Lekisa Ocituwa Coku Talamẽla!
“Nalamẽla Suku yeyovo liange. Suku yange o njeva.”−MIKA 7:7.
1, 2. (a) Ocituwa civi ca nyõla ndati ekalo liwa lia va Isareli vekango? (b) Nye ci pondola oku pita Lukristão okuti ka lekisa ocituwa ca sunguluka?
OVINA via lua komuenyo citava okuti vi tendiwa ndu via sunguluka, ale ka via sungulukile, cosi catiamẽla ño kocituwa tu tala laco ovina viaco. Eci va Isareli va kala vekango, locikomo va tekuiwa lo mana. Nda ovo va kulihisile ciwa vekango ovo va kala okuti ka mua imaile apako, ovo nda va vetiyiwa oku eca olopandu via lua ku Yehova omo a va ihã ha eteku. Eci nda calekisa okuti ovo va kuete ocituwa cimue ca sunguluka. Pole, ovo ka va cilingile, kuenje noke va fetika oku ivaluka ovikulia viñi viñi va kuatele kofeka yo Egito, kuenda va fetika oku sepula o mana hati, ya kuma kuenda ka yipepi vali. Hacituwakuoco civi coku liyeya!−Atendelo 11:4–6.
2 Ukristão kotembo yilo, citava okuti ocituwa caye cilingisavo ovina vimue oku molẽha soketi viwa ale vivi. Ukristão nda ka lekisa ocituwa ca sunguluka, esanju liosi akuatele haico li fetika oku imula, noke o fetika oku kuata ovitangi via lua, momo ndomo Nehemiya a ci popia, “esanju lioku sanjukila Yehova olio ongusu [yetu].” (Nehemiya 8:10) Ocituwa coku sunguluka haico cesanju, ci tu kuatisa oku amamako loku pama kuenda oku kala lombembua lelitokeko la vakuetu vekongelo.−Va Roma 15:13; Va Filipoi 1:25.
3. Ocituwa ca sunguluka ca kuatisa ndati Yeremiya eci a li yaka lovitangi?
3 Yeremiya wa lekisa ocituwa ca sunguluka, ndaño okuti wa kala kotembo yimue ya tila ca lua. Ndaño muẽle ceci a imba uvangi watiamẽla ko ku lumduiwa kuo Yerusalãi kunyamo wo 607 O.Y, eye lopo handi wa luluvalele kovina via sunguluka viatiamẽla kondaka yaco. Yehova nda ka ivalele va Isareli, kuenda pokati kavo nda pa supa vamue. Yeremiya wa soneha velivulu Liasiõsuilo hati: “Ocisola ca Yehova ka ci kava kava, haico ka ci pui. Ohenda yaye ka yi kuete efulilo. Olomele viosi yeyi, ndeci ekumbi. Ocili cove calua!” (Asiõsuilo 3:22,23) Ndaño okuti vokuenda kuanyamo alua, omanu va Suku vasiata oku li yaka lovitangi via lua, lopo handi, va siata oku tẽla oku lekisa ocituwa ca sunguluka kuenda esanju liocili.−2 Va Korindo 7:4; 1 Va Tesalonike 1:6; Tiago 1:2.
4. Ocituwa cipi ciwa Yesu a lekisa, kuenda ocituwa caco cokuatisa ndati?
4 Eci papita cisoka ovita epandu kanyamo noke ya Yeremiya, Yesu wa kuatisiwavo locituwa caye cesunguluko oco a pandikise. Kelivulu lia va Heveru tu tangako ndoco: “Mekonda liesanju lio kapiwila kovaso, [Yesu] wa pandikisa oku tala ohali [kuti, NW], wa pembula osõi, kuenje cilo wa tumala kondio yocalo ca Suku.” (Va Heveru 12:2) Ndaño loku kuamawa kumue loku suvukiwa, kuenda toke muẽle eci a talisiwa ohali yu vovalela kuti, Yesu wa pandikisa kohali “mekonda liesanju lio kapiwila kovaso.” Esanju liaco lio kapiwilile kovaso, lia kala esumuluho lioku teyuila omoko ya Yehova yoku viala oluali luosi kuenda oku kemãlisa onduko yaye, kumue lelavoko lioku nena asumuluho avelapo komanu va pokola.
