Amamako Loku Pandikisa Ndu Okuti Olete Una Kamuiwa Lovaso Ositu
“[Mose] wa pandikisa ndu o lete una ka muiwa lovaso ositu.”—VA HEVERU 11:27.
1. Olondaka vipi vi komõnhisa viatiamẽla ku Suku Yesu a tukula Vohundo yaye yo Komunda?
YEHOVA, Suku umue okuti ka muiwa lovaso ositu. Eci Mose a pingile oco a mõle ulamba Waye, Yehova wo tambulula hati: “Ka ci tava oku mõla ocipala cange. Momo lomue omunu o mõla kuenje o kala vali lomuenyo.” (Etundilo 33:20) Kuenda upostolo Yoano w soneha hati: “Lomue [omunu] wa la mola Suku.” (Yoano 1:18) Eci Yesu Kristu a kala palo posi ndomunu ukuetimba liositu, ka tẽlelevo oku mõla Suku. Pole, Kohundo yaye Yavelapo a lingila Komunda, Yesu wa popia hati: “Ava va yela vutima va sumuluha, momo va[ka] mola Suku.” (Mateo 5:8) Nye Yesu a yonguile oku popia lolondaka evi?
2. Momo lie ka tu tẽlela oku mola Suku lovaso etu ositu?
2 Embimbiliya li tukula Yehova hati, espiritu ka li muiwa lovaso ositu. (Yoano 4:24; Va Kolosai 1:15; 1 Timoteo 1:17) Omo liaco, Yesu ka yonguile oku popia hati, etu tumanu tu pondola oku mõla muẽle ocili Yehova lovaso etu ositu. Ocili okuti, Akristão olombuavekua, vaka mõla Yehova Suku oko kilu noke yepinduko liavo ndovilulikilo viespiritu. Pole, omanu vana “va yela vutima,” okuti va kuete elavoko lioku kala otembo yenda ño hu palo posi, va pondolavo ‘oku mõla Suku. Eci hẽ ci tẽliwa ndati?
3. Ndamupi omanu va pondola oku limbuka ovituwa vimue via Suku?
3 Tu lilongisa Cimue catiamẽla ku Yehova poku luluvalela lutate kovina eye a lulika. Poku ci linga, ci tava okuti, tu komõha unene waye, kuenda ci tu vetiya oku limbuka okuti eye Suku haeye Ululiki. (Va Heveru 11:3; Esituluilo 4:11) Catiamẽla kondaka eyi, upostolo Paulu wa soneha hati: “Tunde kokululikiwa kuoluali, unu wa [Suku], una ko muiwa lovaso, okuti unene waye ko pui, kuenda okukola kuaye, [k]u molehela ciwa vovina [eye] a lulika.” (Va Roma 1:20) Omo liaco, volondaka via Yesu viatiamẽla koku mõla Suku, mua kongela uloño woku limbuka vimue pokati kovituwa via Yehova. Oku mõla kuaco kuatiamẽla koku kuata ukulihiso wasuapo kuenda koku kuata elomboloko liovina viespiritu ‘lovaso utima.’ (Va Efeso 1:18) Olondaka kuenda ovilinga via Yesu, vi lekisavo calua catiamẽla ku Suku. Omo liaco, Yesu wa popia hati: ‘U wa mõla ame, wa mõlavo Isia.’ (Yoano 14:9) Yesu wa lekisa muẽle ovituwa ndevi via Yehova. Omo liaco, oku kuliha omuenyo wa Yesu kuenda elongiso liaye, ci pondola oku tu kuatisa oku mõla loku limbuka ovituwa vimue via Suku.
