Kuata Esanju li Tunda Koku Eca!
“Esumuluho li tunda koku eca olio lia lua, eli li tunda koku tambula li sule.”—OVILINGA 20:35.
1. Ndamupi Yehova a siata oku lekisa esanju litunda koku eca?
ESANJU lioku kuliha ocili, kuenda asumuluho eyililako, viosi evi olombanjale vi tunda ku Suku. Omanu vosi veya oku kuliha Yehova, va kuete esunga lioku sanjuka. Pole,ndaño okuti kuli esanju koku tambula ombanjaile yimue, kulivo esanju koku eca. Yehova eye Ukuakueca “ocali cosi ciwa longavelo yosi ya kanguka,” kuenda eye, eye “Suku yesumuluho.” (Tiago 1:17; 1 Timoteo 1:11) Eye eca elongiso limue lialipua komanu vosi va yongola oku u yevelela kuenda o sanjuka eci ovo va pokola kueci eye a va longisa, ndeci olonjali vi sanjukavo eci omãla vavo va pokola kelongiso lieciwa locisola.—Olosapo 27:11.
2. (a) Nye Yesu a popia kueci catiamẽla koku eca? (b) Esanju lipi tu pondola oku kuata eci tu longisa vakuetu ocili Cembimbiliya?
2 Cimuamue haico okuti, eci Yesu a kala palo posi, wa sanjukile calua loku mõla omanu va kala loku tava ciwa kovina a va longisa. Ndomo upostolo Paulu a ci lombolola Yesu wa popia hati: “Esumuluho li tunda koku tambula li sule.” (Ovilinga 20:35) Esanju tu kuata eci tu longisa vakuetu ocili Cembimbiliya, halinako ño lioku sanjuka omo umue a tava ketavo lietu. Cimue tu sanjukila vali enene, oku kuliha okuti, tua longisa ocina cimue cocili haico ci kuete esilivilo lienda ño hu. Poku longisa cimue cesilivilo kespiritu, tu kuatisa omanu okupa esilivilo liocili koloneke vilo muẽle kuenda kotembo yenda ño hu.—1 Timoteo 4:8.
Oku Eca ku Nena Asumuluho
3. (a) Ndamupi Upostolo Paulu lupostolo Yoano va lekisa esanju liavo lioku kuatisa vakuavo kespiritu? (b) Momo lie oku longisa ocili Cembimbiliya komãla vetu oyo onjila yimue yoku lekisa ocisola kokuavo?
3 Ocili okuti, ndeci Yehova la Yesu va sanjukila oku eca olombanjaile viespiritu, cimuamue haicovo Akristão va kasi loku linga. Upostolo Paulu wa sanjukile omo lioku kuliha okuti, wa kuatisa vakuavo oku lingisa ocili Condaka ya Suku. Eye wa sonehelele kekongelo lia va Tesalonike hati: “Kovaso a Ñala yetu Yesu ketukuluko liaye, elavoko lietu nye, pamue esanju lietu, pamue ekolowa lietu lioku lipandiya? Siti ene? Momo ene vupandiyo lietu, haene vusanju lietu.” (1 Va Tesalonike 2:19, 20) Cimuamue haicovo okuti, upostolo Yoano, catiamẽla komãla vaye kespiritu wa soneha hati: “Kokuange ka kuli esanju lia velapo, okuti eli lioku yeva okuti omãla vange va kasi loku endaila vocili li sule.” (3 Yoano 4) Sokolola handi esanju li tunda koku longisa ocili komãla vetu muẽle oco va linge omãla vetu kespiritu! Oku tekula omãla loku ‘va longisa kuenda oku va pindisa lovilongua via Yehova,’ ocindekaise cocisola colonjali komãla vavo. (Va Efeso 6:4) Lonjila eyi, olonjali vi lekisa okuti via sakalala lekalo liwa lienda ño hu liomãla vavo. Eci omãla va pokola, olonjali ci va sanjuisa vali calua.
