Amamako Loku Vumba Yehova Lutima Wove Wosi
“Utima wange wa [pama], a Suku, utima wange wa [pama] muẽle.”—OSAMO 57:7.
1. Momo lie tu sesamẽlela oku kuata ekolelo ndeli lia Daviti?
YEHOVA o pondola oku tu kuatisa oco tu linge Akristão va pama kekolelo poku kala olondingupange viaye via litumbika. (Va Roma 14:4) Pole, tu pondola oku kuata ovisimĩlo ndevi viukualosamo Daviti una wa vetiyiwa oku imba ocisungo hati: “Utima wange wa [pama], a Suku.” (Osamo 108:1) Nda tua pamisa utima wetu, tuka vetiyiwa oku suisapo ocikele cetu coku litumbika ku Suku. Nda tua sandiliya ekuatiso liaye oco a tu songuile kuenda oco a pamise ovitima vietu, cika tu kuatisa oku nõlapo onjila ya sunguluka. Kuenje, ‘olonjanja viosi tuka kuatela ombili upange wa Ñala.’—1 Va Korindo 15:58.
2, 3. Elungulo upostolo Paulu a eca kelivulu lia 1 Va Korindo 16:13, li kuete esilivilo lipi?
2 Elungulo lia tumiwa kolondonge via Yesu ko Korindo yosimbu, li kuetevo esilivilo liocili Kakristão vo koloneke vilo. Omo liaco, upostolo Paulu wa popia hati: “Lavululi. Tuameli vetavo. Kuati utõi [kuenda] kolisiko.” (1 Va Korindo 16:13) Kelimi lio Helasi, olondaka viaco evi vi lomboloka ekisika lia cimue ci kasi loku lingiwa cilo. Oco hẽ elungulo eli li kuete esilivilo lie?
3 Tu pondola oku ‘lavulula’ kespiritu poku tila Eliapu okuti tu kuata ukamba wocili la Suku. (Tiago 4:7, 8) Oku lekisa Ekolelo ku Yehova, ku tu kuatisa oco ukamba wetu laye wamameko, okuti tu ‘kuata utõi lekolelo liocili.’ Vosi yetu oku kongelamo akãi valua va sangiwa pokati ketu, tu ‘kuati utõi’ poku vumba Suku lepandi liocili, momo tuakundi Vusoma. (Osamo 68:11) Etu tu lekisa ‘utõi wocili’ poku amamako loku kolela Isietu wokilu oco a tu ĩhe ongusu yoku tẽlisa ocipango caye.—Va Filipoi 4:13.
4. Nye ci tu tuala kepapatiso oco tu linge Akristão?
4 Tu lekisa okuti tua tava kekolelo liocili, eci tu litumbika ku Yehova lutima wetu wosi poku papatisiwa vovava. Oco hẽ nye ci tu kuatisa oco tu papatisiwe? Tete, tu sukila oku kuata ukũlĩhĩso wa suapo Wondaka ya Suku. (Yoano 17:3) Eci ci tu kuatisa kekolelo lietu, okuti tu vetiyiwa oco tu likekembele akandu etu, poku lekisa esumuo liocili omo lieci cĩvi tua linga kosimbu. (Ovilinga 3:19; Va Heveru 11:6) Noke yepongoloko tua linga, tu liwekapo oku linga cosi cĩvi oco tu tẽlise lika ocipango ca Suku komuenyo wetu. (Va Roma 12:2; Va Efeso 4:23, 24) Eci oco ci lingiwa poku litumbika lutima wosi ku Yehova lekuatiso liohutililo. (Mateo 16:24; 1 Petulu 2:21) Etu tua pinga ku Suku oco tu kuate ovisimĩlo viwa, kuenje oku papatisiwa kuetu, owo uvangi u lekisa okuti tua litumbika ku Yehova. (1 Petulu 3:21) Nda tu ivaluka alianga aco, cika tu kuatisa oco tu kuame lika onjila yina yi litava lelitumbiko lietu. Kuenje, eci cika tu kuatisa oku vumba Yehova lutima wetu wosi.