Oku Kuata Elomboloko Liovina Viespiritu ci Kuete Esilivilo Liocili
4. Ndamupi ekambo liukulihiso wovina viespiritu li lekisiwa lomanu valua koloneke vilo?
4 Koloneke vilo, ka ca lelukile oku sanga omanu va kuete ekolelo okuti va kakatela muẽle Kovina viespiritu. Upostolo Paulu wa popia hati: “Havosiko ka kuete ekolelo.” (2 Va Tesalonike 3:2) Kuli omanu valua okuti, va litumbika vali calua kovopange avo muẽle, kuenda ka va kuete ekolelo ku Suku. Ovituwa viavo vieviho, kuenda ekambo lioku kapako ovina viespiritu, vi va tateka oku limbuka Suku lovaso utima. Omo liaco, upostolo Yoano wa soneha eci catiamẽla kokuavo hati: “Ukuakulinga eviho ka la mola Suku.” (3 Yoano 11) Omo okuti omanu vaco ka va lete Suku lovaso avo ositu, ovina viosi va linga, va sima hati, ka vi letiwe la Suku. (Esekiele 9:9) Ovo va pembula ovina viespiritu, kuenda ka va kuete “ukulihiso wa Suku.” (Olosapo 2:5) Ocili okuti, via sunguluka olondaka viupostolo Paulu wa soneha hati: “Ukuetimba ka tambula oviali viespiritu lia Suku, momo kokuaye vi linga nduveke, kuenje eye ka te?la oku vi limbuka momo vi limbukiwa lika lekuatiso liespiritu sandu.” —1 Va Korindo 2:14, NW.
5. Omanu va kuete ovisimilo viespiritu, va kuliha nye?
5 Pole, nda tua kapako muẽle ovina viespiritu, olonjanja viosi tuka limbuka okuti, ndaño Yehova ka kasi nda Suku umue o lisiõsiõla calua, eye wa kuliha eci tu kuata ovisimilo ka via sungulukile, kuenda olonjongole vivi. Ocili okuti, “olonjila viomunu vi molẽha kovaso a Yehova. Eye o lavulula olonjila vieya viosi.” (Olosapo 5:21) Nda tua wila vekandu, tu vetiyiwa oku litavela kuenda oku sandiliya ongecelo ya Yehova, momo liocisola tu u kuetele, kuenda ka tu yongola oku u sumuisa.—Osamo 78:41; 130:3.
Nye ci tu Kuatisa Koku Pandikisa?
6. Oku pandikisa ku lomboloka nye?
6 Ndaño okuti, ka tu pondola oku mõla Yehova lovaso etu ositu, olonjanja viosi tu ivaluki okuti, eye o tu lete. Poku kuliha okuti eye o kasiko muẽle ocili, kuenda oku kuliha okuti eye o kasi ocipepi lomanu vana vo sandiliya, cika tu kuatisa koku pandikisa, kuenda tuka pamisa vali calua ekolelo lietu kokuaye. (Osamo 145:18) Tu pondola oku kuama ongangu ndeyi ya Mose una upostolo Paulu a soneha eci catiamẽla kokuaye hati: “Omo [Mose] a kala lekolelo, wa tunda ke Egito, yu ka kuatele usumba wonyeño yosoma, momo wa pandikisa ndu o lete una ka muiwa lovaso ositu.”—Va Heveru 11:27.
7, 8. Nye ca vetiya Mose oku kuata epandi lioku vangula la Fareo?
7 Poku tẽlisa ocikundi caye Suku o wihile coku songuila va Isareli poku tunda lavo kupika wo Egito, Mose olonjanja vialua wa endaile oku ka vangula la Fareo kombala yaye kueyukile to vakuatavo kuenda asualali va kala pomangu ya velapo. Vovimano viombala yaco, soketi mua tatiwile oviluvialuvia vioviteka. Ndaño okuti Mose ka tẽlele oku mõla Yehova lovaso aye ositu, eye handi wa kolelele kokuaye, kuenje, eci ca litepele calua loviteka viosi via kala ndolosuku ko Egito ka vi kuete omuenyo. Ka ci komohisa okuti, Mose ka kuatele usumba la Fareo.
8 Nye ca eca ku Mose epandi lioku enda enda olonjanja vialua ku Fareo? Embimbiliya li tu lomboluila okuti, “Mose ulume womboka cimue, omanu vosi kilu lieve va sule.” (Atendelo 12:3) Ocili okuti, oku pama kuaye kespiritu, kuenda ndomo a kolelele okuti Suku wa kala laye, kua eca ongusu ku Mose yoku imbila uvangi “una ka muiwa lovaso ositu,” kovaso yolosoma vivi vio ko Egito. Vipi hẽ olonjila vimue viokuti ava ‘valete’ Suku una ka muiwa lovaso ositu, koloneke vilo, oko va lekisila ekolelo liavo kokuaye?