4. Ulandu upi u lekisa esnju litunda koku eca ovina viespiritu?
4 Manji Dell, o kuete omãla vatãlo, pole wa litumbika kupange wakundi votembo yosi. Eye wa popia hati: “Ndi pondola oku kuata elomboloko liwa liolondaka viupostolo Yoano, kuenda ngeca olopandu momo omãla vange vakuãla “va kasi loku endaila vocili.” Nda kuliha okuti ci nenela esumbilo kuenda ekemanyo ku Yehova eci epata liendela kumuamue vefendelo liocili. Omo liaco, ndi yeva esanju lia lua eci ndi limbuka asumuluho aye kalikolisilo ange oku longisa ocili komãla vange. Elavoko li sanjuisa lioku kala otembo yenda ño hu Vofeka Yelau palo posi kumue lepata liange li pamisa ekolelo liange, kuenda ci ndi vetiya oco ndi pandikise ndaño lovitangi vialua.” Ci sumuisa calua ceci okuti, umue omõla ufeko wa manji Dell, wa tundisiwa vekongelo omo a siapo onjila Yukristão. Pole, manji Dell, o likolisilako calua kovopange aye oco amameko locituwa ca sunguluka. Eye wa popiavo hati: “Ndi kuete elavoko liokuti, eteke limue omõla wange ufeko lumbombe wocili oka tiuka vali vocisoko ca Yehova. Pole, ngeca olopandu ku Suku omo okuti omãla vange vakuãla va kasi loku amamako koku vumba Yehova lekolelo liocili. Esanju ndi yevite olio lia linga ono yongusu yange.”—Nehemiya 8:10.
Vala Ukamba Umue Wenda ño hu
5. Osimbu tu lieca muẽle kupange woku longisa omanu oco va linge olondonge, oku kuliha nye ci tu iha esanju?
5 Yesu wa tuma olondonge viaye oku longisa omanu oco va linge Akristão, loku va longisa eci catiamẽla ku Yehova, kuenda kovihandeleko viaye. (Mateo 28:19, 20) Yehova kumue la Yesu locisola calua va siata oku kuatisa omanu oco va kulihe onjila yocili. Omo liaco, osimbu tu amamako loku lieca etu muẽle kupange woku longisa omanu oco va linge olondonge, tu kuata esanju lioku kuliha okuti tukuãi ongangu ya Yehova kuenda ya Yesu, ndeci Akristão vo kocita catete va lingavo. (1 Va Korindo 11:1) Eci tu kuata onepa kupange wa Suku Ukuonene wosi kumue Lomõla waye o soliwe calua, omuenyo wetu u kuata elomboloko liocili. Hesumuluhokuolio tu pondola oku kuata poku tendiwa nda umue ‘pokati kolondingupange’ via Suku! (1 Va Korindo 3:9) Ka ci tu nenela he? esanju oku kuliha okuti ovangelo va kuetevo onepa kupange owu woku kunda olondaka viwa?—Esituluilo 14:6, 7.
6. Osimbu tu amamako loku kuata onepa koku eca ovina viespiritu, velie vaka linga akamba vetu?
6 Ocili okuti, oku kuata onepa kupange owu woku eca cimue cespiritu, katu lingi ño lika olondingupange via Suku, puãi tu pondola oku kuata ukamba wocili laye. Omo liekolelo Avirahama a kuata, weya oku tukuiwa hati, ekamba lia Yehova. (Tiago 2:23) Osimbu tu amamako loku likolisilako loku tẽlisa ocipango ca Suku, tuka pondolavo oku lingavo akamba va Suku. Nda tua ci linga, tuka lingavo akamba va Yesu. Eye wa sapuila kolondonge viaye hati: “Siu tukuli vali [okuti w]akuenje, momo ukuenje ka kulihile eci ñala yaye a lingainga, puãi ndo tukuli [okuti] akamba, momo ndo sapuili ovina viosi nda yeva ku Tate.” (Yoano 15:15) Valua va sanjuka eci va tukuiwa okuti, akamba vomanu va kemãla, ale vava va kasi pomangu ya velapo, pole etu tu pondola oku tukuiwa ndakamba vomanu vavali vavelapo voluali luosi.
7. (a) Ndamupi ukãi umue a sanga ekamba liocili? (b) Ove hẽ o kuetevo ulandu umue ndowu?
