A Suku Momo Lie wa Ecelela Ocitangi Eci?’
RICARDO handi ivaluka okuti wa tumãla lukãi waye Maria vohondo yoku talamẽla ndotolo.a Lomue pokati kavo wa kuata utõi woku tanga opapelo ya eca ndotolo yina yi lekisa uveyi ukãi waye Maria a kuete. Noke, Ricardo wa likolisilako oku yulula opapelo yaco loku vanjamo lonjanga yalua, oco a kũlĩhe ño onduko yuveyi waco. Ovo va limbuka onduko yuveyi okuti, o “cancer,” kuenje kavali kavo va fetika oku lila osimbu va kala oku sokolola cosi ci lomboloka onduko yuveyi waco.
Ricardo ivaluka okuti: “Ndotolo wa kala omunu umue ukuacikembe, momo ndaño okuti eye wa limbukile uveyi waco okuti wa kala ocitangi cimue ci koka ohele yalua, pole eye wamamako oku tu sapuila okuti, ‘tu sukila oku kolela ku Suku.’”
Osimbu handi ndotolo ka fetikile oku sakula Maria lonjila yimue yi tukuiwa hati, radioterapia, eye wa limbuka okuti omãhi yondio ya Maria ya fetika oku lituñunya lika liayo. Kuenje loku kũlĩhĩsa ciwa, ndotolo wa limbuka okuti uveyi wa Maria wa lisanduila ale toke kowoño. Noke yoku u tata eci ci soka osemana, ndotolo wa liwekapo oku linga o radioterapia. Uveyi wa Maria weya oku livokiya, kuenje noke yolosãi vivali eye wa fa. Ricardo o lombolola okuti: “Nda pandula lika omo okuti olohali viukãi wange, via pua, pole nda siata oku wivaluka calua lonjongole yokuti omuenyo wange nda wa pitililevo kesulilo. Olonjanja vialua nda siata oku lisiõsũila Suku okuti: ‘Momo lie wa ecelela okuti ocitangi eci ci pita lame?’ ”
Eci tu Sangiwa Lovitangi Komuenyo Wetu tu Kuata Apulilo Alua
Ndeci ca pita la Ricardo, omanu valua voluali luosi va siatavo oku liyaka lovitangi vi nena olohali viñi viñi. Olonjanja vialua omanu vana va siata oku tala ohali yalua, havoko va kuete ekandu liovitangi viaco. Ivaluka omanu vana va sumua omo liovitangi vialua vi yilila kovoyaki ana a siata oku fukĩlisa omanu. Handi vali, sokolola evalo liakãi vakahandangala vana va siata oku kuatiwa lalume oco va lipekele lavo, alume va lipekela lomãla, ovitangi viatiamẽla kungangala u lingiwila pokati ka vakuepata volonjo kuenda akandu akuavo a siata oku lingiwa lomanu. Vokuenda kuesapulo lioluali kua siata oku limbukiwa okuti ka kuli layimue ongave yoku linga ungangala kuenda evalo li tunda kalume lakãi vana va siata oku liyaka pokati. (Ukundi 4:1-3) Handi vali, kuli omanu va sumua calua okuti va kasi oku liyaka lovitangi ka vi kokiwa lomanu ale ovoveyi ana atiamẽla kovisimĩlo, kolondunge kuenda ketimba. Omo liaco, ka ci komohĩsa omanu valua oku linga epulilo liokuti: “Momo lie Suku a ecelela ovitangi viaco?”
Ndaño muẽle omanu vana vakuetavo, lalimue eteke ca lelukile oku liyaka lovitangi. Ci tava okuti ove o li pulavo esunga lieci Suku ukuacisola haeye ukuonene wosi a ecelela ohali komanu. Oku sanga etambululo liwa hailio liocili kepulilo eli, ci kuete esilivilo liocili kekalo lietu liwa kuenda kukamba wetu la Suku. Embimbiliya lieca etambululo liaco. Omo liaco, konomuisa ciwa lutate eci Embimbiliya li lombolola catiamẽla kepulilo liulandu wocipama ci kuãimo.
[Atosi pombuelo yamẽla]
a Olonduko via pongoluiwa.
[Elitalatu kemẽla 3]
‘Ndotolo wamamako oku tu sapuila okuti, ‘tu sukila oku kolela ku Suku’