Amamako Loku Sandiliya Ukũlĩhĩso Wocili
5. Momo lie tu sukilila oku amamako loku kuata ukũlĩhĩso Wembimbiliya?
5 Oco tuambate omuenyo umue u litava lelitumbiko lietu, tu sukila oku amamako oku kuata ukũlĩhĩso Wembimbiliya oco tu pame kekolelo. Eci tua fetika oku kuata elomboloko liocili ci sangiwa Vondaka ya Suku poku tambula okulia kuespiritu, tua sanjukile calua. (Mateo 24:45-47) Tua solele calua ‘okulia’ kuaco, kuenda tua endaenda oku litekula ciwa kespiritu. Cilo, tu sukila oku amamako loku tambula okulia kuaco kuespiritu, oco tu pamise utima wetu momo tumanu va Yehova va litumbika kokuaye.
6. Ndamupi ove wa kuatisiwa oco o kuate ombili yocili Cembimbiliya?
6 Tu sukila oku likolisilako calua oco tu kuate ukũlĩhĩso wasuapo Wembimbiliya. Ukũlĩhĩso waco, u sokisiwa lukuasi umue wa selekiwa okuti tu sukila oku likolisilako oco tu u sange. Hanimakuoyo tu pondola oku tambula nda tua sanga ‘ukũlĩhĩso waco wa Suku’! (Olosapo 2:1-6) Eci umue ukundi Wusoma a lilongisa love Embimbiliya onjanja yatete, pamue wa lilongisa laye elivulu Ukũlĩhĩso Utuala Komuenyo Ko Pui. Ci tava okuti, wa pita otembo yimue loku lilongisa laye oco a tẽlise olonepa vimue viocipama, ale ocipama caco cosi. Wa tambula ekuatiso liocili eci ovinimbu Viembimbiliya via tangiwa kuenda via lomboluiwa. Nda etosi limue ka lia ku lombolokele, ulongisi wove wa enda loku ku li situluila ciwa. Manji una waku longisa Embimbiliya, wa enda loku pinga ekuatiso liespiritu lia Suku oco a liangiliye ciwa. Omo liaco, eye wa ku kuatisa calua oco ece olopandu lutima wove wosi omo liocili wa lilongisa.
7. Nye ci kuatisa omunu oco a loñolohe koku longisa vakuavo ocili condaka ya Suku?
7 Oku likolisilako kuaco, kua sungulukile calua kupostolo Paulu una wa soneha hati: “U wa longisiwa ondaka, ovina viosi viwa a tepeleko u o longisa.” (Va Galatia 6:6) Palo, ondaka yo Helasi yi lekisa okuti, Ondaka ya Suku, va enda loku yi kapa kovitima via una wa “longisiwa ondaka.” Ove nda wa kuamavo onjila eyi, oka loñoloha calua, kuenda oka tẽlavo oku longisa vakuene. (Ovilinga 18:25) Oco ove ambate omuenyo umue u litava lelitumbiko liove, o sukila oku kuata uhayele wocili kespiritu oco o pame ciwa osimbu amamako loku lilongisa Ondaka ya Suku.—1 Timoteo 4:13; Tito 1:13; 2:2.
Ivaluka Oku Likekembela Kuove Kuenda Epongoloko Liove
8. Ndamupi omunu a pondola oku amamako loku lekisa ovituwa viwa?
8 Ove hẽ ivaluka ekavuluko wa kuata eci wa fetika oku lilongisa ocili poku likekembela akandu ove? Anga hẽ wa limbuka ongecelo ya Suku yatiamẽla koku kolela ku Yesu onjovoli? (Osamo 32:1-5; Va Roma 5:8; 1 Petulu 3:18) Ocili okuti, ove ku yongola oku tiukila vali komuenyo una woku linga vali akandu. (2 Petulu 2:20-22) Oco o tambule ekuatiso liocili, o sukila oku likutilila ku Yehova olonjanja viosi momo cika ku kuatisa oku amamako loku lekisa ovituwa viwa. Handi vali, cika ku kuatisavo oku ambata omuenyo umue u litava lelitumbiko liove, oco o vumbe Yehova lutima wove wosi.—2 Petulu 3:11, 12.