7 Handi vali, eci tu kuatisa omanu oco va kulihe Suku, oco vaka lingavo akamba vetu, kuenje eci ci tu nenela esanju lia piãla. Joan, okuti o kasi kofeka yo Estodos Unidos, wa fetika oku lilongisa Embimbiliya lukãi umue o tukuiwa hati, Thelma. Ndaño okuti, epata lia Thelma ka lia solele okuti eye o lilongisa Embimbiliya, eye wa pandikisa, kuenje noke eci papita unyamo, weya oku papatisiwa. Joan wa soneha hati: “Ukamba wetu ka wa sulilile eci eye a papatisiwa, puãi, wu kasi muẽle loku amamako toke cilo kuenda tua tẽlisa ale ci soka 35 kanyamo. Tua siata oku endela kumuamue kupange woku kunda, kuenda kolohongele viofeka. Cilo, nda ilukila konjo yimue yokaliye yi kasi ocinãla ci soka 800 kolokilometulu loku eye a kasi. Pole, handi lopo, Thelma wa siata oku ndi tumisa ovilamo viocisola kumue lovikanda vi sanjuisa, loku ndi sapuila okuti, eye wa siata oku njivaluka locisola calua, kuenje, o pandula calua omo nda linga ekamba liaye, kuenda omo ndo longisa ocili Cembimbiliya. Ukamba tu li kuetele pokati owo esumuluho lioku likolisilako kuange koku u kuatisa oku lilongisa eci catiamẽla ku Yehova.”
8. Ovisimilo vipi via sunguluka vika tu kuatisa kupange wetu woku kunda?
8 Elavoko lioku sanga omunu umue o yongola oku lilongisa ocili, li tu kuatisa oku pandikisa ndaño okuti omanu valua tu vangula lavo va lekisa onjongole yitito, ale pamue ka va lekisa onjongole la yimue Kondaka ya Yehova. Ekambo lionjongole yomanu vaco ci tava okuti, li tu lingila ocitangi kekolelo lietu kuenda koku pandikisa kuetu. Pole, ocituwa cesunguluko cika tu kuatisa. Fausto wo kofeka yo Guatemala wa popia hati: “Eci ngeca uvangi ku vakuetu, ndi sokolola asumuluho eyililako nda omunu waco nda vangula laye weya oku linga manjange kespiritu. Ndi sima okuti, pokati komunu ndi kavangula lavo pamue umue oka tava kocili Condaka ya Suku. Ovisimilo viaco evi vi ndi kuatisa calua koku amamako loku eca uvangi kuenda vi ndi nenela esanju liocili.”
Tu Soleki Ukuasi Wetu Kilu
9. Nye Yesu a popia catiamẽla koku soleka ukuasi kilu, kuenda nye tu pondola oku lilongisa kondaka eyi?
9 Oku longisa omanu oco va linge olondonge, ci kale omãla vetu ale omanu vamue vakuavo, ka ca lelukile. Cambata otembo yalua, ci sukila epandi liocili, kuenda oku likolisilako calua. Ivaluka okuti, kuli omanu valua okuti ka va kavi koku talavaya calua oco va kuate ovokuasi alua, okuti ka wu va nenela esanju liocili, kuenda ka wamamako otembo yenda hu. Yesu wa sapuila olonjeveleli viaye hati, ca velapo oku talavayela ukuasi wespiritu. Eye wa popia hati: “Ko ka [soleki] ukuasi kilu lieve oku ombunji longuyu yi lia lia, haiko ovimunu vi tuiyila loku iva. Puãi [soleki] ukuasi kilu, oku ndaño ombunji, ndaño onguyu, ka yi li, haiko ovimunu ka vi tuiyila loku iva.” (Mateo 6:19, 20) Poku likolisilako loku litumbikila ovimãho viespiritu, okuti mua kongela oku kuata onepa kupange wa velapo woku longisa omanu oco va linge olondonge, tuka pondola oku kuata esanju lioku kuliha okuti, tu kasi loku linga ocipango ca Suku, kuenda eye oka tu iha onima. Upostolo Paulu wa soneha hati: “Suku hokuanyako okuti ivalako upange wene kuenda ocisola wa lekisi poku vumba olosandu vonduko yaye.”—Va Heveru 6:10.