Kuata Ocituwa Coku TalamẽLa
5. Kondaka yipi yasiata okuti nda tua lekisa ocituwa coku kevelela ci ka tu kuatisa oku tala ondaka yaco lesunguluko?
5 Nda tua lekisa ocituwa ca sunguluka ndeci ca Yesu, lalimue eteke esanju lietu ku Yehova li ka imuha, ndaño muẽle okuti olonjanja vimue ovina ka vi tẽlisiwa ndomo tua kevelele ale votembo tua lavokaile. Uprofeto Mika wa popia hati: “Ame, ame njimbila Yehova ovaso, nalamẽla Suku yeyovo liange.” (Mika 7:7; Asiõsuilo 3:21) Etu citava okuti tu lekisavo ocituwa cimuamue coku talamẽla. Ndamupi? Kovina viñi viñi. Ndeci, etu pamue tusima okuti manji umue o kuete ocikele coku songola, o kasi loku linga eci ka ca sungulukile, kuenje ci sukila oku tetulula ekatanga liaco. Ocituwa coku talamẽla ci ka tu vetiya oku lipula ndoco: ‘Eye hẽ wa lueya muẽle, ale ame, ame ka ca ndombolokele ño enene ciwa? Nda hẽ eye wa lueya muẽle, anga hẽ Yehova o kasi loku ecelela ovina viaco omo wa limbuka okuti omunu waco o ka imbapo ocituwa caco ka ca sungulukile, kuenje ka ci ka sukila vali etetululo limue lia piãla?’
6. Ocituwa coku talamẽla ci kuatisa ndati omunu o kasi loku liyaka lovitangi komuenyo waye?
6 Ocituwa co ku talamẽla ci sukiliwavo nda tu kasi lakatanga amue, ale pamue tu kasi loku li yaka lo ku hongua konepa yimue yomuenyo wetu. Ndeci, citava okuti pamue tua likutilila ale ku Yehova oco a tu kuatise, pole handi lopo ocitangi caco ci kasi loku tuihinya. Nye tu linga? Te tuamamako loku linga cosi tu tẽla oco tu tetulule ocitangi caco, kuenda tu sukilavo oku kolela kolondaka via Yesu, eci a popia hati: “Pingi kuenje cu wihiwi, vanjiliyi kuenje vu sanga, totoli, kuenje vo yikuluili.” (Luka 11:9) Amamako loku likutilila ku Yehova, kuenda talamẽla kokuaye. Yehova oka tambulula ohutililo yove votembo eye a sokiya kuenda ndomo eye muẽle a yongola.−1 Va Tesalonike 5:17.
7. Ndamupi ocituwa co ku talamẽla ci ka tu kuatisa ndomo tu tenda oku situluiwa kua naito la naito kuatiamẽla kelomboloko Liembimbiliya?
7 Osimbu ovitumasuku vi kasi loku tẽlisiwa, elomboloko lietu Liembimbiliya li situluiwa vali ciwa. Pole, olonjanja vimue, pamue tu sima okuti, asituluilo amue a cilua. Nda ka a situluiwile votembo tua yonguile, tu lekisa hẽ onjongole yocituwa coku talamẽla? Ivaluka okuti, Yehova wa situlula ‘elumbu lia Kristu,’ naito la naito, vokuenda kueci cisoka 4.000 kanyamo. (Va Efeso 3:3–6) Etu, eu kuete hẽ esunga liokuti ka tu kuata vali epandi? Tu kuete hẽ atatahãi vokuti, “ukuenje wa kolelua haeye wa lunguka,” wa nõliwila oku eca komanu va Yehova “okulia kuavo kotembo ya tukuiwa?” (Mateo 24:45) Nye hẽ etu muẽle tu li pumbisila esanju litunda ku Suku omo liovina vimue ka via tu lombolokele ño enene ciwa? Ivaluka okuti, Yehova eye wa kuliha otembo kuenda ndomo a tu ‘situluila ovisimilo viaye.’−Amosi 3:7.