9. Yipi hẽ onjila yimue tu pondola oku kuama oco tu amameko loku pandikisa?
9 Yimue onjila tu kuama koku lekisa ekolelo kuenda koku amamako ndu o lete Una ka muiwa lovaso ositu, yatiamẽla koku kunda olondaka viwa lepandi liocili ndaño loku suvukiwa. Yesu wa lungula olondonge viaye hati: “Vu suvukilua onduko yange lomanu vosi.” (Luka 21:17) Eye handi wa va sapuila hati: “Ukuenje ka velipo okuti ñala yaye o sule. Nda va fukilisa ame, ene vo fukilisivo.” (Yoano 15:20) Ndomo Yesu a ci popele, noke yolofa viaye, olondonge viaye vieya oku suvukiwa calua okuti vieya oku kapiwa vokayike kuenda oku tipuiwa calua. (Ovilinga 4:1–3, 18–21; 5:17, 18, 40) Ndomo ovapostolo va Yesu va suvukiwile calua, ovo kumue lolondonge vikuavo vi amamako loku kunda olondaka viwa lutõi wocili.—Ovilinga 4:29–31.
10. Ndamupi ekolelo lioku kuliha okuti Yehova o tu tata ciwa li tu kuatisa kupange woku kunda?
10 Ndeci Mose a linga, olondonge viatete via Yesu, ka via kuatele usumba lovanyãli vavo. Olondonge via Yesu, via kuatele ekolelo ku Suku, kuenje, eci via suvukiw via tẽla oku pandikisa cocili. Ocili okuti, ovio vi amamako lepandi liavo kuenda via kala ndu okuti vi lete Una ka muiwa lovaso ositu. Koloneke vilo, omo lioku kuliha okuti Yehova o kasi loku tu tata muele ciwa, ci tu iha utõi woku litumbika kupange wetu woku kunda. Ondaka ya Suku yi popia hati, “usumba omunu a kuetele ukuavo onjanjo, puãi u wa kolela Yehova wa koka.” (Olosapo 29:25) Omo liaco, ka tu kuata usumba omo liesuvu, kuenda ka tu kuata osõi yoku linga upange wetu woku kunda. Ekolelo lietu li tu vetiya oku eca uvangi lepandi liocili ku vakuetu tu lisungue lavo, lava tu talavaya lavo kupange umuamue, la vakuetu tu tangela kumuamue kosikola, kuenda omanu vakuavo.—Va Roma 1:14–16.
Una Kamuiwa Lovaso Ositu o Songuila Omanu Vaye
11. Ndomo Upostolo Petulu la Yuda va popia, Ndamupi vamue va likongalaile lekongelo Liakristão va lekasaile ekambo liekolelo?
11 Ekolelo, li pondola oku tu kuatisa oku limbuka Yehova nda una okuti eye o kasi loku songuila ocisoko caye ca palo posi. Omo liaco, tu yuvuli oku kuata ocituwa coku sokola vana va tambula omoko yoku songola vekongelo. Upostolo Petulu la Yuda manji ya Yesu, va lungula vamanji vamue ka va kuatele ekolelo, okuti va enda loku sepula alume vana va tambuile omoko yoku songuila Akristão. (2 Petulu 2:9–12; Yuda 8) Anga hẽ omanu vaco ava vakuakusepula nda va vangula ndoco nda okuti va kale kovaso ya Yehova kuenda nda ovo va ponduile oku u mõla lovaso avo ositu? Sio nda ka va ci lingile. Omo okuti Suku ka muiwa lovaso ositu, omanu vaco ava vakuetimba liositu, ka va ponduile oku limbuka okuti va kuete ocikele kovaso aye.
