Apulilo Valingiwa Lavakuakutanga

Ulandu u sangiwa kelivulu lia Yeremiya 7:16 u lekisa hẽ okuti ka ci tava oku likutilililako Akristão vana va tundisiwa vekongelo omo lioku sina kuavo?

Eci Yehova a mãla oku vangula olondaka viaye viesombiso viatiamẽla komanu voko Yuda vana ka va kuatele ekolelo, wa sapuila Yeremiya hati: ‘Ove puãi kuka likutililile omanu ava, ku ka va lilile, ku ka va lombele, ndaño oku va livondelela kokuange, momo siu ku yevi ale.’—Yeremiya 7:16, NW.

Momo lie Yehova a handelekela Yeremiya oco kaka linge ohutililo yatiamẽla ku va Isareli? Momo ovo va lavisile calua Ocihandeleko caye. Kovaso omanu vosi, ovo va kala loku “iva loku ponda loku pekelisa loku lisila uvangi wuhembi kuenda oku timihila Baale insensu loku kuama olosuku vikuavo.” Omo liaco, Yehova wa sapuila omanu voko Yuda vana ka va kuatele ekolelo hati: “Ndu tundisi kokuange ndeci nda tundisile vakuẽle vosi okuti ombuto yosi ya Efarimi.” Ocili okuti, eci ocina cimue ka ca lelukile ku Yeremiya ale komunu ukuavo oku pinga ku Yehova vohutililo oco eye a litiukemo koku linga esombiso Liaye.—Yeremiya 7:9, 15.

Eli olio esunga lieci upostolo Yoano a sonehela eci catiamẽla kohutililo yi sesamẽla Suku. Omo liaco, eye wa lungula Akristão hati: “Nda tu pinga cimue ca sungulukila ocipango caye eye o tu yeva.” (1 Yoano 5:14) Handi vali, upostolo Yoano poku likutililako vakuavo wa linga hati: “Umue nda o lete manjaye o li loku linga ekandu ka li koki okufa, o pingilako kuenje Suku o muisila omuenyo ava ka va lingile ekandu li koka okufa. Kuli ekandu li koka okufa. Si popi siti, Olio co sesameli oku li kikutilila.” (1 Yoano 5:16) Handi vali, Yesu wa vangula eci catiamẽla kekandu li lingiwa locipango, okuti ‘ka likuete ongecelo.’—Mat. 12:31, 32.

Anga hẽ eci ci lomboloka okuti vosi vana va tundisiwa vekongelo Liakristão omo lioku sina kuavo, va linga akandu a “koka okuga”? Kuenda eci ci lomboloka hẽ okuti ka ci tava oku linga ohutililo yatiamẽla kokuavo? Sio, hacoko, momo olonjanja vimue akandu aco ka a koki okuga. Omo liaco, ka ca lelukile oku kuliha nda akandu aco a koka muẽle okufa. Soma Manase wa pita lulandu umue watiamẽla kondaka eyi. Eye wa tungile ovotala oku fendela olosuku viesanda, loku ecelako ovilumba viomãla vavo muẽle. Handi vali, wa lingainga eci catiamẽla kolondele kuenda oku kapa oviñumañuma vonembele ya Yehova. Omo liaco, Embimbiliya li sapula okuti, Manase kuenda omanu “va linga eviho lia piãla, lina liavakualofeka vana Yehova a nyolele kovaso a va Isareli li sule.” Omo liovina viaco evi vivi, Yehova weya oku yambula Manase, kuenje wambatiwa ndomandekua ko Bavulono.−2 Olosoma 21:1–9; 2 Asapulo 33:1–11.

Akandu a Manase hẽ a kala amue a kãla nda ana a koka oku fa? Ci lekaisa okuti hacoko, momo ulandu wamamako loku sapula eci catiamẽla kokuaye okuti: “Eci a kala vohali, wa likuambela ku Yehova Suku yaye. Wa liketisila calua kovaso a Suku yolosekulu viaye. Wa likutilila kokuaye kuenje Suku wa tava koku likuambela kuaye. Wa yeva elombelo liaye kuenje wo nena vali vo Yerusalãi vusoma waye. Oco Manase wa kuliha okuti Yehova eye Suku.”−2 Asapulo 33:12, 13.

Omo liaco, ka ca sungulukile oku yayulako loku sima okuti, nda omunu umue wa tundisiwa vekongelo, ci lekisa okuti wa linga ekandu li tuala kolofa. Ci tava okuti pamue omunu waco o sukila otembo yalua oco utima waye u pongoloke. Esunga lieci omunu a tundisiwila vekongelo, lieli okuti utima waye utiuka kolondunge oco a likekembele akandu aye okuti cu kuatisa oku pongoloka.

Omo okuti omunu wa tundisiwa vekongelo, apongoloko eye a linga, ci tava okuti a limbukiwa tete lomanu vana va kasi laye ocipepi ndeci, ukuanjo yaye ale omanu vakuavo vakuepata. Omanu vana va lete apongoloko aco va pondola oku limbuka okuti omunu waco ka lingile ekandu li koka oku fa. Omo liaco, ci tava okuti vakuepata va vetiyiwa oku linga ohutililo yatiamẽla komunu waco oco a kuatisiwe Londaka ya Suku, kuenda oco Yehova o tetele akandu aye okuti o linga ocipango Caye.−Osamo 44:21; Ukundi 12:14.

Pamue vamanji vana va kuete ocikele coku limbuka omunu o lekisa ovituwa vioku likekembela, va limbuka muẽle okuti omunu waco wa pongoloka. Pole, pamue eci hacoko ci letiwe lomanu vosi vekongelo. Kuenje, ci tava okuti ovo pamue va sumua calua okuti ci va lingila ocilondokua kespiritu eci va yeva omunu umue o lingila powiñi ohutililo yatiamẽla kondigaivi yaco. Omo liaco, vamanji vosi va yongola oku lingilako ohutililo u watundisiwa vekongelo va kuete oku yi lingila pokolika. Pole, ovina vikuavo vi kala peka liakulu vekongelo va kuete ocikele caco pokati kavamanji.

[Elitalatu kemela 30]

Akandu a kãla a Manase a eceliwa la Yehova eci eye a likekembela lumbombe kovaso yaye

[Ono Yofoto kemela 29]

Reproduced from Illustrierte Pracht-Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s