8. Epandi lia Yehova li kasi loku ecelela ndati okuti ku kuatisiwa omanu va lua?
8 Ca siata okuti vamue va pua epandi omo va sima okuti, noke yanyamo alua loku kuata ekolelo kupange wa Suku, pamue citava okuti ka va ka kala vali komuenyo oco vamõle “eteke linene lia Yehova hailio li yokokisa.” (Yoeli 2:30, 31) Pole, ovo ci tava okuti va kolisiwa loku tenda ovina via sunguluka viatiamẽlako. Petulu wa lungula hati: “Sokololi okuti epandi lia Ñala yetu olio eyovo.” (2 Petulu 3:15) Epandi lia Yehova li kasi loku ecelela okuti, olohuluwa via lua vikuavo viomanu vana okuti vakuotima wa sunguluka, va lilongisa ocili. Eci hẽ ka ci sanjuisa? Handi vali, osimbu Yehova a kasi oku amamako loku kuata epandi, tu sanga vali otembo yalua yoku ‘likolisilako oku linga eci ci koka epopelo lietu, okuti tu kolisako muẽle, ‘lusumba kuenda loku luluma.’−Va Filipoi 2:11, 12.
9. Nda okuti ka tu kuete epondolo lioku lingila Yehova upange wa lua, ndamupi ocituwa coku talamẽla ci ka tu kuatisa oco tu pandikise locitangi caco?
9 Ocituwa coku talamẽla ci tu kuatisa oco ka tu ka pue epandi eci kuiya elambalalo, ovovei, oku kuka, ale ovitangi vimue okuti ka vi tuecelela oku kuata onepa kupange Wusoma. Yehova o kevelela okuti tu vumba kokuaye lutima wetu wosi. (Va Roma 12:1) Pole, Omõla wa Suku, una “o kuatela ohenda ohukui losuke,” ka tu kisika ocina cimue okuti ka tu ci tẽla oku ceca, kuenda ndaño muẽle Yehova ka ci lingivo. (Osamo 72:13) Omo liaco, tua siata oku vetiyiwa oku linga eci tu pondola, loku talamẽla lepandi liocili toke eci ovina vi ka pongoluiwa, cikale voluali lulo, ale luolu lua laika okuiya. Ivaluka okuti: “Suku hokuanyako okuti ivalako upange wene kuenda ocisola wa lekisi loku vumba olosandu vonduko yaye, ndeci vu kasi loku linga toke opo.”−Va Heveru 6:10.
10. Onjila yipi ka ya sungulukile omunu una o kuete ocituwa coku talamẽla a ka yuvula? Ci lombolola.
10 Ocituwa coku talamẽla cipondolavo oku tu kuatisa oco tu yuvule oku kuata emande. Omanu vamue okuti kaliye va siapo etavo liocili, ka va yonguile oku talamẽla. Ovo soketi va simaile hati, kuli cimue ca kambelele oku ci pongolola, cikale Vembimbiliya, ale kovina vimue viatiamẽla kocisoko ca Yehova. Pole, ovo ka va limbukile okuti espiritu lia Yehova li vetiya ukuenje wa kolelua haeye wa lunguka, oco a pongolole ovina vimue, votembo eye muẽle Yehova a sokiya, okuti ha ceci ko etu muẽle tu sima okuti oco ci sukila oku lingiwa. Kuenda epongoloko liosi li lingiwa, ka li lingiwa ndomo etu muẽle tu yongola, puãi te li li tava locipango ca Yehova. omanu vana okuti vasiapo etavo liocili, va ecelela okuti ocituwa coku kuata emande, ci nyõla ovisimilo viavo kuenje ca va yapula. Pole, ovo nda va kuatele ocituwa covisimilo via Kristu, nda vamamako lesanju liavo kuenda nda va tuihinya oku kala pokati komanu va Yehova.−Va Filipoi 2:5–8.
