Elembeleko Kotembo Yohali
ASAPULO a siata oku eciwa kotembo yilo ka aci lalimue elembeleko. Umue usonehi wa popia hati: “Kua siata oku kala ovolandu a sumuisa calua okuti olonjanja vialua omunu ka kuata utõi woku tala asapulo kowola yepandu.” Oluali lueyuka to ovoyaki, oku pondiwa kuomanu, ohali, ungangala kuenda ovoveyi ana a siata oku tu sanga okuti pamue lalimue eteke tua a kuatele.
Embimbiliya lia lomboluile ale eci catiamẽla kovitangi viaco evi. Eci Yesu a lombolola eci catiamẽla kotembo yetu, eye wa popia okuti kuka kala ovoyaki alua, ovoveyi, ekambo liokulia kuenda ovilemawe. (Luka 21:10, 11) Cimuamue haico upostolo Paulu a soneha eci a popia hati: “kuiya otembo yohali” okuti omanu vaka kala vakualonyeño, vakuakusola olombongo kuenda ka vaka sola oku linga eci ciwa. Eye wa tukula otembo yaco hati, ‘oloneke via sulako.’—2 Timoteo 3:1-5.
Loku kũlĩhĩsa ekalo lioluali, ci tava oku limbuka okuti asapulo a lekisa eci Embimbiliya lia vangula ale osimbu. Pole, alomboluilo atiamẽla kovitangi vi kasi oku pita voluali a kuete esulilo limosi. Embimbiliya li tu ĩha elomboloko limue okuti asapulo año ka a pondola oku ci linga. Lekuatiso Liondaka ya Suku ka tu pondola lika oku kuata elomboloko lieci ku kasilili ovoveyi alua, pole tu pondolavo oku kuata elomboloko lieci cika pita kotembo yokovaso.
Ndomo Suku a Tenda Ovoveyi
Embimbiliya li lombolola ndomo Suku a tenda ovina viosi vi sumuisa okuti vi kasi oku pita koloneke vietu vilo. Ndaño okuti Suku wa limbukile ale tete okuti kuka kala ovitangi viaco, eci ka ci lomboloka okuti eye ecelela ovitangi viaco otembo yosi. Upostolo Yoano wa soneha okuti, “Suku eye ocisola.” (1 Yoano 4:8) Yehova o sole calua omanu kuenda eye wa suvuka ovina viosi vĩvi. Ca sunguluka kokuetu oku sandiliya elembeleko ku Suku momo eye uwa kuenda o kuete ohenda lomanu, haeye o kuete unene wa velapo woku mãlako ovoveyi osi voluali. Ukualosamo wa soneha ndoco: “[Osoma yokilu ya nõliwa la Suku yika] popela osuke eci yi vilikiya, ndaño ohukui lu ka kuete oñuatisi. O kuatela ohenda ohukui losuke. O popela ovimuenyo violosuke. O popela ovimuenyo viavio ku undiandia lo kungangala. Osonde yavio kokuaye yi kola.”—Osamo 72:12-14.
Anga hẽ ove o kuete ohenda lomanu vana va kasi oku tala ohali? Ci tava okuti oco o yevite. Oku kuata ohenda lomanu ocituwa cimue Suku a kapa vutima wetu omo okuti tua lulikiwa lesetahãlo liaye. (Efetikilo 1:26, 27) Omo liaco, tu pondola oku kolela okuti, Yehova ka kasi ndomunu una ka kuete ocikembe la vana va tala ohali. Omo okuti, Yesu wa kũlĩhĩle vali calua Yehova okuti omanu vosi ci sule, wa lombolola hati, Yehova o tu kuetele ocisola cimue ca velapo kuenda o tu kuetele ohenda yalua.—Mateo 10:29, 31.
Onjila Suku a kuama poku lulika ovina viosi vi kasi voluali, yi lekisa okuti eye o kuete ocisola lomanu. Yesu wa popia okuti Suku “o tundasaila ekumbi liaye kolondingaiwa lo kolondingaĩvi; kuenje o lokasaila ombela vakuesunga la vakuevĩho.” (Mateo 5:45) Upostolo Paulu wa sapuila omanu vo kofeka yo Lustra hati: “[Suku] ka la liweka oku eca olondimbukiso viu wimbila uvangi, momo wa lingainga ohenda. Wo wihi ombela ya tunda kilu, wo muisi ovovo elau, kuenje wa kutisa ovitima viene omo wo wihi okulia kuenda esanju.”—Ovilinga 14:17.
Helie wa Nena Ovoveyi?
Ci kuete esilivilo oku limbuka okuti upostolo Paulu wa sapuilavo omanu voko Lustra okuti: “Kovitumbulukila viosiahũlu [Suku] wa tava okuti olofeka viosi vi endela volonjila viavo muẽle.” Omo liaco, olofeka ale omanu vaco muẽle va kuatele onepa yalua yekandu lieci va sangela ovitangi vina ovo va kuete cilo komuenyo wavo. Suku hayeko o kuete ekandu.—Ovilinga 14:16.
Momo lie Yehova a ecelela okuti ku kala ovina vĩvi? Anga hẽ eye eteke limue oka linga cimue catiamẽla koku potolola ovitangi viaco? Etambululo liapulilo alo a sangiwa lika Vondaka ya Suku. Vetambululo liaco mua kongela omunu umue okuti ka kuete etimba, eye espiritu kuenda mua kongelavo epulilo eye a linga liatiamẽla kuviali wespiritu ka u letiwe.
[Elitalatu kemẽla 3]
Upper left, Croatia: UN PHOTO 159208/S. Whitehouse; starving child: UN PHOTO 146150 BY O. MONSEN
[Elitalatu kemẽla 4]
Omanu va kuete ohenda la vakuavo. Oco hẽ Suku ka kuete ocikembe lohali yomanu?