12. Ocituwa cipi tu sukila oku lekisa ku vana va tambula omoko yoku songola vekongelo?
12 Ocili okuti, ekongelo Liakristão lia tungiwa lomanu ka valipuile. Akulu vekongelo olonjanja vimue va siatavo oku lueya, kuenje pamue ci tu sumuisa calua. Ndaño ovo ka valipuile, Yehova handi wa va nõla ndangombo vocunda caye. (1 Petulu 5:1, 2) Alume lakãi okuti vakuespiritu, va limbuka okuti eyi oyo onjila Yehova a nõlapo oco a songuile omanu vaye. Handi vali, etu Tuakristão, tu yuvula ovituwa ndeci, oku sokola vakuetu tu fendela lavo kumuamue, oku liyeya, kuenda tu lekisa esumbilo keliangiliyo liuviali wa Suku. Nda tua pokola kasongui vosi va kasi pokati ketu, tu lekisa okuti tu lete Una ka muiwa lovaso ositu. —Va heveru 13:17.
Oku Limbuka Suku Ndulongisi Wetu Wavelapo
13, 14. Oku tenda Yehova Ndulongisi Wavelapo ci lomboloka nye kokuove?
13 Kuli vali handi onepa yikuavo yi sukila oku kuata elomboloko kespiritu. Isaya wa popele hati: “Ovaso ene a[ka] mõla alongisi vene.” (Isaya 30:20) Ci sukila oku kuata ekolelo liocili oco tu limbuke okuti, Yehova eye o kasi loku tu longisa lekuatiso liocisoko caye ca palo posi. (Mateo 24:45–47) Oco tu limbuke Suku Ndulongisi wetu Wavelapo, mua kongela calua okuti, etu Tuakristão ka tu sukila lika oku kuata ocituwa coku tanga Embimbiliya eteke leteke, kuenda oku enda enda kolohongele vietu viekongelo olonjanja viosi. Eci ci lomboloka okuti, tu sukila okupa esilivilo kokulia kuespiritu Suku a siata oku tu angiliyila oco ku tu kuatise. Ndeci, tu sukila oku lavulula lutate kolonumbi Yehova a siata oku tu iha vonduko ya Yesu oco ka tuka hongue kespiritu.—Va Heveru 2:1.
14 Olonjanja vimue, tu sukila oku likolisilako calua oco tupe esilivilo liocili kokulia kuespiritu. Ndeci, pamue tu kuata ocituwa coku tanga ño lonjanga asapulo amue Embimbiliya okuti, ana tu sima okuti a tila oku kuata elomboloko liwa. Eci tu tanga Utala Wondavululi lo Despertai!, pamue tu siako ovipama vimue kuenje tu sima okuti, ka vi tu kuatisa. Ale pamue handi, eci tu enda kolohongele vietu Tuakristão ka tu yevelela lutate. Pole, tu pondola oku lavulula, nda utima wetu tua u kapa muẽle katosi a kasi oku lomboluiwa vohongele. Onjongole yetu yocili tu lekisa kueci tu longisiwa kespiritu, oyo uvangi u lekisa okuti, ca tu lomboloka muẽle okuti Yehova eye muẽle Ulongisi wetu Wavelapo.
Tuka Sombisiwa la Suku
15. Nye vamue va siata oku linga loku sima okuti, ka va letiwe la Yehova?
15 Omo okuti kulo “kotembo yesulilo” eviho lia livokiya calua, oku kolela muẽle Una ka muiwa lovaso ositu, ci kuete esilivilo liocili. (Daniele 12:4) Ekambo liesunguluko, kuenda ukahonga via livokiya calua. Omo liaco, ciwa oku ivaluka okuti, Yehova o lete cosi tu linga ndaño muẽle cina tu lingila vuyombeki okuti omanu ka va pondola oku ci mõla. Vamue ka va siatele oku ivaluka ondaka yaco eyi. Eci va limbuka okuti, lomue o va lete, va fetika oku linga cina ci pisiwa Lembimbiliya. Ndeci, vamue ka va siatele oku tamalãla koku tala ovitalukilo vina vi koka ohele, loku talavo omanu va kasi epolõla vo Internet lo vo televisãu, kuenda ovitalukilo vikuavo via siata calua koloneke vilo. Omo okuti ovitalukilo viaco vi taliwila pokolika, vamue va siata oku sima hati, ovilinga viavo ka vi letiwe la Yehova.