9. Nda tua siapo ovituwa vina vi tuala kekandu, onjila yipi tu sukila oku kuama?
9 Eci ove wa nõlapo onjila yoku pongoloka, wa siapo ovilinga viosi vi tuala kekandu, kuenje, wa fetika oku sandiliya ekuatiso lia Suku oco a pamise utima wove. Ocili okuti, ove wa kuamele onjila yina yi tuala kenyolẽho, pole noke weya oku sandiliya onjila yikuavo ya sunguluka. Vonjila yaco eyi kuka yapukemo vali. Sandiliya oku songuiwa la Suku, kuenda amamako loku endela vonjila yi tuala komuenyo.—Isaya 30:20, 21; Mateo 7:13, 14.
Kuka Ivaleko Elitumbiko Lepapatiso Liove
10. Atosi api tu sukila oku ivaluka kueci catiamẽla koku litumbika kuetu ku Suku?
10 Ivaluka okuti, ove wa litumbika ku Yehova lekuatiso liohutililo. Pole wa ci lingila oco o litumbike lekolelo kupange waye otembo yenda hũ. (Yuda 20, 21) Oku litumbika, ci lomboloka oku linga upange umue wa litepa haiwo u kuete esilivilo limue li kola. (Ovisila 15:31; 22:2) Oku litumbika kuove ka kuka kale ndundalatu wotembo yimue ño, kuenda ka kuka tendiwe ndupange umue u kisikiwa lomanu. Oku litumbika kuetu ku Suku Wavelapo Voluali Luosi, te ku kala otembo ka yi pui, kuenda tu sukila oku kolela ku Suku ukuamuenyo. Cikale okuti tu ‘kala lomuenyo ale tufa, tuatiamẽla ku Yehova.’ (Va Roma 14:7, 8) Esanju lietu li tunda lika koku pokola kuetu kocipango caye, poku amamako loku vumba kokuaye lutima wetu wosi.
11. Momo lie ci kuetele esilivilo oku ivaluka epapatiso liove?
11 Olonjanja viosi ivaluka epapatiso liove momo olio uvangi u lekisa okuti wa litumbika ku Suku lutima wove wosi. Lomue wa kusindiliya oco o papatisiwe, pole ove muẽle wa nõlapo oku kuama onjila yaco. Cilo hẽ, wa nõlapo lika oku linga cina ci litava locipango ca Suku komuenyo wove wosi? Ove wa pinga ku Suku oco o kuate ovisimĩlo vina via sunguluka kuenda wa papatisiwa oco o litumbike kokuaye. Lava ciwa ovituwa viove viwa omo lielitumbiko liove, momo nda wa ci linga, oka tambula asumũlũho alua ku Yehova.—Olosapo 10:22.
Onjongole Yove yi Kuete Esilivilo Liocili
12, 13. Ndamupi onjongole yetu muẽle yi pondola oku tu tuala koku litumbika kuenda kepapatiso?
12 Oku litumbika loku papatisiwa, kua siata oku nenela asumũlũho alua kolohuluwa viomanu voluali luosi. Eci tu litumbika ku Suku poku papatisiwa vovava, tufa kovituwa vietu viosi vĩvi tua linga kosimbu, pole handi tu pondola oku kuata ovisimĩlo vĩvi. Osimbu tuamamako loku tava kueci tu kasi oku lilongisa, tu fetika oku kuata onjongole yeci tu litumbikila ku Suku vohutililo oco tu papatisiwe. Poku tumbika omuenyo wetu ku Suku oco tu papatisiwe, tu sukila oku nõlapo oku linga ocipango ca Suku okuti oco lika tu kuama. (Va Efeso 5:17) Tu kuami ongangu ya Yesu una wa siapo umesele waye woku panga olomangu kuenda ovikuata vikuavo, noke weya oku papatisiwa, kuenda, wa linga lika ocipango ca Isiaye o kasi kilu.—Osamo 40:7, 8; Yoano 6:38-40.