11. Kotembo yoku talamẽla tu pondola ndati okupako esilivilo, poku kuama ongangu yava va tukuiwa?
11 Ocili okuti, oku kuata ocituwa coku talamẽla ka ci lomboloka okuti omunu o linga ocisiãi ale okuti ka lingi vali lacimue. Etu tu kuete ovina via lua vioku linga. Ndeci, tu sukila oku litumbika koku lilongisa Embimbiliya pokolika. Loku kuama onjila eyi, tu lekisa onjongole ya piãla kovina viespiritu ndeci ovaprofeto vakuekolelo kuenda ovangelo valekisilevo. Kueci catiamẽla koku lekisa onjongole yaco, upostolo Petulu wa popia hati: “Ovaprofeto va sandiliya loku puliliya epopelo liaco. Kuenje ovangelo va livela oku lengelela vovina viaco.” (1 Petulu 1:10–12) Pole, helilongisoko lika lio pokolika, puãi oku endaenda kolohongele olonjanja viosi ci sukiliwavo ca lua, kuenda tu sukilavo oku amẽla ku Suku volohutililo. (Tiago 4:8) Vosi vana va limbuka usuke wavo wovina viespiritu, kuenje va li tekula olonjanja viosi lokulia kuespiritu kuenda va siata oku litokeka kumue la vakuavo Akristão, va lekisa okuti va kuete muẽle ovisimilo lovituwa via Kristu.−Mateo 5:3.
Kuata Ovisimilo Via Sunguluka
12. (a) Oku lisanja kupi Adama la Heva va kala loku sandiliya? (b) Nye ca siata oku pita lomanu omo lioku kuama ongangu ya Adama la Heva?
12 Eci Suku a lulika ulume wa tete lukãi waye, Yehova wa li kapela eye muẽle omoko yoku va tumbikila ovihandeleko vieci ciwa leci civi. (Efetikilo 2:16,17) Adama la Heva va yonguile oku kala vakuavipango okuti ovo muẽle va linõlela eci va yongola oku linga, okuti ka va kuama vali ovihandeleko via Suku, kuenje eci casulila vovitangi tu kasi loku li yaka lavio ndeti voluali oloneke vilo. Upostolo Paulu wa popia hati: “Ekandu lia iñila voluali lomunu umuamue, kuenda okufa kueya lekandu, haico okufa kua sambukila omanu vosi, momo vosi va linga ekandu.” (Va Roma 5:12) Vokuenda kuolohulukãi epandu vianyamo vekalo liomanu, tunde kotembo ya Adama, kuasiata oku ocili colondaka via Yeremiya, wa popia hati: “A Yehova, ndi ci okuti okuenda kuomunu ka ku kasi povaka aye muẽle. Omunu enda ka tẽla eye muẽle oku suñamisa okuenda kuaye.” (Yeremiya 10:23) Oku limbuka okuti olondaka via Yeremiya viocili muẽle, eci ka ci tatãliwa. Ovio, viocili muẽle. Ovio, vi lombolola okuti vokuenda kuovita vianyamo, ‘omunu okasi loku longisa vakuavo,’ omo okuti ovo va kasi loku viala locipango cavo muẽle, ka va kasi loku kuama ovilongua via Suku.−Ukundi 8:9.