16. Nye ci pondola oku tu kuatisa oco tu pokole kolonumbi via velapo via Yehova?
16 Ciwa okuti, tu ivaluka Olondaka viupostolo Paulu wa popia hati: “Etu vosi, omunu [l]omunu o[ka] lilombolola ku Suku.” (Va Roma 14:12) Tu sukila oku kuliha okuti, onjanja yosi tu linga ekandu, tu kasi oku lueyela. Oku kuliha ondaka eyi, ci kuete oku tu kuatisa oco tu pokole kolonumbi viaye, kuenda oku yuvula eci civi. Embimbiliya li tu ivaluisa hati: “Ku Suku ka kuli ociluvo ca salamisua, kovaso [a una] o laika oku tu tetuluila.” (Va Heveru 4:13) Ocili muẽle, tuka sombisiwa la Suku, pole, ocisola calua tu kuetele Yehova oco ci tu vetiya oku linga ocipango caye poku pokola kolonumbi viaye viesunga. Omo liaco, tu lunguki leci catiamẽla koku nõla ovitalukilo, kuenda oku lekisa esumbilo kovituwa vietu lavamanjetu alume kuenda akãi.
17. Yehova o tu lete Lonjongole ye?
17 Yehova wa tu kapako calua, pele eci ka ci Lomboloka okuti eye o kevelela okuti tu u lueyela oco a tu pise. Puãi, eye o tu lete locisola, kuenda o kasi nda isia o yongola oku eca onima komõla waye ukuepokolo. Helembelekokuolio tu tambula omo tua kuliha okuti, Isietu wokilu o sanjukila ekolelo tu u kuetele, kuenda “eca onima kuava vo sanda”! (Va Heveru 11:6) Tu lekisi ekolelo lietu ku Yehova, kuenda tu u vumbi ‘lutima wetu wosi.’ —1 Asapulo 28:9.
18. Omo okuti Yehova o tu lete kuenda wa kuliha ciwa ovilinga vietu viekolelo, ohuminyo yipi ya suapo tu tambula Vembimbiliya?
18 Elivulu Liolosapo 15:3 li lombolola okuti: “Ovaso a Yehova a lete kuosi, a lavulula olondingaivi lolondingesunga.” Ocili okuti, Yehova o lete omanu vãvi kuenda o tala ndomo ovituwa viavo vi kasi. Pole, nda tu ka pokati ‘kavakuesunga,’ tu kuete oku kapelako okuti, Yehova wa kuliha ciwa ovilinga vietu viekolelo. Ekolelo lietu li pamisa vali calua eci tu limbuka okuti, ‘upange wetu ka u lingi wolivova omo tua kuliha okuti, tu kasi vu Ñala,’ kuenje una kamuiwa lovaso etu ositu kaka ‘ivalako upange tuolingila vonduko yaye.’—1 Va Korindo 15:58; Va Heveru 6:10.
Tu Pingi ku Yehova Oco a tu Kulihise
19. Ekuatiso lipi li tunda kekolelo lia pama cocili ku Yehova?
19 Omo okuti tulonalavayi via Yehova via koleliwa, tu soliwe calua laye. (Mateo 10:29–31) Ndaño okuti eye ka muiwa lovaso ositu, eye ci tava okuti o kala muẽle omunu wocili kokuetu, kuenda tu pondola oku sola calua ukamba wetu laye. Nda tua lekisa ocituwa caco eci ku Isietu wokilu tuka kuatisiwa cocili. Ekolelo lietu lia pama li tu kuatisa oku kuata utima wa yela kuenda oku lekisa utima wa sunguluka kovaso a Yehova. Ekolelo lina okuti ka mua kongeliwile ombambe, li tu kuatisa oco tu yuvule oku ambata olonjila vivali, okuti (okulu voluali, okulu vocisoko ca Yehova). (1 Timoteo 1:5, 19) Omo liekolelo lietu lia pama tu kuetele Suku, tu lekisa ongangu yiwa, kuenda tu pondola oku vetiya vakuetu va tu ñuala. (1 Timoteo 4:12) Handi vali, ekolelo liaco eli li vetiya oku kuata ovituwa via sunguluka, vina vi sanjuisa utima wa Yehova.—Olosapo 27:11.