10. (a) Momo lie Yesu a kuatelele ukuasi kespiritu? (b) Ndamupi Yesu lieca eye muẽle ku vakuavo, kuenda lekuatiso lipi lia velapo kokuavo?
10 Nda tua talavaya lonjongole yocili kupange woku longisa omanu oco va linge olondonge, ‘tu soleka ukuasi kilu,’ ndomo Yesu a ci popia. Eci ci tu nenela esanju lia piãla lioku tambula. Nda tu eca ocali, tuka lingavo olohuasi. Yesu lekolelo liocili wa talavaya la Yehova vokuenda kuolohuluwa vianyamo ka a tendiwa. Sokolola handi ovokuasi eye a selekele kilu! Pole, Yesu lalimue eteke a sandiliyile olonjongole viaye muẽle. Upostolo Paulu wa soneha hati: “[Yesu] wa liecela akandu etu ha tu popela kotembo yilo yivi, ndeci ca panga Suku Isietu.” (Va Galatia 1:4) Yesu ka pesilile lika otembo yaye kupange woku kunda, pole eye wa ecavo omuenyo waye ndocisembi oco omanu vakuavo va kuate epuluvi lioku seleka ukuasi wavo kilu.
11. Momo lie ombanjaile yespiritu ya velelapo okuti ombanjaile yovikuata yi sule?
11 Poku longisa omanu eci catiamẽla ku Suku, tu va kuatisa oku limbuka ndomo va pondolavo oku seleka ovokuasi espiritu okuti ka a nyõleha. Ombanjaile yipi hẽ ove o pondola oku eca? Ndeci, nda ove wa eca kekamba liove ololosio, ekãlu, ale onjo yimue ya tila calua, ekamba liaco lika eca olopandu kuenda lika sanjuka cocili, kuenda ove oka sanjukavo calua omo lieci wo wavela. Pole, ombanjaile yaco yika kala hẽ ndati vokuenda kueci ci soka 20 kanyamo? Noke eci papita 200 kanyamo? Ale vokuenda kueci ci soka 2000 kanyamo? Puãi, nda ove wa kuatisa omunu umue oku vumba Yehova, eye o pondola okupa esilivilo kombanjaile eyi votembo yenda ño hu.
Sandiliya Omanu Vana va Yongola Oku Lilongisa Ocili
12. Ndamupi vamue va siata oku lieca kupange woku kuatisa vakuavo kespiritu?
12 Oco va kuate onepa kesanju lioku eca ovina viespiritu, omanu va Yehova va siata oku enda toke kolonepa kupãla violuali. Olohulukãi vialua via vamanji okuti va siata oku siapo olonjo viavo kuenda epata liavo oco va litumbike kupange wumisionariu kolofeka kuna okuti, ci sukila oku lilongisa elimi limue likuavo kuenda ovituwa viomanu vaco. Vamue va siata oku enda kovambo o vofeka yavo muẽle kuna okuti, kuli ekambo lialua liakundi Vusoma. Handi vali, vakuavo va siata oku lilongisa elimi lio kofeka yimue yikuavo, oco va sange epuluvi lioku vangula lomanu vana va ilukila vofeka yavo. Ndeci, ulume umue lukãi waye va sangiwa kolupale luo Nova Jersey, ko Estados Unidos yo Amerika, eci omãla vavo vavali valume va linga akuenje, noke, veya oku litumbika kupange wombetele kombala Yolombangi via Yehova. Ovo veya oku litumbika kupange wakundi votembo yosi, kuenda va lilongisa elimi lio kofeka yo China. Vokuenda kuanyamo atatu, ovo va kala ale loku endisa eci ci soka 74 kalilongiso Embimbiliya lomanu va vangula elimi lio ko China, va kala oku lilongisila kosikola yimue yi kasi posongo yovo. Ove hẽ o kuete epondolo lioku vokiya kupange wove woku kunda oco esanju liove li livokiye omo lioku longisa omanu oco va linge olondonge?