13 Yehova wa yonguile okuti, Omõlaye o ‘tuvika akandu omanu.’ Yesu wa tẽlisa ocipango caco poku tala ohali yalua lekolelo liocili. Noke, weya oku ‘likutilila calua kumue loku loluila asuẽlela ku isiaye wa tẽla oku u popela kolofa, kuenje weya oku yeviwa omo liesumbilo a lekisile ku Suku.’ (Va Heveru 2:10, 18; 5:7, 8) Nda tua lekisavo esumbilo limuamue ku Suku, ci tava okuti tu ‘yeviwavo’ laye. Handi vali, tu pondolavo oku kolela oco Yehova a tu kuatise momo Tulombangi viaye via litumbika.—Isaya 43:10.
Ci Tava Oku Kuata Utima Umue wa Pama
14. Momo lie tu sukilila oku tanga Embimbiliya oloneke viosi?
14 Nye cika ku kuatisa koku amamako loku pamisa utima wove oco ambate omuenyo umue u litava lelitumbiko liove ku Suku? Oco o kuate ukũlĩhĩso wa suapo Wondaka ya Suku, tanga Embimbiliya oloneke viosi. Elungulo eli olio “ukuenje wa kolelua haeye wa lunguka” a siata oku tu ĩha olonjanja viosi. Tu tambula elungulo eli, momo nda tu yongola oku ambata omuenyo umue u litava lelitumbiko lietu, tu sukila oku endela vonjila ya Suku. Nda okuti ocisoko ca Yehova ca longisile ondotilina yuhembi, Olombangi via Yehova nda ka vi vetiyiwa oku tanga Embimbiliya oloneke viosi, kuenda nda ka vi vetiyavo oku tanga Embimbiliya la vana ovo va kundila.
15. (a) Poku nõla onjila tu yongola oku kuama, nye tu sukila oku konomuisa lutate wocili? (b) Momo lie ci popiwila okuti Akristão ka va pitisa kovaso upange woku sanda eteku?
15 Oco o nõle onjila o yongola oku kuama, o sukila oku konomuisa nda onjila yaco yi litava lelitumbiko liove ku Yehova. Oku nõla kuaco ci tava okuti ku tiamisiwila kupange oku o talavaya. Anga hẽ o likolisilako oku nõla onjila yu ku kuatisa oco amameko kefendelo liocili? Pamue vacime va limbuka okuti Akristão va litumbika va pokola loku tẽlisa ciwa ovikele viavo viupange. Handi vali, ovo va limbukavo okuti Olombangi via Yehova via litumbika, ka vi kuete ocipululu oco va kemãle voluali kuenda ka vi yongola oku livelisapo pokati ka vakuavo omo ño va kasi pomangu ya velapo kupange oku va talavaya. Eli olio esunga lieci Olombangi via Yehova ka vi pitisila kovaso ovokuasi, ekemãlo, epandiyo kuenda ovonene. Ocili okuti, omanu vosi vambata omuenyo una u litava lelitumbiko liavo ku Suku, ca velapo okuti va linga ocipango Caye. Upange ovo va linga u va kuatisa oco va sange eci va sukila komuenyo wavo, pole hawoko va pitisa kovaso. Upostolo Paulu wa lekisa ongangu yiwa poku pitisa kovaso upange woku kunda. (Ovilinga 18:3, 4; 2 Va Tesalonike 3:7, 8; 1 Timoteo 5:8) Ove hẽ wa pitisavo kovaso upange woku kunda Usoma?—Mateo 6:25-33.
16. Nye tu pondola oku linga nda tua sangiwa lasakalalo ana a tu tateka oku ambata omuenyo umue u litava lelitumbiko lietu ku Suku?