20, 21. (a) Momo lie ca sunguluka okuti, tu konomuisiwa la Yehova? (b) Ndamupi tu pondola oku kuama olondaka Viosamo 139:23, 24?
20 Nda tua kuata olondunge, tuka eca olopandu ku Yehova omo a tu lavulula. Etu ka tu yongola lika okuti eye o tu lavulula, pole tu yongolavo okuti, o kulihisa lutate ovisimilo vietu kuenda ovilinga vietu. Vohutililo, tu linga ciwa okuti, tu pinga Yehova okuti o tu kulihisa lutate oco a tale nda tu kuete handi ovisimilo vimue ka via sungulukile. Tua kuliha okuti, eye o pondola oku tu kuatisa oco tu linge apongoloko osi a sukiliwa. Omo liaco, ca sunguluka eci ukualosamo Daviti a imba ocisungo hati: “Ñulihise, a Suku. Kuliha utima wange. Seteke. Kuliha ovisimilo viange, hu vanji nda ñasi lovituwa vieviho. Songuile vonjila ka yi pui.”—Osamo 139:23, 24.
21 Daviti wa pinga ku Yehova oco o kulihise ciwa kuenda oco a tale nda o kuete ‘ovituwa vieviho.’ Ndeci ukualosamo a linga, etu hẽ ka tu yongolavo okuti, Suku o kulihisa ovitima vietu oco a tale nda tu kuete ovisimilo vimue ka via sungulukile? Omo liaco, lekolelo liocili, tu pingi ku Yehova oco a tu kulihise. Oco hẽ, nye tu pondola oku linga nda tu kasi loku li yaka lovisimilo vimue ka via sungulukile, ale ovina vimue vivi vi kasi loku tu sakalaisa? Tulikutilili olonjanja viosi lutima wetu wosi ku Yehova Suku yetu ukuacisola, kuenje, lumbombe wocili, tu tavi oku songuiwa lespiritu sandu liaye, kuenda tu pokoli kelungulo Liondaka yaye. Tu pondola oku kolela okuti, eye oka tu kolisa, kuenda oka tu kuatisa oco tu kuame onjila yi tuala komuenyo wenda ño hu.—Osamo 40:11–13.
22. Onjila yipi tu kuete oku nõlapo kueci catiamẽla ku Una ka muiwa lovaso etu ositu?
22 Ocili okuti, Yehova oka tu sumuluisa lomuenyo wenda ño hu nda tua pokola muẽle kolonumbi viaye. Pole, tu sukila oku limbuka unene waye, ndeci upostolo Paulu a linga eci a soneha hati: “Ku soma yonahululua, haeye ka fi, haeye ka muiwa muiwa, haeye lika Suku, ku kale esumbilo lulamba toke koloneke vi enda ño–o hu ka vi pui. Amene.” (1 Timoteo 1:17) Olonjanja viosi, tu lekisi esumbilo liaco eli liocili ku Yehova. Ndaño kueya ovitangi, lalimue eteke ka tuka kuati atatahãi, puãi tu nõlipo muẽle onjila yoku amamako ndu okuti tu lete Una ka muiwa lovaso etu ositu.
O Tambulula hẽ Ndati?
• Ci tava hẽ ndati okuti omanu vakuetimba liositu va mola Suku?
• Nda tua kolela okuti Yehova okasiko muẽle, nye tuka linga eci tu suvukiwa?
• Oku mõla Yehova ndulongisi wetu Wavelapo ci lomboloka nye?
• Momo lie tu yonguila okuti Yehova o kulihisa ovituwa vietu?
[Elitalatu kemela 14]
Mose, ka kuatele usumba wonyeño ya Fareo, puãi wa linga muẽle ndu okuti o lete Yehova Suku, una ka muiwa lovaso ositu
[Elitalatu kemela 17]
Lalimue Eteke ka tuka lingi Cimue loku sima okuti Suku ka tu lete
[Elitalatu kemela 19]
Lepandi liocili, tu sandiliya ukulihiso wa Suku, momo tuotenda Ndulongisi wetu Wavelapo