalamisa upange wetu vokukunda, kuendavo katuyongola okulipanda eci vamue vapopia ciwa catiamẽla kokuetu. Etu tukavangula ocili kuenda pamue citava okut tukapondola okuyula ongangu yiwa yatiamẽla kupange wa Suku. Eci anyali vetu vatulipañela okutuipaya, etu tukakolela Yehova. Nda tualinga ndoco, tukatava epindiso lesanju.−2 Va Korindo 6:8, 9.
19. Citava ndati okumuisa “omanu va lua ukuasi” wespiritu?
19 Pokumalusula ombangulo yaye yatiamẽla kupange wokulisunguluisa, Paulu wavangula eci catiamẽla kokuaye muẽle kuenda kakamba vaye hati “ndaño esumuo lietu lia lua haimo tu sanjuka ño. Ndaño tulosuke haimo omanu va lua va muila ukuasi kokuetu. Ndaño omanu va kuete cosi.” (2 Va Korindo 6:10) Ndaño okuti olonumiwa evi viakala lesunga lioku sumua, lopo viakala lesanju vovitima viavo. Ovo vakala olosuke konepa yovikuata, pole “omanu va lua va muila ukuasi” wespiritu kokuavo. Ocili, ovo vakuete cosi momo ekolelo liavo liavanenela ukuasi wespiritu−kuenda handi liavanenela elavoko liokukala omãla va Suku kilu. Ovo vakala lomuenyo umue wukuasi kuend wesanju, omo liokukala olonumiwa via Kristu. (Ovilinga 20:35) Ndeci ovo vakala, etu citavavo okuti omanu valua vamuila ukuasi kokuetu omo liokukuata onepa kupange wokulisunguluisa cilo muele−veteke lilo lieyovo!
Kolela Eyovo Litunda ku Yehova
20. Onjongole yocili ya Paulu yakala ya nye, kuenda momo lie kakuakalilile vali otembo yokutaluka? (b) Nye cilekisa eteke lieyovo koloneke vilo tukasi ndeti?
20 Eci Paulu asonehela ukanda waye wavali va Korindo kunyamo 55 K.K., kuakambele ño 15 kunyamo kesulilo liocisoko co Yudea. Upostolo wayonguile okuti va Yudea Lavakualofeka valisunguluisa la Suku pokati ka Kristu. Eli liakala eteke lieyovo, kuenda kakuakale vali otembo yalua. Etu tukasivo kotembo yalisoka la yina, omo tukasi kesulilo lioluali lulo, tunde kunyamo wo 1914. Upange wokukunda Usoma okuti ukasi okuamamako cili voluali luosi, ulekisa okuti lilo olio eteke lieyovo.
21. (a) Ocipama cipi Cembimbiliya canõliwila unyamo wo 1999? (b) Nye tusukila okulinga veteke lilo lieyovo?
21 Omanu vakuolofeka viosi vasukila okuyeva eci catiamẽla keliangiliyo lia Suku liatiamẽla keyovo pokati ka Yesu Kristu. Kakuli vali otembo yokulipañela. Paulu wasoneha hati: “Lilo olio eteke liaco lieyovo.” Olondaka evi visangiwa kelivulu lia 2 Va Korindo 6:2 ovio vikakala ocipama Cembimbiliya Colombangi via Yehova cunyamo wo 1999. Ndomo tuamõla, etu tutailili ohali yimue yapiãla okuti olukundu luna luapita ko Yerusalãi lonembele yaco cisule! Cikakala esulilo liovina viosi visangiwa voluali lulo, okuti likaveta vosi vasangiwa kulo kilu lieve. Cilo−hẽla hacoko−yilo oyo otembo yokulinga cimue. Nda etu tuakolela okuti eyovo litunda ku Yehova, nda tu ukuetele ocisola, kuenda nda tueca esilivilo komuenyo kopui, etu katukatamba ocali ca Suku leselula. Lutima weyuka onjongole yokukemãlisa Yehova, tulekisi lolondaka vietu kuenda lovilinga vietu okuti tuyongola muẽle ocili okucilinga, osimbu tupopia hati: “Lilo olio eteke liaco lieyovo.”
Otambulula Ndati?
Momo lie okulisunguluisa la Suku kukuetele esilivilo liocili?
Velie olomunga kuenda olonumiwa vikasi okulinga upange wokulisunguluisa?
Tulilekisa ndati okuti tulonumiwa via Suku?
Ocipama Cembimbiliya Colombangi via Yehova cunyamo wo 1999, cilomboloka nye kokuove?
[Alitalatu Kemela 15]
Ndeci Paulu alinga ove okasivo okukunda lombili yocili oco okuatise vakuele okulisunguluisa la Suku?
[Elitalatu kemela 16]
Veteke lilo lieyovo, ove okasi hẽ pokati kowiñi ukasi okulisunguluisa la Yehova Suku?