16 Kuli vamue okuti, eci handi ka va fetikile oku lilongisa ocili, va kuatele asakalalo alua komuenyo wavo. Pole, eci va fetika oku lilongisa eci catiamẽla kelavoko liusoma, va kuata esanju liocili, kuenda va lekisavo ocisola ku Suku. Sokolola asumũlũho ovo va siata oku tambula tunde eci va fetika oku kuatisiwa oco vambate omuenyo umue u litava lelitumbiko liavo ku Yehova. Ci lingiwa hẽ ndati nda ovitangi via siata komuenyo weteke leteke voluali lulo vi tateka “Ondaka ya Suku,” ndeci ci kasi olosongo vi totomisa ocikũla oco ka cika ime apako? (Luka 8:7, 11, 14; Mateo 13:22; Marko 4:18, 19) Nda wa limbuka okuti ovitangi viaco via fetika oku pita love ale lepata liove, pinga ekuatiso ku Yehova oco a ku kuatise okuti ocisola cove ci livokiya. Nda ovitangi viove viosi wa vieca ku Yehova, eye oka ku ĩha ongusu yoku u vumba lesanju liocili kuenda lutima umue wa pama.—Osamo 55:22; Va Filipoi 4:6, 7; Esituluilo 2:4.
17. Ndamupi tu pondola oku yula ovitangi?
17 Likutilila ku Yehova Suku olonjanja viosi ndeci wa linga eci wa litumbika kokuaye. (Osamo 65:2) Nda wa yonjiwila koku linga eci cĩvi ale pamue o liyaka lovitangi, sandiliya ekuatiso liolonumbi via Suku kuenda pokola kokuavio. Ivaluka eci catiamẽla kekambo liekolelo ndomo ondonge Tiago a soneha hati: “Nda umue pokati kene wa kamba olondunge a pinge ku Suku, u ecaeca komanu vosi ocali, halocikundoko, kuenje vi eciwa kokuaye. Puãi a pinge lekolelo, oku tatãla hakoko, momo u o tatãla wa soka ndapuku okalunga a pungua lofela, hao a pekuiwa. Omunu waco ka ka kolele okuti, omunu ukuavitima vivali, haeye ukuakutatayala volonjila viaye viosi, o tambula cimue ku Ñala [Yehova].” (Tiago 1:5-8) Nda tua sangiwa lovitangi, tu pondola oku kolela kuvangi Wembimbiliya u popia hati: “Lalimue eyonjo liosangi, te eli lia siata pokati komanu. Suku wa kolelua, kuenje ka tava okuti wu yonjiwa te leli wu tẽla, puãi kumuamue leyonjo u muisivo evelo lioku puluka okuti vu soka lalio.”—1 Va Korindo 10:13.
18. Nye tu pondola oku linga nda tua wila vekandu limue li tateka oku ambata omuenyo umue u litava lelitumbiko lietu ku Yehova?
18 Nye ci lingiwa nda ekandu limue li sakalaisa ovisimĩlo viove kuenda ku yongola vali oku ambata omuenyo umue u litava lelitumbiko liove ku Suku? Nda wa likekembela, o pondola oku tambula elembeleko lelavoko liokuti, Yehova kaka ivalako ‘utima womunu wa teka.’ (Osamo 51:17) Sandiliya ekuatiso Liakulu vekongelo vana va kuãi ongangu ya Yehova, momo ka vaka lekisa owesi konjongole yove yoku kuata vali ukamba wocili la Isietu wokilu. (Osamo 103:10-14; Tiago 5:13-15) Omo liaco, nda weya oku pamisa vali ekalo liove kespiritu, oka pengulula onjila yove, kuenda oka tẽla oku ambata omuenyo umue u litava lelitumbiko liove ku Suku.—Va Heveru 12:12, 13.
Amamako Loku Vumba Yehova Lutima Wapama
19, 20. Momo lie ci kuetele esilivilo okuti tuambata omuenyo umue u litava lelitumbiko lietu ku Suku?
19 Koloneke vilo vieyuka to ovitangi, tu sukila oku likolisilako calua oco tuambate omuenyo umue u litava lelitumbiko lietu okuti tu tẽla oku vumba Suku lutima umue wa pama. Yesu wa popia hati: “Puãi, u o pandakaisa toke kesulilo, eye o[ka] popeliwa.” (Mateo 24:13) Omo okuti tu kasi “koloneke via sulako” violuali lulo, esulilo li pondola okuiya votembo yimue ka ya kũlĩhĩwile. (2 Timoteo 3:1) Lomue pokati ketu wa kũlĩha eci ci keya hẽla. (Tiago 4:13, 14) Koloneke vilo, ca velapo okuti tuambata omuenyo umue u litava lelitumbiko lietu..