13. Ocisimilo cipi cocili Olombangi via Yehova vi kuete catiamẽla kueci ci pondola oku lingiwila omanu?
13 Kueci catiamẽla kovitangi omanu va kasi loku liyaka lavio, Olombangi via Yehova via kuliha okuti citito calua ci tẽliwa oku lingiwa catiamẽla kondaka eyi voluali lulo. Ocituwa ca sunguluka ci pondola oku tu kuatisa oco tuamameko lesanju, pole, ndaño lesanju liaco, eci ka ci pondola oku tetulula ovina viosi. Kefetikilo liunyamo wo 1950, umue ukuetavo limue wo kofeka yo Amerika, wa sandeka elivulu limue lia landisiwa vali ca lua, litukuiwa okuti, The Power of Positive Thinking (Unene Wovisimilo via Sunguluka). Elivulu liaco, li lombolola okuti, onepa ya lua yovitangi citava okuti vi yuliwa nda via tendiwa locituwa cimue ca sunguluka. Ocina cimue ciwa, ci komohisa calua. Pole, ovolandu a lekisa okuti ukulihiso, uloño, ovikuata, kuenda ovina via lua vikuavo, nda ka tu vi kuete, vi tateka ovina etu tu pondola oku tẽlisa. Kuenda voluali luosi, ovitangi via lua enene okuti omanu ka va tẽla oku vi tetulula ciwa, ndaño va kuete ovisimilo via sunguluka!
14. Ocili hẽ okuti Olombangi via Yehova vi kuete ocituwa civi? Ci lombolola.
14 Omo liocituwa ca sunguluka Olombangi via Yehova via siata oku tenda laco ovitangi, olonjanja vimue omanu vasiata oku va lundila hati, va kuete ocituwa cimue civi. Puãi eci hacoko, ovo, lesanju lia piãla, va litumbika kupange woku sapuila omanu catiamẽla ku Suku okuti eye lika o ka tẽla oku tetulula ovitangi viosi viomanu. Poku ci linga, ovo va lekisavo ovisimilo via Kristu. (Va Roma 15:2) Kuenda ovo va litumbika kupange woku kuatisa omanu oco va kuate ukamba uwa la Suku. Ovo va kuliha okuti, eci ci ka nena uwa umue wenda ño hu.−Mateo 28:19, 20; 1 Timoteo 4:16.
15. Upange Wolombangi via Yehova wa siata ndati oku kuatisa omanu?
15 Olombangi via Yehova, ka vi kuete ocituwa cokuti, ka via kapeleko ovitangi vi kasi loku pita lomanu, ca piãla vali enene ovituwa vina vivi okuti ka vi li tava Lembimbiliya. Eci omunu umue olekisa onjongole okuti ka lingile handi Ombangi ya Yehova, eye osukila oku linga apongoloko, kuenda okuete oku imbapo ovituwa vivi vina Suku a nyale. (1 Va Korindo 6:9–11) Omo liaco, Olombangi via Yehova viasiata oku kuatisa omanu vana va tava oku imbapo ovituwa ndeci, uholua, oku sipa eliamba, ukahonga, kuenda ocituwa coku imba oco va sange olombongo. Omanu vaco, va pongoloka ndeti, va lilongisa oku sandiliya eteku liokueca kepata liavo, lonjila yimue yolondunge viocili. (1 Timoteo 5:8) Cikale omunu lomunu ale apata eci va kuatisiwa konepa eyi, posongo va kasi ovitangi vi tepuluka ndeci, oku sipa eliamba, ungangala vapata, kuenda ovitangi vikuavo. Omo lioku pokola kovihandeleko, kuenda omo lioku kuatisa vakuavo oco va pongoluile ovimuenyo viavo kueci ciwa, Olombangi via Yehova, vi tepulula ocilemo kovisoko via siata oku tetulula ovitangi viomanu.
