Kuata Ukamba la Suku

“Eye wa Tulumũla Ocipala ca Yehova”

ULUME umue wa kulila vocili, pole, noke wa tinduka, wa popia hati: “Nda kala ndu okuti si kuete esilivilo.” Eci a fetika oku linga apongoloko komuenyo waye, wa kuatele atatahãi nda Suku wa laikele oku ecela. Pole, ulume waco wa lingile ekandu kuenda wa likekembela, wa sanga elavoko kulandu Wembimbiliya watiamẽla ku Manase, u sangiwa kelivulu 2 Asapulo 33:1-17. Nda okuti wa liyevele ale ndoco omo liakandu wa linga kosimbu, o pondolavo oku lembelekiwa lulandu wa li pita la Manase.

Manasse wa kulila vepata limue li vumba Suku. Isiaye Esekiya wa kala osoma yimue wa kũlĩhĩwile calua pokati kolosoma vio ko Yuda. Manase wa citiwa noke lianyamo atatu tunde eci Suku a vokiya anyamo omuenyo a isiaye. (2 Olosoma 20:1-11) Ka kuli atatahãi okuti, Esekiya wa tendele omõlaye ndesumũlũho lia tunda kohenda ya Suku kuenje wa enda oku likolisilako oku u longisa oku sola efendelo liocili. Pole. halonjanjaviosiko omãla va kuama ongangu yolonjali viavo. Eci oco ca pita la Manase.

Manase wa kuatele 12 kanyamo eci isiaye a fa. Ci sumuisa calua okuti, “eye wa linga eci cĩvi kovaso a Yehova.” (Ocinimbu 1, 2) Anga hẽ osoma yaco umalẽhe, ya yapuisiwile lolondunguli vina ka via sumbilile efendelo liocili? Embimbiliya ka li ci popi. Pole, olio li popia okuti Manase wa pitĩla petosi lioku linga efendelo lioviteka kuenda ungangala. Eye wa tunga ovotala olosuku viesanda, wa yoka omãla vaye vondalu ndocilumba, wa kala ukuombanda kuenda wa tungavo ovotala vonjo ya Yehova ko Yerusalãi. Manase okuti wa kala ukuesino, wa likala oku pokola kalungulo a Yehova, o Suku yina ya lingile ocikomo oco eye a citiwe.​—Ocinimbu 3-10.

Oku sulako, Yehova wa ecelela okuti Manase ambatiwa kumandekua ko Bavulono. Kumandekua waco, eye wa kuata epuluvi lioku sokolola kovina viosi a lingile. Anga hẽ eye wa sokolola okuti oviteka viaye ka vi kuete unene kuenda omuenyo, ka via tẽlele oku u teyuila? Eye wa ivaluka hẽ ovina isiaye ulume una okuti wa enda oku sumbila Suku, o longisa eci a kala omõla? Pole, Manase wa linga apongoloko. Ulandu u popia hati: Eye, “wa livondela ku Yehova Suku yaye oco o lekise ohenda . . . Eye wamamako oku likutilila ku Suku.”a (Ocinimbu 12, 13) Pole, anga hẽ ulume umue wa lingile akandu anene Suku wa lakele muẽle oku ecela?

Yehova wa vetiyiwa omo okuti Manase wa likekembela lutima wosi. Suku wa yevelela apingilo aye ohenda “kuenje wo tiuwiya kuviali waye ko Yerusalãi.” (Ocinimbu 13) Omo liaco, Manase oco a lekise okuti wa likekembela, wa likolisilako oku siapo ovina vĩvi a lingaile poku kundula efendelo lioviteka vina a tungile kuviali waye kuenda wa vetiya omanu oku ‘vumba Yehova.’​—Ocinimbu 15-17.

Nda o sima okuti ku sesamẽla oku tambula ongecelo ya Suku omo liakandu wa linga kosimbu, ulandu wa Manase u pondola oku ku sanjuisa. Ulandu waco u panga onepa Kondaka ya Suku. (Va Roma 15:4) Ulandu owu, u lekisa okuti Yehova o yongola okuti tu kũlĩha okuti eye “wa likapelako oku ecela.” (Olosamo 86:5) Ca velapo ekalo liovutima womunu wa linga ekandu, okuti ekandu liaco halioko. Omunu wa linga ekandu okuti o likutilila lutima wosi kuenda o likolisilako oco a linge eci ca sunguluka, o pondola oku ‘tulumũla ocipala ca Yehova’ ndeci Manase a linga.​—Isaya 1:18; 55:6, 7.

Onumbi Yoku Tanga Embimbiliya Kosãi ya Susu:

◼ 2 Asapulo 29–Esera 10

[Etosi pombuelo yemẽla]