13. Nye ove o pondola oku linga nda o yongola okuti upange wove woku kunda wima apako?
13 Pamue ove o yongola oku kuata omanu umue o longisa Embimbiliya, pole, ku kuete epondolo liaco lioku ci linga. Kolofeka vimue, ka ca lelukile oku sanga omanu va lekisa onjongole. Pamue omanu ove o lisanga lavo ka va lekisa onjongole layimue Kembimbiliya. Nda o kasi ou pita locitangi caco, ci tava okuti volohutililo viove o kongelamo ondaka yaco, loku kuliha okuti, Yehova la Yesu Kristu upange waco owo va u kapako calua, kuenda vaka ku songuila komunu umue o kasi ndomeme. Kuama olonumbi via vamanji vo vekongelo liove, vana okuti va loñoloha calua kupange woku kunda kuenda kupange wavo kua siata oku imila apako. Upa esilivilo kelongiso kuenda kolonumbi viosi vieciwa kolohongele vietu Tuakristão. Upa esilivilo kelungulo lieciwa lolomitavaso vi nyula akongelo vimbo, kuenda kuamavo ongangu yiwa yakãi vavo. Cavelapo vali handi ceci okuti, lalimue eteke kuka sime oku liwekapo. Ulume umue ukualondunge wa soneha hati: “Omẽle imba ombuto yove, oñolosi eka ka li ka lembuke; momo kua kulihile nda ombuto ye nda ombuto ye yima ciwa.” (Ukundi 11:6) Handi vali, ivalukavo alume vakuekolelo ndeci, Noha kuenda Yeremiya. Ndaño okuti, valua kava lekisile onjongole kueci ovo va kala loku kunda, kua kala vamue va lekisa onjongole, kuenje upange wavo woku kunda wa enda muẽle ciwa. Ca velapo vali ceci okuti, upange wavo wa sanjuisa Yehova.
Likolisila Oku Linga Eci o Tẽla
14. Ndamupi Yehova a tenda vana okuti kukila koku linga upange waye?
14 Ci tava okuti ekalo liove ka li ku ecelela oku kuata onepa yalua kupange owu woku kunda ndeci ove o yongola oku linga. Ndeci, oku kuka, pamue ku pondola oku tepulula eci ove o yongola oku linga kupange wa Yehova. Pole, ivaluka olondaka viulume ukualondunge wa soneha hati: “Owele ocifuto culamba ca sangiwa vomuenyo wesunga.” (Olosapo 16:31) Nda tua pesila ongusu yetu kupange wa Yehova, eye o sanjuka calua. Handi vali Embimbiliya li lombolola okuti: “toke kokukuka kuene haime. Ndu wambati toke kowele wene. Ame nda lulika, haime nikula; Ame ngambata haime mopela.” (Isaya 46:4) Isietu wokilu ukuacisola wa likuminya oku tata loku kuatisa vana vo kolela.
15. Ove hẽ o tava okuti, ekalo liove Yehova liolomboloka ciwa? Momo lie?
15 Pamue ove o kasi oku liyaka lovitangi vioku vela, vioku suvukiwa lukãi ale lulume wove ka lilongisa Embimbiliya, ale o kasi oku liyaka locikele ca tila coku tata epata, ale pamue lovitangi vimue vikuavo. Yehova wa kuliha ciwa ekalo lietu, kuenda o tu sole calua omo lioku likolisilako kuetu loku u vumba. Eci ci kapiwako muẽle, ndaño okuti eci tua siata oku linga ci mõleha soketi citito oku cisokisa leci vakuetu va siata oku linga. (Va Galatia 6:4) Yehova wa kuliha okuti, etu ka tua lipuile, pole, eye o lekisa esunguluko kueci a kevelela kokuetu. (Osamo 147:11) Nda tua likolisilako loku linga cosi tu pondola tuka kuata ekolelo liokuti tu soliwe calua la Suku, kuenda eye kaka ivalako ovopange etu tua linga lekolelo.—Luka 21:1–4.