16. Momo lie Olombangi via Yehova ka vi li tengela vombuanja yoluali loku sandiliya apongoloko?
16 Eci ci lomboloka hẽ okuti Olombangi via Yehova via siata oku pongoloka ekalo livi liomanu voluali luosi? Ocili okuti, vocita canyamo apita, etendelo liolombangi via Yehova okuti tete lia kala lika cisoka 3.800.000 komanu, kaliye liatẽla eci cisoka 6.000.000 komanu. Eci ci lekisa evokiyo limue li soka 2.200.000 komanu, valua pokati kavo va imbapo ovituwa vivi eci va linga Akristão. Omanu valua va pongolola omuenyo wavo! Pole, etendelo liaco eli, litito ca lua oku lisokisa loku livokiya kuomanu vokuenda kuotembo yaco yimuamue, okuti lia tẽlisa eci cisoka 875.000.000 komanu va kasi voluali luosi otembo yilo! Olombangi via Yehova via siata oku sanga esanju liocili, koku kuatisa ava va tava, pole ovo va kuliha okuti ka va luile va kuama onjila yituala komuenyo. (Mateo 7:13,14) Osimbu Olombangi via Yehova vi kevelela epongoloko liwa li ka pita voluali luosi, okuti lika lingiwa lika la Suku, ovio ka vi li tengi vombuanja yoluali oku sandiliya apongoloko, okuti olonjanja via lua vi fetika lovisimilo viwa, pole noke vi sulila vesumuo kuenda vungangala.−2 Petulu 3:13.
17. Nye Yesu a linga oco a kuatise omanu vana va kala koloneke viaye, pole nye eye ka tavele oku linga?
17 Loku kuama onjila eyi, Olombangi via Yehova vi lekisa ekolelo limuamue ku Yehova ndeli Yesu a lekisa eci a kala palo posi. Kocita catete canyamo, Yesu wa linga ovikomo vioku sakula omanu va vela. (Luka 6:17–19) Eye toke muẽle wa pindula omanu va fa. (Luka 7:11–15; 8:49–56) Pole, eye ka maleleko ovovei ndaño olofa okuti unyali umue unene. Eye wa kulihile okuti eyi hayoko ya kala otembo ya nõliwa la Suku yoku malako ovitangi viaco. Omo okuti Yesu wa kala omunu umue wa lipua eye wa kuata uloño wa velapo, omo liaco ci tava okuti nda wa linga ca lua koku tetulula ovitangi viopulitika kuenda vikuavo omanu va kala loku li yaka lavio. Kuenda cimolẽha soketi vamue pokati komanu vo koloneke viaye, va yonguile okuti eye otambula omangu yuviali oco a mãleko ovitangi viosi, pole Yesu ka tavele. Etu tu tanga ndoco: “Eci omanu va mõla ocilimbu a linga, va popia vati, Ocili u, eye uprofeto una o laika oku iya voluali. Yesu, omo a limbuka okuti va [ka] si oku iya oku u kuata ha vo vialeka, oco wa tiukila komunda lika liaye.”−Yoano 6:14, 15.
18. (a) Yesu wa lekisa ndati olonjanja viosi ocituwa coku talamẽla? (b) Upange wa Yesu wa pongoloka ndati okupisa kunyamo wo 1914?
18 Yesu wa likala oku li tenga vopulitika, kuenda oku linga upange umue woluali, omo wa kulihile okuti, otembo yaye yoku kala komangu yosoma oco a linge upange woku sakula omanu vosi va kasi voluali handi ka ya pitililepo. Ndaño muẽle ceci a pinduiwila komuenyo wespiritu oko kilu okuti ka fi vali, eye wa tava oku kevelela toke otembo ya nõliwa la Yehova yi pitilapo oco a linge upange waye. (Osamo 110:1; Ovilinga 2:34, 35) Pole, tunde eci a vialekiwa oco a kale Soma Yusoma wa Suku kunyamo wo 1914, o kasi oku ‘amamako loku yula kuaye.’ (Esituluilo 6:2; 12:10) Hesanjukuolio tu yevite omo lioku pokola kusoma waye, osimbu vana va li tukola hati Akristão, va likala oku kuata ukulihiso Wembimbiliya watiamẽla Kusoma!