20 Upostolo Petulu wa tukula olondaka evi vukanda waye wavali. Eye wa lombolola hati, ndeci olondingaĩvi via kunduiwa Letande kosimbu, haico cika pitavo lovisoko viosi viomanu va sangiwa voluali lulo, momo vaka kunduiwa ‘keteke lia Yehova.’ Upostolo Petulu wa popia hati: ‘Usesamẽli oku kolapo komuenyo wene okuti vu sumbila Suku.’ Eye wa lungulavo hati: “A vakuacisola, omo wa ci kũlĩhi ale osimbu ka ceyile handi, lunguki sanga wambatiwi lokulueya kua vakuakandu, kuenje vu lipumbisa epandi liene.” (2 Petulu 3:5-17) Ci sumuisa calua nda okuti omunu umue wa papatisiwa wa yapuisiwa, noke ofa, kuenje o linga nda una wa liwekapo oku amamako loku pamisa utima waye.
21, 22. Ndamupi olondaka vi sangiwa Vosamo 57:7 via eca ndati ku Daviti kuenda Kakristão vocili uvangi wocili?
21 Oku nõlapo kuove oku ambata omuenyo umue u litava lelitumbiko liove ku Suku, kuka pamisiwa lika nda wa ivaluka eteke wa papatisiwa poku sandiliya ekuatiso lia Suku oco o lekise ovituwa vina vi sanjuisa utima ya Yehova. (Olosapo 27:11) Omo okuti, Yehova lalimue eteke aka yanduluka omanu vaye, etu tu sukila oku kolelavo kokuaye. (Osamo 94:14) Eye wa lekisa ohenda ku Daviti poku tateka ovisimĩlo viovanyali vaye loku u yovola peka liavo. Omo liaco, Daviti wa eca olopandu viocili poku nõlapo oku lekisa ocisola cocili Konjovoli yaye. Lesanju liocili, eye wa imba ocisungo hati: “Utima wange wa [pama], a Suku, utima wange wa [pama] muẽle. Njimba. Njimba ovisungo viesivayo.”—Osamo 57:7.
22 Ndeci Daviti a linga, haicovo Akristão vocili va siata oku linga, momo ka va tatãla oku litumbika kuavo ku Suku. Lutima wa pama, va situlula eci catiamẽla keyovo liavo, momo va kolela Yehova upopeli wavo una va sanjukila lovisungo viesivayo. Nda wa pamisa utima wove, oka kolela lika ku Yehova, kuenda lekuatiso liaye oka tẽla oku suisapo cosi catiamẽla kelitumbiko liove. Ocili okuti, ove o pondola oku sokisiwa ‘londingesunga’ yina ukualosamo a tukula poku imbila ocisungo hati: ‘Kaka kala lohele yolondaka viesumuo. Utima waye wa kolapo loku kolela Yehova.’ (Osamo 112:6, 7) Nda wa lekisa ekolelo liocili ku Suku, oka tẽla oku ambata omuenyo umue u litava lelitumbiko liove. Omo liaco, amamako loku vumba Yehova lutima wove wosi.
Ocivaluka?
• Momo lie tu sukilila oku amamako loku lilongisa Embimbiliya oco tu kuate ukũlĩhĩso wa suapo?
• Momo lie tu sukilila oku ivaluka elikekembelo lietu kuenda epongoloko tua linga?
• Ndamupi tu kuatisiwa poku ivaluka elitumbiko kuenda epapatiso lietu?
• Nye cika tu kuatisa oco tuamameko loku vumba Yehova lutima wetu wosi?
[Elitalatu kemẽla 28]
Ove hẽ wa siata oku tata ciwa uhayele wove kespiritu poku lilongisa Ondaka ya Suku oloneke viosi?
[Elitalatu kemẽla 28]
Oku pitisa kovaso upange wetu woku kunda ci tu kuatisa oku vumba Yehova lutima wetu wosi