16. Ndamupi ekongelo liosi li pondola oku kuata onepa koku longisa omanu oco va linge olondonge?
16 Ivalukavo okuti, upange woku longisa omanu oco va linge olondonge, upange umue u lingiwa loku likolisilako kua vosi. Lomue o tẽla oku longisa likaliaye omunu toke eci a linga ondonge, ndeci etosi limosi liombela ka li pondola oku tapela ocikula. Ocili okuti, Ombangi yimosi lika ya Yehova oyo yi pondola oku sanga omunu umue o lekisa onjongole kuenda oku u longisa Embimbiliya. Pole, eci omunu waco a fetika oku endaenda Vonjango Yusoma, o kuatisiwa lekongelo liosi ale eye muẽle o limbuka ocili. Ukamba u lekisiwa la vamanji vosi u ko vetiya oku lekisa ovituwa viespiritu lia Suku. (1 Va Korindo 14:24, 25) Eci omãla vetu lamalẽhe va eca atambululo a vetiya, ci lekisa komunu waco wa fetika ndopo okuti amalẽhe vetu ka va kasi ndamalẽhe vo voluali. Vana va vela, lava va hongua, kuenda vana va kuka va longisa ku vana va fetika ndopo okuti ci sukila oku pandikisa. Nda tuakulu, nda tuamalẽhe, vosi yetu tu kuetu upange umue u kuete esilivilo liocili koku kuatisa ava va fetika ndopo osimbu ocisola cavo kocili Cembimbiliya ci livokiya kuenda osimbu vamamako loku loña kepapatiso. Olowola viosi tu pesila kupange woku kunda, apasu tu linga, ombangulo tu vangula la umue wa lekisa onjongole Vonjango Yusoma, cosi eci ci kasi ño soketi ka ci kuete esilivilo, pole, cosi muẽle catiamẽla kupange wavelapo u kasi oku tẽlisiwa la Yehova.
17, 18. (a) Kilu lioku litumbika kupange woku longisa omanu oco va linge olondonge, ndamupi vali tu pondola oku kuata esanju li tunda koku eca? (b) Poku kuata esanju li tunda koku eca, ongangu yelie tu kasi oku kuama?
17 Ocili okuti, ndaño tua litumbika kupange wa velapo woku longisa omanu oco va linge olondonge, etu Tuakristão tu kuatavo esanju lioku eca volonepa viñi viñi vikuavo. Tu pondola oku eca olombongo vioku kuatisa kefendelo lialipua kuenda vioku kuatisa vana va suka. (Luka 16:9; 1 Va Korindo 16:1, 2) Tu pondolavo oku sandiliya epuluvi lioku poka vakuetu. (Va Roma 12:13) Tu pondola oku likolisilako loku ‘linga eci ciwa komanu vosi, ca piãla vali enene vakuetu tu kasi lavo vetavo limuamue.’ (Va Galatia 6:10) Kuenda, lonjila yimue ya leluka pole yi kuete esilivilo, tu pondola oku eca ku vakuetu ndeci oku tumisa ukanda umue ku vakuetu, oku vangula lavo vo telefone, oku va iha yimue ombanjaile, loku va iha cimue ci va kuatisa, kuenda oku va kolisa lolondaka vimue viwa.
18 Poku eca, tu lekisa okuti tu kuãi ongangu ya Isietu wokilu. Tu lekisavo ocisola cetu cumanji, okuti oco ondimbukiso yi limbukisa Akristão vocili. (Yoano 13:35) Oku ivaluka ovina evi, ku pondola oku tu kuatisa oku kuata esanju li tunda koku eca.
O Pondola Oku ci Lombolola?
• Ndamupi Yehova la Yesu va lekisa ongangu yiwa kueci catiamẽla koku eca ovina viespiritu?
• Ndamupi tu pondola oku vala ukamba wenda ño hu?
• Vipi hẽ olonjila tu pondola oku kuama oco upange wetu woku kunda wende ciwa?
• Ndamupi vamanji vosi vekongelo va pondola oku kuata onepa kesanju li tunda koku eca?
[Alitalatu kemela 27]
Eci omãla va tava kueci va longisiwa, olonjali viavo vi kuata esanju lia piãla
[Elitalatu kemela 29]
Tu pondola oku li vala ukamba wocili poku longisa omanu oco va linge olondonge
[Elitalatu kemela 30]
Yehova o tu tata eci tu kuka
[Elitalatu kemela 31]
Lonjila yimue ya leluka pole yikuete esilivilo, tu pondola oku kuata esanju li tunda koku eca