Oku Talamẽla−ono Yesumuo ale Yesanju?
19. Otembo yipi oku talamẽla ku nena evalo kutima, kuenda otembo yipi okuti oku talamẽla ku nena esanju lia piãla?
19 Salomone wa kulihile okuti oku talamẽla ku nena esumuo. Eye wa soneha ndoco: “Elavoko liosimbu li tepuluisa utima, onjongole ya sangiwa oyo uti womuenyo.” (Olosapo 13:12) Ocili okuti, nda omunu okasi oku talamẽla cimue okuti ka ci kasi loku tẽlisiwa, utima waye u vala lesumuo. Pole, oku talamẽla ovipito vimue vi sanjuisa, ndeci, uvala, okucitiwa kuomõla, ale oku kala pohongele yimue la vakuetu tu sole ca lua, ovina viaco evi citava okuti vi tu yukisa elavoko liesanju eci handi eteke liaco ka lia pitililepo. Esanju liaco li li vokiya vali ca lua nda tu kasi oku talamẽla lolondunge, okuti tu liangiliyila eci ci kasi lokuiya.
20. (a) Ovipito vipi vimue vi komohisa tu talamẽla oku mõla? (b) Tu pondola ndati oku sanga esanju, osimbu tu talamẽla oku tẽlisiwa kuocipango ca Yehova?
20 Eci tu kuata ekolelo liocili okuti eci tu lavoka ci ka tẽlisiwa muẽle ocili, ndaño ka tua kulihile otembo ocina caco ci ka tẽlisiwa, otembo yoku kevelela ka yi nena ‘evalo liutima.’ Afendele va Suku vakuekolelo va kuliha okuti Ohulukãi Yanyamo Yuviali wa Kristu yi kasi ocipepi. Ovo va kolela okuti va ka mõla esulilo liolofa kuenda ovovei. Lelavoko liocili, ovo vakevelela lesanju otembo va ka tambula olohuluwa viomanu va ka pinduiwa, oku kongelamo vangandiavo vafa. (Esituluilo 20:1–3, 6; 21:3, 4) Otembo yilo okuti ovisenge lovikula vi kasi loku nyõliwa, ovo va kuete esanju lia piãla lioku lavoka oku tala Ofeka Yelau palo posi. (Isaya 35:1, 2, 7) Omo liaco, olondunge viocili okupa esilivilo kotembo, osimbu tu talamẽla loku ‘kuata ombili kupange wa Ñala!’ (1 Va Korindo 15:58) Tu kuati onjongole lokulia kuespiritu. Tu kuati elitokeko liocili la Yehova. tu sandiliyi omanu vana va sunguluka kovitima, kuenda tu va vetiyi oco va vumbe Yehova. Tu kolisi vakuetu vakuetavo. Tupi esilivilo liocili kotembo Yehova a kasi handi oku ecelela. Lonjila eyi, oku kevelela ku Yehova, lalimue eteke ku ka tu nenela ‘evalo kutima,’ puãi, ci ka tu nenela esanju lia piãla!
O Pondola oku ci Lombolola?
• Yesu wa lekisa ndati ocituwa coku talamẽla?
• Vakalo api okuti Akristão va sukila oku kuata ocituwa coku talamẽla?
• Momo lie Olombangi via Yehova via sanjukila oku talamẽla ku Yehova?
• Citava ndati okuti oku talamẽla ku Yehova ku linga ono yesanju?
[Elitalatu Kemẽla 23]
Yesu wa pandikisa omo liesanju lio kapiwila kovaso
[Elitalatu Kemẽla 24]
Ndaño tukasi anyamo alua kupange wa Suku, tu pondola handi oku amamako lesanju lietu